1, 2. Yesu naaturiisa kurabira omuri baahi, kandi ahabw’enki tushemereire kubamanya?

“AB’EISHE-EMWE, tindikwijuka emirundi ei mumpaire ebitabo ebiine ebicweka ebirimu obuhabuzi oburikwizira omu bwire obu ndikuba nimbwenda.” Okwo nikwo munyaanyazi-itwe omwe yaahandiikiire ab’eishe-emwe abarikuheereza aha ofiisi yaitu enkuru, arikworeka okusiima kwe. Naiwe orayehuriireho otyo? Baingi ahariitwe turehuriireho tutyo. Mbwenu ekyo kishemereire kututangaaza? Ngaaha buzima.

² Eby’okurya by’omwoyo ebi turikutunga, n’obuhame ngu Yesu Omutwe gw’ekibiina naahikiiriza okuraganisa kwe kuguma naaturiisa. Naaturiisa kurabira omuri baahi? Obu Yesu yaaha akamanyiso k’okubaho kwe, akagira ngu akaba naija kukoresa ‘omwambari ow’okwesigwa kandi ow’obwengye’ kuha ab’omu ka ye eby’okurya “omu bunaku obuhikire.” * (Shoma Matayo 24:45-47.) Omwambari ogwo omwesigwa niwe Yesu arikukoresa kuriisa abakuratsi be ab’amazima omu bunaku obu obw’emperu. Ni kikuru munonga ngu tumanye omwambari ogwo. Omukago gwaitu na Yehova nigurugiirira aha kutunga eby’okurya eby’omwoyo kurabira omu mwambari omwesigwa.​—Mat. 4:4; Yoh. 17:3.

3. Ebitabo byaitu bibaire nibishoboorora bita enfumu erikukwata aha mwambari omwesigwa?

³ Enfumu ya Yesu erikukwata aha mwambari neemanyisa ki? Enyima, ebitabo byaitu bibaire nibyoreka ngu aha Pentekoote omu gwa 33, Yesu nibwo yaatsigira omwambari ab’omu ka ye. Bibaire nibigira ngu omwambari ogwo n’Abakristaayo boona abashukirweho amajuta abatwire nibabaho omu nsi kwiha omu mwaka ogwo. Kandi ngu ab’omu ka ye ni buri Mukristaayo oshukirweho amajuta. Reero ngu omuri 1919, Yesu nibwo yaakwatsa omwambari “ebi atungire byona,” ekirikumanyisa byona ebiri omu nsi ebirikukoresibwa omu kushagika omurimo gw’Obukama. Kwonka bwanyima y’okushaba n’okushwijuma  gye ebigambo bya Yesu ebirikukwata aha mwambari ow’okwesigwa kandi ow’obwengye, tureebire ngu enyetegyereza egyo eine kuhindurwamu. (Enf. 4:18) Ka tushwijume enfumu egyo tureebe n’oku erikutukwataho twena yaaba twine amatsiko g’okuza omu iguru nari ag’okutuura aha omu nsi.

4-6. Ahabw’enki kihikire kugira ngu enfumu ya Yesu erikukwata aha mwambari omwesigwa ekatandika kuhikiirira bwanyima y’omwaka 1914?

⁴ Enyiriri ezindi eza Matayo 24, nizooreka ngu ebiri omu nfumu egyo tibiratandikire kuhikiirizibwa aha Pentekoote omu gwa 33, kureka omu biro by’emperu. Ka tureebe oku Ebyahandiikirwe birikutuhwera kwetegyereza eki.

⁵ Enfumu y’omwambari omwesigwa ni kimwe aha biri omu bunabi bwa Yesu oburikukwata aha kamanyiso k’okubaho kwe, n’ak’obunaku, obu ensi egi erihwaho. (Mat. 24:3) Kimwe aha biri omu bunabi obu oburi omu Matayo 24:4-22, kikahikiirira omu bicweka bibiri. Eky’okubanza, kikahikiirira omu gwa 33 kuhika omu gwa 70, kandi ekya kabiri nikiija kuhikiirira omu bwijwire omu bunaku bwaitu. Mbwenu shi eki nikimanyisa ngu ebigambo bya Yesu ebirikukwata aha mwambari bikaba nibiija kuhikiirizibwa omu bicweka bibiri? Ngaaha.

