“Helie Ukuenje wa Kolelua Haeye wa Lunguka?”
“Helie ukuenje wa kolelua haeye wa lunguka okuti cime caye wo kundika vakuanjo yaye vosi?”—MAT. 24:45.
1, 2. Helie Yesu a nõla oco a tu tekule koloneke vilo? Oku limbuka ocikele cukuenje wa lunguka ci kuetele esilivilo lie?
MANJI umue ukãi vukanda a tuma Kombala Yolombangi Via Yehova Voluali luosi, wa eca olopandu poku popia hati: “Avamanji. Si tẽla oku tenda olonjanja wa ndi tumisi ovipama via siata oku ndi kuatisa eci ndi liyaka lovitangi.” Anga hẽ vosi yetu tu kuete ovisimĩlo ndevi viaye? Tu kuete. Ovisimĩlo viaco hẽ vi tu komohĩsa? Sio, ka vi tu komõhisa.
2 Olonumbi Viembimbiliya tua siata oku tambula vi lekisa okuti Yesu utue wekongelo, o kasi oku tẽlisa ohuminyo yaye yoku tu tekula. Helie a nõla oco a linge upange waco? Eci Yesu a eca ondimbukiso yoku tukuluka kuaye, wa popia hati o ka nõla ‘ukuenje wa kolelua haeye wa lunguka oco a ece ku vakuanjo yaye okulia votembo ya tukuiwa.’ a (Tanga Mateo 24:45-47.) Ukuenje wakolelua eye Yesu a kundika ocikele coku tekula olondonge viaye koloneke vilo via sulako. Tu sukila oku limbuka ocikele cukuenje wa lunguka. Momo ekolelo kuenda ukamba wetu la Suku vi pamisiwa lika nda tua pokola kukuenje wa lunguka.—Mat. 4:4; Yoa. 17:3.
3. Elomboloko lipi liolusapo luatiamẽla kukuenje wa kolelua lia enda oku iyilila valivulu etu?
3 Tu kuata ndati elomboloko lia suapo liolusapo lua Yesu luatiamẽla kukuenje wa kolelua? Kosimbu, valivulu etu mua enda oku iyilila ulandu u kuãimo. Kocipito Copendekoste yunyamo wa 33 K.K., Yesu wa nõla ukuenje wa kolelua oco a songuile vakuanjo yaye. Oku upisa kotembo yaco, ukuenje wa kolelua, eye osungu Yakristão vosi olombuavekua va siala palo posi. Vakuanjo, va lomboloka Akristão olombuavekua. Kunyamo wo 1919, Yesu wa nõla ukuenje wa kolelua, kuenje wo ‘kundika ovina viosi a kuete’ viatiamẽla kupange Wusoma palo posi. Pole, ekonomuiso limue lia lingiwa lolohutililo, lia lekisa okuti, elomboloko liolondaka via Yesu liatiamẽla kukuenje wa kolelua haeye wa lunguka, li sukila oku penguluiwa. (Olosap. 4:18) Omo liaco, tu konomuisi olusapo lua Yesu, oco tu limbuke ndomo tua kongeliwamo, ci kale okuti tu kuete elavoko lioku enda kilu, ale lioku kala palo posi.
OTEMBO YIPI OLUSAPO LUA TẼLISIWA?
4-6. Momo lie tu popela tuti olusapo lua Yesu luatiamẽla kukuenje wa kolelua lua fetika lika oku tẽlisiwa noke liunyamo wo 1914?
4 Ulandu luolusapo luatiamẽla kukuenje wa kolelua haeye wa lunguka lu lekisa okuti, ka lua fetikile oku tẽlisiwa kocipito Copendekoste yunyamo wa 33 K.K., pole, lu kasi oku tẽlisiwa koloneke vilo via sulako. Omo liaco, tu konomuisi eci Embimbiliya li popia catiamẽla kondaka yaco.
5 Olusapo luatiamẽla kukuenje wa kolelua, lu panga onepa ‘kondimbukiso yoku tukuluka kua Yesu, kuenda ondimbukiso yesulilo lioluali lulo.’ (Mat. 24:3) Onepa yatete yocitumasuku ci sangiwa kelivulu lia Mateo 24:4-22, yi tẽlisiwa volonepa vivali. Onepa yatete, ya fetika oku tẽlisiwa kunyamo wa 33 K.K., toke wa 70 K.K. Onepa yavali, yi kasi oku tẽlisiwa koloneke vilo. Anga hẽ elomboloko lia situluiwa ndeti li lekisa okuti olondaka via Yesu viatiamẽla kukuenje wa kolelua vi tẽlisiwavo volonepa vivali? Sio, ka vi tẽlisiwa.
