‘Ãnda n yaa tʋm-tʋmd sẽn tũud sɩd la sẽn tar yamã?’
“Ãnda n yaa tʋm-tʋmd sẽn tũud sɩd la sẽn tar yam, t’a Zu-soabã kõ-a noor t’a ges a zak yelle?”—MAT. 24:45.
1, 2. Yaa ãnda la a Zezi tũnugd ne rũndã-rũndã n sõngd tõndo, la bõe yĩng tɩ tar yõod wʋsg tɩ d bãng-a?
SAAM-BI-POAK n gʋls lɛtr n tool saam-biis nins sẽn tʋmd biru ning sẽn get d tʋʋmdã yell dũniyã gill zugã, n na n pʋʋs-b barka. A yeela woto: “Yãmb sõss nins m sẽn karem tɩ kell n yɩ bũmb ning m sẽn da ratã bal kɛpɩ wã yaa wʋsgo, tɩ m pa tõe n sõd n sa ye.” Tõnd sʋkã, wʋsg tagsda woto. La rẽ pa segd n ling tõnd ye.
2 D paamdame tɩ b sõngd tõnd tɩ d wʋmd Gʋlsg Sõamyã võor sõma. Sõngrã sẽn zems a wakatã wilgdame t’a Zezi sẽn yaa tigingã zu-soabã geta d yell wa a sẽn pʋlmã. La ãnd dãmb la a tũnugd ne n maand rẽ? A sẽn wa n gomd yaoolem wakatã yellã, a wilgame t’a ra na n wa yãka “tʋm-tʋmd sẽn tũud sɩd la sẽn tar yam,” t’a ges a zakã bɩ a tẽedbã yelle, n sõng-b tɩ b wʋm Gʋlsg Sõamyã võor sõma. (Karm-y Matɩe 24:45-47.) Yaa tʋm-tʋmd sẽn tũud sɩdã la a Zezi tũnugd ne n sõngd kiris-neb hakɩkã yaoolem wakatã. Tara yõod wʋsg tɩ d bãng tʋm-tʋmd sẽn tũud sɩdã sẽn yaa a soaba. Bala yaa yẽ n tõe n sõng-d tɩ d paam tẽeb sẽn tar pãnga, la zood sõma ne Wẽnnaam.—Mat. 4:4; Zã 17:3.
3. Wãn to la d ra wʋmd yel-bũnd ning sẽn gomd tʋm-tʋmd sẽn tũud sɩd yellã võore?
3 La a Zezi yel-bũnd ning sẽn gomd tʋm-tʋmd sẽn tũud sɩd yellã võor yaa bõe? Tõnd sɛbã pʋsẽ, d ra yeta woto: Yʋʋmd 33 Pãntekotã, a Zezi yãka tʋm-tʋmd sẽn tũud sɩdã t’a na n ges a zakã yelle. Rẽ tɛka, tʋm-tʋmdã makda kiris-neb nins fãa sẽn paam vʋʋsem sõngã zaeeb n be tẽng zugã. Zakã nebã yaa sẽn paam-b vʋʋsem sõng zaeebã yembr-yembre. D ra yetame me tɩ yʋʋmd 1919 wã, a Zezi kõo tʋm-tʋmd sẽn tũud sɩdã noor t’a yɩ a “zakã fãa yel-gɛta,” n ges a paoongã sẽn yaa bũmb nins fãa sẽn be tẽngã zug n teend Rĩungã yelle. La d sẽn maag d yĩng n lebs n vaees a Zezi goamã, n pʋʋs la d bʋgse, d bãngame tɩ tõnd sẽn tagsd bũmb ning tʋm-tʋmd sẽn tũud sɩd la sẽn tar yamã zugã segda ne toeengo. (Yel. 4:18) D na n goma yel-bũndã pidsg yelle, la d ges rẽ sẽn nafd sẽn na n tɩ vɩɩmd-b saasẽ wã, la sẽn na n vɩɩmd-b tẽngã zugã to-to.
WAKAT BƲG LA A ZEZI GOMDÃ PIDS-YÃ?
4-6. Bõe n wilgd t’a Zezi sẽn yeel bũmb ning tʋm-tʋmd sẽn tũud sɩdã zugã sɩnga pidsg yʋʋmd 1914 poore?
