1. Ki desaroyo alarmante Nehemias a topa ora el a regresa Jerusalem? (Wak e prome plachi.)

 E HABITANTENAN di Jerusalem tabata tur preocupa. Dicon? Pa motibo di loke tabata pasa den nan stad. Un opositor notorio di Jehova tabata keda den un di e cambernan di e tempel. E levitanan no tabata haci nan trabou mas. En bes di e ancianonan guia e pueblo den e adoracion di Jehova, nan tabata haci negoshi riba sabbat. Y hopi Israelita tabata casa cu hende di otro nacion. Esaki ta apenas algun di e desaroyonan alarmante cu Nehemias a topa ora el a regresa Jerusalem despues di aña 443 prome cu Cristo.—Neh. 13:6.

2. Con Israel a bira un nacion santifica?

² Israel tabata un nacion dedica na Dios. Na aña 1513 prome cu Cristo, e Israelitanan tabata ansioso pa obedece Jehova. E tempo ey nan a bisa: “Tur e palabranan cu SEÑOR a papia nos lo haci!” (Exo. 24:3) Pues, Dios a santifica nan. Cu otro palabra, el a scoge nan pa ta su pueblo y tabata kier pa nan ta santo y separa for di e otro nacionnan. Ki un gran privilegio esey tabata! Cuarenta aña despues, Moises a corda nan: “Bo ta un pueblo santo pa SEÑOR bo Dios; SEÑOR bo Dios a scoge bo, for di tur e pueblonan cu tin riba superficie di tera, pa ta un pueblo special pa su mes.”—Deu. 7:6.

3. Den ki condicion spiritual e Hudiunan tabata ora Nehemias a bin Jerusalem pa di dos biaha?

³ Lamentablemente, e entusiasmo cu Israel tabatin na principio como un nacion santo no a dura hopi. Semper tabatin algun Hudiu cu a sirbi Dios, pero mayoria di nan tabata mas interesa den parce santo of devoto cu den haci e boluntad di Dios. Ora Nehemias a bin Jerusalem pa di dos biaha, esey tabata casi shen aña despues cu un resto di Hudiu fiel a bolbe for di Babilonia pa restaura adoracion berdadero. Pero un biaha mas, e nacion su entusiasmo pa asuntonan spiritual tabata menguando.

4. Kico por yuda nos keda santo y util pa e sirbishi di Jehova?

 ⁴ Mescos cu e Israelitanan, Dios a santifica Testigonan di Jehova di awe. Tanto e cristiannan ungi como e miembronan di e “multitud grandi” ta santo, es decir, separa of aparta pa sirbishi sagrado. (Rev. 7:9, 14, 15; 1 Cor. 6:11) Cu tempo e Israelitanan a perde nan amistad cu Jehova pasobra nan no a keda santo. Nos no kier pa esey pasa cu nos. Kico nos por haci anto pa keda santo y util pa e sirbishi di Jehova? Nehemias capitulo 13 ta siña nos cuater cos cu nos por haci: (1) Evita mal compania; (2) apoya loke e organisacion di Dios ta haci; (3) pone e cosnan di Jehova na prome luga y (4) proteha nos identidad cristian. Laga nos analisa e puntonan aki.

5, 6. Ken Eliasib cu Tobias tabata, y dicon kisas nan tabata amigo?

⁵ Lesa Nehemias 13:4-9. Nos ta rondona pa mal influencia, pues no ta facil pa keda santo. Por ehempel, laga nos wak e caso di Eliasib cu Tobias. Eliasib tabata sumo sacerdote. Y Tobias tabata un Amonita cu probablemente tabata traha como un funcionario di rango inferior pa rey di Persia. Anteriormente, Tobias cu su compinchinan a purba di stroba Nehemias di reconstrui e murayanan di Jerusalem. (Neh. 2:10) Ademas, segun e Ley di Dios, Amonitanan no tabata mag di bin mes riba e tereno di tempel. (Deu. 23:3) Pues, dicon e sumo sacerdote a duna un homber manera Tobias un camber den e tempel?

