1, 2. (1) Wõn eo Jijej ej kõjerbale ñan naajdik kõj ak letok katak ko rem̦ool? (2) Etke eaorõk bwe jen jel̦ã kõn wõn kumi in?

 JUON jeid im jatid kõrã ear je juon lõta in kam̦m̦oolol ñan em̦m̦aan ro rej jerbal ilo Ra eo ilo New York. Ear ba ñan em̦m̦aan rein: “Elukkuun lõñ iien ko iar loi katak ko me iar lukkuun aikuji im ear jejjet iien ko rar wal̦o̦k ie.” Men in enañin ke bar wal̦o̦k ñan kwe? Bõlen men in em̦õj an wal̦o̦k ñan elõñ iaadwõj. Ilo m̦ool, men in ej kaalikkar juon men. Ta in?

² Eokwe, aolep iien jej bũki katak ko me jej aikuji ilo iien ko rejejjet. Men in ej kaalikkar bwe Jijej Kũraij, eo ej Bõran eklejia ko, ej kajejjete kallim̦ur eo an. Kallim̦ur eo an ej ñan naajdik kõj ekkan ko ilo kõkkar ak letok katak ko rem̦ool. Wõn eo Jijej ej kõjerbale ñan letok ekkan kein? Ilo iien eo ke Jijej ear kwal̦o̦k kõn men ko renaaj wal̦o̦k ñe enaaj kiiñ, ear bar ba bwe enaaj kõjerbale “ri karejar eo etiljek im mãlõtlõt” ‘bwe en kajejjet iien an lel̦o̦k kijen’ “ri karejar ro jet.” (Riit Matu 24:45-47, UBS.) Jijej ej kõjerbale kumi in “ri karejar eo etiljek im mãlõtlõt” ñan an letok katak ko rem̦ool ñan rũkal̦oor ro an ilo iien kein ãliktata. Elukkuun aorõk bwe jen jel̦ã kõn wõn kumi in. Etke? Kõnke jej aikuji katak ko rem̦ool me kumi in ej litok bwe en em̦m̦an kõtaan eo ad ippãn Anij.​—Matu. 4:4; Jon 17:3.

3. Ta ko bok ko ad rekõn ba m̦okta kõn waanjoñak eo kõn ri karejar eo etiljek im mãlõtlõt?

³ Kar m̦okta bok ad rar kõmel̦el̦e kõn ta mel̦el̦ein waanjoñak eo an Jijej kõn ri karejar eo etiljek im mãlõtlõt. Ñan waanjoñak, rar kwal̦o̦k bwe ilo kar raan in Pentekost eo ilo iiõ eo 33, Jijej ear jitõñ “ri karejar eo etiljek im mãlõtlõt” bwe en bõk eddon ak lale “ri karejar ro jet.” Rar kwal̦o̦k bwe aolep ri kapit ro me rar mour ioon lal̦ in ilo kar tõre eo ñan kiiõ rej jitõñl̦o̦k ñan ri karejar eo etiljek im mãlõtlõt. Bareinwõt, jaar l̦õmn̦ak bwe “ri karejar ro jet” ilo waanjoñak eo ej jitõñl̦o̦k ñan kajjojo iaan ri kapit ro. Im bwe ilo 1919, Jijej ear jitõñ kumi in ri karejar eo etiljek im mãlõtlõt bwe en “bõk eddon men ko otemjej m̦weien.” Bok ko ad rar bar ba bwe men ko “m̦weien” rej jitõñl̦o̦k ñan men ko ijin ioon lal̦ me jej kõjerbali ñan rejetake jerbal in kwal̦o̦k naan kõn Aelõñ eo an Anij. Bõtab, ãlikin  am kar jar im bar lukkuun etale im kõl̦mãnl̦o̦kjen̦ kake waanjoñak eo an Jijej kõn ri karejar eo etiljek im mãlõtlõt, kõmij kile bwe ej aikuj oktak mel̦el̦e ko ad kake. (Jabõn Kõnnaan 4:18) Innem, ta mel̦el̦ein waanjoñak eo an Jijej kõn ri karejar eo etiljek im mãlõtlõt? Eokwe, jen kiiõ etale waanjoñak eo an Jijej kõn kumi in. Im jen lale kõn ewi wãween waanjoñak in ej jelõt kõj aolep, ro me renaaj mour indeeo ilañ im ro me renaaj mour indeeo ioon lal̦.

