“Ki Mañi Luli Mutanga Ya Sepahala Ya Na Ni Kutwisiso?”

“Ki mañi luli mutanga ya sepahala ya na ni kutwisiso, yo Mulenaa hae a mu ketile ku babalela batanga ba hae?”—MAT. 24:45.

KANA MWA KONA KU FUMANA LIKALABO ZA LIPUZO ZE?

Ki mañi mutanga ya sepahala ya na ni kutwisiso?

Ki bo mañi batanga ba ba bulezwi mwa swanisezo ya Jesu, mi Jesu naa file lili mutanga ya sepahala buikalabelo bwa ku babalela batanga bao?

Kreste u ka fa lili mutanga ya sepahala buikalabelo bwa kuli a babalele liluwo la hae kaufela, mi liluwo la hae li kopanyelezañi?

1, 2. Jesu u itusisa mañi ku lu fepa kwa moya kacenu, mi ki kabakalañi ha lu swanela ku ziba mutanga yo?

KAIZELI yo muñwi naa ñolezi cwana mizwale ba ba sebeleza kwa ofisi ya luna ye tuna ya zamaiso: “Mizwale, ni itebuha hahulu kwa litaba ze mu ñolanga mwa lihatiso ka nako kaufela ili ze ni tusanga hahulu.” Kana ni mina mu kile mwa ikutwa cwalo? Buñata bwa luna lwa ikutwanga cwalo. Kana lwa swanela ku komoka haiba lu ikutwa cwalo? Batili.

² Bakeñisa kuli lu amuhelanga lico za kwa moya ka nako ye lu li tokwanga luli, ki bupaki bwa kuli Jesu, yena Toho ya puteho, u taleleza sepiso ya hae ya ku lu fepa kwa moya. Jesu u itusisa bo mañi ku lu fa lico za kwa moya? Jesu ha naa bulelela balutiwa ba hae sisupo sa ku ba teñi kwa hae, naa bulezi kuli naa ka itusisa “mutanga ya sepahala ya na ni kutwisiso” ku fa batanga ba hae ‘lico ka nako ye swanela.’ * (Mu bale Mateu 24:45-47.) Mwa nako ye ya mafelelezo, Jesu u fepa balateleli ba hae ba niti ka ku itusisa mutanga ya sepahala yo. Ki kwa butokwa hahulu ku luna kuli lu zibe kuli mutanga ya sepahala yo ki mañi. Bulikani bwa luna ni Mulimu bu tiiswa ki lico za kwa moya za lu fa yena mutanga ya sepahala yo.—Mat. 4:4; Joa. 17:3.

3. Swanisezo ya mutanga ya sepahala i talusizwe cwañi mwa lihatiso za luna?

³ Swanisezo ya Jesu ye bulela za mutanga ya sepahala i talusañi? Mwa lilimo za kwamulaho, mwa lihatiso za luna ku bulezwi litaba ze latelela: Fa Pentekota ya silimo sa 33 C.E., Jesu naa ketile mutanga ya sepahala kuli a babalele batanga ba hae. Hape ku bulezwi kuli ku zwa feela ka silimo seo, mutanga yo u yemela sikwata kaufela sa Bakreste ba ba tozizwe ba ba pila fa lifasi ka nako ifi kamba ifi. Mi hape ne ku taluswanga kuli batanga ba Jesu ki Bakreste kaufela ba ba tozizwe. Ka silimo sa 1919, Jesu naa ketile mutanga ya sepahala kuli a ‘babalele liluwo la hae kaufela’ ili ku talusa lika kaufela za fa lifasi ze itusiswa mwa ku zwisezapili musebezi wa ku kutaza taba ye nde ya Mubuso. Kono hamulaho wa ku nyakisisa  ka tokomelo taba yeo, ku lapela ka za teñi, ni ku kengeyela hahulu, lu fitile fa ku lemuha kuli lu swanela ku cinca kutwisiso ya luna ya mo lu utwisiseza manzwi a naa bulezi Jesu ku amana ni mutanga ya sepahala ya na ni kutwisiso. (Liprov. 4:18) Ku si na taba kuli sepo ya luna ki ya ku pila kwa lihalimu kamba fa lifasi, ha lu nyakisiseñi swanisezo ye ama mutanga ya sepahala ni ku bona mo i kona ku lu tuseza.