4 Bũmb ning sẽn be Matɩe sak 24 vɛrse-rãmb a taab pʋsẽ wã wilgdame t’a Zezi sẽn yeel tʋm-tʋmd sẽn tũud sɩdã zugã pa sɩng pidsg yʋʋmd 33 Pãntekotã ye. Sɩnga pidsg saabã wakate. Bɩ d ges bũmb ning sẽn kɩt tɩ d yet woto.
5 Yaa a Zezi sẽn wa n wilgd ‘bãnd ning sẽn na n wilg yẽ waoongo, la dũniyã sɛɛb wakatã’ la a gom tʋm-tʋmd sẽn tũud sɩdã yelle. (Mat. 24:3) A bãngr-gomdã pipi babgã sẽn be Matɩe 24:4-22 pidsa naoor a yiibu. Reng n pidsa yʋʋmd 33 ne yʋʋmd 70 wã sʋka. La pidsg a to wã na n yɩɩ tõnd wakatã, dũniyã gill zugu. Woto rat n yeelame t’a Zezi sẽn yeel bũmb ning tʋm-tʋmd sẽn tũud sɩdã zugã me na n pidsa naoor a yiib bɩ? Ayo.
6 Matɩe 24:29 wã tɛk n tar n dabda, a Zezi goma bũmb nins sẽn na n zĩnd tõnd wakatã yell n yɩɩda. (Karm-y Matɩe 24:30, 42, 44.) A goma bũmb ning sẽn na n zĩnd to-kãsengã sasa, n yeel tɩ nebã ‘na n yãa Ninsaal Biigã sẽn wate.’ Rẽ poore, a yeela sẽn na n vɩɩmd-b yaoolem wakatã sasa wã woto: ‘Yãmb ka mi daar ning yãmb Zu-soabã sẽn na n wa ye.’ La tɩ ‘Ninsaal Biigã wata wakat ning yãmb sẽn ka tẽeda.’ (Ges-y pipi vẽnegrã.) Rẽnd yaa a Zezi sẽn wa n gomd bũmb nins sẽn na n zĩnd yaoolem wakatã yellã la a gom tʋm-tʋmd sẽn tũud sɩdã yelle. Yaa vẽeneg t’a Zezi sẽn yeel bũmb ning tʋm-tʋmd sẽn tũud sɩdã zugã sɩnga pidsg yaoolem wakatã sɩngr poore, rat n yeel tɩ yʋʋmd 1914 poore. Woto sɩd zemsame. Bõe yĩng tɩ d yet woto?
7. Tigsgã sɩngrẽ, sok-bʋg leoor n da tar yõodo, la bõe yĩnga?
7 Tẽeg-y t’a Zezi sokame tɩ ‘ãnda n yaa tʋm-tʋmd sẽn tũud sɩd la sẽn tar yamã?’ Pipi kiris-nebã wakatẽ, nebã ra pa na n sok b mens woto ye. Wa d sẽn yã sõsg ning sẽn loogã pʋgẽ wã, tʋm-tʋmdbã ra tõe n maana yel-soalma, la b kɩt tɩ neb a taab paam vʋʋsem sõngã kũun menga. Woto ra wilgdame t’a Zeova bee ne-ba. (Tʋʋ. 5:12) Rẽnd kiris-nebã ra pa sokd b mens n dat n bãng neb nins Kiristã sẽn yãk tɩ b lʋɩt b taoorã ye. La yʋʋmd 1914 tɩ yɛlã ra yaa toor fasɩ. Yʋʋm-kãng la tigsgã sɩng-yã. Wakat ra taame tɩ b na n welg nadensã ne ki wã. (Mat. 13:36-43) La rẽ tɩ neb wʋsg n da yet tɩ b yaa kiris-neb n yaool n pa kiris-neb hakɩk ye. Wakat kãnga, sokr ning sẽn da tar yõodã la woto: Wãn to la d tõe n bãng kiris-neb nins sẽn paam vʋʋsem sõng zaeebã b sẽn mak ne ki wã n bake? Yel-bũnd ning sẽn gomd tʋm-tʋmd sẽn tũud sɩd yellã sõngdame tɩ d paam sokrã leoore. Sẽn paam-b zaeebã ra na n yɩɩ b rãmb nins sẽn paamd tɩ b sõngd-b tɩ b wʋmd Gʋlsg Sõamyã võor sõma wã.