4-6. Etke jejaam̦ ba bwe mel̦el̦ein waanjoñak eo an Jijej kõn ri karejar eo etiljek im mãlõtlõt ear jino jejjet ãlikin 1914?

⁴ Eoon ko jet ilo Matu jebta 24 rej kaalikkar bwe ear jino jejjet mel̦el̦ein waanjoñak eo kõn ri karejar eo etiljek im mãlõtlõt ilo raan kein ãliktata im jab ilo raan in Pentekost eo ilo iiõ eo 33. Jen lale eoon ko im renaaj kõmel̦el̦e etke jejaam̦ ba men in.

⁵ Ilo kanaan eo an Jijej kõn kakõl̦l̦en iien eo ‘enaaj itok, kab ñããt iien eo ãliktata,’ ear kwal̦o̦k kõn waanjoñak eo kõn ri karejar eo etiljek im mãlõtlõt. (Matu 24:3, UBS) Ruo alen an jejjet kitien kanaan eo an Jijej ilo Matu 24:4-22. M̦okta ear jejjet kitien ilo iiõ ko 33 l̦o̦k ñan 70. Im kiiõ ej bar jejjet kitien ilo raan kein ãliktata. Ak ta kõn waanjoñak eo kõn ri karejar eo etiljek im mãlõtlõt. Enaaj ke bar jejjet kitien ruo alen? Jaab.

⁶ Jino jãn Matu 24:29, Jijej ej kwal̦o̦k kõn men ko renaaj wal̦o̦k ilo raan kein ad. (Riit Matu 24:30, 42, 44, UBS.) Ke ear kõnono kõn men ko renaaj wal̦o̦k ilo eñtaan eo el̦ap, ear ba bwe armej ro “renaaj lo Nejin Armej ej itok ilo kõdo̦ ko ilañ.” Innem ear wõnm̦aanl̦o̦k im kwal̦o̦k kõn ro me rej mour ilo raan ko ãliktata. Ear ba: “Kom̦ jaje raan eo Irooj eo ami enaaj itok” im “Nejin Armej enaaj itok ilo awa eo kom̦ij jab l̦õmn̦ak enaaj itok ie.” (Lale kõmel̦el̦e 1.) * Ãlikin wõt an Jijej kwal̦o̦k kõn men ko renaaj wal̦o̦k ilo raan kein ãliktata, ear bar kwal̦o̦k kõn waanjoñak eo kõn ri karejar eo etiljek im mãlõtlõt. Eñin unin jemaroñ ba bwe ear jino jejjet mel̦el̦ein waanjoñak in an Jijej kõn ri karejar eo etiljek im mãlõtlõt ãlikin an kar ijjino raan ko ãliktata ilo 1914. Elukkuun alikkarl̦o̦k im jejjetl̦o̦k mel̦el̦e in kiiõ. Etke jejaam̦ ba men in?