6 Volondaka vi sangiwa kelivulu lia Mateo 24:29, Yesu wa tukula ovina via laikele oku pita koloneke vilo. (Tanga Mateo 24:30, 42, 44.) Yesu poku lombolola ovina vi ka pita vokuenda kuohali ya piãla wa popia hati: ‘Omanu va ka mola Mõlomunu iyilila valende.’ Omo liaco, wa vetiya omanu vo koloneke vilo via sulako oco va lavulule poku popia hati: ‘Ka wa kũlĩhĩli eteke lioku iya kua Ñala yene,’ kuenda ‘ka wa kũlĩhĩli owola yoku pitĩla kuaye.’ Ulandu owu u lekisa okuti Yesu poku tukula ovina via laikele oku pita koloneke via sulako, olusapo luaco wa lu tiamisila kukuenje wa kolelua. Omo liaco, tu pondola oku limbuka okuti, olondaka viaye viatiamẽla kukuenje wa kolelua via fetika lika oku tẽlisiwa noke liunyamo wo 1914 eci oloneke via sulako via fetika. Ca sunguluka oku kuata elomboloko liaco. Momo lie?
7. Epulilo lipi lia votuiwa eci otembo yoku ungula ya fetika, kuenda momo lie?
7 Sokolola epulilo liokuti: “Helie ukuenje wa kolelua haeye wa lunguka?” Kocita catete, ka ca lelukila oku linga epulilo eli. Ndomo tua konomuisa ocipama ca pita, ovapostolo va kuatele unene woku linga ovikomo, kuenda oku lekisa okuti ovikomo viaco vi tunda ku Suku. (Ovil. 5:12) Momo lie pamue omunu umue a pulila hati, helie wa nõliwa la Kristu oco a songuile olondonge viaye? Kunyamo wo 1914, ekalo lia litepele. Momo upange woku ungula wa fetika kunyamo waco, eci otembo yoku tepa osoka lotiliku ya pitĩlapo. (Mat. 13:36-43) Eci otembo yoku ungula ya fetika kua lingiwa epulilo eli: Omo okuti kuli omanu valua va litukula vati Akristão, kuenda va popia vati olondonge viocili via Yesu, citava ndati oku limbuka otiliku yi lomboloka Akristão olombuavekua? Olusapo luatiamẽla kukuenje wa kolelua lua eca etambululo. Olombuavekua okuti olondonge via Kristu, ovio via kala oku eca olonumbi vi pamisa ekolelo.
HELIE UKUENJE WA KOLELUA HAEYE WA LUNGUKA?
8. Momo lie ca sungulukila oku popia okuti ukuenje wa kolelua o panga onepa Kakristão olombuavekua?
8 Ukuenje wa kolelua o panga onepa kocisoko Cakristão olombuavekua va kasi palo posi. Momo va tukuiwa vati, ovitunda via soma’ via nõliwa oco ‘vi sapule ovilinga vi komohĩsa via Suku, una wopa omanu vowelema okuti veya vocinyi caye ci komohĩsa.’ (1 Pet. 2:9) Ca sunguluka oku popia okuti, vana va panga onepa ‘kovitunda via soma,’ va kuete omoko yoku pitiya ondaka ya Suku ku vamanji vosi.—Mal. 2:7; Esit. 12:17.
9. Anga hẽ olombuavekua viosi vi kasi palo posi vi panga onepa kukuenje wa kolelua? Ci lombolola.
9 Anga hẽ olombuavekua viosi vi kasi palo posi vi panga onepa kukuenje wa kolelua? Sio, ka vi pangi. Momo havosiko olombuavekua va kuete ocikele coku eca olonumbi vi pamisa ekolelo lia vamanji voluali luosi. Pokati kotiliku okuti Akristão olombuavekua, pali vamue okuti oloñuatisi viekongelo, ale akulu vekongelo va sangiwa vakongelo a litepa. Ovo va siata oku longisa omanu konjo lanjo, vakongelo avo, kuenda va kuatisa Kombala Yolombangi Via Yehova Voluali luosi. Pole, ka va pangi onepa koku eca olonumbi vioku pamisa ekolelo lia vamanji voluali luosi. Pokati kolombuavekua pali vamanji akãi va lekisa umbombe okuti ka va seteka oku kuata ocikele coku longisa vekongelo.—1 Va Kor. 11:3; 14:34.