⁶ Ebigambo ebiri omuri Matayo 24:29, Yesu akata omutima aha byabaire nibiija kubaho omu bunaku bwaitu. (Shoma Matayo 24:30, 42, 44.) Arikugamba aha byabaire nibiija kubaho omu bunaku bw’okubonabona kwingi, akagira ngu abantu “baryareeba Omwana w’omuntu naizira omu bicu by’omu iguru.” Kandi arikugamba ahari abo abaakubaire bariho omu biro by’emperu akagira ati: “Mugume nimureeba, ahakuba timurikumanya kiro eki Mukama waanyu ariiziraho” kandi, “obunaku obu mutarikuteekateeka, nibwo Omwana w’omuntu ariiziramu.” * Bwanyima y’okugamba aha byakubaireho omu biro by’emperu, Yesu akacwa enfumu erikukwata aha mwambari omwesigwa. N’ahabw’ekyo, nikyeyoreka gye ngu ebigambo bye ebirikukwata aha mwambari omwesigwa bikatandika kuhikiirira bwanyima y’ebiro by’emperu kutandika omuri 1914. Enyetegyereza egi ehikire. Ahabw’enki?

7. Hakabaho kibuuzo ki obu eigyesha ryatandika, kandi ahabw’enki?

⁷ Teekateeka aha kibuuzo eki: “Ni mwambari ki ow’okwesigwa kandi ow’obwengye?” Omu kyasha ky’okubanza kikaba kitarikwetengyesa kubuuza ekibuuzo ekyo. Nk’oku tureebire omu kicweka ekihweire, entumwa bakaba nibakora eby’okutangaaza kandi barikuha n’abandi ebiconco by’omwoyo kworeka ngu nibo Ruhanga yaabaire naakoresa. (Byak. 5:12) N’ahabw’ekyo hakaba hatariho owaabaire naabaasa kubuuza ati: N’oha buzima ou Kristo yaatooraine kwebembera ekibiina? Kwonka omuri 1914, embeera zikahindukira kimwe. Eigyesha rikatandika omu mwaka ogwo. Obwire bw’okutoorana oburo omu nkyenzi bukaba buhikire. (Mat. 13:36-43) Obu eigyesha ryatandika, hakaba hariho Abakristaayo baingi ab’ebishuba. N’ahabw’ekyo hakabaho ekibuuzo kikuru eki: Abakristaayo ab’amazima bakaamanyirwe bata? Enfumu y’omwambari omwesigwa ekabahwera kutunga eky’okugarukamu. Abakuratsi ba Kristo abashukirweho amajuta nibo baakubaire nibatunga eby’okurya eby’omwoyo.

8. Ahabw’enki kihikire kugira ngu abarikuheereza nk’omwambari omwesigwa baine kuba bari Abakristaayo abashukirweho amajuta?

⁸ Abo abarikuheereza nk’omwambari omwesigwa baine kuba bari Abakristaayo abashukirweho amajuta. Abo nibeetwa ‘abanyamurwa b’obukama’ kandi nibaragiirwa “kworeka oburungi bw’Owaabeetsire okuruga omu mwirima, okutaaha omu mushana gwe ogurikutangaaza.” (1 Pet. 2:9) Kihikire  kugira ngu abo abarikuheereza ‘nk’abanyamurwa b’obukama’ nibo baine obujunaanizibwa bw’okwegyesa ab’eishe-emwe bagyenzi baabo amazima.​—Mal. 2:7; Kush. 12:17.

