1. Nehemia be Ierusalema dekenai ia giroa lou neganai, dahaka ia itaia? (Laulau ginigunana itaia.)

 IERUSALEMA ai idia noho Israela taudia be gau ta idia herevalaia noho. Tau dikana ta be dubu helaga lalonai ia noho. Levi taudia be edia gaukara idia rakatania. Elda taudia be Iehova tomadiho henia karana idia atoa guna lasi, to Sabati dinana ai bisinesi karadia idia karaia. Momo be idau bese taudia idia adavaia. Lagani 443 B.C.E bamona murinai, Nehemia be Ierusalema dekenai ia giroa lou neganai, unai gaudia ia itaia.—Neh 13:6.

2. Edena dala ai Israela be bese helagana ai ia lao?

² Israela be Dirava ida gwauhamata ia karaia besena. Lagani 1513 B.C.E. ai, Israela taudia idia gwauhamata Iehova ena ura do idia badinaia, idia gwau: “Ai be Lohiabada ena hereva ibounai do ai karaia.” (Eso. 24:3) Unai dainai, Dirava ese ia hahelagadia bona iena bese korikorina ai ia halaodia. Unai be hahenamo badana! Lagani 40 murinai, Mose ese idia ia hadibaia lou ia gwau: “Umui be bese helagana, Lohiabada emui Dirava, ena. Lohiabada, emui Dirava ese tanobada bese ibounai dekena amo umui ia abia hidi vadaeni, iena bese korikori do umui lao totona.”—Deu. 7:6.

3. Nehemia be nega iharuana Ierusalema dekenai ia lao neganai, Israela taudia edia tomadiho karana be edena bamona?

³ Matamanai, Israela taudia idia ura dikadika bese helagana ai do idia lao, to madi, gabeai unai ia idau. Badina Israela taudia haida sibona be mai edia lalona ibounai ida Dirava idia hesiai henia, to momo be Dirava ena ura idia dadaraia. Abidadama Israela taudia haida be Babulonia idia rakatania, bona Ierusalema dekenai idia giroa tomadiho momokani idia haginia lou totona. Bena lagani handred murinai, Nehemia be nega iharuana Ierusalema dekenai ia giroa neganai, ia davaria Israela taudia be Iehova tomadiho henia karana idia laloa bada lasi.

4. Edena point foa ese ita do idia durua ita helaga noho totona?

⁴ Israela taudia bamona, hari Iehova ena Witnes taudia  be Dirava ese ia hahelagaia. Horoa Keristani taudia bona “hutuma bada” taudia be Iehova ese ia hahelagaia, iena hesiai gaukara idia karaia totona. (Apok. 7:9, 14, 15; 1 Kor. 6:11) Israela taudia be edia hetura karana Iehova ida idia haboioa badina idia helaga lasi. Ita ura lasi idia ita tohotohoa. Dahaka ese ita do ia durua Iehova vairanai ita helaga bona iena hesiai gaukara ita karaia noho totona? Inai stadi ai ita be Nehemia karoa 13 ese ia herevalaia gaudia foa do ita itaia: (1) Hebamo dikadia dadaraia; (2) tiokratik gaukara idauidau karaia; (3) dirava tomadiho henia karadia atoa guna; bona (4) oiemu Keristani toana oi gimaia.

5, 6. Eliasibi bona Tobaia be daika? Bona dahaka dainai Eliasibi be Tobaia ia tura henia?

⁵ Nehemia 13:4-9 duahia. Ita be tanobada dikana lalonai ita noho dainai, ita helaga noho be mai ena hekwarahi. Eliasibi bona Tobaia mani ita laloa. Eliasibi be hahelaga tauna badana, bona Tobaia be Amono tauna bona reana ia be Parasa ena king ena hesiai tauna ta. Tobaia bona ena bamodia be Nehemia idia koua, Ierusalema ena magu do ia haginia lou lasi totona. (Neh. 2:10) Dirava ena Taravatu hegeregerena, Amono taudia be dubu helaga lalonai do idia vareai lasi. (Deu. 23:3) To, dahaka dainai Eliasibi ese dubu helaga ena daiutu ta be Tobaia dekenai ia henia?

