Mutatu komuhuka, mu 5 ya Tungonkhe yo 2012, mombunga Yombetele yoko Estados Unidos noko Canadá muaiviswa okuti pononkhalamutwe Mbonombangi mba Jeova payauiswa vali umwe. Mark Sanderson wahimbika okuundapa movilinga ovio mu 1 ya Tungonkhe yo 2012.

Omukuatate Sanderson wekulila motyili ko Estados Unidos mepundaumbo lio San Diego, Califórnia, iya wambatisalua mu 9 ya Hitandyila yo 1975. Wakala omukokoli-ndyila mu 1 ya Tungonkhe yo 1983 ko Saskatchewan, Canadá. Mu Kayovo yo 1990, wapita Mosikola Yovilinga Viokuivisa (pahe itiwa Osikola Yombimbiliya yo Vakuatate Vahanepele) ko Estados Unidos. Omukuatate Sanderson wakala omukokoli-ndyila wavilapo mu Tyikukutu yo 1991 atumwa pokalongo kakala pokati komeva katiwa Newfoundland ko Canadá. Etyi akala omutalelipo womauaneno, akongwa opo akale mombunga Yombetele ko Canadá mu Hitandyila 1997. Mu Kuhuhu yo 2000, atumwa ko Mbetele yoko Estados Unidos, ahimbika okuundapa movilinga viokupopia no nondotolo mo Nosipitali (Serviços de Informações sobre Hospitais) konyima aundapa Moseketa Yovilinga.

Mu Tungonkhe yo 2008, Omukuatate Sanderson apiti Mosikola Yovakulu Vokomisau yo Filiyale, konyima aholovonwa opo akale omukulu Wokomisau yo Filiyale ko Filipina. Mu Tungonkhe yo 2010, waihanua opo akondoke ko Estados Unidos, oku ekahi nokuundapa ngomukuatesiko Wokomisau Yovilinga Yononkhalamutwe mbo Nombangi mba Jeova.