Ng’ano ma en “jatichno mogen, kendo mariek? ”
“Ere jatichno mogen, kendo mariek, ma ruodhe noketo kuom joode mondo opognigi chiemo e kinde makare?”—MATH. 24:45.
NYAMINWA moro nondiko barua kogoyogo erokamano ne ofis maduong’ mar Joneno mag Jehova. Nondiko kama e baruano: “Owete, ok dakwan ni en nyadidi masegayudo gasede mawuoyo e wi gik machando chunya kendo ayudogi mana e kinde mowinjore.” Be kamano e kaka in bende ijawinjo e chunyi? Thothwa nyalo bedo ni osewinjo kamano. Be mano en gima onego okawwa gi wuoro? Ooyo.
2 Chiemb chuny ma wayudo e kinde mowinjore nyiso gadier ni Yesu ma en Wi kanyakla, chopo singo mare mar pidhowa. Opidhowa kokalo kuom ng’ano? Konyiso gima ne dhi bedo ranyisi mar bedoe mare, Yesu nowacho ni ne odhi tiyo gi “jatichno mogen, kendo mariek”, mondo jatijno ‘opog chiemo ne joot e kinde makare. * (Som Mathayo 24:45-47.) Yesu ne dhi pidho jolupne madier e kinde mag gikogi kokalo kuom jatijno mogen. En gima dwarore ahinya mondo wang’e ni jatichno mogen en ng’a. Mondo wabed gi winjruok maber gi Nyasaye, mano biro tenore ahinya kuom chiemb chuny ma jatijno mogen miyowa.—Math. 4:4; Joh. 17:3.
3 Tiend ngero ma Yesu nogoyo e wi jatichno mogen en ang’o? E kinde mosekalo, bugewa nosebedo ka wacho ni e Pentekost 33 E Ndalowa, Yesu noyiero jatichno mogen mondo orit joode. Bugewago ne wacho ni chakre higa mar 33 E.N., jatijno ne en kweth mar Jokristo duto mowal manie piny. Bugego bende nosebedo kawacho ni joot ne gin mana Jokristogo duto mowal ka gin ng’ato achiel achiel. E wi mano bugego nomedo wacho ni e higa mar 1919, Yesu noketo jatijno mogen “e wi gige duto,” matiende ni gige duto manie piny makonyo e tije mag lando wach Pinyruoth. Kata kamano, bang’ timo nonro matut kendo paro ngerono e yor lamo, dwarore omed lero tiend gima Yesu nowacho e wi jatichno mogen kendo mariek. (Nge. 4:18) Weuru wanon kendo ngerono e yo matut mondo wane kaka omulo ngimawa, bed ni wan gi geno mar dhi e polo kata mar dak e pinyka.
WECHE MANIE NGERONO NE DHI CHOPO KARANG’O?
4 Ndiko mamoko manie Mathayo sula 24, nyiso ni ngero mar jatichno mogen kendo mariek, nochako chopo e ndalo mag giko, to ok e Pentekost 33 E.N. Koro we wane ane kaka Ndikogo konyowa chopo e parono.
5 Ngero mar jatichno mogen en mana achiel kuom weche ma Yesu nokoro e wi ‘ranyisi mar bedoe mare, kendo mar giko mar ndalo.’ (Math. 24:3) Weche ma Yesu nokoro e Mathayo 24:4-22, chopo e okenge ariyo—mokwongo ne gichopo kare chakre higa 33 E.N. nyaka 70 E.N, kae to mar ariyo, ne gidhi chopo kare e okang malach e kindewagi. Be mano nyiso ni weche ma Yesu nowacho e wi jatichno mogen bende ne dhi chopo e okenge ariyo? Ooyo.