10. Helie ukuenje wa kolelua haeye wa lunguka?
10 Helie ukuenje wakolelua haye walunguka? Poku kuama ongangu ya Yesu yoku tekula omanu valua letendelo litito liovapostolo, vana va panga onepa kocisoko cukuenje wa kolelua va sokiyiwa letendelo litito lia vamanji olombuavekua, va kuete ocikele coku pongiya olonumbi kuenda oku vi eca komanu vokuenda kuotembo yoku tukuluka kua Kristu. Vokuenda kuoloneke via sulako, vamanji olombuavekua okuti ovo va panga onepa kocimunga cukuenje wakolelua, va kasi Kombala Yolombangi Via Yehova Voluali luosi, kuna va lingila kumosi upange. Vokuenda kuanyamo a sulako, ukuenje wa kolelua o tukuiwa hati, Osungu Yolombangi Via Yehova. Ndaño okuti ondaka “upika” volusapo lua Yesu yi tiamisiwila lika komunu umosi, pole, mua kongela omanu valua. Omo liaco, ovina viosi Osungu Yolombangi Via Yehova yi yongola oku linga, va vi nõlela kumosi.
VELIE VAKUANJO?
11, 12. (a) Ovikele vipi vivali ukuenje wa kolelua haeye wa lunguka a tambula? (b) Otembo yipi Yesu a nõla ukuenje wa kolelua oco a tate vakuanjo yaye, kuenda velie a nõla?
11 Ndomo ca lekisiwa volusapo lua Yesu, ukuenje wa kolelua haeye wa lunguka wa tambula ovikele vivali vialitepa. Ocikele catete catiamẽla koku tata vakuanjo, cavali catiamẽla kovina viosi via cime. Omo okuti olusapo luaco lu kasi oku tẽlisiwa koloneke vilo via sulako, olombuavekua via tambula lika ovikele vivali kunyamo wo 1914, noke yoku vialekiwa kua Yesu komangu yusoma.
12 Otembo yipi Yesu a eca kukuenje wa kolelua ocikele coku tata vakuanjo yaye? Oco tu tambulule epulilo eli, tu sukila oku tiukila kunyamo wo 1914, eci upange woku ungula wa fetika. Ndomo tua lilongisa ulandu waco, kotembo yaco kua kala ovimunga viomanu valua va enda oku litukula vati Akristão. Anga hẽ vovimunga viaco omo Yesu a nõla ukuenje wa kolelua? Epulilo eli lia tambuluiwa eci Yesu kumue la Isiaye veyile oku kũlĩhĩsa onembele oku upisa kunyamo wo 1914, toke kefetikilo liunyamo wo 1919. b (Mal. 3:1) Ovo va sanjukila ocimunga cimue citito ca Vakuakulilongisa Embimbiliya va lekisa okuti, va tiamisila utima wavo ku Yehova, kuenda va kapako Ondaka yaye. Ndaño okuti va sukilile oku yelisiwa kovina vimue, pole, va lekisa umbombe vokuenda kuotembo yoseteko, kuenda yoku yelisiwa. (Mal. 3:2-4) Vakuakulilongisa Embimbiliya va tukuiwa ndeti, ovo Akristão vocili va sokisiwa lotiliku. Kunyamo wo 1919, eci otembo yoku pamisa vali ekolelo ya fetika, pokati ka vamanji olombuavekua Yesu wa nõlapo vamue va loñoloha oco va linge ukuenje wa kolelua haeye wa lunguka, kuenda wa va ĩha ocikele coku tata vakuanjo yaye.
