1, 2. ¿Mávapepa Jesús oiporu omeʼẽ hag̃ua ñandéve hiʼupy hiʼoraitépe koʼã tiémpope, ha mbaʼérepa tekotevẽterei jahechakuaa upéva?

PETEĨ ermána ohai peteĩ kárta pe séde mundiálpe ha heʼi: “Che ermanokuéra, hetaiterei vésema ningo osẽ umi artíkulo ou porãitereíva chéve, ha hiʼarive og̃uahẽ pe aikotevẽve jave”. ¿Reñeñandúmapa nde avei ko ermánaicha? Oiméne heta oĩ ñande apytépe oñeñandúva péicha, péro ndajahecharamói vaʼerã upéva.

² Jesús, pe omoakãva kongregasión, omeʼẽ ñandéve hiʼupy hiʼoraitépe opromete haguéicha. ¿Mávapepa oiporu upearã? Omombeʼúrõ guare mbaʼe mbaʼépa oikóta haʼe oĩ vove, Jesús heʼi ojevaletaha “pe tembiguái jeroviaha ha iñarandúva” rehe omeʼẽ hag̃ua “hiʼupy hiʼoraitépe” umi ótro hembiguáipe (elee Mateo 24:45-47). * Jesús oiporu ko tembiguáipe omombarete hag̃ua idisipulokuéra jerovia koʼã ára pahápe. Upévare, ñamombarete hag̃ua ñande jerovia ha ñaime porã hag̃ua Jehová ndive, tekotevẽterei jaikuaa mávapa añetehápe ko tembiguái (Mat. 4:4; Juan 17:3).

3. ¿Mbaʼépa ojeʼe vaʼekue ñane puvlikasionkuérape pe tembiguái jeroviaháre?

³ Upéicharõ, ¿mbaʼéichapa ñantende vaʼerã pe ehémplo oñeʼẽva pe tembiguái jeroviaha ha iñarandúvare? Ymave ñane puvlikasionkuéra heʼi vaʼekue Pentekostés áño 33-pe, Jesús omoĩ hague pe tembiguái jeroviaha poguýpe ambue tembiguaikuérape. Avei jaguerovia vaʼekue pe tembiguái haʼeha entéro umi unhído oikóva ko yvy ape ári año 33 guive. Ñapensa kuri umi ótro tembiguái haʼeha káda uno umi unhído, ha 1919-pe Jesús omoĩha pe tembiguái jeroviaha poguýpe “opa mbaʼe orekóva”, térã opa mbaʼe oiporúva ko yvy ape ári pe Rréino rehehápe. Péro oñeñemboʼe ha oñehesaʼỹijo porã rire pe ehémplo Jesús omoĩ vaʼekue, ojehechakuaa tekotevẽha ñakambia ñantendéva pe tembiguái jeroviaha ha iñarandúvare (Prov. 4:18). Ñahesaʼỹijomína ko ehémplo ha jahecha mbaʼérepa  iñimportánte ñantende porã heʼíva upépe, tahaʼe jarekóramo esperánsa jahávo yvágape térã jaikóvo ko yvy ape ári.

4-6. ¿Mbaʼérepa ikatu jaʼe pe ehémplo oñeʼẽva pe tembiguái jeroviaháre oñepyrũha oñekumpli áño 1914 rire?

⁴ Umi mbaʼe Jesús heʼi vaʼekue omeʼẽ mboyve pe ehémplo oñeʼẽva pe tembiguái jeroviaháre, ohechauka upéva noñepyrũi hague oñekumpli Pentekostés áño 33-pe, síno koʼã ára pahápe. Jahechamína mbaʼéichapa la Biblia ñanepytyvõ ñantende porã hag̃ua upéva.

⁵ Ko ehémplo oĩ hína umi profesía Jesús omeʼẽ vaʼekue apytépe ñanepytyvõva ‘japilla hag̃ua [haʼe] oĩmaha, ha ko múndo ára pahaite oñemoag̃uimaha’ (Mat. 24:3, NM). Umi mbaʼe oĩva Mateo 24:4-22-pe oñekumpli mokõi hendáicha. Ñepyrũrã oñekumpli áño 33 guive áño 70 peve; upéi katu oñekumpli jey ñane tiémpope. ¿Heʼisépa upéva pe ehémplo oñeʼẽva tembiguái jeroviaháre oñekumplitaha avei mokõi hendáicha? Nahániri.

