1. Ki bann probleme Nehémia ti trouvé kan li ti retourne Jérusalem? (Guette zimage dan commencement lartik.)

 BANN habitant Jérusalem pé kozé. Enn etranger ki tou dimoune koné ek ki bien opposé ar peuple Bondié pé reste dan enn la chambre dan temple. Bann Lévite inn abandonne zot travail. Au lieu ki zot prend la tête dan vrai l’adoration, bann ancien pé faire commerce jour Sabbat. Beaucoup Israélite pé marié ar bann femme non-Juif. Sa c’est zis certain probleme ki Nehémia trouvé kan li retourne Jérusalem apré 443 Avant Nou Lepok.​—Neh. 13:6.

2. Couma bann Israélite ti vinn enn nation saint?

² Israël ti enn nation ki ti voué ar Bondié. En 1513 Avant Nou Lepok, bann Israélite ti bien disposé pou obeir Jéhovah. Zot ti dire: “Nou d’accord pou faire tou seki Jéhovah inn dire.” (Ex. 24:3) Alors, Bondié ti faire zot vinn saint, setadir ti mette zot a part couma enn peuple ki Li ti choisir. Sa ti vrai-mem enn grand privilege! Quarante an plitar, Moïse ti faire zot rappel: “To enn peuple ki saint pou Jéhovah to Bondié. Parmi tou bann peuple ki lor la terre, c’est toi ki Jéhovah to Bondié finn choisir pou vinn so peuple, so prop di-bien.”​—Deut. 7:6.

3. Kan Nehémia ti retourne Jérusalem enn deuxieme fois, dan ki condition spirituel bann Juif ti été?

³ Malheureusement, l’enthousiasme ki bann Israélite ti ena au commencement parski zot ti enn nation saint, pa ti dure longtemps. Mem si ti ena toujours certain Israélite ki ti servi Bondié, en general, bann Juif ti plis interessé pou parette saint ki pou faire volonté Bondié. Kan deuxieme fois Nehémia ti vinn Jérusalem, apepré cent an ti’nn passé depuis ki bann Juif fidele ti’nn sorti Babylone pou retabli vrai l’adoration. Ankor enn fois, zele ki bann Israélite ti ena pou bann kitsoz spirituel ti’nn diminué.

4. Ki bann point nou pou examiné dan sa lartik-la?

⁴ Pareil couma bann Israélite, zordi dan enn sens general, Bondié finn faire bann Témoins de Jéhovah vinn saint. Bann Chretien oint ek bann membre ‘la grande  foule’ toulé-deux, zot saint. Bondié inn mette zot a part pou so service sacré. (Rév. 7:9, 14, 15; 1 Cor. 6:11) Personne parmi nou pa envie perdi sa position-la devant Bondié pareil couma sa ti arrive bann Israélite. Ki nou kapav faire pou ki sa pa arrive nou ek pou nou reste saint devant Jéhovah ek Li contigne servi nou? Dan sa letid-la, nou pou examine quatre point ki trouve dan Nehémia chapitre 13: (1) Rejette bann mauvais frequentation; (2) soutenir bann disposition theocratik; (3) mette bann kitsoz spirituel en premier; ek (4) protege ou l’identité en tant ki Chretien. Anou examine sakenn sa bann point-la.

5, 6. Kisannla Éliashib ek Tobia ti été, ek kifer li possible ki Éliashib ti frequente Tobia?

⁵ Lire Nehémia 13:4-9. Tout autour nou ena bann mauvais kitsoz ki kapav influence nou, alors li pa fasil pou nou reste saint. Anou prend l’exemple Éliashib ek Tobia. Éliashib ti grand pretre, ek Tobia ti enn Ammonite ki kitfois ti travail pou le roi Perse. Tobia ek so bann associé ti opposé ar bann zeffort ki Nehémia ti faire pou ré-construire muraille Jérusalem. (Neh. 2:10) Bann Ammonite pa ti gagne droit vinn dan temple. (Deut. 23:3) Alors, kifer eski grand pretre ti donne enn dimoune couma Tobia enn place dan la salle a mangé dan temple?

