Mì Ko Yin Hinhẹn Zun Wiwe
Mì Ko Yin Hinhẹn Zun Wiwe
“Mì ko yin kiklọ́we, . . . mì ko yin hinhẹn zun wiwe.”—1 KỌL. 6:11.
NAWẸ HIẸ NA NA GBLỌNDO GBỌN?
Naegbọn mí dona nọ dapana gbẹdido ylankan lẹ?
Nawẹ mí sọgan nọ nọgodona tito yẹwhehọluduta tọn lẹ gbọn?
Etẹwẹ na gọalọna mí nado nọ ze gbigbọnu lẹ do otẹn tintan mẹ bo basi hihọ́na Klistiani-yinyin mítọn?
1. Nuhe ma sọgbe tẹlẹ go wẹ Nẹhemia doayi to whenue e lẹkọwa Jelusalẹm? (Pọ́n yẹdide he tin to bẹjẹeji hosọ ehe tọn.)
TÒMẸNU Jelusalẹm tọn lẹ to hodọ gando nuhe to jijọ go. Jonọ he diyin de tin to abò tẹmpli lọ tọn de mẹ. Levinu lẹ to azọ́ndenamẹ yetọn jodo. Kakati nado ze sinsẹ̀n-bibasi Jehovah tọn do otẹn tintan mẹ, nukọntọ Ju lẹ to ajọwa to Gbọjẹzangbe. Islaelivi susu to alọwle hẹ jonọ lẹ. Ehelẹ yin vude poun to nuhe ma sọgbe he go Nẹhemia doayi to whenue e lẹkọwa Jelusalẹm to owhe 443 J.W.M. godo lẹ mẹ.—Nẹh. 13:6.
2. Nawẹ akọta Islaeli tọn yin hinhẹn zun wiwe gbọn?
2 Islaeli yin akọta de he klan ede do wiwe na Jiwheyẹwhe. To 1513 J.W.M., Islaelivi lẹ yí jejejininọ do dọ dọ emi na wà ojlo Jehovah tọn. Yé dọmọ: “Ohó he OKLUNỌ lọ ko dọ lẹpo wẹ mí na wà.” (Eks. 24:3) Enẹwutu, Jiwheyẹwhe hẹn yé zun wiwe kavi klan yé dovo taidi omẹ dide etọn lẹ. Lẹblanulọkẹyi nankọ die! To owhe kande godo, Mose flinnu yé dọmọ: “Omẹ wiwe lẹ de wẹ hiẹ hlan OKLUNỌ lọ Jiwheyẹwhe towe: OKLUNỌ lọ Jiwheyẹwhe towe ko dewe nado yin omẹ gbọnvo de hlan ede, sọn akọta he tin to nukunmẹ aigba ji tọn lẹpo mẹ.”—Deut. 7:6.
3. Etẹwẹ yin ninọmẹ gbigbọmẹ tọn Juvi lẹ tọn to whenue Nẹhemia lẹkọwa Jelusalẹm whla awetọ?
3 E blawu dọ, zohunhun he Islaelivi lẹ tindo to tintan whenu nado yin akọta wiwe de ma dẹn-to-aimẹ. Dile etlẹ yindọ delẹ to yé mẹ nọ sẹ̀n Jiwheyẹwhe, suhugan Juvi lẹ tọn ma tindo ojlo nado setonuna Jehovah, bo nọ sọalọakọ́n poun dọ emi yin mẹwiwe. To whenuena Nẹhemia lẹkọwa Jelusalẹm whla awetọ, nudi owhe kanweko ko juwayi sọn whenue pipotọ nugbonọ lẹ lẹkọ sọn Babilọni nado hẹn sinsẹ̀n-bibasi nugbo gọwá. Zohunhun he akọta lọ tindo na gbigbọnu lẹ ko depò whladopo dogọ.