13. Velie va kongeliwa ku vakuanjo, kuenda momo lie?
13 Velie vakuanjo? Vana va tambula eteku. Eci oloneke via sulako via fetika, olombuavekua viosi ovio via kala vakuanjo. Noke, ketendelo lia vakuanjo kua kongeliwa owiñi wakahandangala wolomeme vikuavo. Koloneke vilo, owiñi wakahandangala wolomeme vikuavo, u panga onepa ‘kocunda cimuamue’ okuti usongui wavo Kristu. (Yoa. 10:16) Ovimunga viaco vivali vi kasi oku kuatisiwa lolonumbi vi eciwa lukuenje wa kolelua. Nye ci popiwa catiamẽla ku vamanji va panga onepa Kosungu Yolombangi Via Yehova okuti ovo ukuenje wa kolelua haeye wa lunguka koloneke vilo? Ovo va sukilavo oku kuatisiwa lolonumbi vi tunda ku Suku. Momo va limbuka okuti va pangavo onepa ku vakuanjo, ndeci ci pita lolondonge viosi via Yesu.
Ci kale okuti tu kuete elavoko lioku enda kilu, ale lioku kala palo posi, tu sukila olonumbi vimuamue vi pamisa ekolelo lietu
14. (a) Ocikele cipi ukuenje wa kolelua a tambula, kuenda nye ca kongelamo? (b) Elungulo lipi Yesu a eca kukuenje wa kolelua haeye wa lunguka? (Tala pokakasia losapi: “Nda Ukuenje Waco Ka Sungulukile . . . ”)
14 Yesu wa eca ocikele cinene peka liukuenje wa kolelua haeye wa lunguka. Kosimbu, ukuenje wa kolelua wa kala onalavayi yo vonjo. (Luka 12:42) Koloneke vilo, ukuenje wa kolelua haeye wa lunguka, wa tambulavo ocikele coku songuila vakuanjo. Vocikele caco mua kongela ovina vioku kuatisa ocisoko ca Yehova ndeci: Upange woku kunda, olohongele vimbo kuenda viofeka, oku panga alivulu a kuatisa kupange woku kunda, elilongiso lio pokolika, kuenda olohongele viekongelo. Vakuanjo va siata oku kuatisiwa lovina viosi vi eciwa lukuenje wa kolelua.
OTEMBO YIPI VA TAMBULA OCIKELE COKU TATA OVINA VIOSI VIA CIME?
15, 16. Otembo yipi Yesu a eca kukuenje wa kolelua ocikele coku tata ovina viaye viosi?
15 Otembo yipi Yesu a eca onjanja yavali ocikele coku tata ‘ovina viaye viosi’? Yesu wa popia hati: ‘Ukuenje waco wa sumũlũha nda cime caye eci eya u sanga okuti o kasi oku linga ndeci a tumiwa. Ndu sapuili siti: Eye u kundika ovina viaye viosi.’ (Mat. 24:46, 47) Ivaluka okuti, Yesu wa eca ocikele onjanja yavali noke yoku tukuluka kuaye, kuenda wa sanga okuti ukuenje wa kala ‘oku tẽlisa’ ocikele caye coku eca olonumbi vi pamisa ekolelo. Osimbu ka ecele ocikele onjanja yavali, pa pita otembo yimue. Oco tu kuate elomboloko ndomo Yesu a nõla ukuenje wa kolelua okuti o tata vakuanjo yaye, kuenda otembo a ci linga, tu sukila oku kũlĩha ovina vivali ndeci: Otembo a tukuluka, kuenda eci ca kongela vovina viaye.
16 Otembo yipi a tukuluka? Etambululo li sangiwa vulandu waco. Ivaluka okuti, eci ovinimbu Viembimbiliya vi popia okuti Yesu ‘o kasi oku iya,’ ondaka yaco yi tiamisiwila kotembo a ka linga esombiso kesulilo lioluali lulo lua vĩha. c (Mat. 24:30, 42, 44) Omo liaco, ‘oku iya’ kua Yesu kua tukuiwa volusapo luatiamẽla kukuenje wa kolelua ku ka tẽlisiwa vokuenda kuohali ya piãla.
17. Nye ca kongela vovina viosi via Yesu?
17 Nye ca kongela ‘vovina viosi via Yesu’? Ondaka yokuti “viosi,” Yesu ka yi tiamisilile lika kovina viaye palo posi. Momo o kuete omoko yoku songuila ovina viosi oku kongelamo evi vi kasi kilu. Eye wa popia hati: ‘Uviali wosi wokilu lowu wa palo posi wa nyĩhiwa.’ (Mat. 28:18; Va Efe. 1:20-23) Vovina viaye cilo mua kongela ocikele a tambula tunde kunyamo wo 1914 coku kala Mesiya Osoma, kuenda o ka viala kumosi lolondonge viaye olombuavekua.—Esit. 11:15.