ÃNDA N YAA TƲM-TƲMD SẼN TŨUD SƖD LA SẼN TAR YAMÃ?
8. Bõe yĩng tɩ d tõe n yeel tɩ tʋm-tʋmd sẽn tũud sɩdã segd n yɩɩ kiris-neb sẽn paam vʋʋsem sõngã zaeebo?
8 Tʋm-tʋmd sẽn tũud sɩdã segd n yɩɩ kiris-neb sẽn paam vʋʋsem sõngã zaeeb n be tẽngã zugu. Biiblã yeelame tɩ sẽn paam-b vʋʋsem sõng zaeebã yaa “naam maan-kʋʋdba,” la tɩ b yãk-b lame tɩ b moon n wilg nebã Wẽnnaam “bõn-sõma wã fãa.” (1 Pɩɛ. 2:9) Rẽnd zemsame tɩ neb sẽn yaa ‘naam maan-kʋʋdb’ lʋɩ taoor n zãms b tẽed-n-taasã Wẽnnaam goamã.—Mal. 2:7; Wil. 12:17.
9. Yaa sẽn paam-b vʋʋsem sõng zaeebã fãa n yaa tʋm-tʋmd sẽn tũud sɩdã bɩ? Wilg-y y leoorã võore.
9 La rẽ yĩnga yaa sẽn paam-b vʋʋsem sõngã zaeeb n be tẽngã zugã fãa n yaa tʋm-tʋmd sẽn tũud sɩdã bɩ? Ayo. Pa b fãa n sõngd b tẽed-n-taasã sẽn be dũniyã gill zugã tɩ b wʋmd Gʋlsg Sõamyã võor sõma ye. Yaa sɩd tɩ kẽer yaa kãsemb-sõngdb wall kãsem-dãmb tigimsã pʋsẽ. Nin-kãens zãmsda nebã zak-zak moonegã sasa la tigimsã pʋsẽ. B tũuda sor-wilgr ning siglgã taoor lʋɩtb sull sẽn kõtã me. La b pa sõngd b tẽed-n-taasã sẽn be dũniyã gill zugã tɩ b wʋmd Gʋlsg Sõamyã võor sõma ye. Saam-bi-pogs me n paam vʋʋsem sõngã zaeebo. La b sẽn yaa sik-m-mens rãmbã, b pa baood n yɩ karen-saam-dãmb tigingã pʋgẽ ye.—1 Kor. 11:3; 14:34.
10. Ãnd n yaa tʋm-tʋmd sẽn tũud sɩd la sẽn tar yamã?
10 La ãnd n yaa tʋm-tʋmd sẽn tũud sɩd la sẽn tar yamã? A Zezi sẽn sɩng n tũnugd ne neb bilf n sõngd neb wʋsgã, rẽnd tʋm-tʋmdã yaa sul-bil sẽn yaa kiris-neb sẽn paam vʋʋsem sõngã zaeebo. B naaga taab yaoolem wakatã, n maand bũmb toor-toor n sõngd kiris-nebã tɩ b wʋmd Gʋlsg Sõamyã võor sõma. Yaoolem wakatã sɩngr tɛka, kiris-neb nins sẽn naag taab n yaa tʋm-tʋmd sẽn tũud sɩdã tʋmda biru ning sẽn get d tʋʋmdã yell dũniyã gill zugã pʋgẽ. Rũndã-rũndã, tʋm-tʋmd sẽn tũud sɩdã yaa a Zeova Kaset rãmbã Siglgã taoor lʋɩtb Sulli. La bõe yĩng t’a Zezi gom “tʋm-tʋmd” a ye yelle? Bala Siglgã taoor lʋɩtb Sullã neb naagda taab n dɩkd sard buud fãa.
ZAKÃ NEBÃ YAA ÃND DÃMBA?
11, 12. a) A Zezi yel-bũndã pʋgẽ, tʋʋm a yi la b kõ tʋm-tʋmd sẽn tũud sɩd la sẽn tar yamã. Yaa bʋse? b) Wakat bʋg la a Zezi kõ tʋm-tʋmd sẽn tũud sɩdã noor t’a ges a zakã yelle, la ãnd dãmb la a yãk-yã?
