1. Jerusalenman tigrashpaca ¿imatata Nehemiasca ricurca? (Callari dibujota ricupangui.)

JERUSALENMANDA gentecunaca manllarishcami parlanajurca, imamandata shuj llactamanda runara Diospa huasipi shuj pushtuta charin nishpa. Levitacunapash paicunapa trabajota saquishpami rinajurca. Israelitacunata ñaupaman pushajcunapash sábado punllapi Diosta aliguta adoranata yachachinapa randica negociocunatarami ruranajurca. Ashtaca israelitacunapash shuj llactamanda huarmicunahuanmi cazaranajurca. Nehemías Jerusalenman tigrashpaca gentecuna chashna causanajujtami ricurca (Neh. 13:6).

2. Israel llactaca ¿imashinata Diospa llacta tucurca?

² Israelitacunaca Jehová Diostalla sirvishun nishpami ashtaca huatacunata huashamanga nishcarca: “Dios rimashca tucui shimicunataca, rurapashunllami” nishpa (Éx. 24:3). Chaimandami Jehová Diosca, tucui llactacunamandaca cangunami ñuca agllashca llacta canguichi nirca. Diospa agllashca llacta canaca shuj jatun bendicionmi carca. Cuarenta huatacuna jipapash israelitacunata yarichishpami Moisesca nirca: ‘Cangunaca Taita Diospajlla shicanyachishcacunami canguichi. Taita Diosca paipalla cachunmi agllarca. Cai pachapi causanajuj tucui gentecunata ashtahuan yali cachunmi agllarca’ nishpa (Deut. 7:6).

3. Jerusalenda Nehemías cutin visitajujpica ¿imashinata israelitacunaca causanajurca?

³ Israelitacunaca Diostalla sirvishun nishca cashpapash na pactachinajurcachu. Huaquingunaca tucuipimi Diosta cazunajurca. Shinapash ashtacacunaca Diosta cazunchi, sirvinchi nij tucushpallami causanajurca. Chai punllacunapica israelitacunaca ñami casi 100 huatacunata Jerusalenman tigrashpa causanajurca. Nehemiaspash ñami ishcai viajeta paicunataca visitajurca. Shinapash israelitacunaca cutinmi Diosmanda caruyanajurca.

4. Diospa ñaupajpi limpio ricuringapaca ¿ima chuscu yuyaicunatata yachajupashun?

 ⁴ Jehová Diosca cunan punllacunapipash paitalla sirvichunmi ungido huauquicunata, ‘pipash na cuentai ushanalla ashtaca gentecunatapash’ agllashca (Apoc. 7:​9, 14, 15; 1 Cor. 6:11). Chaimandami tucui horas Diospa ñaupajpi limpio, ali ricuringapaj munanchi. Ñucanchicunaca israelitacunapa chaquitaca na catingapaj munanchichu. Shinaca, Diospa ñaupajpi limpio, ali ricurishpa catingapaca ¿imatata rurana canchi? Chaita yachangapaca Nehemías capítulo 13ta yachajupashunchi. Chaipica cai chuscu yuyaicunatami ricushun: 1) Nali cumbacunamandaca ¿imashinata caruyashun? 2) Jehová Diospa organizaciondaca ¿imashinata apoyashun? 3) ¿Imashinata Diosta pundapi churashun? 4) ¿Imashinata tucui horas Jehová Diosta sirvijushcata ricuchishun?

5, 6. Eliasibca ¿pita carca? Tobiasca ¿pita carca? ¿Imamandashi Eliasibca Tobiashuan ali llevarin carca?

⁵ (Nehemías 13:​4-9, liingui.) Nali cumbacunata saquinaca na facilchu can. Eliasibpa Tobiaspa ejemplocunata ricupashunchi. Eliasibca sumo sacerdotemi carca. Cutin Tobiasca ammonitami carca. Tobiasca Judea llactapi persa gobiernopi ayudajmi cashcanga. Ñaupa huatacunapica Tobiasca paipa cumbacunahuan shayarishpami, Nehemías Jerusalén llactapa pircacunata cutin shayachichunga na saquishcarca (Neh. 2:10). Ashtahuangarin, Diospa huasiman yaicunaca, ammonitacunapaca prohibidomi carca (Deut. 23:3). Shinaca ¿imamandata sumo sacerdote Eliasibca Diospa huasiman Tobías yaicuchun saquirca?