SWANISEZO YA MUTANGA YA SEPAHALA I TALELEZWA LILI?

4-6. Ki kabakalañi ha lu kona ku bulela kuli swanisezo ya Jesu ya mutanga ya sepahala i kalile feela ku talelezwa hamulaho wa silimo sa 1914?

⁴ Litimana ze ñwi za mwa kauhanyo 24 ya Mateu li bonisa kuli swanisezo ya mutanga ya sepahala ya na ni kutwisiso ne i si ka talelezwa fa Pentekota ya silimo sa 33 C.E., kono i talelelizwe mwa nako ye ya maungulelo. Ha lu nyakisiseñi mwa lu tuseza Mañolo ku utwisisa hande taba yeo.

⁵ Swanisezo ya mutanga ya sepahala ki ye ñwi ya bupolofita bwa Jesu bo bu bonisa sisupo sa ku ba teñi kwa hae mwa mazazi a maungulelo. (Mat. 24:3) Kalulo ya pili ya bupolofita bo, ye ñozwi kwa Mateu 24:4-22, i talelezwa habeli. Ze ñozwi mwa kalulo ya pili ya bupolofita bo, ne li talelelizwe lwa pili ku zwa ka 33 C.E. ku isa ka 70 C.E., mi li talelezwa lwa bubeli mwa linako za luna. Kana seo si talusa kuli za naa bulezi Jesu ka za mutanga ya sepahala ni zona li ka talelezwa habeli? Batili.

⁶ Ku kalisa feela ka manzwi a kwa Mateu 24:29, Jesu sihulu u bulela za lika ze ka ezahala mwa nako ya luna. (Mu bale Mateu 24:30, 42, 44.) Jesu ha naa bulela ze ka ezahala ka nako ya ñalelwa ye tuna, naa bulezi kuli batu “ba ka bona Mwanaa mutu ha taha fa malu a lihalimu.” Mi ha naa bulela ka za batu ba ba ka pila mwa mazazi a maungulelo, Jesu naa ize: “Ha mu zibi lizazi la taha Mulenaa mina” mi “Mwanaa mutu u taha ka nako ye mu sa hupuli ku ba yona.” * Jesu ha saa felize feela ku bulela ze ne ka ezahala mwa mazazi a maungulelo, a fa swanisezo ya mutanga ya sepahala. Kamukwaocwalo, kwa utwahala ku bulela kuli za naa bulezi Jesu ka za mutanga ya sepahala li kona ku talelezwa feela hamulaho wa ku kalisa kwa mazazi a maungulelo ka silimo sa 1914. Taba yeo luli ya utwahala. Ki kabakalañi ha lu bulela cwalo?

7. Ki puzo mañi ya butokwa ye ne buzizwe kwa makalelo a nako ya kutulo, mi ki kabakalañi?

⁷ Ha lu nyakisiseñi cwale puzo ye latelela: “Ki mañi luli mutanga ya sepahala ya na ni kutwisiso?” Mwa linako za baapositola, batu ne ba sa tokwi ku buza puzo yeo. Sina mo lu itutezi mwa taba ye felile, baapositola ne ba ezanga limakazo mi ne ba kona ku fa ba bañwi limpo za moya. Taba yeo ne i bonisa kuli baapositola ne li bona ba naa itusisa Mulimu. (Lik. 5:12) Kamukwaocwalo, ha ku na ya naa kona ku buza kuli ki mañi luli ya naa ketilwe ki Kreste kuli a pete musebezi wa ku etelela. Kono ze ne ezahezi mwa linako za baapositola li shutana hahulu ni ze ne ezahezi mwa silimo sa 1914. Nako ya kutulo ne i kalile mwa silimo seo. Nako ya ku kauhanya buloto kwa mufuka ne i fitile. (Mat. 13:36-43) Nako ya kutulo ha ne i kalile, ne ku na ni Bakreste ba buhata ba bañata ba ne ba ipapata ku ba balateleli ba Jesu ba niti. Kamukwaocwalo, puzo ya butokwa ne li ya kuli: Buloto, bona Bakreste ba ba tozizwe, ne bu ka zibiwa cwañi? Swanisezo ya mutanga ya sepahala ne i alabile puzo yeo. Balateleli ba Kreste ba ba tozizwe ki bona ba ne ba ka fumana lico za kwa moya ze ne ba tokwa.