7. Ta kajjitõk eo ear wal̦o̦k ke ear ijjino iien m̦adm̦õd eo? Etke ear wal̦o̦k kajjitõk in?

⁷ L̦õmn̦ak kõn kajjitõk in, “Wõn ri karejar eo etiljek im mãlõtlõt?” Ilo raan ko an rijjelõk ro, ejjel̦o̦k armej ear kwal̦o̦k kajjitõk in. Etke? Eokwe, ãinwõt ad kar katak kake ilo katak eo l̦o̦k, rijjelõk ro rar maroñ kõm̦m̦ani menin kabwilõñlõñ ko im rar bar kamaroñ ro jet ñan kõm̦m̦an menin bwilõñ ko. Men in ear kaalikkar ñan aolep bwe Anij ear kõjerbal rijjelõk ro. (Jerbal 5:12, UBS) Innem ejjel̦o̦k iaan ro ilo eklejia ko rar kajjitõk kõn wõn ro Kũraij ear jitõñ er ñan lale im tõl jerbal ko aer. Bõtab, ilo iiõ eo 1914, ear jab ãinwõt kar iien ko an rijjelõk ro. Eñin kar iiõ eo ear jino iien m̦adm̦õd ak iien kõjenolo̦k wit ko jãn mar ko. (Matu 13:36-43, UBS) Ke ear jino iien m̦adm̦õd eo, ear kanooj lõñ mar ak ro me rej riab in Kũrjin jãn wit ko ak Kũrjin ro rem̦ool me rej ri kapit. Innem ilo iien eo me ear ijjino raan ko ãliktata, elemen an naaj kar alikkar wõn ro rej wit ko? Waanjoñak eo kõn ri karejar eo etiljek im mãlõtlõt enaaj jipañ kõj ñan lo uwaak eo. Ej kwal̦o̦k bwe wit ko ak Kũrjin ro rem̦ool me rej ri kapit renaaj ro me rej bõk katak ko rem̦ool jãn Baibõl̦.

8. Etke ekkar bwe Kũrjin ro wõt me rej ri kapit ren ejaakin ri karejar eo etiljek im mãlõtlõt?

⁸ Kũrjin ro me rej ri kapit ijin ilal̦ rej ejaakin ri karejar eo etiljek im mãlõtlõt. Baibõl̦ ej n̦aetan ri kapit ro “bũrij ro im irooj ro [ak kiiñ ro.]” Im kar kakien rein bwe ren “kõnnaanekl̦o̦k men ko rem̦m̦an” me Anij ej kõm̦m̦ani. (1 Piter 2:9) Eñin unin ekkar bwe ro wõt me rej uwaan “bũrij ro im irooj ro” en er eo rej katakin ri tõmak ro jet m̦õttaer kõn katak ko rem̦ool.​—Malakai 2:7, UBS; Revelesõn 12:17.

9. Aolep ri kapit ro rej ke ejaakin kumi in ri karejar eo etiljek im mãlõtlõt? Jouj im kõmel̦el̦e.

⁹ Aolep ri kapit ro ijin ilal̦ rej ke ejaakin kumi in ri karejar eo etiljek im mãlõtlõt? Jaab. Ilo m̦ool ejjab aolep ri kapit ro rej kõpooji katak ko ñan ri tõmak ro m̦õttaer ipel̦aakin lal̦ in. Jet iaaer rej lale  eklejia eo rej pãd ie im jet rej ri jipañ ilo eklejia. Im rej rejetake eklejia ko rej pãd ie ilo aer kwal̦o̦k naan jãn em̦ ñan em̦ im bareinwõt kwal̦o̦k katak ko ilo iien kweilo̦k. Rej kõttãik er im l̦oore tõl ko jãn Kumi eo Ej Lale Aolep Eklejia ko an Ri Kõnnaan ro an Jeova. Rej kõm̦m̦ani men kein bõtab rejjab bõk kun̦aaer ñan kõpooji katak ko ñan ri tõmak ro ipel̦aakin lal̦. Ebar wõr kõrã ro me rej bar ri kapit. Kõrã rein ettã bũrueer im rejjab wãlo̦k im bõk jerbal in katakin ilo eklejia ko.​—1 Korint 11:3; 14:34.