⁶ Tobiasca Eliasibhuanga alimi llevarin carca. ¿Imamandata shina ninchi? Tobiaspash paipa churi Jehohananbash judía huarmicunahuanmi cazarashcarca. Judiocunapash Tobiastaca alicachishpami parlan carca (Neh. 6:​17-19). Ashtahuangarin, Eliasibpa shuj nietoca, Samaria llactata mandaj Sanbalat shuti runapa ushihuanmi cazarashcarca. Sanbalatca alipachami Tobiashuanga llevarin carca (Neh. 13:28). Shinaca, paicunahuan ali llevarimandami Eliasibca Tobías munashcata rurajushcanga. Shinapash, Tobiasta Diospa huasimanda llujchishpami Jehovata tucui shunguhuan cazushcata Nehemiasca ricuchirca.

7. Diospa ñaupajpi limpio ricuringapaca ¿imatata ancianocunapash shuj huauquicunapash rurana can?

⁷ Ñucanchicunapash Diospa agllashcacuna caimandami Taita Diostaca cazunapacha canchi. Diospa ñaupajpi limpio, ali ricuringapaj munashpaca Diospa tucui mandashcacunatami pactachina canchi. Chaimada, Jehovapa randica nunca ama ñucanchi familiatara pundapi churashunchi. Ancianocunacarin, paicunapa pensamientocunata catinapa randica Jehovapa yuyaitami catina can (1 Tim. 5:21). Tucui horas Diospa ñaupajpi limpio ricuringapami esforzarina can (1 Tim. 2:8).

8. Bibliaca ¿imatata cumbacunamandaca nin?

⁸ Bibliaca ninmi: “Nali cumbacunaca ali yachajushcacunatapash cungachinmi” nishpa (1 Cor. 15:​33, NM). Ñucanchi familiapipash huaquingunaca na ashta ali cumbacunachu can. Eliasibpa ejemplota cutin yaripashunchi. Jerusalenba pircacunata Nehemías cutin shayachingapaj rijpica, ashtacata ayudashpami Eliasibca tucuicunaman shuj ali ejemplota curca (Neh. 3:1). Shinapash Eliasibca Tobiaspa, shuj gentecunapa shimicunata asha asha uyashpami, Diospa ñaupajpica nalicunata rurai callarirca. Ñucanchi ali cumbagucunaca Bibliata liichun, tandanajuicunaman richun, villachingapaj llujshichunmi ayudan. Chashna familiacunata charimandaca ninandami cushijunchi.

9. Diospa huasipica ¿imata pasajurca? Chaimanda ¿pitata Nehemiasca rimarca?

⁹ (Nehemías 13:​10-13, liingui.) Jerusalenman Nehemías tigrajpica Diospa huasipica na contribuciongunata  churanajushcachu yarirca. Contribucionguna na tiajpimi levitacunaca Diospa huasipi trabajota saquishpa, paicunapa pambacunapi trabajangapaj rinajurca. Chaita ricushpami Nehemiasca Jerusalenda ñaupaman pushajcunataca rimarca, imamandata contribuciongunata na tandachircanguichi, imamandata Diospa huasiman imata cachanataca na cacharcanguichi nishpa (Neh. 12:44). Chaimandami Nehemiasca Diospa huasiman imata cuna cashcata chasquichun, ali repartichunga ali yachajushca runacunata agllarca.

10, 11. ¿Imashinata shujcunapash Diosta ali sirvichun ayudaita ushapanchi?

¹⁰ Imashinami ricushcanchi, Jehová Diostaca ñucanchi cosascunahuanbashmi alicachina canchi (Prov. 3:9). Tucuilla cosascunami Jehová Diospalla can. Imatapash Jehovaman cushpaca paipa cashcatallatami tigrachinajunchi (1 Crón. 29:​14-16). Huaquinbica na ashtacata Jehová Diosman cui ushanichu yanchichari. Ashagutalla cujpipash tucui shunguhuan cujpica Jehová Diosca cushijushpami chasquin (2 Cor. 8:12).

¹¹ Shuj familiaca 8 huahuagucunata charishpapash, ashtaca huatacunatami mayorlla cusahuarmi precursor especialcunataca semanapi shuj viajeta paicunapa huasipi micuchun invitan carian. Mamaca ninmi carca: “Micuna 10purapa pactashpaca 12purapapash pactangallami” nishpa. Chai precursor especialcunapash ali experienciacunata parlashpami huahuacunataca Diosta ashtahuan sirvichun animarca. Chaimandami tucuilla huahuacuna tiempo completopi sirvi callarirca.