⁶ Mateo 24:29 guive Jesús oñeʼẽ vaʼekue umi mbaʼe oikótavare ñane tiémpope (elee Mateo 24:30, 42, 44). Oñeʼẽvo pe jehasa asy guasúre, Jesús heʼi yvyporakuéra ohechataha “pe Yvypóra Raʼy ouha umi arai ári”. Upéi omokyreʼỹvo opavave oikóvape umi ára pahápe oñatende porã hag̃ua, heʼi: “Ndapeikuaái hína mbaʼe díapa oúta pende Ruvicha [...], cháke peimoʼãʼỹve jave oúta pe Yvypóra Raʼy”. * Jesús oñeʼẽvo opa mbaʼe oikótavare umi ára pahápe, omombeʼu avei pe ehémplo oñeʼẽva tembiguái jeroviaháre. Upévare ikatu jaʼe Jesús heʼi vaʼekue pe tembiguáire oñekumpliha áño 1914 rire, oñepyrũvo umi ára paha. ¿Mbaʼérepa ikatu ñapensa upéicha?

7. ¿Mbaʼépa ojekuaase vaʼekue oñepyrũre pe kosécha tiémpo, ha mbaʼérepa?

⁷ Ñapensamína Jesús oporandu vaʼekuére: “Añetehápe, ¿mávapa hína pe tembiguái jeroviaha ha iñarandúva [...]?”. Síglo primérope natekotevẽi avave oñeporandu upéva. ¿Mbaʼérepa? Jahecha haguéicha pe artíkulo ohasa vaʼekuépe, umi apóstol ojapo milágro ha haʼekuéra rupive ambue disípulo ikatu avei ojapo. Upéicha ojekuaa porã Jehová oĩha hendivekuéra (Hech. 5:12). Upévare ndaipóri oñeporandúva mávapepa Jesús omoĩ oñangareko hag̃ua ijovechakuéra. Péro áño 1914-pe tuicha idiferénte pe situasión. Upe áñope oñepyrũ pe kosécha tiémpo. Og̃uahẽ sapyʼa pe tiémpo ojepeʼa hag̃ua pe ñana vai pe trígo apytégui (Mat. 13:36-43). Oñepyrũvo pe kosécha oĩ hetaiterei kristiáno japu heʼíva ijehe osegiha Jesúspe. Upévare heta oĩ oporandúva: “¿Mbaʼéichapa ojekuaáta mávapa añetehápe pe trígo, térã umi kristiáno unhído?”. Ohechaukaháicha pe ehémplo Jesús omeʼẽ vaʼekue, pe trígo térã umi kristiáno unhído, haʼe hína umi orresivíva pe hiʼupy omombaretéva ijerovia.

8. ¿Mbaʼérepa pe tembiguái jeroviahápe oĩ vaʼerã kristiáno unhído?

⁸ Pe tembiguái jeroviahápe ningo oĩ vaʼerã kristiáno unhído oikóva gueteri ko yvy ape ári. Koʼã kristiánope oñehenói “saserdotekuéra oservíva rréiramo” ha oñemanda chupekuéra: “‘Pemombeʼu oparupiete umi mbaʼe porã’ ojapo vaʼekue upe penerenóiva pytũmbýgui ha pendeguerúva imbaʼerendy ijojahaʼỹvape” (1 Ped. 2:9, NM). Upévare jaʼekuaa koʼã “saserdotekuéra oservíva rréiramo” omboʼeha pe añetegua opavave ermánope (Mal. 2:7; Rev. 12:17).

9. ¿Ikatúpa jaʼe opavavete unhído haʼeha pe tembiguái jeroviaha? Emyesakã.