⁶ Tobaia be Eliasibi ena turana namona ta ai ia lao. Tobaia bona ena natuna Iehohanana be Iuda hahine idia adavaia, bona Iuda taudia momo ese Tobaia ena kara namodia idia herevalaia. (Neh. 6:17-19) Danu, Eliasibi ena tubuna ta be Sanubalata, Samaria ena gavana, ena natuna kekeni ia adavaia. Sanubalata bona Tobaia be tura namodia. (Neh. 13:28) Unai bamona idia varavara dainai, ena be Tobaia be Israela tauna ta lasi, bona ia ese Dirava ena taunimanima edia gaukara ia koua toho, to Eliasibi ese Tobaia ena hereva ia abia dae. To, Nehemia be Iehova ia badinaia noho, unai dainai ia ese Tobaia ena kohu ibounai be unai daiutu amo ia nega raka-lasi.

7. Edena dala ai elda taudia bona ita ibounai ita helaga noho diba?

⁷ Ita be Dirava ita gwauhamata henia taudia dainai, namona be nega ibounai Iehova ita badinaia. Bema Dirava ena kara maoromaoro taravatudia ita badinaia lasi, ia vairanai do ita helaga lasi. Namo lasi eda varavara ita hamoalea totona, Baibel ena hakaua herevadia ita dadaraia. Keristani elda taudia be abia hidi idia karaia neganai, Iehova ena lalohadai idia tahua guna, bona sibodia edia lalohadai o hemami dekenai idia tabekau lasi. (1 Tim. 5:21) Danu, idia be kara dikadia idia dadaraia, unai amo edia hetura karana Dirava ida idia hadikaia lasi.—1 Tim. 2:8.

8. Iseda hebamo ita abia hidi neganai, dahaka ita laloatao be namo?

⁸ Namona be ita laloatao, “hebamo dikadia ese ta ena kara namodia idia hadikaia diba.” (1 Kor. 15:33) Reana eda varavara haida ese ita idia hakaua kerere diba. Guna Eliasibi be haheitalai namona ia hahedinaraia, badina ia ese Nehemia ia durua Ierusalema ena magu idia haginia lou totona. (Neh. 3:1) To, gabeai Tobaia bona ma haida ese Eliasibi idia hakaua kerere, bena ia ese Iehova vairanai kerere ia karaia. Namona be tura namodia ita bamoa, badina idia ese ita idia durua kara namodia hegeregere Baibel ita duahia, Keristani heboudia ita lao, bona ita haroro totona. Danu, bema eda famili taudia ese ita idia hagoadaia kara maoromaoro ita badinaia totona, idia ita lalokau henia be namo.

9. Dubu helaga ai dahaka ia vara? Bona Nehemia be dahaka ia karaia unai ia hamaoromaoroa totona?

⁹ Nehemia 13:10-13 duahia. Nehemia be Ierusalema dekenai ia giroa lou neganai, ia davaria taunimanima be dubu helaga dekenai kontribusen  moni idia henia lasi. Unai dainai, Levi taudia be edia gaukara helagana idia rakatania bona uma idia karaia. Unai ia vara dainai Nehemia be lohia taudia ia gwau henia, badina edia gaukara idia karaia namonamo lasi. Reana taunimanima amo idia be karoa namba 10 idia gogoa lasi, o dubu helaga dekenai idia abia lao lasi. (Neh. 12:44) Unai dainai, Nehemia ese dala ia karaia taunimanima amo karoa namba 10 idia gogoa totona. Danu, ia ese abidadama tatau haida ia abia hidi kohu haboua daiutu idia naria, bona Levi taudia edia davana idia henia totona.

10, 11. Edena dala ai tomadiho momokani ita durua diba?

¹⁰ Inai sivarai amo dahaka ita dibaia? Eda dava bada kohudia be Iehova dekenai ita henia diba. (Aon. 3:9) Bema ita ese Iehova ena gaukara durua kontribusen ita henia, unai be hegeregere ia amo ita abia gaudia be ia dekenai ita henia lou. (1 Siv. 29:14-16) Reana ita laloa iseda harihari gaudia be hegeregere lasi, to bema eda lalona ibounai ida ita henia, Iehova ese do ia abia dae.—2 Kor. 8:12.

¹¹ Lagani momo lalodiai, famili ta be wiki ta ta ai dina ta be spesel painia tau buruka ta bona ena adavana idia boiria, idia aniani hebou totona. Ena be famili lalonai natudia be eit, to nega momo sinana do ia gwau: “Emai teibolo ai mereki ten idia noho vadaeni, bona ma mereki rua ai atoa be gau ta lasi.” Ena be unai famili ese idia henia gauna be bada lasi, to unai painia rua ese edia heabidae karana idia moalelaia! Danu, unai painia rua edia hagoadaia hereva bona ekspiriens namodia ese natudia idia durua, hereva momokani lalonai idia goada idia lao. Gabeai, idia ibounai be ful-taim hesiai gaukara idia karaia.