4. Nuhe sọgan gọalọna mí nado gbọṣi wiweji tẹlẹ wẹ mí na gbadopọnna?
4 Taidi Islaelivi lẹ, to egbehe, Kunnudetọ Jehovah tọn lẹ to pọmẹ ko yin hinhẹn zun wiwe gbọn Jiwheyẹwhe dali. Klistiani yiamisisadode lẹ po “gbẹtọ susugege” lọ po yin wiwe, enẹ wẹ yindọ, yé yin kinklandovo na sinsẹ̀n-bibasi wiwe. (Osọ. 7:9, 14, 15; 1 Kọl. 6:11) Depope to mí mẹ ma jlo na hẹn wiwe-yinyin mítọn bu to Jiwheyẹwhe nukọn dile e wá yin do na Islaelivi lẹ. Etẹwẹ sọgan gọalọna mí nado dapana onú mọnkọtọn nado sọgan gbọṣi wiweji bo yọ́n-na-yizan to sinsẹ̀nzọn Jehovah tọn mẹ? To hosọ ehe mẹ, mí na gbadopọnna onú ẹnẹ delẹ he yin nùzindeji to Nẹhemia weta 13 mẹ: (1) Nọ dapana ogbẹ́ ylankan lẹ; (2) nọ nọgodona tito yẹwhehọluduta tọn lẹ; (3) nọ ze gbigbọnu lẹ do otẹn tintan mẹ; podọ (4) nọ basi hihọ́na Klistiani-yinyin towe. Todin, mì gbọ mí ni gbadopọnna onú ehelẹ dopodopo.
NỌ DAPANA OGBẸ́ YLANKAN LẸ
5, 6. Mẹnu wẹ Eliaṣibi po Tobia po, podọ naegbọn Eliaṣibi na ko nọ dogbẹ́ hẹ Tobia?
5 Hia Nẹhemia 13:4-9. Nuyiwadomẹji mawé lẹ kẹdẹ wẹ lẹdo mí, enẹwutu e ma nọ bọawu nado gbọṣi wiweji. Lẹnnupọndo Eliaṣibi po Tobia po ji. Eliaṣibi yin yẹwhenọ daho, podọ Tobia yin Ammọninu he na ko nọ wazọ́n na ahọlu Pẹlsia tọn to Jude. Tobia po gbẹdohẹmẹtọ etọn lẹ po diọnukunsọ Nẹhemia to vivẹnudido etọn nado vọ́ adó Jelusalẹm tọn lẹ do mẹ. (Nẹh. 2:10) Osẹ́n Jiwheyẹwhe tọn gbẹ́ dọ Ammọninu lẹ ma dona biọ tẹmpli mẹ. (Deut. 23:3) Enẹwutu, naegbọn yẹwhenọ daho nado wleawu nọtẹn de tọn na Tobia to họ̀nù he mẹ yè nọ dùnú te to tẹmpli mẹ?
6 Tobia wá lẹzun gbẹdohẹmẹtọ pẹkipẹki Eliaṣibi tọn. Tobia po visunnu etọn Jehohanani po wlealọ hẹ yọnnu Juvi lẹ, podọ susu to Juvi lẹ mẹ nọ dọho dagbe gando Tobia go. (Nẹh. 6:17-19) Dopo to ovivi Eliaṣibi tọn lẹ mẹ wlealọ hẹ viyọnnu Sanbalati tọn, yèdọ ayimatẹn-gán Samalia tọn, mẹhe yin dopo to gbẹdohẹmẹtọ pẹkipẹki Tobia tọn lẹ mẹ. (Nẹh. 13:28) E sọgan yindọ kanṣiṣa ehelẹ wẹ zọ́n bọ Yẹwhenọ Daho Eliaṣibi do na dotẹnmẹ mayisenọ podọ nukundiọsọmẹtọ enẹ nado yinuwado ewọ ji. Ṣigba, Nẹhemia do nugbonọ-yinyin etọn hia Jehovah bo bẹ nutindo Tobia tọn lẹ dlan sọn họ̀nù lọ mẹ.