⁶ Tobia ti enn bon associé avek Éliashib. Tobia ek so garson Yehohanân, ti marié avek bann femme Juif, ek beaucoup Juif ti koz en bien lor Tobia. (Neh. 6:17-19) Enn ti-zenfant Éliashib ti marié avek tifi Sânballat, gouverneur Samarie, ki ti enn parmi bann pli proche associé Tobia. (Neh. 13:28) Kitfois sa bann relation-la faire nou comprend kifer Grand Pretre Éliashib ti permette enn dimoune ki pa ti croire Jéhovah influence li. Mais Nehémia ti montré so fidelité envers Jéhovah kan li ti mette tou bann meuble Tobia ki ti dan salle a mangé, dehors.

7. Couma bann ancien ek lezot Chretien rejette tou seki kapav faire zot vinn impur devant Jéhovah?

⁷ En tant ki enn peuple ki’nn voué ar Bondié, nou fidelité pou Jéhovah bizin touletan passe enn premier dan nou lavi. Si nou pa reste attaché ar bann principe Biblik, nou pa pou kapav reste saint devant Li. Fodé pa nou laisse bann relation familial passe avant bann principe Biblik. Bann ancien laisse-zot guidé par bann pensée Jéhovah, pa par zot prop l’opinion ou-soit zot sentiment. (1 Tim. 5:21) Zot faire bien attention pou ki nanyé pa mette en danger zot bann bon relation avek Bondié.​—1 Tim. 2:8.

8. Ki tou bann serviteur Jéhovah bizin rappel concernant zot frequentation?

⁸ Li bon nou rappel ki “bann mauvais frequentation gate bann bon l’habitude.” (1 Cor. 15:33) Li possible ki certain parmi bann membre nou famille ena enn mauvais l’influence lor nou lavi. Au commencement, Éliashib ti donne enn bon l’exemple bann lezot Israélite kan li ti soutenir Nehémia dan construction bann muraille Jérusalem. (Neh. 3:1) Mais, avek le temps, mauvais l’influence Tobia ek lezot, ti surement amenn Éliashib pou faire bann kitsoz ki ti faire li vinn impur devant Jéhovah. Bann bon frequentation encourage nou pou faire bann kitsoz spirituel, couma par exemple, lire la Bible, assisté reunion, ek participe dan predication. Nou bien reconnaissant envers bann membre nou famille ki encourage nou pou faire seki bon.

9. Kifer bann Lévite ti arrete travail dan temple, ek ar kisannla Nehémia ti faire reproche?

⁹ Lire Nehémia 13:10-13. Li parette ki dan lepok ki Nehémia ti retourne Jérusalem,  bann Israélite ti pé faire enn tigit contribution-mem pou temple. A cause sa, bann Lévite ti’nn abandonne zot travail dan temple pou al travail dan zot karo. Nehémia ti reproche bann chef adjoint pou sa situation-la. Li parette ki zot ti pé neglige zot responsabilité. Soit zot pa ti pé ramasse la dime ki le peuple ti pé faire, soit zot pa ti envoye sa larzan-la pou temple, couma zot ti bizin faire. (Neh. 12:44) Alors Nehémia ti prend bann disposition pou ramasse la dime. Li ti etabli bann zom fidele, pou donne sa la dime-la bann Lévite.

10, 11. Ki privilege bann serviteur Bondié ena pou soutenir vrai l’adoration?

¹⁰ Eski nou kapav tire enn leson dan sa recit-la? Oui, parski nou ena privilege pou honore Jéhovah avek nou bann kitsoz ki ena valeur. (Prov. 3:9) Kan nou faire bann contribution pou soutenir bann activité spirituel, en realité nou pé donne Jéhovah seki deja pou Li. (1 Chron. 29:14-16) Kitfois nou pensé ki nou pena beaucoup pou donné, mais si nou disposé pou donné, Jéhovah pou content pou accepté nou don.​—2 Cor. 8:12.

¹¹ Pendant plusieurs l’année, enn famille ki ti ena huit zenfant ti invite enn couple pionnier special ki agé, pou mange avek zot enn fois par semaine. Mem si zot ti enn grand famille, mama-la ti dire: “Ki été deux l’assiette en plis pou enn la table dix dimoune?” Li possible ki enn repas par semaine pa parette beaucoup, mais sa bann pionnier-la ti bien reconnaissant envers sa famille-la! En retour, zot ti enn benediction pou sa famille-la. Zot bann parole encourageant ek bann bon l’experience ki zot ti raconté, ti pousse bann zenfant pou faire progré dan la verité. Plitar tou bann zenfant ti prend service a plein temps.