KI MAÑI MUTANGA YA SEPAHALA YA NA NI KUTWISISO?

8. Ki kabakalañi ha ku li ko ku swanela kuli ba ba li mutanga ya sepahala ba be Bakreste ba ba tozizwe?

⁸ Batu ba ba li mutanga ya sepahala ba swanela ku ba Bakreste ba ba tozizwe. Bakreste bao ba bizwa kuli ki bona “buprisita bwa silena” mi ba ketilwe kuli ba kutaze ku ba bañwi litaba ze nde za Mulimu. (1 Pit. 2:9) Kwa utwahala ku bulela kuli Bakreste bao ki bona ba ne ba ka luta mizwale ba bona niti.—Mala. 2:7; Sin. 12:17.

9. Kana ki Bakreste kaufela ba ba tozizwe ba ba li mutanga ya sepahala? Mu taluse.

 ⁹ Kana ki Bakreste kaufela ba ba tozizwe ba ba li mutanga ya sepahala? Batili. Haki Bakreste kaufela ba ba tozizwe ba ba fa lico za kwa moya kwa mizwale ba bona ba ba mwa lifasi kaufela. Ki niti kuli Bakreste ba bañwi ba ba tozizwe ki likombwa za puteho kamba ki baana-bahulu mwa puteho. Mizwale bao ba kutazanga fa ndu ni ndu ni ku luta mwa liputeho za bona, mi hape ba swalisana ka busepahali ni liketelelo ze lu fiwanga ku zwelela kwa ofisi ye tuna ya zamaiso. Kono mizwale bao ha ba fi lico za kwa moya kwa mizwale ba bona ba ba mwa lifasi kaufela. Mi mwahalaa Bakreste ba ba tozizwe, ku na ni likaizeli ba ba ikokobeza ba ba sa nahanangi nihaiba hanyinyani za ku ba baluti mwa puteho.—1 Makor. 11:3; 14:34.

10. Ki mañi mutanga ya sepahala ya na ni kutwisiso?

¹⁰ Kamukwaocwalo, ki mañi mutanga ya sepahala ya na ni kutwisiso? Sina Jesu mwa naa fepezi batu ba bañata mwa linako za baapositola ka ku itusisa batu ba sikai, mutanga ya sepahala ni yena ki sikwatanyana sa mizwale ba ba tozizwe ba ba lukisa ni ku fa lico za kwa moya ku zwa ka silimo sa 1919. Ku zwa feela ka nako yeo, mizwale ba ba tozizwe ba ba li mutanga ya sepahala ba sebelelize kwa ofisi ye tuna ya zamaiso. Sitopa se si Etelela sa Lipaki za Jehova ki sona se si sebeza sina mutanga ya sepahala. Mu hupule kuli mwa swanisezo ya hae, Jesu naa bulezi kuli ne ku ka ba ni “mutanga” a li muñwi. Kamukwaocwalo, ba ba mwa Sitopa se si Etelela ba kona feela ku ba mutanga ya sepahala ya na ni kutwisiso ha ba sebeza hamoho. Ka nako kaufela, mizwale bao ba ezanga likatulo hamoho sina sikwata.

BATANGA KI BO MAÑI?

11, 12. (a) Mutanga ya sepahala ya na ni kutwisiso u fiwa buikalabelo bufi bo bubeli? (b) Jesu naa ketile lili mutanga ya sepahala kuli a babalele batanga ba hae, mi ki batu ba ba cwañi ba naa ketile?