7. Etẹwẹ mẹho agun tọn lẹ po mẹdevo lẹ po sọgan wà nado gbọṣi wiweji to nukun Jehovah tọn mẹ?
7 Taidi omẹ dide Jiwheyẹwhe tọn lẹ, Jehovah wẹ mí dona yin nugbonọ na jẹnukọn to whelẹponu. Eyin mí ma tẹdo nujinọtedo dodo tọn etọn lẹ go, mí ma sọgan gbọṣi wiweji to nukun etọn mẹ. Mí ma dona dike kanṣiṣa whẹndo tọn ni sisẹ́ mí nado dovọ́na nunọwhinnusẹ́n Biblu tọn lẹ. Mẹho agun tọn lẹ dona nọ yinuwa sọgbe hẹ linlẹn Jehovah tọn, e ma yin linlẹn kavi numọtolanmẹ yetọn titi gba. (1 Tim. 5:21) Mẹho lẹ dona tin to aṣeji nado nọ dapana nudepope he sọgan hẹn haṣinṣan he yé tindo hẹ Jiwheyẹwhe gble.—1 Tim. 2:8.
8. Etẹwẹ devizọnwatọ Jehovah tọn he ko klan yede do wiwe lẹ dona nọ flin gando gbẹdido go?
8 Mí na wà dagbe nado flindọ “gbẹdido ylankan lẹ nọ hẹn walọ dagbe lẹ gble.” (1 Kọl. 15:33) Delẹ to hẹnnumẹ mítọn lẹ mẹ sọgan tindo nuyiwadomẹji ylankan do mí ji. Eliaṣibi ko ze apajlẹ dagbe dai na Islaelivi lẹ gbọn godoninọna Nẹhemia to gigọ́ mẹ nado vọ́ adó Jelusalẹm tọn do dali. (Nẹh. 3:1) Ṣigba, dile ojlẹ to yìyì, nuyiwadomẹji ylankan Tobia po mẹdevo lẹ po tọn wẹ na ko hẹn Eliaṣibi nado wà nuhe hẹn ẹn flu to nukun Jehovah tọn mẹ. Gbẹdido dagbe nọ na mí tuli nado doafọna yanwle Klistiani tọn lẹ, taidi Biblu hihia, opli Klistiani tọn lẹ yìyì po mahẹ tintindo to sinsẹ̀nzọn kunnudegbe tọn mẹ po. Mí nọ yọ́n pinpẹn hagbẹ whẹndo tọn he nọ yinuwado mí ji nado wà nuhe sọgbe lẹ tọn bosọ nọ yiwanna yé.
NỌ NỌGODONA TITO YẸWHEHỌLUDUTA TỌN LẸ
9. Naegbọn tito tẹmpli mẹ tọn lẹ ma do to yìyì ganji, podọ mẹnu lẹ wẹ Nẹhemia gblewhẹdo na ehe?
9 Hia Nẹhemia 13:10-13. To whenue Nẹhemia lẹkọwa Jelusalẹm, Islaelivi lẹ masọ to nunina dohlan tẹmpli mẹ ba. Na Levinu lẹ ma mọ godonọnamẹ nunina ehelẹ tọn wutu, yé gbọ bo jẹ ogle yetọn lẹ lẹ̀ ji. Nẹhemia gblewhẹdo ogán lẹ na ninọmẹ lọ. E taidi dọ yé ma to nukunpedo azọ́ndenamẹ yetọn go. Vlavo yé ma to mado-ao lẹ ṣinyan sọn gbẹtọ lẹ si kavi yé ma to nunina lọ lẹ dohlan tẹmpli mẹ, dile yé ko yin azọ́ndena nado wà do. (Nẹh. 12:44) Enẹwutu, Nẹhemia ze afọdide he jẹ lẹ, na mado-ao lẹ nido yin nina. Ewọ de sunnu dejidego lẹ nado penukundo nunina he wá tẹmpli mẹ lẹ po lehe yé na yin mimá do po go.
10, 11. Lẹblanulọkẹyi tẹwẹ omẹ Jiwheyẹwhe tọn lẹ tindo nado nọgodona sinsẹ̀n-bibasi nugbo?