11 Tẽeg-y t’a Zezi yel-bũndã pʋgẽ, b kõo tʋm-tʋmdã tʋʋm a yiibu. Pipi, a segd n gesa a zu-soabã zak yelle. Yiib-n-soaba, a zu-soabã na n gũnug-a-la a paoongã fãa. Yaa saabã wakate, rat n yeel t’a Zezi sẽn wat n sɩng a naamã rɩɩbã la yel-bũndã sẽn gomd bũmb ninsã na n zĩndi. Rẽnd yaa yʋʋmd 1914 poor la b na n kõ tʋm-tʋmdã tʋʋm a yiibã fãa.
12 Wakat bʋg la a Zezi kõ tʋm-tʋmdã noor t’a ges a zakã yelle? Bɩ d tẽeg yɛlã sẽn yɩ to-to yʋʋmd 1914 sẽn yɩ tigsgã sɩngrã. Wa d sẽn zoe n yã wã, sasa kãng tɩ tũudum wʋsg neb n da yet tɩ b yaa kiris-neba. La tũudum kãens sʋkã, bʋg la a Zezi ra na n yãk t’a yɩ tʋm-tʋmd sẽn tũud sɩdã? Sẽn na yɩl n bãng rẽ, yẽ ne a Ba wã waame n na n ges sull bʋg neb n sɩd maand Wẽnnaam daabã. B sɩnga rẽ maaneg yʋʋmd 1914, n baas yʋʋmd 1919 wã. (Ges-y vẽnegr a 2.) (Mal. 3:1) B sũy yɩɩ noog ne sul-bil b sẽn da boond tɩ Biiblã Zãmsdba, bala nin-kãens ra wilgdame tɩ b nonga a Zeova la a Gomdã. Baasgo, yɩɩ tɩlae tɩ b rems-b wakat bilf pʋgẽ. La bãmb me sika b mens n sak remsgã. (Mal. 3:2-4) Biiblã Zãmsdbã n da yaa kiris-neb hakɩkã a Zezi sẽn mak ne ki wã. Yʋʋmd 1919 wã, a Zezi yãka b sʋkã kẽer sẽn tar minim tɩ b naag taab n yɩ tʋm-tʋmd sẽn tũud sɩd la sẽn tar yamã, n ges a zakã yelle.
13. Ãnd dãmb me n yaa zu-soabã zak neba? Wilg-y y leoorã võore.
13 Ãnd dãmb n yaa zakã neba? Koɛɛg-koɛɛga, yaa neb nins sẽn paamd tɩ b sõngd-b tɩ b wʋmd Gʋlsg Sõamyã võor sõma wã. Yaoolem wakatã sɩngrẽ, nin-kãensã fãa ra paama vʋʋsem sõngã zaeebo. La kaoosg zugẽ, kʋʋn-kãsengã neb sẽn yaa piis a taabã wa n naaga zakã nebã. Rũndã-rũndã, piis a taabã sẽn be Kiristã yãgrẽ wã sõor n yɩɩd sẽn paam-b vʋʋsem sõng zaeebã. (Zã 10:16) Sul a yiibã fãa paamda zãms-yɛng sẽn yit tʋm-tʋmd sẽn tũud sɩdã nengẽ. La siglgã taoor lʋɩtb sull neb sẽn yaa tʋm-tʋmd sẽn tũud sɩdã yẽ? Bãmb me ratame tɩ b sõng-b tɩ b wʋm Gʋlsg Sõamyã võor sõma. Rẽ n so tɩ b miẽ tɩ b ned kam fãa yaa zakã neb wa kiris-neb a taabã.
D saagd n na n wa tɩ vɩɩmda saasẽ tɩ yaa tẽngã zug me, d fãa yaa zakã neba, n dat tɩ b sõng-d tɩ d wʋm Gʋlsg Sõamyã võor sõma
14. a) Tʋʋm-bʋg la a Zezi bobl tʋm-tʋmd sẽn tũud sɩd la sẽn tar yamã, la rẽ baooda bõe maanego? b) A Zezi keooga tʋm-tʋmd sẽn tũud sɩd la sẽn tar yamã n yeel tɩ bõe? (Ges-y zĩ-gũbr ning gom-zug sẽn yaa: “Yẽ sã n yaa tʋm-tʋmd-wẽnga . . .”)