12. Edena dala ai elda bona hesiai taudia be haheitalai namona idia hahedinaraia?

¹² Ita dibaia gauna ma ta be inai: Nehemia bamona, hari elda bona hesiai taudia be tiokratik gaukara idauidau idia durua. Bona kongrigeisen taudia be edia haheitalai amo heduru idia abia. Danu, elda taudia be aposetolo Paulo idia tohotohoa. Ia be tomadiho momokani ia durua bona heduru hereva namodia ia henia. Hegeregere, ia ese kontribusen henia dala namodia haida ia gwauraia.—1 Kor. 16:1-3; 2 Kor. 9:5-7.

13. Edena dala ai Israela taudia haida be Sabati dinana idia matauraia lasi?

¹³ Nehemia 13:15-21 duahia. Bema tauanina gaudia ita tahua momo, iseda hetura karana Iehova ida be metairametaira ia dika diba.  Esodo 31:13 ena hereva hegeregerena, Israela taudia be wiki ta ta ai Sabati idia karaia neganai, idia laloatao idia be Dirava ese ia hahelagaia besena. Sabati dinana ai famili be tomadiho, guriguri bona Dirava ena Taravatu idia laloa dobu. To, Nehemia ena negai idia noho Israela taudia haida be Sabati dinana idia laloa bada lasi. Anina be Dirava tomadiho henia karana idia laloa maragi. Nehemia be unai gaudia ia itaia dainai, dina namba siks ena adorahi ai, Sabati ia do matamaia lasi neganai, idau tano kohu hoihoilaia taudia ia luludia bona geiti ia koua.

14, 15. (a) Bema bisinesi karadia lalonai ita vareai momo, dahaka ia vara diba? (b) Edena dala ai Dirava ena laga-ani lalonai ita vareai diba?

¹⁴ Nehemia ena haheitalai amo dahaka ita dibaia? Namo lasi bisinesi karadia lalonai ita vareai bona moni momo ita tahua. Unai ia vara diba bema eda moni gaukara ita atoa guna. Badina unai gaudia ese ita ia veria diba, bena ita be nega lasi Dirava ita hesiai henia totona. Namona be Iesu ena hereva ita laloatao, ia gwau biaguna rua ita hesiai henia diba lasi. (Mataio 6:24 duahia.) Nehemia be taga tauna, to ena nega be edena bamona ia gaukaralaia? (Neh. 5:14-18) Ia be Turo taudia eiava ma haida ida bisinesi ia karaia lasi, to ena nega bada be ena tadikaka ia durua, bona Iehova ena ladana hahelagaia gaukaradia ia karaia. Unai hegeregerena, hari Keristani elda bona hesiai taudia be kongrigeisen durua gaukaradia idia laloa bada, bona edia kara namodia dainai tadikaka taihu ese idia lalokau henidia. Unai dainai lalokau, maino, bona noho namo be Dirava ena taunimanima huanai idia noho.—Ese. 34:25, 28.

¹⁵ Ena be Keristani taudia be wiki ta ta ena Sabati idia badinaia lasi, to Paulo ia gwau “Dirava ena taunimanima totona sabati ena laga-ani ia do noho.” Ma ia gwau: “Badina Dirava ena laga-ani lalonai ia vareai tauna be ena gaukara amo ia laga-ani danu, Dirava be sibona ena gaukara amo ia laga-ani hegeregerena.” (Heb. 4:9, 10) Ita be Keristani taudia dainai, bema Dirava ena ura hegeregerena eda mauri ita gaukaralaia, iena laga-ani lalonai ita vareai diba. Oi bona emu lalokau taudia ese emui mauri lalonai ruma bese ena tomadiho, kongrigeisen heboudia, bona haroro gaukara umui atoa guna, a? Bema iseda bosi eiava bisinesi turadia be eda tomadiho karadia idia matauraia lasi, namona be idia dekenai ita hahedinaraia eda tomadiho karadia ita laloa bada. Unai be hegeregere Nehemia ese ‘geiti ia koua bona Turo taudia ia lulua,’ unai amo ia hahedinaraia ia be Iehova ena ura ia atoa guna. Ita danu be Dirava ese ia hahelagaia taudia dainai, namona be sibona ita nanadaia, ‘Egu mauri dalana ese ia hahedinaraia lau be Iehova ena hesiai gaukara lau atoa guna, a?’—Mat. 6:33.

