Sɔ mɔtu ngɛ September 5, 2012 ɔ mi ɔ, a fia adafi kɛ ha Betel weku ɔ nɛ ngɛ United States kɛ Canada a kaa nɔ he ba piɛɛ Blɔ Tsɔɔmi Ajla Toli ɔmɛ a he. E biɛ ji Mark Sanderson, nɛ e kɛ Blɔ Tsɔɔmi Ajla Toli Ɔmɛ bɔni nítsumi kɛ je September 1, 2012 ɔ mi.

A tsɔse Nyɛminyumu Sanderson ngɛ San Diego, California, U.S.A. E fɔli nɛ a tsɔse lɛ ɔ ji Kristofoli. A baptisi lɛ ngɛ February 9, 1975 ɔ mi. E bɔni sɔmɔmi kaa blɔ gbalɔ ngɛ Saskatchewan ngɛ Canada, ngɛ September 1, 1983 ɔ mi. E ya Sɔmɔli A Tsɔsemi Sukuu (amlɔ nɛ ɔ, a tsɛɛ sukuu nɛ ɔ ke Baiblo Sukuu Kɛ Ha Nyumuhi Nɛ A Sɛ We Gba Si Himi Mi) nɛ ji kpaagone ɔ ngɛ United States, nɛ e gbe nya ngɛ December 1990 ɔ mi. Ngɛ April 1991 ɔ mi ɔ, a hla Nyɛminyumu Sanderson kaa e ya sɔmɔ kaa blɔ gbalɔ klɛdɛɛ ngɛ Newfoundland, nɛ ji zugba kpɔ nɛ wo bɔle lɛ ɔ nɔ ngɛ Canada. Pee se ɔ, e sɔmɔ kaa kpokpa nɔ hyɛlɔ nanemi dalɔ, nɛ ngɛ February 1997 ɔ mi ɔ, a ha nɛ e ya sɔmɔ ngɛ Canada Betel. Ngɛ November 2000 ɔ mi ɔ, a je lɛ kɛ ho asafo ɔ nítsumi he kɔni nɛ ngɛ United States ɔ ya, nɛ e ya sɔmɔ ngɛ Nítsumi He Nɛ Hyɛɛ Hiɔtsami Hé Sanehi A Mi ɔ. Pee se ɔ, e ya tsu ní ngɛ Nítsumi He Nɛ Hyɛɛ Sɔmɔmi Nítsumi ɔ Nɔ ɔ.

Ngɛ September 2008 ɔ mi ɔ, Nyɛminyumu Sanderson ya Asafo ɔ Nítsumi He Kɔni Ajla Toli A Sukuu ɔ eko, nɛ lɔɔ se ɔ, a hla lɛ kaa e piɛɛ Asafo ɔ Nítsumi He Kɔni Ajla Toli nɛ a ngɛ Philippines ɔ a he. Ngɛ September 2010 mi ɔ, a kpale tsɛ lɛ kɛ ho United States ya, nɛ a ha nɛ e ya sɔmɔ kaa Sɔmɔmi Ajla Toli nɛ a ngɛ Blɔ Tsɔɔmi Ajla Toli ɔmɛ a sisi ɔ a yemi kɛ bualɔ.