⁶ Tabatin tres motibo: Di prome, Eliasib a cera amistad cu Tobias. Di dos, Tobias cu su yiu Johanan a casa cu muhernan Hudiu, y hopi Hudiu tabata papia hopi bon di Tobias. (Neh. 6:17-19) Di tres, Tobias tabata bon amigo di Sanbalat, gobernador di Samaria. E yiu muher di Sanbalat tabata casa cu un nieto di Eliasib. (Neh. 13:28) Tur e lasonan aki kisas ta splica dicon Sumo Sacerdote Eliasib a laga Tobias influenci’e, a pesar cu Tobias no tabata un creyente y tabata opone e obra di e pueblo di Dios. Pero Nehemias si a demostra cu e tabata leal na Jehova, ya cu el a saca tur e cosnan di cas for di e camber di Tobias benta afo.

7. Con sirbidornan di Dios, incluso e ancianonan, por keda santo?

⁷ Nos ta un pueblo dedica na Dios, pues nos lealtad na dje semper mester ta na prome luga den nos bida. Pa nos por keda santo den su bista, nos mester biba segun su normanan husto. Pesey nos no mester laga lasonan familiar bira mas importante cu principionan di Bijbel. Y ancianonan ta tuma decision basa riba Jehova su manera di pensa, no basa riba nan propio opinion of sintimento. (1 Tim. 5:21) Nan ta tene cuidou pa nan no haci nada cu lo por pone nan perde e aprobacion di Dios.—1 Tim. 2:8.

8. Kico tur sirbidor dedica di Jehova mester corda tocante e hendenan cu nan ta asocia cu ne?

⁸ Ta bon pa nos corda cu “mal compania ta daña bon custumber.” (1 Cor. 15:33) Hasta algun miembro di nos famia por tin un mal influencia riba nos. Un tempo Sumo Sacerdote Eliasib tabata un bon ehempel y a coopera cu Nehemias pa reconstrui e murayanan di Jerusalem. (Neh. 3:1) Pero cu tempo e mal influencia di Tobias y di otro hende aparentemente a pon’e haci cosnan cu a lag’e bira impuro den bista di Jehova. Nos tin cu asocia cu hende cu ta anima nos pa haci bon cosnan, manera lesa Bijbel, asisti na reunion y bay den sirbishi di veld. Nos mester ta hopi agradecido si nos tin miembronan di famia cu tin e bon influencia ey riba nos.

9. Ki situacion tabata tuma luga na e tempel, y kico Nehemias a haci pa corigi esey?

⁹ Lesa Nehemias 13:10-13. Parce cu ora Nehemias a regresa Jerusalem e Israelitanan  casi no tabata duna contribucion mas na tempel. Esey a pone cu e levitanan a laga nan asignacion un banda y a bay traha den nan cunucu pa cria nan famia. Nehemias a culpa e oficialnan Hudiu pa e situacion ey, kisas pasobra nan no tabata colecta e diesmo cerca e pueblo of pasobra nan no tabata trece e diesmo na e tempel manera tabata nan deber. (Neh. 12:44) Pues, Nehemias a tuma medida pa colecta e diesmo: El a nombra hombernan confiabel pa supervisa e depositonan di tempel y pa duna e diesmo na e Levitanan.

10, 11. Con nos por apoya adoracion berdadero?

¹⁰ Kico nos por siña for di esaki? Wel, e ta recorda nos cu nos tin e privilegio di honra Jehova cu nos rikesa, esta, cu nos cosnan valioso. (Prov. 3:9) Ora nos ta duna contribucion pa apoya su trabou, eigenlijk nos ta dunando Jehova loke ta di dje caba. (1 Cro. 29:14-16) Kisas nos ta pensa cu nos no por dun’e hopi, pero si nos tin e deseo, nos tur por contribui cu loke nos tin, y gustosamente e ta acepta esey.—2 Cor. 8:12.

¹¹ Durante hopi aña, un famia cu ocho yiu tabata invita un pareha di edad cu tabata pionero special pa bin come un biaha pa siman cerca nan. E mama semper tabata bisa: ‘Caminda 10 por come, 12 por come!’ Un cuminda pa siman kisas no ta parce gran cos, pero e pioneronan ey si tabata hopi agradecido pa e hospitalidad! Nan, na nan turno, tabata un bendicion pa e famia. E palabranan di animacion y e experencianan di e pareha aki a motiva e yiunan pa haci progreso den e berdad. Despues, tur e yiunan a drenta den sirbishi di tempo completo.