⁹ ¿Ikatúpa jaʼe opavavete unhído oĩva ko yvy ape ári haʼeha pe tembiguái jeroviaha ha iñarandúva? Nahániri. Naentéroi unhído ombaʼapo omeʼẽ hag̃ua hiʼupy ermanokuéra oĩvape ko yvy tuichakuére. Pe trígo  apytépe oĩ kristiáno unhído oservíva siérvo ministeriál térã ansiánoramo. Haʼekuéra osẽ avei opredika ogahárupi, ombaʼapo meme ikongregasiónpe ha osegi umi konsého oúva pe séde mundiálgui. Péro koʼã unhído ndopreparái pe hiʼupy omombaretétava enterove ermáno jerovia. Avei umi unhído apytépe oĩ ermána hekomirĩva ni mbaʼevéicharõ noñehaʼãmoʼãiva ojapo ansianokuéra rembiapo kongregasiónpe (1 Cor. 11:3; 14:34).

10. ¿Mávapa pe tembiguái jeroviaha ha iñarandúva?

¹⁰ ¿Mávapa upéicharõ pe tembiguái jeroviaha ha iñarandúva? Ñanemanduʼa vaʼerã Jesús omongaru hague hetápe mbovymi rupive. Upéicha avei ko tembiguái jeroviahápe oĩ mbovymi kristiáno unhído ombaʼapo meméva oprepara ha omeʼẽ hag̃ua hiʼupy omombaretétava ermanokuéra jerovia Cristo oĩ aja. Koʼã ára pahápe, umi kristiáno unhído haʼéva pe tembiguái jeroviaha oservi oñondivepa pe séde mundiálpe ha oñehenói chupekuéra Kuérpo Governánte de los Testigos de Jehová. Péro ñanemanduʼa vaʼerã Jesús oñeʼẽ hague peteĩ tembiguái rehe añónte. Upévare pe Kuérpo Governánte odesidi opa mbaʼe oñondivepa haʼe rupi peteĩnte.

11, 12. a) ¿Mbaʼe mbaʼépa oñemoĩ pe tembiguái jeroviaha ha iñarandúva poguýpe? b) ¿Arakaʼépa Jesús omoĩ pe tembiguái jeroviaha poguýpe umi ótro tembiguaikuéra, ha mávapepa oiporavo?

¹¹ Pe ehémplo Jesús omoĩ vaʼekuépe ojehecha oñemoĩha pe tembiguái jeroviaha poguýpe mokõi mbaʼe: Primero, umi ótro tembiguaikuérape; ha segundo, opa mbaʼe orekóva Ijára. Pe ehémplo oñekumpli koʼã ára pahápe, upévare ikatu jaʼe oñemoĩha ipoguýpe koʼã mokõi mbaʼe Jesúsgui oiko rire Rréi 1914-pe.

¹² ¿Arakaʼépa Jesús omoĩ pe tembiguái jeroviaha poguýpe umi ótro tembiguaikuéra? Jaikuaa hag̃ua upéva jahecha jey vaʼerã mbaʼépa oiko vaʼekue oñepyrũrõ guare pe kosécha 1914-pe. Jahecha haguéicha, upe tiémpope oĩ vaʼekue heta grúpo heʼíva ijehe kristianoha. ¿Mávapepa ijapyteguikuéra Jesús oiporavóta oiko hag̃ua chuguikuéra pe tembiguái jeroviaha? Ko porandu oñembohovái Jehová ha Jesús ou rire ohecha mbaʼéichapa umi kristiáno omombaʼeguasu Ñandejárape. Upéva oiko vaʼekue 1914 guive oike pukumi peve 1919 (Mal. 3:1). * ¡Oiméne ovyʼaite  hikuái otopávo umi estudiánte de la Biblia ohayhuha Jehovápe ha omombaʼeha Iñeʼẽ! Añetehápe ningo koʼã kristiáno tekotevẽ okambia heta mbaʼépe, péro hekomirĩ hikuái ha oheja Jehová omopotĩ ha omoldea chupekuéra (Mal. 3:2-4). Umi Estudiánte de la Biblia haʼe vaʼekue pe trígo teete. Áño 1919-pe, umi unhído oñepyrũ jey rire ombaʼapo meme omombarete hag̃ua ermanokuéra jerovia, Jesús oiporavo ijapyteguikuéra unhído ikatupyrýva haʼe hag̃ua pe tembiguái jeroviaha ha iñarandúva, ha omoĩ ipoguýpe umi ótro tembiguaikuéra.

13. ¿Máva mávapa haʼe hína umi ótro tembiguaikuéra, ha mbaʼére jaʼe upéva?