14 A Zezi bobla tʋm-tʋmd sẽn tũud sɩd la sẽn tar yamã tʋʋm-kãsenga. Pĩnd wẽndẽ wã, yaa tʋm-tʋmd a woto la zu-soab ra yãkd t’a yɩ a zakã fãa yel-gɛta. (Luk 12:42) Woto me, Kiristã kõo tʋm-tʋmd sẽn tũud sɩd la sẽn tar yamã noor t’a ges bũmb nins fãa a sẽn so tẽngã zugã yelle. Wala makre, tʋm-tʋmdã n get Rĩungã rot la rot a taab yelle, tʋʋm-teedo, koɛɛgã moonego, tigis-kãsemsã sõssa, sɛbã b sẽn yiisd koe-moonegã la tigingã neb zãmsg yĩngã yelle. Zu-soabã zakã neb teega bũmb nins fãa tʋm-tʋmd sẽn tũud sɩdã sẽn maand n sõngd-b tɩ b wʋmd Gʋlsg Sõamyã võor sõma wã.
WAKAT BƲG LA ZU-SOABÃ NA N GŨNUG A PAOONGÃ FÃA TƲM-TƲMDÃ?
15, 16. Wakat bʋg la a Zezi na n gũnug a paoongã fãa tʋm-tʋmd sẽn tũud sɩdã?
15 Wakat bʋg la a Zezi na n kõ tʋm-tʋmdã tʋʋm a yiib-n-soabã sẽn yaa gũnug-a a paoongã fãa wã? A Zezi yeela woto: “Bark bee tʋm-tʋmd kãng zugu, a zu-soabã sẽn na n wa n mik t’a maanda woto. Mam yeta yãmb sɩd tɩ yẽ na [“gũnug-a a paoong fãa,” Sebr Sõngo].” (Mat. 24:46, 47) Dẽnd yaa a Zezi sã n wa n mik tɩ tʋm-tʋmdã “maanda woto,” rat n yeel tɩ n sõngd kiris-nebã tɩ b wʋmd Gʋlsg Sõamyã võor sõma la a na n kõ-a tʋʋmd a yiib-n-soabã. Rẽnd a pa kõ tʋm-tʋmdã tʋʋm a yiibã fãa wakat yɛng ye. Sẽn na yɩl n bãng wakat ning a Zezi sẽn gũnug a paoongã fãa tʋm-tʋmdã, la a sẽn maan rẽ to-to wã, d segd n bãnga bũmb a yiibu: A waoongã wakate, la a paoongã fãa wã sẽn yaa bũmb ninga.
16 Wakat bʋg la a Zezi wata? Bũmb nins yell a Zezi sẽn deng n gomã sõngd-d lame tɩ d bãng rẽ. Tẽeg-y t’a sẽn gom a waoongã yellã, yaa wakat ning a sẽn na n wa kao nebã bʋʋd dũniyã saab wakat la a sɩbg-bã yell la a ra gomda. (Ges-y vẽnegr a 3.) (Mat. 24:30, 42, 44) Dẽnd a Zezi waoongã yell a sẽn gom tʋm-tʋmd sẽn tũud sɩdã yel-bũndã pʋgẽ wã na n yɩɩ to-kãsengã sasa.
17. A Zezi ‘paoongã fãa’ wã yaa bõe?
17 A Zezi ‘paoongã fãa’ wã yaa bõe? Pa dũniyã zug ka bal la a paoongã be ye. A paoong kẽer bee saasẽ. Daar a yembre, a Zezi yeela woto: “B kõo maam pãng fãa sẽn be [“saasẽ,” MN] la sẽn be dũniyã.” (Mat. 28:18; Ef. 1:20-23) Yʋʋmd 1914 tɛka, Mesi Rĩungã me lebga a paoongo, t’a na n wa kɩt tɩ kiris-neb nins sẽn paam vʋʋsem sõng zaeebã naag-a n dɩ naam.—Wil. 11:15.
18. Bõe yĩng t’a Zezi na n gũnug a paoongã fãa tʋm-tʋmd sẽn tũud sɩdã?
18 D na n kʋmsame n yeel tɩ bõe? A Zezi sã n wa na n sãam nin-wẽnsã to-kãsengã sasa, a na n mikame tɩ tʋm-tʋmd sẽn tũud sɩdã sõngda zakã neb tɩ b wʋmd Gʋlsg Sõamyã võor sõma. Wakat kãng la a na n kõ-a tʋʋmd a yiib-n-soabã, sẽn yaa gũnug-a a paoongã fãa wã. Kiris-neb nins sẽn naag taab n yaa tʋm-tʋmd sẽn tũud sɩdã na n paama tʋʋm-kãng wakat ning b sẽn wat n kẽng saasẽ n tɩ naag Kiristã n dɩt naamã.