10 Be mí sọgan plọn nude sọn nujijọ enẹ mẹ ya? Mọwẹ, na e flinnu mí dọ mí tindo lẹblanulọkẹyi lọ nado nọ yí nutindo họakuẹ mítọn lẹ do gbògbéna Jehovah. (Howh. 3:9) To whenue mí basi nunina nado nọgodona azọ́n Jehovah tọn, onú etọn na ẹn wẹ mí te poun. (1 Otan. 29:14-16) Mí sọgan lẹndọ mí ma tindo nususu nado basi nunina, ṣigba eyin ojlo lọ tin to finẹ, mímẹpo wẹ sọgan na nuhe mí tindo.—2 Kọl. 8:12.
11 Na owhe susu lẹ, whẹndo daho de nọ basi oylọna asu po asi po mẹhomẹ he yin gbehosọnalitọ titengbe de nado wá dùnú hẹ yé whladopo to osẹ dopo mẹ. Dile etlẹ yindọ ovi ṣinatọ̀n wẹ mẹjitọ lọ lẹ tindo, onọ̀ lọ nọ saba dọ dọ, “To whenue e yindọ núdùdù omẹ ao tọn wẹ n’nọ dà, e ma vẹawu nado dà omẹ awe tọn dogọ?” Núdùdù ninamẹ whladopo to sẹmẹsẹmẹ sọgan taidi nuhe ma sọ nude, ṣigba lehe gbehosọnalitọ enẹlẹ yọ́n pinpẹn johẹmẹ lọ tọn do sọ! Yelọsu yin dona de na johẹmẹtọ yetọn lẹ. Asu po asi po ehelẹ nọ dọ numimọ yetọn bo nọ na tuli ovi lọ lẹ nado yinukọn to gbigbọ-liho. To nukọn mẹ, ovi lọ lẹpo wẹ biọ sinsẹ̀nzọn whenu-gigọ́ tọn mẹ.
12. Apajlẹ dagbe tẹwẹ sunnu he yin dide do otẹn azọngban tọn mẹ to agun mẹ lẹ nọ zedai?
12 Nudevo he mí sọ plọn wẹ yindọ: Taidi Nẹhemia, to egbehe, sunnu he yin dide do otẹn azọngban tọn mẹ lẹ nọ yin nukọntọ to godoninọna tito yẹwhehọluduta tọn lẹ mẹ. Mẹdevo lẹ to agun lọ mẹ nọ mọaleyi sọn apajlẹ yetọn mẹ. To whẹho ehe mẹ, mẹho lẹ sọ nọ hodo apajlẹ apọsteli Paulu tọn. Ewọ nọgodona sinsẹ̀n-bibasi nugbo bosọ namẹ anademẹ dagbe lẹ. Di apajlẹ, e na ayinamẹ yọ́n-na-yizan susu Klistiani lẹ gando lehe yé sọgan basi nunina do go.—1 Kọl. 16:1-3; 2 Kọl. 9:5-7.
NỌ ZE GBIGBỌNU LẸ DO OTẸN TINTAN MẸ
13. Nawẹ Juvi delẹ nọ dovọ́na Gbọjẹzan lọ gbọn?
13 Hia Nẹhemia 13:15-21. Eyin mí dike bọ agbasanu lẹ tin to otẹn tintan mẹ na mí, mí sọgan jẹ mimiọn ji vudevude to gbigbọ-liho. Sọgbe hẹ Eksọdusi 31:13, Gbọjẹzan sẹmẹsẹmẹ tọn nọ flinnu Islaelivi lẹ dọ omẹ wiwe lẹ wẹ yé yin. Gbọjẹzan lọ dona yin didedovo na sinsẹ̀n-bibasi whẹndo tọn, odẹ̀, po ayihamẹlinlẹnpọn do Osẹ́n Jiwheyẹwhe tọn ji po. Ṣigba, delẹ to mẹhe nọgbẹ̀ to azán Nẹhemia tọn gbè lẹ mẹ nọ pọ́n Gbọjẹzan lọ taidi azán paa de, he ji yé sọgan wàjọ te. Yé nọ dovọ́na sinsẹ̀n-bibasi yetọn. To whenue Nẹhemia mọ nuhe to jijọ, e degbe dọ ajọwatọ jonọ lẹ ni nọ yin yinyan sọn tòdaho lọ mẹ, podọ họngbo etọn lẹ ni nọ yin súsú to whèjai azán ṣidopotọ tọn whẹpo Gbọjẹzan lọ nido bẹjẹeji.