¹¹ Mu hupule kuli mwa swanisezo ya Jesu, mutanga ya sepahala ya na ni kutwisiso u fiwa buikalabelo bo bubeli bo bu shutana. Sa pili, u ketiwa ku babalela batanga. Mi sa bubeli, u ketiwa ku babalela liluwo kaufela la mulena. Bakeñisa kuli swanisezo yeo i talelezwa feela mwa nako ye ya mafelelezo, ku ketiwa ko kubeli ko, ne ku ka ezahala feela hamulaho wa silimo sa 1914, ili nako ya naa kalile ku busa Jesu.

¹² Jesu naa ketile lili mutanga ya sepahala kuli a babalele batanga ba hae? Kuli lu alabe puzo yeo, ha lu nyakisiseñi ze ne ezahezi kwa makalelo a nako ya kutulo ye ne kalile ka silimo sa 1914. Sina mo lu itutezi, ka nako ya kutulo yeo, batu ba ne ba li mwa likwata ze ñata ne ba ipapatile ku ba Bakreste. Ki sikwata sifi kwa likwata zeo sa naa ka keta Jesu kuli si be mutanga ya sepahala?  Puzo yeo ne i alabilwe ka nako ya naa tile Jesu ni Ndatahe ku to tatuba tempele ya kwa moya mwa silimo sa 1914 ku isa kwa makalelo a silimo sa 1919. * (Mala. 3:1) Jesu ni Ndatahe ne ba tabile hahulu ku fumana sikwatanyana sa batu ba ne ba sepahala ili Baituti ba Bibele ba ne ba bonisize kuli ne ba lata hahulu Jehova ni Linzwi la hae. Nihakulicwalo, sikwata seo ne si tokwa ku keniswa hape. Mi sikwata seo ne si amuhezi ka buikokobezo kelezo ye ne si filwe ka nako yeo ya ku likiwa ni ku keniswa. (Mala. 3:2-4) Baituti ba Bibele ba ne ba sepahala bao ne li bona Bakreste ba niti, ili bona buloto bo bu bulezwi mwa swanisezo ya Jesu. Ka silimo sa 1919, Jesu naa ketile mizwale ba ne ba kwanisize ze tokwahala mwahalaa sikwata seo kuli ba be mutanga ya sepahala ya na ni kutwisiso, mi naa ba ketile ku babalela batanga ba hae.

13. Ki bo mañi batanga ba ba bulezwi mwa swanisezo ya Jesu, mi ki kabakalañi kaufelaa bona ha ba bizwa batanga?

¹³ Batanga ba ba bulezwi mwa swanisezo ya Jesu ki bo mañi? Ki Bakreste kaufela ba ba fiwa lico za kwa moya. Kwa makalelo a mazazi a maungulelo, batanga bao ne li Bakreste kaufela ba ba tozizwe. Kono hamulaho, buñata bo butuna bwa lingu ze ñwi ni bona bu bile kalulo ya batanga bao. Buñata bwa batu ba ba li “mutapi u li muñwi” wa Kreste, ki ba lingu ze ñwi. (Joa. 10:16) Bakreste ba ba tozizwe ni ba lingu ze ñwi kaufelaa bona ba tusiwa ki lico za kwa moya ze ba fiwa ki mutanga ya sepahala ka nako ye swanela. Kana ba ba mwa Sitopa se si Etelela ili ba ba li mutanga ya sepahala kacenu ni bona ba balelwa kwa batanga ba ba bulezwi mwa swanisezo ya Jesu? Mizwale bao ni bona ba tokwa ku fepiwa kwa moya. Kamukwaocwalo, yo muñwi ni yo muñwi kwa mizwale bao u lemuha kuli ha inzi a nosi, ni yena ki mutanga sina Bakreste ba niti kaufela.

14. (a) Ki buikalabelo mañi bwa filwe mutanga ya sepahala, mi buikalabelo bo, bu amañi? (b) Ki temuso mañi ya naa file Jesu ku mutanga ya sepahala ya na ni kutwisiso? (Mu bone mbokisi ye li, “Kabe Mutanga yo ki ya Maswe . . .”)