12. Ki bon l’exemple bann zom ki’nn etabli dan congregation donné?

¹² Enn lot leson ki nou kapav aprann c’est: Pareil couma Nehémia, bann zom ki’nn etabli zordi, prend la tête pou soutenir bann disposition theocratik. Lezot membre dan congregation tire bann bienfait ar zot l’exemple. Dan sa domaine-la, bann ancien imite aussi l’apotre Paul. Li ti soutenir vrai l’adoration ek ti donne bann bon conseil. Par exemple, li ti donne bann suggestion pratik couma pou faire bann contribution.​—1 Cor. 16:1-3; 2 Cor. 9:5-7.

13. Couma certain Juif pa ti pé respecté jour Sabbat?

¹³ Lire Nehémia 13:15-21. Si nou laisse-nou absorbé par bann kitsoz materiel, tigit  par tigit nou kapav perdi nou spiritualité. Dapré Exode 31:13, bann Israélite ti bizin garde Sabbat toulé semaine ek sa ti rappel zot ki zot ti enn peuple saint. Zot ti bizin mette sa jour-la a part pou adore Jéhovah en famille, pou prié, ek medite lor la Loi Bondié. Mais certain dan lepok Nehémia ti considere Sabbat couma enn jour normal​—zot ti contigne faire business. Zot ti faire zot l’adoration passe apré. Kan Nehémia ti trouve sa, li ti faire ferme bann laport lavil sixieme jour, kan ti commence faire noir. Li ti pousse bann marchand etranger en dehors lavil avant ki Sabbat ti commencé.

14, 15. (a) Ki kapav arrivé si nou pa garde nou bann activité commercial dan zot place? (b) Couma nou kapav rente dan repos Bondié?

¹⁴ Ki nou kapav aprann ar l’exemple Nehémia? Enn leson, nou bizin garde nou bann activité commercial dan zot place. Sinon, nou travail kapav absorbe nou le temps, surtout si nou bien content nou travail. Mais nou bizin rappel ki Jésus ti dire ki nou pa kapav esclave deux maitre. (Lire Matthieu 6:24.) Nehémia ti pou kapav gagne beaucoup kass ek servi so le temps pou faire business avek bann habitant Tyr ek lezot marchand. Mais ki li ti faire? (Neh. 5:14-18) Li ti travail dur pou aide so bann frere ek pou faire bann kitsoz ki ti pou sanctifié nom Jéhovah. Zordi aussi pareil, bann ancien ek bann assistant ministeriel consacré zot le temps ek zot la force pou aide zot congregation. Zot bann frere ek soeur content zot pou sa l’attitude ki zot ena-la. A cause sa, ena lamour, la paix ek securité parmi bann serviteur Bondié.​—Ézék. 34:25, 28.

¹⁵ Mem si li pa necessaire ki bann Chretien garde Sabbat chaque semaine, Paul dire nou ki “reste ankor enn repos sabbat pou peuple Bondié.” Li ti ajouté: “Sa dimoune ki finn rente dan repos Bondié-la, finn reposé li aussi ar bann travail ki li’nn faire, pareil couma Bondié finn reposé ar So bann travail.” (Héb. 4:9, 10) En tant ki Chretien, nou kapav rente dan repos Bondié kan nou obeir Jéhovah ek soutenir so projet. Eski pou ou ek ou famille l’adoration pou Jéhovah, reunion, ek predication passe en premier dan zot lavi? Kitfois nou pou bizin montré-nou ferme surtout si nou patron ou-soit nou bann collegue travail pa respecté nou bann l’objectif theocratik. Coumadir, nou pou bizin ‘ferme bann laport lavil ek pousse bann habitant Tyr’ pou nou kapav donne priorité bann kitsoz sacré. Nou enn peuple saint pou Jéhovah, alors, li bon nou demann-nou-mem: ‘Eski par mo fason vive mo montré ki mo mette Jéhovah en premier dan mo lavi?’​—Mat. 6:33.