9. Mbwenu shi abashukirweho amajuta boona nibaheereza nk’omwambari omwesigwa? Shoboorora.

⁹ Mbwenu shi abashukirweho amajuta boona abari omu nsi nibaheereza nk’omwambari omwesigwa? Ngaaha. Amazima gari ngu ti boona abashukirweho amajuta ngu baine obujunaanizibwa bw’okuriisa ab’eishe-emwe bagyenzi baabo omu by’omwoyo. Omuri abo abashukirweho amajuta harimu abarikuheereza nk’abareeberezi nari nk’abaheereza omu bibiina ebi barimu. Nibeegyesa abantu omu kubuurira enju aha nju, kandi bakuratira obuhabuzi oburikuruga aha ofiisi enkuru. Kwonka tibarikwejumba omu kuriisa ab’eishe-emwe omu nsi yoona omu by’omwoyo. Kandi omu bashukirweho amajuta harimu banyaanyazi-itwe, kwonka tibarikuteekateeka ngu baine kuheebwa obujunaanizibwa bw’okwegyesa omu kibiina.​—1 Kor. 11:3; 14:34.

10. Omwambari omwesigwa kandi ow’obwengye n’oha?

¹⁰ Mbwenu shi, omwambari omwesigwa n’oha? Nk’oku Yesu yaagaburiire baingi kurabira omuri bakye, bakye aha b’eishe-emwe abashukirweho amajuta nibo abarikwejumba omu kutebeekanisa eby’omwoyo kandi bakabigaburira abandi omu bunaku bw’okubaho kwa Kristo. Okuruga obu ebiro by’emperu byatandika, ab’eishe-emwe abashukirweho amajuta abarikuheereza nk’omwambari batwire nibaheereza hamwe aha ofiisi yaitu enkuru. Omu myaka egi, omwambari ogwo atwire naamanywa nk’Akakiiko Akareeberezi ak’Abajurizi ba Yehova. Kwonka yetegyereze ngu Yesu omu nfumu ye akagira ngu “omwambari” akaabaire omwe. N’ahabw’ekyo abari aha Kakiiko Akareeberezi butoosha nibacwamu hamwe.

11, 12. (a) Ni bujunaanizibwa ki bw’emiringo ebiri obu omwambari omwesigwa kandi ow’obwengye yaakuhairwe? (b) Ni ryari obu Yesu yaatoorana omwambari omwesigwa kandi ow’obwengye, kandi akatoorana baahi?

¹¹ Yetegyereze ngu omu nfumu ya Yesu, omwambari omwesigwa kandi ow’obwengye akaatsigiirwe obujunaanizibwa emirundi ebiri. Ogw’okubanza akatsigirwa ab’omu ka ye, kandi ogwa kabiri naaza kutsigirwa ebi mukama we aine. Obu enfumu egyo erikuhikiirizibwa omu biro by’emperu byonka, ebyo byombi Yesu akaabikozire yaatandika kutegyeka nk’Omugabe omuri 1914.

 ¹² Yesu akatsigira ryari omwambari ab’omu ka ye? Kubaasa kugarukamu ekibuuzo ekyo, twine kwijuka ebyabaireho omuri 1914 obu eigyesha ryatandika. Nk’oku twegire, omu bwire obwo ebibiina bingi bikaba nibyetwara kuba Ebikristaayo. Mbwenu omuri ebyo ni kiiha eki Yesu yaakutoorainemu omwambari omwesigwa? Ekibuuzo ekyo kikagarukwamu obu Yesu na Ishe baashwijuma hekalu y’eby’omwoyo, kuruga 1914 kuhika ahagati ya 1919. * (Mal. 3:1) Bakashemererwa kushanga hariho ekibiina kimwe eky’Abeegi ba Baibuli abaayorekire ngu buzima nibakunda Yehova hamwe n’Ekigambo kye. Hatariho kubangaanisa, Abeegi ba Baibuli abo bakaba baine kushemezibwa, kandi bakaikiriza obuhabuzi obwabahairwe omu bunaku obwo. (Mal. 3:2-4) Abo nibo baabaire bari Abakristaayo ab’amazima. Omuri 1919, Yesu akatoorana bamwe aha b’eishe-emwe abashukirweho amajuta yaabatsigira obujunaanizibwa bw’okuheereza nk’omwambari omwesigwa kandi ow’obwengye kuriisa ab’omu ka ye.