18. Momo lie Yesu a ka sanjukilila oku eca onjanja yavali ocikele coku tata ovina viaye viosi?
18 Lekuatiso liovolandu tua konomuisa, elomboloko lipi tu kuete? Eci Yesu a keya oku linga esombiso vokuenda kuohali ya piãla, o ka sanga okuti ukuenje wa kolelua o kasi oku eca olonumbi vi pamisa ekolelo lia vakuanjo. Noke, Yesu o ka sanjukila oku eca onjanja yavali kukuenje wa kolelua ocikele coku tata ovina viaye viosi. Vamanji vana va panga onepa kocisoko cukuenje wa kolelua haeye wa lunguka, va ka kundikiwa ocikele caco eci va ka tambula onima yavo kilu yoku viala la Kristu.
19. Anga hẽ ukuenje wa kolelua o ka tambula onima ya velapo kilu okuti olombuavekua vikuavo ci sule? Ci lombolola.
19 Anga hẽ ukuenje wa kolelua o ka tambula onima ya velapo okuti olombuavekua vikuavo ci sule? Sio, ka tambula. Onima yeciwa kocimunga citito, haiyo olombuavekua vikuavo vi tambula. Kũlĩhĩsa olondaka Yesu a sapuila kueci ci soka 11 kovapostolo vaye vakuekolelo kuteke wa sulako osimbu ka file. (Tanga Luka 22:28-30.) Yesu wa likuminya oku eca onima yiwa kocimunga citito colombuavekua omo liekolelo liavo. Ovo va ka viala kumue laye kilu. Yesu wa lekisa okuti, vosi va panga onepa kocimunga ci soka 144.000 komanu, va ka viala kumue laye kilu. (Esit. 1:1; 3:21) Ndomo ca lekisiwa kelivulu lia Mateo 24:47, Yesu wa likuminya hati o ka kundika ovina viaye viosi kocimunga citito ca vamanji olombuavekua va panga onepa kukuenje wa kolelua. Omo liaco, vosi va panga onepa kueci ci soka 144.000 komanu, va ka viala kumue la Yesu kilu.—Esit. 20:4, 6.
Vosi va panga onepa kueci ci soka 144.000 komanu, va ka viala kumue la Yesu kilu
(Tala ocinimbu 19)
20. Momo lie Yesu a nõlela ukuenje wa kolelua, kuenda nye wa nõlapo oku linga?
20 Lekuatiso liukuenje wa kolelua haeye wa lunguka, Yesu wa siata oku kuama onjila yimuamue ndeci a linga kocita catete poku eca kovapostolo vamue ocikele coku tekula omanu valua. Yesu wa kundika peka liukuenje wa kolelua ocikele coku eca Kakristão olombuavekua kuenda kolomeme vikuavo olonumbi vi pamisa ekolelo liavo koloneke vilo via sulako. Omo liaco, tu lekisi okuti tua sanjukila eliangiliyo liaco, poku kuatisa vamanji olombuavekua vatiamẽla kocimunga cukuenje wa kolelua haeye wa lunguka.—Va Hev. 13:7, 17.
a Ocinimbu 2: [1] Onjanja yimue, Yesu wa ta olusapo luatiamẽla “kukuenje” okuti o lomboloka “kaleyi,” kuenda “vakuanjo” okuti, va lomboloka ‘omanu vana va tambula ekuatiso.’—Luka 12:42-44.
b Ocinimbu 6: [2] ‘Oku iya’ kua Yesu okuti (kelimi lio Helasi ku lomboloka erʹkho·mai), kua litepa loku tukuluka kuaye kuna ku lomboloka (pa·rou·siʹa). Oku iya kuaye ka ku muiwa lomanu, ku ka fetika osimbu ka lingile handi esombiso kolondingaĩvi.
c Ocinimbu 12: [3] Tala ocipama losapi hati: ‘Ndi Kasi Kumue Lene Oloneke Viosi,’ Vutala ulo Wondavululi, kamẽla 10-12, kovinimbu 5-8.
Ocinimbu 16: [4] Tala ocipama losapi hati: “Tu Sapuile, Eteke Lipi Ovina Evi vi Lingiwa?,” Vutala ulo Wondavululi, kamẽla 7-8, kovinimbu 14-18..