14, 15. (a) Etẹwẹ sọgan jọ do mí go eyin mí ma nọ nọ̀ jlẹkaji to whẹho ajọwiwa tọn lẹ mẹ? (b) Nawẹ mí sọgan biọ gbọjẹ Jiwheyẹwhe tọn mẹ gbọn?
14 Etẹwẹ mí sọgan plọn sọn apajlẹ Nẹhemia tọn mẹ? Nuplọnmẹ dopo wẹ yindọ, mí dona nọ jlẹkaji to whẹho ajọwiwa tọn mẹ. Eyin e ma yinmọ, mí sọgan yin ayihafẹsẹna po awubibọ po, kavi ahun mítọn tlẹ sọgan má titengbe eyin mí yiwanna agbasazọ́n mítọn taun. Flindọ, Jesu na avase gando afanumẹ-yinyin na ogán awe go. (Hia Matiu 6:24.) Nẹhemia tindo dotẹnmẹ hundote nado jẹ adọkun, ṣigba nawẹ e yí whenu etọn zan to Jelusalẹm gbọn? (Nẹh. 5:14-18) Kakati nado doafọna kanṣiṣa ajọwiwa tọn hẹ Tilenu kavi mẹdevo lẹ, ewọ ze ede jo nado gọalọna mẹmẹsunnu etọn lẹ podọ nado klan yinkọ Jehovah tọn do wiwe. Mọdopolọ to egbehe, mẹho agun tọn lẹ po devizọnwatọ lizọnyizọnwiwa tọn lẹ po nọ ze ayidonugo yetọn do nuhe na hẹn ale wá na agun he mẹ yé tin te lẹ wiwà ji, podọ yisenọ hatọ yetọn lẹ nọ yiwanna gbigbọ he yé nọ dohia. Taidi kọdetọn de, owanyi, jijọho, po hihọ́ po nọ tin to omẹ Jiwheyẹwhe tọn lẹ ṣẹnṣẹn.—Ezek. 34:25, 28.
15 Dile etlẹ yindọ e ma yin bibiọ to Klistiani lẹ si nado nọ yìn Gbọjẹzan to sẹmẹsẹmẹ, Paulu dọna mí dọ “gbọjẹzan de gbẹ́ pò to aimẹ na omẹ Jiwheyẹwhe tọn lẹ.” E yidogọ dọmọ: “Mẹhe ko biọ gbọjẹ Jiwheyẹwhe tọn mẹ ko sọ gbọjẹ sọn azọ́n etọn titi lẹ mẹ ga, kẹdẹdile Jiwheyẹwhe ko wà do sọn etọn titi lẹ mẹ.” (Heb. 4:9, 10) Taidi Klistiani lẹ, mí sọgan biọ gbọjẹ Jiwheyẹwhe tọn mẹ, eyin mí setonu bo yinuwa to kọndopọ mẹ hẹ lẹndai etọn. Be hiẹ po mẹyiwanna towe lẹ po nọ ze sinsẹ̀n-bibasi whẹndo tọn, opli yìyì, po lizọnyizọn kunnudegbe tọn po do otẹn tintan mẹ to gbẹzan mìtọn mẹ ya? E sọgan biọ dọ mí ni yí nujikudo do dohia azọ́nmẹyimẹdotọ mítọn kavi ajọwatọ hatọ mítọn lẹ dọ tito yẹwhehọluduta tọn mítọn lẹ yin nujọnu na mí, titengbe eyin yé ma nọ na sisi tito enẹlẹ. To linlẹn de mẹ, e sọgan biọ dọ mí ni ‘sú họngbo tòdaho lọ tọn lẹ bo yàn Tilenu lẹ tọ́n’ nado sọgan na ayidonugo onú gbigbọmẹ tọn lẹ bosọ ze yé do otẹn tintan mẹ. Na mí ko yin hinhẹn zun wiwe wutu, mí na wà dagbe nado nọ kanse míde dọ, ‘Be gbẹzan ṣie nọ dohia dọ n’ko yin kinklandovo na sinsẹ̀nzọn Jehovah tọn ya?’—Mat. 6:33.