13. Ab’omu ka ya Yesu nibatwariramu baahi, kandi n’ahabw’enki?

¹³ Mbwenu shi ab’omu ka ye ni baahi? N’abo abarikuheebwa eby’okurya. Obu ebiro by’emperu byatandika, ab’omu ka ye boona bakaba bashukirweho amajuta. Bwanyima, ab’omu ka ye bakaija kutwariramu n’ab’entaama ezindi. “Obusyo bumwe” oburikwebemberwa Kristo, ab’entaama ezindi nibo barikukirayo obwingi. (Yoh. 10:16) Ab’obusyo obukye n’ab’entaama ezindi boona nibagasirwa omu by’okurya by’omwoyo ebi barikuheebwa omwambari omwesigwa. Kandi shi ab’Akakiiko Akareeberezi abarikuheereza nk’omwambari omwesigwa kandi ow’obwengye? Ab’eishe-emwe abo nabo baine kuriisibwa omu by’omwoyo. N’ahabw’ekyo, buri omwe aharibo naamanya ngu ari omwe aha b’omu ka ya Yesu abeesigwa.

14. (a) Omwambari omwesigwa ahairwe bujunaanizibwa ki, kandi nibutwariramu ki? (b) Ni kurabura ki oku Yesu yaahaire omwambari omwesigwa kandi ow’obwengye? (Reeba akabokisi “Omwambari Omubi, Ku . . .”)

¹⁴ Yesu akaha Omwambari omwesigwa kandi ow’obwengye obujunaanizibwa bw’amaani. Omu bwire bw’okuhandiikwa kwa Baibuli, omwambari orikwesigwa nari omubiiki akaba naareeberera ebintu by’omu ka ebya mukama we byona. (Luk. 12:42) Omu muringo nigwo gumwe, omwambari omwesigwa kandi ow’obwengye nawe ahairwe obujunaanizibwa bw’okureeberera ebya Kristo ebiri omu nsi. Ebyo nibitwariramu okureeberera omurimo gw’okubuurira, esente, n’enteerane  empango. Kandi nibitwariramu n’okuteera ebitabo ebirikushoboorora aha Baibuli eby’okukoresa omu kubuurira, omu kweyegyesa n’omu nteerane z’ekibiina. Ab’omu ka ye boona nibagasirwa omu by’okurya ebi omwambari arikutebeekanisa.

15, 16. Ni ryari obu Yesu yaabaire naija kutsigira omwambari ebi aine byona?

¹⁵ Ni ryari obu Yesu araatoorane omwambari omurundi gwa kabiri ekirikumanyisa okumutsigira “ebi atungire byona”? Yesu akagira ati: “Aine omugisha omwambari ogwo, ou mukama we arigaruka akashanga naakora atyo. Buzimazima nimbagambira nti: Aryamukwatsa ebi atungire byona.” (Mat. 24:46, 47) Yetegyereze ngu Yesu naaza kutoorana omwambari omurundi gwa kabiri obu araagaruke akashanga omwambari ogwo “naakora atyo,” ekirikumanyisa okugabura eby’okurya eby’omwoyo. N’ahabw’ekyo, haakahingwireho obwire atakatooraine omwambari omurundi gwa kabiri. Kubaasa kwetegyereza oku Yesu yaakutsigiire omwambari ebi aine byona n’obu yaakubimutsigiire, twine kumanya ebintu bibiri: obu araije n’ekirikutwarirwa omu bi aine.