¹⁴ Jesu naa file mutanga ya sepahala ya na ni kutwisiso buikalabelo bwa butokwa hahulu. Mwa linako za Bibele, mutu ya naa li mutanga kamba sikombwa se ne si sepilwe, naa babalelanga lika kaufela za mulenaa hae. (Luka 12:42) Ka nzila ye swana, mutanga ya sepahala ya na ni kutwisiso u filwe buikalabelo bwa ku babalela lika kaufela za Kreste fa lifasi. Buikalabelo bo, bu kopanyeleza ku babalela masheleñi, maluo, ku etelela mwa musebezi wa ku kutaza, ni ku lukisa mikopano ye mituna ni ye minyinyani. Hape buikalabelo bo, bu ama ku hatisa Libibele ze lu itusisanga ha lu li mwa bukombwa, ha lu eza tuto ya ka butu, ni ha lu li kwa mikopano. Batanga ba  Jesu ba tusiwa ki lico za kwa moya ze ba fiwa ki mutanga ya sepahala.

MUTANGA YA SEPAHALA U KA KETIWA LILI KULI A BABALELE LILUWO KAUFELA LA MULENA?

15, 16. Jesu u keta lili mutanga ya sepahala kuli a babalele liluwo la hae kaufela?

¹⁵ Jesu u fa lili mutanga ya sepahala buikalabelo bwa bubeli, ili ku mu keta kuli a babalele “liluwo la hae kaufela”? Jesu naa ize: “U ka ba ni tabo mutanga yo haiba Mulenaa hae a mu fumana a eza cwalo ka nako yaa fita! Kaniti na mi bulelela ni li: Mulenaa hae u ka mu keta ku babalela liluwo la hae kaufela.” (Mat. 24:46, 47) Mu lemuhe kuli Jesu u fa buikalabelo bwa bubeli ku mutanga ya sepahala ha saa fitile ni ku fumana kuli mutanga yo u petile hande musebezi wa naa filwe, ona musebezi wa ku fa lico za kwa moya. Kamukwaocwalo, ne ku ka fita nako ye telele ku zwa fa felwa buikalabelo bwa pili mutanga ya sepahala ku isa fa felwa buikalabelo bwa bubeli. Kuli lu utwisise mo Jesu a ka ketela mutanga yo kuli a babalele liluwo la hae kaufela ni nako ya ka eza cwalo, lu tokwa ku ziba lika ze peli ze latelela: Jesu u fita lili, mi liluwo la hae li kopanyelezañi?

¹⁶ Jesu u fita lili? Kalabo i fumaneha mwa litimana za makalelo za kauhanyo 24 ya Mateu. Mu hupule kuli mwa litimana zeo, ku “taha” kwa Jesu ku talusa nako ya ka taha ku to yundisa ba ba maswe kwa mafelelezo a muinelo wo wa lifasi. * (Mat. 24:30, 42, 44) Kamukwaocwalo, ku “fita” kamba ku “taha” kwa Jesu ko ku bulezwi mwa swanisezo ya mutanga ya sepahala ku ka ezahala mwa nako ya ñalelwa ye tuna.

17. Liluwo la Jesu li kopanyelezañi?

¹⁷ Liluwo “kaufela” la Jesu li kopanyelezañi? Haki fa lifasi feela fo ku na ni liluwo la Jesu. Liluwo la hae li kopanyeleza ni lika ze kwa lihalimu. Nako ye ñwi Jesu naa bulezi kuli: “Ni filwe maata kaufela mwa lihalimu ni mwa lifasi.” (Mat. 28:18; Maef. 1:20-23) Ka nako ya cwale, liluwo la hae li kopanyeleza ni Mubuso wa Mesia. Mubuso wo, u bile wa hae ku zwa feela ka silimo sa  1914, mi u ka busa ni balateleli ba hae ba ba tozizwe.—Sin. 11:15.

18. Ki kabakalañi Jesu ha ka ba ni tabo ya ku fa mutanga ya sepahala buikalabelo bwa ku babalela liluwo la hae?

¹⁸ Lu kona ku bulelañi ka za lika ze lu itutile? Jesu ha ka taha ku to yundisa ba ba maswe ka nako ya ñalelwa ye tuna, u ka to fumana kuli mutanga ya sepahala u zwezipili ku sepahala mwa musebezi wa hae wa ku fa lico za kwa moya ka nako ye swanela kwa batanga ba hae. Mi cwale Jesu kihona a ka ba ni tabo ya ku fa mutanga yo buikalabelo bwa ku babalela liluwo la hae kaufela. Bakreste ba ba li mutanga ya sepahala ba ka fiwa buikalabelo bo ha ba ka amuhela mupuzo wa bona kwa lihalimu mi ba ka busa ni Kreste.