10. Wõn ri karejar eo etiljek im mãlõtlõt?

¹⁰ El̦aññe ejjab aolep ri kapit ro rej ejaakin ri karejar eo etiljek im mãlõtlõt, innem wõn ro rej ejaakin? Ilo iien ko an rijjelõk ro, Jijej ear kõjerbal jet wõt em̦m̦aan ro ñan naajdik ak lel̦o̦k katak ko ñan aolep rũkal̦oor ro an. Ãindeinl̦o̦k wõt ilo raan kein. Ri karejar eo etiljek im mãlõtlõt ej juon kumi edik ejaakin em̦m̦aan ro me rej ri kapit im rej kõpooji katak ko rem̦ool im kajeededi jãn kar iiõ eo 1919. Aolepen iien kein liktak, ri kapit ro me rej uwaan kumi in ri karejar eo etiljek im mãlõtlõt rar jerbal ippãn doon ilo New York. Ri karejar eo etiljek im mãlõtlõt ej Kumi eo Ej Lale Aolep Eklejia ko an Ri Kõnnaan ro an Jeova ipel̦aakin lal̦ in. Ri karejar eo etiljek im mãlõtlõt ej jitõñl̦o̦k ñan juon kumi in elõñl̦o̦k jãn juon em̦m̦aan, bõtab ilo waanjoñak eo an Jijej ej kwal̦o̦k bwe ej juon wõt ri karejar. Etke? Kõnke ñe rej jerbal ippãn doon rej juon wõt. Aolep iien Kumi eo Ej Lale Aolep Eklejia ko an Ri Kõnnaan ro an Jeova rej kõm̦m̦ani pepe ko ippãn doon.

11, 12. (1) Ta eddo ak jerbal ko ruo Irooj eo ej lel̦o̦k ñan ri karejar eo etiljek im mãlõtlõt? (2) Ñããt eo Jijej ear lel̦o̦k ñan ri karejar eo etiljek im mãlõtlõt eddo eo ñan lale ak “bõk eddon ri karejar ro jet”? (3) Im wõn ro Jijej ear kããlõt er bwe ren ejaakin ri karejar eo etiljek im mãlõtlõt?

¹¹ Ilo waanjoñak eo an Jijej, ewõr ruo eddo ak jerbal ej lel̦o̦k ñan ri karejar eo etiljek im mãlõtlõt. Jerbal eo kein kajuon kar lel̦o̦k ñan ri karejar in ej ñan lale ak “bõk eddon ri karejar ro jet.” Im jerbal eo kein karuo ej ñan “bõk eddon men ko otemjej m̦weien” irooj eo an. Keememej bwe waanjoñak in kõn ri karejar eo etiljek im mãlõtlõt ejejjet kitien ilo raan kein ãliktata. Kõn men in, naaj kar lel̦o̦k jerbal ak eddo kein ruo ñan ri karejar eo etiljek im mãlõtlõt ãlikin an Jijej erom Kiiñ ilo kar iiõ eo 1914.

¹² Ñããt eo Jijej ear jitõñ ri karejar eo etiljek im mãlõtlõt ñan bõk “eddon ri karejar ro jet”? Ñan lo uwaak eo, jen bar kõnono kõn ta eo ear wal̦o̦k ilo jinoin iien m̦adm̦õd eo ilo 1914. Ãinwõt ad kar katak m̦oktal̦o̦k, ear lõñ kumi in armej ro me rar ba bwe rej Kũrjin ilo iien m̦adm̦õd eo. Ak wõn iaan kumi kein me Jijej ear kããlõte bwe en ri karejar eo  etiljek im mãlõtlõt? Eokwe, ilo iiõ ko jãn 1914 ñan jinoin iiõ eo 1919, Jijej im Jemãn rar etale tampel̦ eo ilo kõkkar. (Lale kõmel̦el̦e 2.) * (Malakai 3:1) Ãlikin men in, rar loe bwe ear wõr juon kumi in Ri Katak Baibõl̦ ro me rar yokwe Jeova im Naan eo an. Jeova im Jijej rar lukkuun m̦õn̦õn̦õ ippãn kumi in. Mekarta ak ear wõr men ko im kar aikuj kajim̦we er kaki. Im ke kar kajim̦we er ak karreoik er ilo kõkkar, rar m̦õn̦õn̦õ in kõttãik er ilo aer pokake im oktak. (Malakai 3:2-4) Ri Katak Baibõl̦ rein me retiljek rar m̦ool in Kũrjin. Innem ealikkar bwe rein rar wit ko ilo waanjoñak eo me Jijej ear kwal̦o̦ke. Ilo 1919, Jijej ear kããlõt jet iaan em̦m̦aan ro me rej ri kapit bwe ren ejaakin ri karejar eo etiljek im mãlõtlõt, im ear lel̦o̦k ñan er eddo eo ñan lale ak “bõk eddon ri karejar ro jet.”