12. Ki bon ehempel e anciano- y sirbidornan ministerial ta pone den congregacion?

¹² Un otro les cu e relato di Nehemias ta siña nos ta cu e anciano- y sirbidornan ministerial mester ta un ehempel den apoya e areglonan cu e organisacion di Dios tin, y asina nan ta yuda e otro rumannan den congregacion. Den esaki e ancianonan ta imita tambe e ehempel di apostel Pablo. El a apoya adoracion berdadero y a duna conseho util. Por ehempel, el a duna algun sugerencia practico tocante con pa duna contribucion.—1 Cor. 16:1-3; 2 Cor. 9:5-7.

13. Con algun Hudiu no tabata respeta sabbat?

¹³ Lesa Nehemias 13:15-21. Si nos ta demasiado preocupa cu asuntonan material, pocopoco pero sigur nos por perde nos relacion cu Jehova. Segun Exodo 31:13, e Israelitanan mester a uza e sabbat semanal  pa corda riba nan relacion cu Jehova como su pueblo separa y santo. E tabata un dia reserva pa adora Jehova hunto como famia, pa haci oracion y pa medita riba e Ley di Dios. Pero pa algun Israelita den tempo di Nehemias, e sabbat a bira un dia di trabou mescos cu tur otro dia. Nan a pone adoracion di Dios na di dos luga. Ora Nehemias a mira loke tabata pasando, el a core cu e comerciantenan stranhero prome cu sabbat a cuminsa y a laga cera e portanan di e stad.

14, 15. (a) Kico por pasa si nos no limita e cantidad di tempo cu nos ta dedica na gana placa? (b) Con nos por drenta den e sosiego di Dios?

¹⁴ Kico nos por siña for di esaki? Un les cu nos ta saca ta cu nos mester limita e cantidad di tempo cu nos ta dedica na gana placa. Si nos no haci esey, facilmente nos trabou por kita nos atencion for di Jehova su adoracion of nos curason por bira dividi, specialmente si e ta un trabou cu nos ta gusta. Corda cu Hesus a bisa cu nos no por ta esclavo di dos doño. (Lesa Mateo 6:24.) Nehemias por a gana hopi placa, y e por a uza su tempo pa haci negoshi cu e hombernan di Tiro y otro comerciantenan. Pero na luga di esey, kico el a haci? (Neh. 5:14-18) El a dedica su tempo na yuda su rumannan y na haci cosnan cu a trece honor pa Jehova su nomber. Awe ta mescos. E anciano- y sirbidornan ministerial ta concentra riba actividadnan cu ta beneficia e congregacion, y pesey e rumannan ta stima nan. Como resultado, ta reina un ambiente di amor, paz y siguridad den e pueblo di Dios.—Eze. 34:25, 28.

¹⁵ Cristiannan no mester warda un sabbat semanal, pero toch Pablo a bisa cu “ta keda un sosiego di sabbat pa e pueblo di Dios.” Y el a agrega: “E hende cu a drenta den e sosiego di Dios tambe a sosega di su obranan, mescos cu Dios a sosega di esnan di dje.” (Heb. 4:9, 10) Como cristian, nos por drenta den e sosiego di Dios door di obedece Jehova y haci nos best pa apoya su proposito. Abo cu bo famia ta pone Jehova na prome luga door di tene boso adoracion como famia, asisti na reunion y participa den sirbishi di veld? Kisas nos doño di trabou of e hendenan cu nos ta traha cu ne no ta considera e cosnan aki importante. Den tal caso, nos mester para firme. Kisas nos lo tin cu haci manera Nehemias y ‘cera e portanan y core cu e hombernan di Tiro’, pa asina nos por duna prioridad na cosnan sagrado. Ya cu Dios ta considera cu nos ta su pueblo santo y separa, nos tin cu puntra nos mes: ‘E manera cu mi ta biba ta demostra cu mi ta pone Jehova na prome luga?’—Mat. 6:33.