6 Kochako gi weche mondiki e Mathayo 24:29, Yesu nojiwo ahinya gigo ma ne dhi timore e kindewagi. (Som Mathayo 24:30, 42, 44.) Kowacho gima biro timore e kinde masira maduong’no, nowacho ni ji ne dhi neno ‘Wuod dhano kabiro e wi boche polo.’ Kae to, kotiyo gi weche manyiso gima biro timore ne jogo modak e kinde giko, nojiwogi ni girit ‘nikech ok ne ging’eyo chieng’ ma Ruodhgi nobie’ kendo ni e ‘sa ma ok gipar e ma Wuod dhano biroe.’ * Weche molworo ndikoni nyiso ni Yesu nolero ngero mar jatichno mogen sama nowuoyo e wi gik ma ne dhi timore e ndalo giko. Kuom mano, wanyalo wacho ni weche ma Yesu nowacho kuom jatichno mogen, nochako timore mana bang’ ka ndalo mag giko osechakore e higa 1914. Mano en gima winjore maber. Nikech ang’o?
7 Kaw ane thuolo mondo ipar e wi penjoni: Ng’ano ma en “jatichno mogen, kendo mariek?” E kinde Jokristo mokwongo, ne onge tiende penjo penjono. Mana kaka ne waneno e sula mokalo, joote ne nyalo timo honini kendo pogo ne jomoko mich mag roho, to mano ne nyiso ayanga ni Nyasaye ne riwogi lwedo. (Tich 5:12) Kare ang’o momiyo dwarore ni wapenjre ni en ng’ano kuom adier ma Kristo noyiero mondo ota joge? E higa mar 1914, gik moko ne opogore ahinya. Tij keyo ne ochakore e higano. Koro kinde nosechopo mar pogo ngano gi ogolo. (Math. 13:36-43) Sama tij keyo ne chakore, penjo moro ne dwarore ni onon. Ka koro ne nitie jo mang’eny maluongore ni Jokristo, ere kaka ne inyalo fweny ngano, tiendeni Jokristo mowal? Ngero e wi jatijno mogen chiwonwa dwoko. Jokristo mowal ema ne idhi pidh maber gi wach Nyasaye.
NG’ANO MA EN JATICHNO MOGEN KENDO MARIEK?
8 Jatichno mogen nyaka bed mana jogo manie kweth mar Jokristo mowal mapod nie piny. Jokristo mowal ema iluongo ni ‘jodolo mag Ruoth’ kendo osemigi migawo mar ‘lando tije madongo mag Jal ma noluongogi gia e mudho mondo gidhi e ler mare miwuoro.’ (1 Pet. 2:9) En gima owinjore ni Jokristo mowal ma gin e ‘jodolo mag Ruoth’ ema opuonj Jokristo wetegi adiera.—Mal. 2:7; Fwe. 12:17.
9 Be Jokristo mowal duto manie piny loso kweth mar jatichno mogen? Ooyo. Adiera en ni Jokristo duto mowal ok nigi migawo mar chiwo chiemb chuny ne Jokristo wetegi e piny mangima. En adier ni moko kuom Jokristo mowal gin jokony-tich kata jodong-kanyakla e kanyakla ma gintiere. Gilendo ot ka ot kendo puonjo ji e kanyakla, bende giriwo lwedo chenro duto moket gi ofis maduong’ matayo. Kata kamano, ok gin gi migawo mar iko kendo pogo chiemb chuny ne owete duto e piny mangima. E wi mano, nitie Jokristo mowal ma gin nyimine mobolore, kendo ok gitem dwaro migawo mar puonjo kanyakla.—1 Kor. 11:3; 14:34.
10 To kare, ng’ano ma en jatichno mogen kendo mariek? Mana kaka Yesu nopidho ji mathoth gi chiemo kotiyo gi joma nok, jatichno mogen bende en mana grup matin mar owete mowal, ma iko kendo pogonwa chiemb chuny e kindegi mag bedoe mar Kristo. E kinde duto mag ndalo giko, grup mar owete ma gin jatichno mogen osebedo katiyo kanyachiel e ofis maduong’. Jatichno mogen ema osebedo Bura Maduong’ mar Joneno mag Jehova. Kata kamano ber ng’eyo ni wach ma otigo ni “jatichno” e ngero mar Yesu, wuoyo e wi jatich achiel. Kuom mano, jokanyo mag Bura Maduong’ riwo paro sama gidwaro ng’ado paro e wi wach moro.
JOOT GIN JOMAGE?
11 Onego wang’e ni e ngero mar Yesu, jatichno mogen kendo mariek imiyo migepe ariyo mopogore. Mokwongo en gi migawo mar rito jood ruodhe; to mar ariyo en migawo mar rito gige ruodhe duto. Nikech weche manie ngeroni chopo e ndalogi mag giko, migepe ariyogo ne idhi mi jatijno ka Yesu osebedo ruoth e higa 1914.