13. Wõn ro rej “ri karejar ro jet”? Etke?

¹³ Wõn “ri karejar ro jet”? Rein rej aolep ro me rej bõk katak ko rem̦ool jãn ri karejar eo etiljek im mãlõtlõt. Ilo jinoin kar raan ko ãliktata, aolep “ri karejar ro jet” rar ri kapit ro. Bõtab, tokãlik ear jab baj ri kapit ro wõt ak ear bar koba jarlepju in jiip ro jet. Ilo raan kein elõñl̦o̦k jiip ro jet jãn ri kapit ro. Meñe ãindein ak rej “juon wõt bwij” im Kũraij ej tõl er. (Jon 10:16) Ri kapit ro im jiip ro jet rej jim̦or bõk ekkan ko ilo kõkkar ak katak ko rem̦ool me ri karejar eo etiljek im mãlõtlõt ej kõpooji. Ak ta kõn ro uwaan Kumi eo Ej Lale Aolep Eklejia ko an Ri Kõnnaan ro an Jeova me rej ejaakin ri karejar eo etiljek im mãlõtlõt? Em̦m̦aan rein rej ke bar “ri karejar ro jet”? Aet, kõnke em̦m̦aan rein rej bar aikuj bõk ekkan ko ak katak ko rem̦ool jãn Baibõl̦. Kõn men in, kajjojo iaaer rej bar “ri karejar ro jet” ãinwõt kõj aolep, Kũrjin ro rem̦ool.

14. (1) Ta jerbal eo ekanooj aorõk kar lel̦o̦k ñan ri karejar eo etiljek im mãlõtlõt? Ewi wãween an kõm̦m̦ane jerbal in? (2) Ta naan in kakkõl eo Jijej ear lel̦o̦k ñan ri karejar eo etiljek im mãlõtlõt? (Lale bo̦o̦k eo etan, “Ak El̦aññe E Juon Ri Karejar Nana . . . ”)

¹⁴ Ilo iien ko etto, juon ri karejar eo im el̦ap an irooj eo an lõke ej bõk eddon jerbal ko ilo m̦weo im̦õn irooj eo an. Jerbal in an ej ãinl̦o̦k wõt jerbal eo an juon mãnija. (Luk 12:42, UBS) Ãindein, Jijej ear lel̦o̦k jerbal eo ekanooj aorõk ñan ri karejar eo etiljek im mãlõtlõt. Innem, ri karejar eo etiljek im mãlõtlõt ej lale ak bõk eddon aolep jerbal ko ijin ioon lal̦ me rej an Kũraij. Ewi wãween an kõm̦m̦ane men in? Ej ilo an lale jããn im kõjparok aolep men ko m̦weien Kũraij. Ej bar tõl jerbal in kwal̦o̦k naan im kõpooji katak ko me rej wal̦o̦k ilo kweilo̦k ko rel̦l̦ap. Bareinwõt, ej kõm̦m̦ani bok ko me rej pedped ioon Baibõl̦. Jej kõjerbali bok kein ilo kwal̦o̦k naan, ñe jej katak ippãd make im ñe jej kweilo̦k. Aolep “ri karejar ro jet” rej aikuji katak ko rem̦ool jãn Baibõl̦ me “ri karejar eo etiljek im mãlõtlõt” ej kõpooji im lil̦o̦k ñan er.