¹⁶ Yesu akaba naaza kwija ryari? Nitubaasa kutunga eky’okugarukamu omu biri omu Matayo 24:30, 42, 44. Ijuka ngu enyiriri ezo nizigamba aha bu Yesu ‘yaakwizire’ kucwekyereza ensi egi embi. * N’ahabw’ekyo, okwija kwa Yesu nari okugaruka kwe okurikugambwaho omu nfumu erikukwata aha mwambari, nikwija kubaho omu bunaku bw’okubonabona kwingi.

17. Ebi Yesu aine nibitwariramu ki?

¹⁷ Ebi Yesu aine “byona” nibitwariramu ki? Ebi Yesu aine t’ebyo ebiri omu nsi byonka. Nibitwariramu n’ebiri omu iguru. Yesu akagira  ati: “Mpairwe obushoboorozi bwona omu iguru n’omu nsi.” (Mat. 28:18; Efe. 1:20-23) Ebi aine nibitwariramu Obukama bw’omu iguru obu yaahairwe kuruga 1914 kandi naija kutegyeka n’abashukirweho amajuta omu Bukama obwo.​—Kush. 11:15.

18. Ahabw’enki Yesu arikwija kuha omwambari obujunaanizibwa bw’okureeberera ebi aine byona?

¹⁸ Kurugiirira ahari ebyo, nitubaasa kuhendera tuta? Yesu ku araije kucwa orubanja omu bunaku bw’okubonabona kwingi, naija kushanga omwambari omwesigwa atwire naaha ab’omu ka ye eby’okurya eby’omwoyo. Obwo nibwo Yesu araatsigire omwambari ebi aine byona. Abo abarikukora nk’omwambari omwesigwa nibaija kutunga obujunaanizibwa obwo, ku baraaze omu iguru bakatandika kutegyeka na Kristo.

19. Mbwenu shi omwambari omwesigwa naija kutunga omugabo muhango omu iguru kukira abandi abashukirweho amajuta? Shoboorora.

 ¹⁹ Mbwenu shi omwambari omwesigwa naija kutunga omugabo muhango omu iguru kukira abandi abashukirweho amajuta? Ngaaha. Omugabo nigubaasa kuraganisibwa bakye, kwonka obwire bwahinguraho gubaganwe baingi. Nk’eky’okureeberaho, yetegyereze eki Yesu yaagambiire entumwa ze 11 aha kiro ekyahereerukireyo akaitwa. (Shoma Luka 22:28-30.) Yesu akaraganisa bakye abo ngu nibaija kutunga omugabo ahabw’obwesigwa bwabo. Bakaba nibaija kutegyeka hamwe nawe omu iguru. Kwonka ku haahingwireho obwire, akooreka ngu boona 144,000 nibaija kutegyeka nawe omu iguru. (Kush. 1:1; 3:21) Nk’oku kirikworekwa omuri Matayo 24:47, akaraganisa ngu bakye aha bashukirweho amajuta bakaba nibaija kuheereza nk’omwambari omwesigwa barikureeberera ebi aine byona. Buzima boona 144,000 nibaija kutegyeka na Kristo omu iguru.​—Kush. 20:4, 6.

20. Ahabw’enki Yesu yaatooraine omwambari omwesigwa, kandi omaririire kukora ki?

²⁰ Nk’oku Yesu yaariisize baingi kurabira omuri bakye omu kyasha ky’okubanza, n’omu bunaku obu naariisa baingi kurabira omu mwambari omwesigwa. Yesu akaha omwambari omwesigwa obujunaanizibwa bw’okureeberera abakuratsi be otwariiremu n’abashukirweho amajuta, kuhamya ngu baaguma nibatunga eby’okurya by’omwoyo omu bunaku obuhikire omu biro by’emperu byona. Ka tumariirire kugumizamu nitushagika ab’eishe-emwe abashukirweho amajuta abarikuheereza nk’omwambari omwesigwa kandi ow’obwengye.​—Heb. 13:7, 17.