12. Ancianocuna, siervo ministerialcunaca ¿ima ali ejemplotata cun?

¹² Ancianocunapash siervo ministerialcunapash Nehemiaspa ejemplota catishpami Jehová Diosta ali adorajushcata ricuchishpa shujcunamanbash ali ejemplota cun. Apóstol Pablopa ali ejemplotapashmi ancianocunaca catin. Paica Taita Diosta aliguta adorangapaj apoyana cashcata, contribuciongunahuan imashina ayudanatapashmi ricuchirca (1 Cor. 16:​1-3; 2 Cor. 9:​5-7).

13. Nehemiaspa punllacunapica ¿imatata huaquin judiocunaca sábado punllapi ruranajurca?

¹³ (Nehemías 13:​15-21, liingui.) Ashtaca cosascunata charinapilla pensajujpica Diosta sirvina munaica asha ashami chiriyashpa ringa. Éxodo 31:13​pica ninmi, Diospa agllashca llacta caimandami israelitacunaca sábado punllapi familiahuan tandanajushpa Jehovata adoran carian, Jehovata mañan carian, Leypipash pensarin carian nishpa. Shinapash Nehemiaspa  tiempopi judiocunaca sábado punllataca trabajanajurcami. Chaita ricushpami Nehemiasca sabadopa shuj punlla faltajpillata llactaman yaicuna pungucunatapash vichachun mandarca, shuj llactamanda negociantecunatapashmi llujchishpa cacharca.

14. Ashtaca culquita charina munaimanda na jarcarishpaca ¿imata tucushun?

¹⁴ Nehemiasmandaca ¿imatata yachajunchi? Nehemiaspa ejemplota catishpami ashtaca culquita charina munaimandaca jarcarina canchi. Chai munaicunamanda na jarcarishpaca Diosta sirvina munaicunataca cungashunmi. Huaquinbicarin trabajanata ninanda gustaimandaca ishcai shungumi tucushun. Jesusca na ishcai amocunata catinachu cangui nishpami advirtirca (Mateo 6:​24, liingui). Nehemiasca charij cashpapash tirio gentecunahuan o shuj negociantecunahuan ali negociocunata rurangapaca na munarcachu (Neh. 5:​14-18). Ashtahuangarin huauquicunata, panicunata ayudanapi, Jehovapa shutita limpio saquinapimi preocuparirca. Cunan punllacunapi ancianocuna, siervo ministerialcunapash congregacionbi huauquicunata ashtahuan ayudanapimi preocuparin. Chashna preocuparijpimi huauquicunapash ninanda paicunataca yan. Chaimandami congregacionbica tucuicuna juyarishpa, tranquilo, ali sintirin (Ezeq. 34:​25, 28).

15. Diospa samana punllapi yaicungapaca ¿imatata rurana capanchi?

¹⁵ Jesusta catijcunaca ¿israelitacunashnachu sábado punllataca yarinchi? Na. Shinapash apóstol Pabloca escribircami ‘Taita Dios agllashca gentecunapaca samana’ punlla tianmi nishpa. Ashtahuangarin nircami: ‘Taita Diosca cai pachata rurai tucuchishpaca samarcami. Ñucanchipash paihuan samangapaj yaicushcacunaca, imata ruranajushcatapash saquishpa samanatami charinchi’ nishpa (Heb. 4:​9, 10). Jesusta catijcunaca Taita Diosta cazushpa, paipa munai pactarichun ayudashpami Diospa samana punllapi yaicushun. Shinaca tapuripashunchi ¿ñucapash, ñucapa huahuacunapash Familiahuan Adorana Tutata charinchichu, tandanajuicunaman, villachingapaj rinchichu? nishpa. Huaquinbica ñucanchita trabajachijcunahuan o cumbacunahuanbash na manllashpami parlana canchi, Jehová Diospa cosascunata ruranami ashtahuan importante can nishpa. Diosta pundapi churangapaca huaquinbica Nehemías pungucunata vichashpa tiriocunata llujchishpa cachashca cuendami ñucanchipash rurana canchi. Jehová Dios agllashcamandaca tapurinami capanchi: “Ñuca causaipica ¿Jehovatara sirvingapaj munajushcatachu ricuchijuni? nishpa (Mat. 6:33).