12 En karang’o ma Yesu noyiero jatichno mogen mondo orit joode? Mondo wayud dwoko mar penjono, wabiro dok chien nyaka e higa mar 1914, ma en e higa ma keyo nochakoree. Mana kaka ne wapuonjore motelo, e kindeno grube mang’eny ne luongore ni Jokristo. Kuom grubego duto, Yesu ne dhi keto ng’ano mondo obed jatichno mogen? Penjono ne odwok kane Yesu gi Wuon mare obiro nono kendo pwodho hekalu, matiende ni chenro mar lamo madier kochakore higa 1914 nyaka e chak higa 1919. * (Mal. 3:1) Ne gimor kane giyudo ni nitie kweth manok mar Jopuonjre Muma ma chunygi nohero Jehova kendo ne omakore gi Wachne. Kata kamano pod ne dwarore ni opwodhgi, kendo ne gibolore e kindego ma ne ipwodhogie. (Mal. 3:2-4) Kuom adier, Jopuonjre Muma ma ne ochung’ motegno e kindego ema ne gin ngano. E higa 1919, ma en e higa ma ne idwokoe lamo madier kendo, Yesu noyiero owete mowal mowinjore e kind Jokristogo mondo obed jatichno mogen kendo mariek kendo ne okete mondo obed e wi joode.
13 To kare, joode gin jomage? Kokete e yo mayot, joode gin jogo mipidho gi chiemb chuny. Kane ndalo giko chakore, joode duto ne gin Jokristo mowal. Bang’e, oganda mang’ongo mar rombe mamoko bende ne oriw e kwan mar joodno. Rombe mamoko ema sani kwan-gi duong’ e “kueth achiel” manie bwo loch mar Kristo. (Joh. 10:16) Grube ariyogo duto yudo gweth kuom chamo chiemb chuny masani iiko gi jatichno mogen. To nade jokanyo mag Bura Maduong’ ma gie kindegi loso grup mar jatichno mogen kendo mariek? Owetego bende dwarore ni opidh gi wach Nyasaye. Kuom mano, ginyiso bolruok kuom yie ni giduto ng’ato achiel achiel, gin joot mana kaka Jokristo mamoko bende.
Kata bed ni wan gi geno mar dhi e polo kata dak e piny nyaka chieng’, waduto wan jood Yesu, kendo wayudo chiemb chuny machal
14 Yesu nomiyo jatichno mogen kendo mariek migawo moro mapek. E ndalo mag Muma, jatich kata jarit mogen kamano ema ne rito kendo tayo ot mangima. (Luka 12:42) Kuom mano, jatichno mogen ema omi migawo mar rito kendo tayo Jokristo madier. Mano oriwo rito mwandu duto mag ruoth, tayo tij lendo, chano program mag chokruoge duto mag alwora kod mag distrikt, goyo buge mitiyogo e tij lendo, koda buge ma ng’ato timogo puonjruok ma mare owuon kaachiel gi mipuonjruokgo e kanyakla. Chiemb chuny duto ma Jokristo yudo, iiko gi jatichno mogen kendo mariek.
RUODHE BIRO KETE E WI GIGE DUTO—KARANG’O?
15 En karang’o mar ariyo ma Yesu biro ketoe jatichno mogen kendo mariek e wi “gige duto”? Yesu nowacho kama: “Jatichno en ng’at moguedhi ma ruodhe kobiro nonwang’ kotimo kamano. Adier awachonu niya, nokete kuom gige duto.” (Math. 24:46, 47) Ne ni kanyo Yesu wacho ni obiro kete kendo e wi gige duto ka obiro moyudo ni jatijno ‘timo kamano,’ matiende ni, koyudo ka jatichno pidho joode gi chiemb chuny kaka dwarore. Mano nyiso ni nitie thuolo moro mabiro kalo chakre ne kete mokwongo, koda kinde mibiro kete mar ariyo. Mondo wang’e ni Yesu noketo jatichno e wi gige duto karang’o kendo e yo mane, dwarore wang’e gik moko ariyo: mokwongo Yesu biro karang’o, to mar ariyo, gige duto oriwo ang’o?