NỌ BASI HIHỌ́NA KLISTIANI-YINYIN TOWE
16. Nawẹ omẹ wiwe Jiwheyẹwhe tọn lẹ ko dibla hẹn Islaelivi-yinyin yetọn bu to azán Nẹhemia tọn gbè gbọn?
16 Hia Nẹhemia 13:23-27. To azán Nẹhemia tọn gbè, Islaelivi sunnu lẹ nọ wlealọ hẹ yọnnu jonọ lẹ. To whenue Nẹhemia dla Jelusalẹm pọ́n whla tintan, e biọ to sunnu he yin nukọntọ lẹpo si nado doalọ owe pàdido tọn de mẹ he dohia dọ sunnu Islaelivi lẹ ma na wlealọ hẹ kosi lẹ. (Nẹh. 9:38; 10:30) Etomọṣo, to owhe delẹ godo, ewọ mọdọ e ma yindọ Juvi sunnu lẹ wlealọ hẹ yọnnu jonọ lẹ kẹdẹ wẹ gba, ṣigba omẹ wiwe Jiwheyẹwhe tọn lẹ ko dibla hẹn Islaelivi-yinyin yetọn bu! Ovi he yọnnu jonọ ehelẹ ji lẹ ma sọgan do kavi hia Heblugbe. Eyin yé wá whẹ́n, be yé na nọ do yede hia taidi Islaelivi lẹ ya? Kavi yé na nọ lẹndọ emi yin Aṣdọdinu, Ammọninu, kavi Moabinu lẹ? Eyin yé ma sọgan do Heblugbe, be e ma na vẹawuna yé nado mọnukunnujẹ Osẹ́n Jiwheyẹwhe tọn mẹ ya? Nawẹ yé na wagbọn do yọ́n Jehovah bo de nado sẹ̀n ewọ kakati nido yin yẹwhe lalo lẹ he onọ̀ yetọn lẹ nọ sẹ̀n? E biọ dọ afọdide niyaniya po nujikudo po tọn ni yin zize, podọ nuhe Nẹhemia wà niyẹn.—Nẹh. 13:28.
17. Nawẹ mẹjitọ lẹ sọgan gọalọna ovi yetọn lẹ nado tindo haṣinṣan mẹdetiti tọn hẹ Jehovah gbọn?
17 To egbehe, mí dona ze afọdide dagbe lẹ nado gọalọna ovi mítọn lẹ nado lẹzun Klistiani nujọnu tọn. Mẹjitọ lẹ emi, mì nọ kanse mìde dọ, ‘Obá tẹ mẹ wẹ ovi ṣie lẹ nọ do “ogbè wiwe ṣeke” lọ he yin nugbo Biblu tọn lẹ jẹ? (Zẹf. 3:9) Be hodidọ ovi ṣie lẹ tọn nọ dohia dọ gbigbọ Jiwheyẹwhe tọn wẹ to nuyiwa do yé ji ya kavi aihọn tọn?’ Ma yawu gbọjọ blo eyin a doayi e go dọ ovi towe lẹ dona basi vọjlado to aliho delẹ mẹ. E nọ biọ whenu nado plọn ogbè de, titengbe eyin ayihafẹsẹnamẹnu susu lẹdo mí pé. Kọgbidinamẹnu sinsinyẹn lẹ wẹ ovi mìtọn lẹ to pipehẹ. Enẹwutu, mì nọ yí sọwhiwhe do yí sinsẹ̀n-bibasi whẹndo tọn mìtọn po dotẹnmẹ hundote devo lẹ po zan nado gọalọna ovi mìtọn lẹ nado wleawuna haṣinṣan pẹkipẹki de hẹ Jehovah. (Deut. 6:6-9) Mì nọ zinnudo ale he mí nọ mọyi eyin mí yinuwa to aliho he gbọnvo na aihọn Satani tọn mẹ lẹ ji. (Joh. 17:15-17) Podọ mì nọ dovivẹnu nado jẹ ahun yetọn mẹ.
