Long Wenesde moning, long 5 Septemba 2012, oli talemaot long ol famle blong Betel long Yunaeted Stet mo long Kanada, se i gat wan niufala memba blong Hed Kampani blong ol Witnes blong Jehova. Long namba 1 Septemba 2012, Mark Sanderson i kam wan memba blong Hed Kampani.

Brata Sanderson i gruap long San Diego long California, mo hem i baptaes long 9 Februari 1975. Papa mo mama blong hem tufala i Witnes. Long namba 1 Septemba 1983, hem i stat blong mekem wok blong paenia long Saskatchewan long Kanada. Long Disemba 1990, hem i finisim trening blong hem long namba seven klas blong Ministeriol Trening Skul (we naoia nem blong hem Baebol Skul Blong Ol Brata We Oli No Mared), we i stap long Yunaeted Stet. Long Eprel 1991, Brata Sanderson i spesel paenia long aelan blong Newfoundland long Kanada. Samtaem, hem i stap tekem ples blong eria elda blong visitim ol kongregesen, be long Februari 1997, oli singaot hem blong i go long Betel blong Kanada. Long Novemba 2000, hem i go wok long branj ofis blong Yunaeted Stet. Hem i wok long Hospital Infomesen Dipatmen mo biaen long Seves Dipatmen.

Long Septemba mo Oktoba 2008, Brata Sanderson i joen long Skul Blong Ol Memba Blong Branj Komiti. Mo biaen hem i kam wan memba blong branj komiti long Filipin. Long Septemba 2010, oli singaot hem i gobak long Yunaeted Stet, mo hem i givhan long Seves Komiti blong Hed Kampani.