16 Yesu biro karang’o? Dwoko yudore e kwan mamoko matindo manie Mathayo sula 24. Sama kwan-go wuoyo e wi “biro” mar Yesu, ginyiso kindego ma Yesu biro mondo oland kendo kelo kum ne jomaricho. * (Math. 24:30, 42, 44) Kuom mano, “biro” mar Yesu miwuoyoe e ngero mar jatichno mogen biro timore e kinde mag masira maduong’.
17 ‘Gige Yesu duto’ oriwo ang’o? Kane Yesu wuoyo e wi gigene “duto,” ok ne owuo mana kuom gigene manie piny kae kende. Ka kuom adier, Yesu nigi teko mang’eny ahinya e polo. Nowacho niya: “Teko duto e polo gi piny osemiya.” (Math. 28:18; Efe. 1:20-23) Gigene sani oriwo Pinyruodh Mesia mosebedo mare chakre higa mar 1914 kendo obiro locho e pinyruodheno kaachiel gi Jokristo mowal.—Fwe. 11:15.
18 Kaluwore gi wechego, wanyalo wacho ang’o? E kinde ma Yesu nobie kokelo kum e masira maduong’, obiro yudo ka jatijno mogen osebedo ka pidho joode gi chiemb chuny e kinde mowinjore. Mano biro miyo Yesu oket jatichno kendo mar ariyo e wi gige duto. Jogo duto manie grup mar jatichno mogen ibiro ket e wi gige Yesu duto ka giyudo pok mar dhi e polo mondo giloch gi Kristo.
19 Be mano nyiso ni jatichno mogen biro yudo pok maduong’ e polo moloyo Jokristo mamoko mowal? Ooyo. Singo inyalo mi mana jo manok, to bang’e jomamoko bende yudo gwethgo. Kuom ranyisi, par ane gima Yesu nowacho ne jootene 11 e otieno mogik kae to otho. (Som Luka 22:28-30.) Yesu nosingo ne jootene manok ni nitie pok maber ma noritogi nyime ka gimakore kode nyaka giko. Ne gidhi locho kode ka gin ruodhi e polo. Kata kamano, higini moko bang’e, nowacho ni ji 144,000 duto ne dhi bedo e kombe ruodhi mondo giloch kode. (Fwe. 1:1; 3:21) E yo machalo kamano bende, e Mathayo 24:47, Yesu nosingo, ni jo manok kuom Jokristo mowal maloso grup mar jatichno mogen ne idhi keti e wi gige Yesu duto. Omiyo, ji 144,000 duto biro bedo gi loch e wi gige Kristo.—Fwe. 20:4, 6.
Ji 144,000 duto biro bedo gi loch e wi gige Kristo (Ne paragraf mar 19)
20 Kotiyo gi jatichno mogen kendo mariek, Yesu luwo ranyisi ma noketo e kinde Jokristo mokwongo, kane opidho ji mang’eny kotiyo gi joma nok. Yesu noyiero jatichno mogen mondo omi jolupne duto chiemb chuny kuom kinde duto mag ndalo giko, bed ni gin Jokristo mowal kata gin rombe mamoko. Omiyo, we wang’ad e chunywa mar riwo lwedo Jokristo mowal maloso grup mar jatichno mogen kendo mariek.—Hib. 13:7, 17.
^ par. 2 Motelo ne mano, Yesu nogoyo ngero moro machalo gi mano kama noluongoe “jatichno” ni ‘jarit.’—Luka 12:42-44.
^ par. 6 “Biro” mar Kristo (Grik, er′kho·mai) opogore gi “bedoe” mare (pa·rou·si′a). Bedoe mare, tiende ni bedoe loch, ne dhi chakore kapok obiro mondo ong’ad bura.
^ par. 12 Ne sula mawacho ni ‘Neuru, An Kodu Ndalo Duto,’ mayudore e gasedni e ite mag 10-12,paragraf mag 5-8.
^ par. 16 Ne sula mawacho ni ‘Konwa, Magi Notimre Karang’o?’ e gasedni, ite mag 7-8, paragraf mag 14-18.