¹³ ¿Mávapa umi ótro tembiguaikuéra? Haʼe hína enterovete oñevenefisiáva pe hiʼupy omeʼẽvagui tembiguái jeroviaha. Oñepyrũvo umi ára paha, umi ótro tembiguaikuéra haʼe vaʼekue kristiáno unhído memete. Péro upe rire umi ótro tembiguaikuéra apytépe oĩma avei pe aty guasu térã ambue ovechakuéra. Koʼã ambue ovechakuéra hetaiteve umi unhídogui, péro mokõivéva oĩ ‘peteĩ ovecha atýpente’ osegíva Crístope (Juan 10:16, NM). Tahaʼe umi unhídope térã ambue ovechakuérape, ideprovécho pe hiʼupy omeʼẽva itiempoitépe pe tembiguái jeroviaha. ¿Ha mbaʼépa ikatu jaʼe umi kristiánore oĩva pe Kuérpo Governántepe haʼéva pe tembiguái jeroviaha ha iñarandúva? Haʼekuéra avei omombarete vaʼerã ijerovia, upévare hekomirĩ hikuái ha ohechakuaa káda uno oĩha avei umi ótro tembiguaikuéra apytépe ambue kristianokuéraicha.

14. a) ¿Mbaʼe rresponsavilidápa oñemeʼẽ pe tembiguái jeroviahápe, ha mbaʼépa oike umíva apytépe? b) ¿Mbaʼe konséhopa Jesús omeʼẽ pe tembiguái jeroviaha ha iñarandúvape? (Ehecha pe rrekuádro “Pe tembiguái iñañáva heʼíramo...”.)

¹⁴ Jesús omeʼẽ tuicha rresponsavilida pe tembiguái jeroviaha ha iñarandúvape. Umi tembiguái, térã majordómo yma guare oreko vaʼekue ipoguýpe umi ótro tembiguái ombaʼapóva pe ijára rógape (Luc. 12:42). Péicha avei pe tembiguái jeroviaha ha iñarandúva oreko ipoguýpe opavave kristiáno oservíva Jehovápe. Oñemeʼẽ chupekuéra heta tembiapo, por ehémplo oñatende vaʼerã mbaʼéichapa ojeporu umi mbaʼeta orekóva Jehová organisasión, omotenonde vaʼerã pe predikasión, oprepara vaʼerã asambleakuéra, ojapo vaʼerã umi puvlikasión ermanokuéra oiporúva predikasiónpe, rreuniónpe ha ostudia hag̃ua haʼeñohápe. Enterove umi ótro tembiguaikuéra  odepende opa mbaʼe omeʼẽvare pe tembiguái jeroviaha ikatu hag̃uáicha omombarete ijerovia.

15, 16. ¿Arakaʼépa Jesús omoĩta pe tembiguái jeroviaha poguýpe opa mbaʼe orekóva?

¹⁵ ¿Arakaʼépa Jesús omoĩ pe tembiguái jeroviaha poguýpe “opa mbaʼe orekóva”? Haʼe heʼi: “¡Ovyʼaite upe tembiguái Ijára oúramo otopa chupe ojapoha upéicha! Añetehápe haʼe peẽme: Omoĩta ipoguýpe opa mbaʼe orekóva” (Mat. 24:46, 47, NM). Jahechaháicha, Jesús omoĩta pe tembiguái jeroviaha poguýpe opa mbaʼe orekóva ou rire ha ohecha pe tembiguái “ojapoha upéicha” térã omeʼẽha oikóvo hiʼupy opavave kristiánope. Upéicharõ, Jesús omoĩ pe tembiguái jeroviaha poguýpe umi ótro tembiguaikuéra, upéi ohasáta peteĩ tiémpo ikatu hag̃uáicha omoĩ avei ipoguýpe opa mbaʼe orekóva. ¿Arakaʼépa ha mbaʼéichapa omoĩta ipoguýpe opa mbaʼe orekóva? Ñambohovái hag̃ua ko porandu, jaikuaa vaʼerã arakaʼépa haʼe og̃uahẽta ha mbaʼépa hína umi mbaʼe orekóva.