19. Kana mutanga ya sepahala u ka fiwa mupuzo o mutuna mwa lihalimu ku fita o ba ka fiwa Bakreste ba bañwi ba ba tozizwe? Mu taluse.

 ¹⁹ Kana mutanga ya sepahala u ka fiwa mupuzo o mutuna mwa lihalimu ku fita o ba ka fiwa Bakreste ba bañwi ba ba tozizwe? Batili. Mupuzo ki nto ye kona ku sepiswa kwa sikwatanyana ka nako ye ñwi mi hasamulaho u kona ku ikoliwa ki sikwatanyana seo hamohocwalo ni ba bañwi. Ka mutala, mu nyakisise za naa bulezi Jesu kwa baapositola ba hae ba 11 ba ba sepahala ka nako ya busihu bo ne bu latelezwi ki lizazi la naa shwile. (Mu bale Luka 22:28-30.) Jesu naa sepisize sikwatanyana seo kuli ne ba ka fiwa mupuzo o munde kabakala busepahali bwa bona. Ne ba ka busa ni Jesu mwa lihalimu. Kono za naa bulezi Jesu hamulaho wa lilimo, li bonisa kuli Bakreste kaufela ba ba tozizwe ba 144,000 ba ka busa ni yena mwa lihalimu. (Sin. 1:1; 3:21) Ka nzila ye swana, sina mo li boniseza liñolo la Mateu 24:47, Jesu naa sepisize kuli sikwatanyana sa baana, ili mizwale ba ba tozizwe ba ba li mutanga ya sepahala, ne si ka fiwa buikalabelo bwa ku babalela liluwo la hae kaufela. Kamukwaocwalo, Bakreste ba ba tozizwe kaufela ba 144,000 ba ka fiwa buikalabelo bwa ku babalela liluwo la Kreste.—Sin. 20:4, 6.

20. Ki kabakalañi Jesu ha naa ketile mutanga ya sepahala, mi mu bata ku zwelapili ku ezañi?

²⁰ Sina mwa naa fepezi batu ba bañata ka ku itusisa batu ba sikai mwa linako za baapositola, Jesu ni kacenu hape u fa lico za kwa moya kwa batu ba bañata ka ku itusisa mutanga ya sepahala ya na ni kutwisiso. Jesu naa ketile mutanga ya sepahala ka mulelo wa kuli balateleli ba hae ba niti, ibe kuli ki Bakreste ba ba tozizwe kamba ki ba lingu ze ñwi, ba zwelepili ku fiwa lico za kwa moya ka nako ye swanela mwa mazazi a maungulelo a. Kamukwaocwalo, haike kamita lu bonise buitebuho bwa luna ka ku swalisana ka busepahali ni mizwale ba ba tozizwe ba ba li mutanga ya sepahala ya na ni kutwisiso.—Maheb. 13:7, 17.

LITALUSO ZA KWA MAFELEZO: (Ha mu fita fa paragilafu fo ku inzi litaluso zeo, mu li bale sina mo mu balelanga litaluso za kwatasi.)

[Litaluso za kwatasi]

[Lipuzo za Tuto]

[Mbokisi fa likepe 22]

KANA MU UTWISISIZE?