16. Con e identidad di e pueblo di Dios como un nacion santifica tabata na peliger den tempo di Nehemias?

¹⁶ Lesa Nehemias 13:23-27. Den tempo di Nehemias, e hombernan Israelita tabata casa cu muher stranhero. Durante su prome bishita na Jerusalem, Nehemias a laga tur e ancianonan firma un acuerdo skirbi den cua nan ta hura cu nan lo no casa cu muher pagano. (Neh. 9:38; 10:30) Pero durante su di dos bishita na Jerusalem, el a ripara cu e Hudiunan no solamente a casa cu muher stranhero, sino cu tambe nan tabata a punto di perde nan identidad como Dios su pueblo santifica! E yiunan di e muhernan pagano ey no por a papia ni lesa Hebreo. Acaso e muchanan ey lo a identifica nan mes como Israelita ora nan a bira grandi? Of mas bien nan lo a considera nan mes Asdodita, Amonita of Moabita? Con nan lo por a compronde e Ley di Dios si nan no tabata sa Hebreo? Con nan lo por a siña conoce Jehova y scoge pa sirbi e en bes di e diosnan falso cu nan mamanan tabata adora? Nehemias a actua lihe y firme pa proteha e identidad di e Israelitanan.—Neh. 13:28.

17. Con mayornan por yuda nan yiunan cera un amistad personal cu Jehova?

 ¹⁷ Awe nos tin cu dal pasonan firme pa yuda nos yiunan haya e identidad cristian, si, pa nan sinti nan mes como un berdadero cristian. Abo como mayor, puntra bo mes: ‘Con bon mi yiunan ta domina e “idioma puro”, es decir, con bon nan ta compronde e berdadnan di Bijbel y cuanto nan ta papia tocante dje? (Sof. 3:9, NW) Loke mi yiunan ta combersa ta mustra cu nan ta bou di e influencia di e spirito di Dios of di e spirito di mundo?’ No desanima mucho lihe si bo ripara cu bo yiunan tin cu mehora den esaki. Ta tuma tempo pa siña un idioma, specialmente si rond di bo tin hopi cos pa kita bo atencion. Mundo ta pone hopi presion riba bo yiunan pa nan desobedece Dios. Pues tene pasenshi, y uza bo Adoracion Como Famia y otro ocasionnan pa yuda nan cera un amistad personal cu Jehova. (Deu. 6:6-9) Laga nan mira e beneficionan di ser diferente for di e mundo di Satanas. (Juan 17:15-17) Y haci bo best pa yega nan curason.

18. Dicon mayornan cristian ta den e mihor posicion pa yuda nan yiunan scoge pa dedica nan mes na Jehova?

¹⁸ Na final di cuenta, cada yiu mes tin cu dicidi si e kier sirbi Dios of no. Pero tin hopi manera cu abo, como mayor, por yuda nan. Bo por ta un bon ehempel, bo por splica nan bon cla ki comportacion ta inaceptabel y bo por papia cu nan tocante e consecuencianan cu nan decisionnan por tin. Mayornan, boso ta den e mihor posicion pa yuda nan scoge pa dedica nan mes na Jehova. Nan mester di boso yudansa pa haya e identidad cristian y proteh’e. Claro cu nos tur tin cu tene cuidou pa nos no perde nos “paña” simbolico, esta, e cualidadnan y normanan cu ta identifica nos como siguidornan di Cristo.—Rev. 3:4, 5; 16:15.

19, 20. Kico nos mester haci pa Jehova corda riba nos “pa bon”?

¹⁹ Un profeta cu a biba den tempo di Nehemias tabata Malakias. El a splica cu Jehova ta corda ‘esnan cu ta tem’e y cu ta honra su nomber’ y cu e ta skirbi nan nomber den “un buki di memoria.” (Mal. 3:16, 17) Pues, Dios hamas lo lubida hende cu tin respet y temor p’e y cu ta stima su nomber!—Heb. 6:10.

²⁰ Nehemias a pidi den oracion: “Corda di mi, o mi Dios, pa bon.” (Neh. 13:31) E tabata kier pa Jehova corda con el a sirbie. Dios lo corda nos tambe y skirbi nos nomber den su buki di memoria si nos evita mal compania, apoya loke su organisacion ta haci, pone su cosnan na prome luga y proteha nos identidad cristian. Pues, laga nos ‘sigui samina nos mes pa sa si nos ta den e fe.’ (2 Cor. 13:5) Si nos haci nos best pa keda den e pueblo santo y separa di Jehova, lo e corda riba nos “pa bon.”