¹⁶ ¿Arakaʼépa Jesús og̃uahẽ? Ñanemanduʼa vaʼerã umi téxto heʼíva Jesús ‘outaha’, oñeʼẽha pe tiémpo haʼe oútavare oporohusga hag̃ua ág̃a ko múndo aña oñehundíta vove (Mat. 24:30, 42, 44). * Upéicharõ, heʼiháicha pe ehémplo oñeʼẽva pe tembiguái jeroviaháre, Jesús oúta, térã og̃uahẽta pe jehasa asy guasu aja.

17. ¿Mbaʼépa oĩ umi mbaʼe Jesús orekóva apytépe?

¹⁷ ¿Mbaʼépa hína “opa mbaʼe orekóva” Jesús? Haʼe heʼívo opa mbaʼe, noñeʼẽi kuri umi mbaʼe orekóvare ko yvy ape árinte. Añetehápe, Jesús oreko tuicha autorida yvágape avei. Haʼe heʼi: “Opa mbaʼe oĩva yvágape ha yvy ape ári oñemoĩ che poguýpe” (Mat. 28:18, NM; Efes. 1:20-23).  Koʼág̃a avei umi mbaʼe orekóva apytépe oĩ pe goviérno haʼe oisãmbyhýva 1914 guive ha omoirũtahápe chupe opavave unhído (Rev. 11:15).

18. ¿Mbaʼérepa jaʼekuaa Jesús vyʼápe omoĩtaha pe tembiguái jeroviaha poguýpe opa mbaʼe orekóva?

¹⁸ ¿Mbaʼépa ikatu jaʼe ñahesaʼỹijo rire koʼã mbaʼe? Jesús ou vove oporohusga hag̃ua pe jehasa asy guasu aja, otopáta pe tembiguái jeroviaha omeʼẽ hague oikóvo itiempoitépe hiʼupy umi ótro tembiguaikuérape. Upémarõ haʼe vyʼápe omoĩta avei ipoguypekuéra opa mbaʼe orekóva. Upéva oikóta ág̃a umi unhído haʼéva tembiguái jeroviaha ha iñarandúva oho vove yvágape ha oiko chuguikuéra rréi Cristo ndive.

19. ¿Ikatúpa jaʼe pe prémio ohupytýva pe tembiguái jeroviaha tuichaveha umi ótro unhído ohupytývagui? Emyesakã.

 ¹⁹ ¿Ikatúpa jaʼe pe prémio ohupytýva pe tembiguái jeroviaha tuichaveha umi ótro unhído ohupytývagui? Nahániri. Ikatu ningo peteĩ tiémpope oñepromete mbovymímente peteĩ prémio, péro upe rire ambue orresivi avei pe prémio. Por ehémplo, ñapensami Jesús heʼi vaʼekuére umi 11 apóstol iñeʼẽrendúvape pe pyhare omano mboyve (elee Lucas 22:28-30). Haʼe opromete kuri chupekuéra peteĩ mbaʼe ijojahaʼỹva iñeʼẽrendu haguére. Haʼekuéra ikatúta ogoverna hendive yvágape. Péro tiémpo rire, Jesús ohechauka enterove umi 144.000 unhído oguapytaha trónope ha ogovernataha hendive (Rev. 1:1; 3:21). Péicha avei, heʼiháicha Mateo 24:47, haʼe opromete vaʼekue mbovymi kuimbaʼépe, umi unhído haʼéva pe tembiguái jeroviaha, omoĩtaha ipoguypekuéra opa mbaʼe orekóva. Péro añetehápe opavave umi 144.000 orekóta tuicha autorida yvágape (Rev. 20:4, 6).

20. ¿Maʼerãpa Jesús omoĩ pe tembiguái jeroviahápe, ha mbaʼépa ñande jajedesidi jajapo?

²⁰ Pe tembiguái jeroviaha ha iñarandúva rupive Jesús ojapo koʼág̃a ojapo haguéicha síglo primérope: oiporu mbovymíme omongaru hag̃ua hetápe. Omoĩ ko tembiguái jeroviahápe ikatu hag̃uáicha idisipulokuéra, tahaʼe unhído térã umi ambue ovechakuéra, ohupyty “hiʼoraitépe” umi mbaʼe omombaretéva ijerovia koʼã ára pahápe. Jahechaukákena jaagradeseha Jesús ojapóva ñañemoĩvo pe tembiguái jeroviaha ha iñarandúva poguýpe (Heb. 13:7, 17).