“Mutanga ya sepahala ya na ni kutwisiso”: Ki sikwatanyana sa mizwale ba ba tozizwe ba ba lukisa ni ku fa lico za kwa moya ku zwa ka silimo sa 1919. Kacenu mizwale ba ba tozizwe bao ki bona ba ba li mwa Sitopa se si Etelela

“Batanga ba hae”: Ki Bakreste kaufela ba ba fiwa lico za kwa moya, ibe kuli ki Bakreste ba ba tozizwe kamba ki ba lingu ze ñwi

“Yo Mulenaa hae a mu ketile ku babalela batanga ba hae”: Ka silimo sa 1919, Jesu naa ketile mizwale ba ba tozizwe ba ne ba kwanisize ze tokwahala kuli ba be mutanga ya sepahala ya na ni kutwisiso

“Mulenaa hae u ka mu keta ku babalela liluwo la hae kaufela”: Bakreste ba ba tozizwe ba ba li mutanga ya sepahala ba ka fiwa buikalabelo bo ha ba ka amuhela mupuzo wa bona kwa lihalimu. Bakreste bao ni ba bañwi kaufela ba palo ya 144,000 ba ka fiwa buikalabelo bwa ku babalela liluwo la Kreste

[Siswaniso se si fa likepe 22, 23]

Ibe kuli lu na ni sepo ya ku yo pila kwa lihalimu kamba ya ku to pila fa lifasi, kaufelaa luna lu batanga mi lu tokwa lico za kwa moya ze swana ze fiwa ka nako ye swanela

[Mbokisi fa likepe 24]

“KONO KABE MUTANGA YO KI YA MASWE . . .”

Jesu u file mutanga ya sepahala ya na ni kutwisiso musebezi wa butokwa hahulu. U ketile mutanga yo kuli a babalele ni ku fa batanga ba hae sico sa kwa moya ka nako ye swanela. Jesu naa bulezi kuli ba ba filwe buikalabelo bo butuna ba ka libelelwa ku peta ze ñata. (Luka 12:48) Kamukwaocwalo, Jesu naa felize swanisezo ya hae ye bulela za mutanga ya sepahala ya na ni kutwisiso ka ku fa temuso ya butokwa hahulu.

Jesu naa file temuso ka za mutanga ya maswe ya naa nga kuli mulenaa hae wa liyeha hahulu ku taha mi a kala ku nata batanga ba bañwi. Mulenaa hae ha taha, u ka to mu “fa koto ye tuna ku feleleza.”—Mu bale Mateu 24:48-51.

Kana Jesu fo naa polofita kuli ne ku ka ba ni sitopa sa mutanga ya maswe mwa mazazi a maungulelo? Kutokwa. Ki niti kuli batu ba bañwi ba bonisize moya o swana ni wa mutanga ya maswe ya naa bulezwi ki Jesu. Batu ba ba cwalo ne lu ka ba biza kuli ki bakwenuheli niha neikaba kuli batu bao ki Bakreste ba ba tozizwe kamba ki ba “buñata bo butuna.” (Sin. 7:9) Jesu naa sa talusi kuli batu ba ba cwalo ki bona sitopa sa mutanga ya maswe. Naa si ka bulela kuli naa ka keta mutanga ya maswe. Jesu fo naa fa feela temuso ku mutanga ya sepahala ya na ni kutwisiso.

Mu lemuhe kuli Jesu u kalisa temuso ya hae ka ku bulela kuli “kabe.” Linzwi leo li bonisa kuli za naa bulezi Jesu hamulaho wa lona, ne li si ke za ezahala luli. Ne ku swana feela inge kuli Jesu naa bulela kuli: ‘Haiba mutanga ya sepahala ya na ni kutwisiso naa ka nyandisa batanga ba bañwi ka ku ba eza maswe, mulenaa hae naa ka mu fa koto ye tuna.’ (Mu bone Luka 12:45.) Kono sitopa sa mutanga ya sepahala ya na ni kutwisiso si zwezipili ku tona kwa moya ni ku fa lico ze swanela za kwa moya.

Mizwale ba ba tozizwe ba ba li mutanga ya sepahala ba lemuha kuli Mulenaa bona u ba libelela kuli ba babalele batanga ba hae. Mizwale bao ba na ni takazo ye tuna ya ku peta buikalabelo bwa bona ka busepahali ilikuli Mulenaa bona ha ka fita a ba bulelele kuli ‘mu ezize hande.’

[Siswaniso se si fa likepe 25]

Bakreste ba ba tozizwe kaufela ba 144,000 ba ka fiwa buikalabelo bwa ku babalela liluwo la Jesu

(Mu bone  paragilafu 19)