16. Edena dala ai Nehemia ena negai, Israela taudia be kahirakahira edia helaga karana idia rakatania?

¹⁶ Nehemia 13:23-27 duahia. Nehemia ena negai, Israela tatau be idau bese hahinedia idia adavaia. Nega ginigunana Nehemia be Ierusalema ia lao neganai, hanua ena tau badadia ia hamaorodia gwauhamata pepana ta do idia sainia; unai pepa amo idia hahedinaraia idau bese hahine do idia adavaia lasi. (Neh. 9:38; 10:30) To, lagani momo murinai, Nehemia ia itaia Israela tatau be idau bese hahine idia adavaia sibona lasi, to kahirakahira edia helaga karana idia rakatania danu. Unai idau bese hahine edia natudia be Heberu gado ai idia duahiduahi o hereva diba lasi. Idia bada neganai, do idia gwau idia be Israela taudia, a? Eiava do idia gwau idia be Asadoda, Amono o Moaba taudia? Heberu gado idia diba lasi dainai, Dirava ena Taravatu idia lalopararalaia diba, a? Edena dala ai Iehova do idia diba bona hesiai henia, to edia sinana edia dirava koikoidia do idia dadaraia? Kara ta idia karaia haraga be namo, bona Nehemia be unai ia karaia.—Neh. 13:28.

17. Edena dala ai tama sina ese natudia idia durua diba, Iehova idia tura henia totona?

 ¹⁷ Hari, namona be kara ta ita karaia haraga eda natudia do ita durua, Iehova idia tura henia totona. Tama sina e, sibona umui nanadaia, ‘Egu natudia be hereva momokani ena “gado goevadaena” idia herevalaia namonamo, a? (Sep. 3:9, BHḡ) Egu natudia edia hereva dalana ese Dirava ena lalohadai, eiava tanobada ena lalohadai idia hahedinaraia?’ Bema oi itaia idia be tanobada ena lalohadai idia hahedinaraia, namo lasi oi lalomanoka haraga. Mani inai oi laloa: Bema tau ta ia ura gado matamata ta ia dibaia to gau momo ese ena lalona idia veria, do ia hekwarahi, ani? Unai hegeregerena, emu natudia danu be hahetoho momo idia davaria noho. Unai dainai, Ruma Bese Ena Tomadiho negadia bona dala ma haida oi gaukaralaia, emu natudia oi durua edia hetura karana Iehova ida ia goada totona. (Deu. 6:6-9) Satani ena tanobada amo ita gini siri karana ena namo haida oi herevalaia. (Ioa. 17:15-17) Namona be oi gaukara goada edia kudouna oi hamarerea totona.

18. Dahaka dainai tama sina idia hegeregere edia natudia idia durua, Iehova dekenai edia mauri idia gwauhamatalaia totona?

¹⁸ Momokani, natudia ta ta ese abia hidi do idia karaia, Dirava do idia hesiai henia o lasi. To tama sina e, dala idauidau ai emui natudia umui durua diba. Hegeregere, haheitalai namona umui hahedinaraia, taravatu umui atoa, bona edia abia hidi dainai do idia vara diba gaudia umui herevalaia. Umui sibona be emui natudia umui diba namonamo dainai, idia umui durua diba Iehova dekenai edia mauri idia gwauhamatalaia totona. Umui durua edia Keristani toana do idia abia bona dogoatao noho totona. Oibe, ita ibounai ita naria namonamo be namo, badina ita ura lasi iseda “dabua,” o Dirava ena taravatu ita dadaraia bona Keristani kara namodia ita haboioa.—Apok. 3:4, 5; 16:15.

19, 20. Edena dala ai Iehova ese ita do ia laloatao?

¹⁹ Peroveta tauna Malaki ia gwau: “Buka ta lalonai be Lohiabada idia gari henia taudia, bona Lohiabada idia matauraia noho taudia edia ladana idia torea.” (Mal. 3:16, 17) Dirava ese iena ladana idia matauraia bona lalokau henia taudia do ia laloatao.—Heb. 6:10.

²⁰ Nehemia ena guriguri lalonai ia gwau: “Egu Dirava e, inai lauegu kara ibounai do oi laloatao, bona idia dainai mani lau do oi hanamoa.” (Neh. 13:31) Nehemia hegeregerena, iseda ladana be Dirava ena buka lalonai do ia noho bema hebamo dikadia ita dadaraia, tiokratik gaukara idauidau ita karaia, Dirava tomadiho henia karadia ita atoa guna, bona iseda Keristani toana ita gimaia. Unai dainai, namona be sibona ‘ita tahua noho bema ita be eda abidadama ita dogoatao noho eiava lasi.’ (2 Kor. 13:5) Bema Iehova ita tura henia bona iseda helaga karana ita dogoatao noho, ia ese ita do ia laloatao.