16. Dan lepok Nehémia, couma l’identité bann Israélite en tant ki enn peuple saint ti menacé?

¹⁶ Lire Nehémia 13:23-27. Dan lepok Nehémia, bann Israélite ti pé marié ar bann femme etranger. Kan premier fois Nehémia ti vinn Jérusalem, li ti faire tou bann ancien signe enn l’accord ek faire serment ki zot pa ti pou marié avek bann païen. (Neh. 9:38; 10:30) Selman, plusieurs l’année apré, li ti trouvé ki bann Juif pa ti’nn zis marié avek bann femme etranger, mais aussi zot ti pré pou perdi zot l’identité couma enn peuple saint pou Bondié! Bann zenfant sa bann madame etranger-la pa ti kapav ni lire ni koz Hébreu. Eski zot ti pou kapav identifié-zot-mem couma bann Israélite kan zot ti pou grandi? Ou-soit eski zot ti pou considere-zot-mem couma bann Ashdodite, bann Ammonite, ou-soit bann Moabite? Zot pa ti konn la langue Hébreu, alors couma zot ti pou kapav comprend la Loi Bondié? Couma zot ti pou aprann pou konn Jéhovah ek choisir pou servi Li au lieu ki servi bann fausse bondié ki zot mama ti pé adoré? Nehémia ti agir bien  vite pou protege l’identité bann Israélite.​—Neh. 13:28.

17. Couma bann parent kapav aide zot zenfant pou ena bann relation personnel avek Jéhovah?

¹⁷ Zordi, nou bizin prend bann bon decision pou aide nou bann zenfant gagne enn identité en tant ki Chretien. Parent, demann-ou-mem: ‘Eski mo bann zenfant konn koz bien la “langue pur,” setadir eski zot comprend la verité ki ena dan la Bible ek zot koz lor la? (Tseph. 3:9) Eski zot conversation montré ki zot influencé par l’esprit Bondié ou-soit l’esprit le monde?’ Pa bizin ou decourage vite si ou trouvé ki zot bizin amelioré. Sa prend le temps pou aprann enn langue, surtout kan nou entouré par bann distraction. Ena beaucoup pression ki pousse ou bann zenfant pou desobeir Bondié. Alors, avek patience, profite le temps ki ou passé dan zot l’Adoration en Famille ek lezot l’occasion pou aide ou bann zenfant developpe bann bon relation avek Jéhovah. (Deut. 6:6-9) Montré zot ki bann bienfait zot kapav gagné si zot diferan ar le monde Satan. (Jean 17:15-17) Ek faire tou seki ou kapav pou touche zot leker.

18. Kifer bann parent dan enn pli bon position pou prepare zot zenfant pou voué zot lavi ar Jéhovah?

¹⁸ Finalement, chaque zenfant pou decidé si li pou servi Bondié ou-soit non. Mais bann parent kapav faire beaucoup pou aide zot zenfant. Sa implik ki bann parent donne enn bon l’exemple, fixé bann limite bien clair, ek faire zot comprend ki zot bann decision pou ena bann consequence. Parent, personne pa dan enn pli bon position ki ou pou prepare ou bann zenfant pou voué zot lavi ar Jéhovah. Zot bizin ou l’aide pou gagne zot l’identité en tant ki Chretien ek pou protege sa. Bien sur, nou tou nou bizin reste lor nou garde pou nou pa perdi ‘nou linge,’ setadir bann qualité ek bann principe ki identifié nou couma bann disciple Christ.​—Rév. 3:4, 5; 16:15.

19, 20. Ki nou kapav faire pou Jéhovah rappel nou pou ‘nou fidelité’?

¹⁹ Prophete Malaki ti vive dan mem lepok ki Nehémia. Li ti dire ki “finn commence ecrire enn livre souvenir . . . pou bann ki ena la crainte pou Jéhovah ek pou bann ki pense so nom.” (Mal. 3:16, 17) Jamais Bondié pou blié bann dimoune ki ena enn grand la crainte pou Li ek ki content so nom.​—Héb. 6:10.

²⁰ Nehémia ti faire sa la priere-la: “Ah mo Bondié, pa blié moi pou mo fidelité.” (Neh. 13:31) Pareil couma Nehémia, nou nom pou ecrire dan livre souvenir Bondié si nou contigne rejette bann mauvais frequentation, soutenir bann disposition theocratik, mette bann kitsoz spirituel en premier ek protege nou l’identité en tant ki Chretien. Anou ‘contigne testé-nou-mem pou guetté si nou dan la foi.’ (2 Cor. 13:5) Si nou faire tou seki nou kapav pou nou reste dan peuple Bondié, enn peuple a part ek ki saint, Li pou rappel nou pou ‘nou fidelité.’