15, 16. Ñããt eo Jijej enaaj lel̦o̦k “men ko otemjej m̦weien” ñan ri karejar eo etiljek im mãlõtlõt?

¹⁵ Jerbal eo kein karuo Jijej ej lel̦o̦k ñan ri karejar eo etiljek im mãlõtlõt ej ñan “bõk eddon men ko otemjej m̦weien.” Em̦õj ke an Jijej kõm̦m̦ane men in? Jijej ear ba: “Enaaj kanooj in l̦ap an m̦õn̦õn̦õ ri karejar eo ñe irooj eo an ej jepl̦aaktok [ak itok] im lo an kõm̦m̦an ãindein! Em̦ool ij ba ñan kom̦, irooj eo enaaj likũt bwe ri karejar eo en bõk eddon men ko otemjej m̦weien.” (Matu 24:46, 47, UBS) Eoon in ej kwal̦o̦k bwe Jijej enaaj lel̦o̦k ñan ri karejar eo etiljek im mãlõtlõt men ko otemjej m̦weien ñe enaaj itok ak jepl̦aaktok im lo bwe ri karejar eo ej “kõm̦m̦an ãindein” ak lel̦o̦k katak ko rem̦ool ñan ri karejar ro jet. Mel̦el̦ein bwe enaaj wõr juon iien eaetok ikõtaan iien eo me Jijej ej lel̦o̦k jerbal eo ñan bõk eddon ri karejar ro jet im iien eo me ej lel̦o̦k jerbal eo ñan bõk eddon men ko otemjej m̦weien. Innem, ñããt Jijej enaaj lel̦o̦k “men ko otemjej m̦weien”? Im ewi wãween an naaj Jijej lel̦o̦k eddo in ñan ri karejar eo etiljek im mãlõtlõt? Eokwe, ñan uwaake kajjitõk kein ruo, jenaaj kiiõ bwebwenato kõn men kein: Ñããt eo Jijej enaaj jepl̦aaktok? Im ta ko rej men ko otemjej m̦weien?

¹⁶ Ñããt eo Jijej enaaj jepl̦aaktok? Jenaaj lo uwaak eo ñe jej riiti eoon ko m̦oktal̦o̦k ilo Matu jebta 24. Keememej bwe ilo eoon ko m̦oktal̦o̦k, rej kwal̦o̦k bwe Jijej ej “itok.” Ilo eoon kein, naan in “itok” ej jitõñl̦o̦k ñan iien eo Jijej ej itok ñan ekajete armej ro im ko̦kkure ro renana ilo jem̦l̦o̦kin jukjukun pãd in enana. (Lale kõmel̦el̦e 3.) * (Matu 24:30, 42, 44, UBS) Kõn men in, ilo waanjoñak eo kõn ri karejar eo etiljek im mãlõtlõt, iien eo me Jijej ej “jepl̦aaktok” ak “itok” ej iien eo me enaaj itok ilo eñtaan eo el̦ap.

17. Ta ko rej “men ko otemjej m̦weien” Jijej?

¹⁷ Ta ko rej “men ko otemjej m̦weien” Jijej? Men ko otemjej m̦weien rejjab men ko wõt ijin ioon lal̦ ak ebar koba men ko ilañ. Jejaam̦ ba men in? Jijej  ear ba: “Em̦õj letok ñan eõ aolepen maroñ otemjej in lañ im lal̦.” (Matu 28:18, UBS; Epesõs 1:20-23) Aolep “men ko otemjej m̦weien” Jijej ej bar koba Aelõñ ak Kien eo me ej irooj ie jãn kar iiõ eo 1914. Im Jijej enaaj lel̦o̦k maroñ ñan ri kapit ro bwe ren bar irooj ippãn ie.​—Revelesõn 11:15.