19. Rẽ yĩnga tʋm-tʋmd sẽn tũud sɩdã keoor na n yɩɩ kãseng n yɩɩg kiris-neb a taab nins sẽn paam vʋʋsem sõng zaeebã bɩ? Wilg-y y leoorã võore.
19 Rẽ yĩnga kiris-neb nins sẽn naag taab n yaa tʋm-tʋmd sẽn tũud sɩdã keoor na n yɩɩ kãseng n yɩɩg kiris-neb a taab nins sẽn paam vʋʋsem sõng zaeebã bɩ? Ayo. Bala, b tõe n pʋlma neb bilf bũmbu, tɩ neb a taab me wa paam bõn-kãnga. Tẽeg-y bũmb ning a Zezi sẽn pʋlem a tʋm-tʋmdb 11 wã yʋng ning b sẽn yõk-a wã. (Karm-y Luk 22:28-30.) A yeela nin-kãensã tɩ b sẽn kell n pa ne-a wã, b na n paama keoor sẽn yaa kãsenga. A pʋlm-b lame tɩ b na n wa naaga yẽ n dɩ naam saasẽ. La kaoosg zugẽ, a yeela bũmb sẽn wilgd tɩ neb 144000 fãa na n naaga yẽ n dɩ naam. (Wil. 1:1; 3:21) Woto me, wa Matɩe 24:47 sẽn wilgã, a Zezi pʋlma kiris-neb nins sẽn naag taab n yaa tʋm-tʋmd sẽn tũud sɩdã t’a na n gũnug-b-la a paoongã fãa. Nin-kãens sõorã yaa bilfu. La neb 144000 fãa na n naaga taab n ges Kiristã paoong fãa yell saasẽ.—Wil. 20:4, 6.
Neb 144000 fãa na n naaga a Zezi n dɩ naam saasẽ (Ges-y sull 19)
20. Bõe yĩng t’a Zezi yãk tʋm-tʋmd sẽn tũud sɩdã, la bõe la d rat n maan wakat fãa?
20 Wa a Zezi sẽn tũnug ne neb bilf n sõng neb wʋsg pipi kiris-nebã wakatẽ wã, a tũnugda ne tʋm-tʋmd sẽn tũud sɩd la sẽn tar yamã n sõngd neb wʋsg rũndã-rũndã. A Zezi yãka tʋm-tʋmd sẽn tũud sɩdã sẽn na yɩl tɩ b sõng sẽn paam-b zaeebã la piis a taabã fãa tɩ b wʋmd Gʋlsg Sõamyã võor sõma yaoolem wakatã. Bɩ d wilg wakat fãa tɩ d sũur yaa noog ne rẽ, n teend kiris-neb nins sẽn naag taab n yaa tʋm-tʋmd sẽn tũud sɩd la sẽn tar yamã ne d sũur fãa.—Heb. 13:7, 17.
Sull a 6: Gɛrkã gom-bil ning b sẽn lebg Matɩe 24:42 tɩ “wa” wã ne gomd ning b sẽn lebg vɛrse 44 tɩ ‘watã’ yaa a ye. La a yaa toor ne gɛrkã gom-bil ning b sẽn lebg Matɩe 24:3 pʋgẽ tɩ ‘waoongã.’ Matɩe 24:3 gomda Kiristã sẽn na n wa sɩng naam dɩɩb saasẽ wã yelle, tɩ vɛrse 42 ne 44 gomd a sẽn na n wa sãam nin-wẽnsã yelle.
Sull 12: Ges-y sõsgã ning sẽn yaa: ‘Gese, mam bee ne yãmb wakat fãa,’ seb-neng 16-18, sull a 5-8.
Sull 16: Ges-y sõsgã ning sẽn yaa: ‘Bɩ y togs tõnd bõn-kãens sẽn na n zĩnd wakat ninga,’ seb-neng 13-14, sull 14-18.