18. Naegbọn mí sọgan dọ dọ mẹjitọ Klistiani lẹ wẹ tin to otẹn dagbe mẹ nado gọalọna ovi yetọn lẹ nado basi klandowiwe hlan Jehovah?
18 To godo mẹ, ovi dopodopo wẹ na de eyin e na sẹ̀n Jiwheyẹwhe kavi lala. Etomọṣo, nususu wẹ mẹjitọ lẹ sọgan wà nado gọalọna yé. Ehe bẹ apajlẹ dagbe zizedai, zẹẹmẹ he họnwun bibasi do walọ he ma sọgbe lẹ ji, po hodọdopọ hẹ ovi mìtọn lẹ do kọdetọn he nudide dopodopo nọ hẹnwa ji po hẹn. Mẹjitọ lẹ emi, mẹdevo de ma tin to otẹn dagbe mẹ hugan mìwlẹ nado gọalọna ovi mìtọn lẹ nado basi klandowiwe hlan Jehovah. Yé tindo nuhudo alọgọ mìtọn tọn nado wleawuna Klistiani-yinyin yetọn bosọ basi hihọ́na ẹn. Na nugbo tọn, mímẹpo wẹ dona tin to aṣeji ma nado hẹn “awugbó” yẹhiadonu tọn mítọn bu, enẹ wẹ jẹhẹnu po nujinọtedo he nọ do mí hia taidi hodotọ Klisti tọn lẹ po.—Osọ. 3:4, 5; 16:15.
JEHOVAH NA FLIN MÍ “NA DAGBE” HE MÍ WÀ
19, 20. Etẹwẹ mí sọgan wà na Jehovah nido flin mí “na dagbe” he mí wà?
19 Dopo to yẹwhegán he nọgbẹ̀ to ojlẹ Nẹhemia tọn lẹ mẹ wẹ Malaki, mẹhe dohia dọ ‘owe oflin tọn de sọ yin winwlan to ewọ nukọn, na yé he dibusi OKLUNỌ lẹ, podọ yé he to oyín etọn tọn lẹnpọn lẹ.’ (Mal. 3:16, 17) Jiwheyẹwhe ma na wọn mẹhe dibusi ewọ bosọ yiwanna yinkọ etọn lẹ pọ́n gbede.—Heb. 6:10.
20 Nẹhemia hodẹ̀ dọmọ: “Jiwheyẹwhe ṣie E, flin mi, na dagbe.” (Nẹh. 13:31) Taidi Nẹhemia, yinkọ mítọn na yin kinkan do owe oflin tọn Jiwheyẹwhe tọn mẹ, eyin mí zindonukọn nado nọ dapana gbẹdido ylankan lẹ, nọ nọgodona tito yẹwhehọluduta tọn lẹ, bo nọ ze gbigbọnu lẹ do otẹn tintan mẹ; bosọ nọ basi hihọ́na Klistiani-yinyin mítọn. Mì gbọ mí ni ‘nọ tẹ́n mìde pọ́n nado yọnẹn eyin mí to yise mẹ.’ (2 Kọl. 13:5) Eyin mí wlebòna haṣinṣan wiwe mítọn hẹ Jehovah, ewọ na flin mí “na dagbe” he mí wà.
[Kanbiọ hukan lẹ tọn]
[Yẹdide to weda 5]
Nawẹ Nẹhemia dohia dọ emi yin nugbonọ na Jehovah gbọn? (Pọ́n hukan 5, 6)
[Yẹdide to weda 7]
Gọalọna ovi towe lẹ nado wleawuna haṣinṣan pẹkipẹki de hẹ Jehovah (Pọ́n hukan 17, 18)