18. Etke Jijej enaaj m̦õn̦õn̦õ in lel̦o̦k ñan ri karejar eo etiljek im mãlõtlõt “men ko otemjej m̦weien”?

¹⁸ Jãn kiiõ ãliji men ko jaar etali. Ñe Jijej enaaj itok im jol̦o̦k nana otemjej ilo naaj eñtaan eo el̦ap, enaaj lo bwe ri karejar eo etiljek im mãlõtlõt ej tiljek ilo an kõpooj katak ko ilo iien eo ejejjet im lil̦o̦k ñan ri karejar ro jet. Ãlikin an lo bwe rej tiljek, enaaj kiiõ m̦õn̦õn̦õ in lel̦o̦k ñane jerbal eo kein karuo, ej eddo eo ñan lale “men ko otemjej m̦weien.” Ri kapit ro me rej ejaakin “ri karejar eo etiljek im mãlõtlõt,” renaaj bõk eddo in ñe renaaj bõk ãjinkõj eo aer ilañ im irooj ippãn Kũraij.

19. El̦apl̦o̦k ke ãjinkõj eo an ri karejar eo etiljek im mãlõtlõt jãn ri kapit ro jet? Jouj im kõmel̦el̦e.

 ¹⁹ El̦apl̦o̦k ke ãjinkõj eo an ri karejar eo etiljek im mãlõtlõt jãn ri kapit ro jet? Jaab. Jet iien juon armej emaroñ kõm̦m̦ane juon kallim̦ur ñan juon kumi edik, ak tokãlik ro jet rej bar del̦o̦ñ ilo kallim̦ur eo. Ñan waanjoñak, lale m̦õk kõn ta eo Jijej ear ba ñan rijjelõk ro 11 ilo boñõn eo m̦okta jãn an mej. (Riit Luk 22:28-30.) Jijej ear kallim̦uri kumi in edik bwe renaaj bõk ãjinkõj eo aer ilañ kõn aer tiljek wõt. Ãjinkõj in ej ñan irooj ippãn Jijej ilañ. Bõtab, jet iiõ tokãlik, Jijej ear ba bwe aolep 144,000 renaaj bar del̦o̦ñ ilo ãjinkõj in, renaaj aolep jijet ioon tũroon ko im irooj ippãn Jijej. (Revelesõn 1:1; 3:21, UBS) Ãindein, ilo Matu 24:47 (UBS), Jijej ej kallim̦ur bwe enaaj lel̦o̦k aolep men ko m̦weien ñan “ri karejar eo etiljek im mãlõtlõt.” Ri karejar in ej kumi in jet wõt em̦m̦aan ro me rej ri kapit. Bõtab, ilo m̦ool aolep ro uwaan 144,000 renaaj bar “bõk eddon men ko otemjej m̦weien” Kũraij.​—Revelesõn 20:4, 6.

20. (1) Etke Jijej ear kããlõt ri karejar eo etiljek im mãlõtlõt? (2) Ta eo jen peek ilo bũruod ñan kõm̦m̦ane?

²⁰ Ilo kar raan ko an rijjelõk ro, Jijej ear kõjerbal jet wõt em̦m̦aan ro ñan naajdik ak lel̦o̦k katak ko ñan elõñ. Ãindein, Jijej ej kõjerbal kumi in “ri karejar eo etiljek im mãlõtlõt” ñan naajdik ak letok katak ko rem̦ool ñan aolep rũkal̦oor ro an ilo raan kein. Jijej ear kããlõt ri karejar eo etiljek im mãlõtlõt im ej kõjerbale kumi in bwe en kõpooji katak ko ilo iien eo ejejjet im lil̦o̦ki ñan aolep ri kapit ro im jiip ro jet. Im ej ãindein an kõm̦m̦ane men in ilo aolepen raan kein ãliktata. Kõn men in, jen peek ilo bũruod ñan kwal̦o̦k ad kam̦m̦oolol ri karejar eo etiljek im mãlõtlõt ikijjeen ad rejetake pepe ko an kumi in.​—Hibru 13:7, 17.