16. Israelitacunaca ¿imashinata Diospa agllashca llacta canataca casi chingachirca?

¹⁶ (Nehemías 13:​23 -27, liingui.) Nehemiaspa tiempopi israelitacunaca shuj llactamanda huarmicunahuanmi cazaranajurca. Nehemías primera vez Jerusalenda visitashpaca, tucui israelita jaricunatami shuj llactamanda huarmicunahuanga na cazaranachu cangui nishpa firmachirca (Neh. 9:38; 10:30). Shinapash jipa huatacunaman Nehemías cutin tigrajpica israelita jaricunaca shuj llactamanda huarmicunahuan cazarashpami causanajurca. Ashtahuangarin, Diospa agllashca llacta canatapash casimi chingachirca. Chai huarmicunapa huahuacunaca hebreo shimipi liita, parlaitaca na usharcachu. Chai huahuacuna viñashpaca ¿israelitacunami canchi ninmanllu carca? ¿O Asdod llactamanda, Ammón llactamanda o Moab llactamandami cani ninmanllu carca? Hebreo shimita na parlai ushashpaca ¿imashinashi Diospa Leytaca intindinman carca? ¿Imashinashi paicunapa mamacuna adorajushca yanga dioscunata huashaman saquishpa Jehová Diosta adoranman carca? Chashna problemacuna tiai callarimandami Nehemiasca ucha israelitacunataca ayudarca (Neh. 13:28).

17. ¿Imashinata taitamamacunaca paicunapa huahuacuna Taita Diosta aliguta rijsichun ayudana can?

 ¹⁷ Cunanbica ñucanchi huahuacunamanga Jesusta catijushcataca aligutami intindichina canchi. Chaimanda taitamamacuna tapuripaichi: “Ñuca huahuacunaca Bibliapa ali yachachishca shimitaca aligutachu parlan?”. “Paicuna parlashpaca Diospa espirituta charishcata o cai mundopa espirituta catijushcatachu ricuchin?” nishpa (Sof. 3:9). Huahuacuna imagupipash mejoranata ricushpaca ama pinaripanguichichu. Imashinami shuj mushuj shimita aliguta parlangapaca tiempo minishtirin, shinallatami huahuacunapash tiempota minishtin. Huahuacunaca ninan nali mundopimi causanajun. Chaimandami, huahuacunataca Familiahuan Adorana Tutapi o shuj punllacunapipash Taita Diosta rijsichun pacienciahuan aliguta yachachina canchi (Deut. 6:​6-9). Diablopa mundopi na chapurijushpa imashina ali causanatapashmi yachachina capanguichi (Juan 17:​15-17). Paicunapa shunguman chayangapapash esforzaripanguichi.

18. ¿Imamandata taitamamacunaca huahuacuna Jehovaman mingarichun ayudana can?

¹⁸ Huahuacunaca cada unomi Jehová Diosta sirvinata o na sirvinata agllanga. Shinapash, taitamamacunami huahuacunamanga shuj ali ejemplota cushpa, imata rurana cashcata yachachina can. Alita o nalita rurashpa ima pasanata nishpami huahuacunamanga aliguta intindichina can. Taitamamacuna, cangunami huahuacunataca Jehová Diosman mingarichun ayudaita ushanguichi. Paicunataca Jesusta aliguta catishpa, Diospa mandashcacunata pactachishpa causachunmi yachachina capanguichi (Apoc. 3:​4, 5; 16:15).

19, 20. Jehová Dios ñucanchita alipaj yarichunga ¿imatata rurana capanchi?

¹⁹ Nehemiaspa tiempopillata causashca profeta Malaquiaspash nircami: ‘Mandaj Diosca tucuita uyashpami paipa libropi escribichirca. Mandaj Diosta manllashpa, paipaj shutita yarishpa’ causajcunapaj shutitami chashna escribichirca nishpa (Mal. 3:​16, 17). Paita respetaimanda manllajcunata o paipa shutita juyajcunataca Jehová Diosca nunca na cungangachu (Heb. 6:10).

²⁰ Nehemiasca nircami, ñuca taita Dioslla, ñuca chashna rurashcamandaca, ñucatapash alipaj yarihuayari nishpa (Neh. 13:31). Shinaca nali cumbacunamanda caruyashpa, Jehovapa organizacionda apoyashpa, Diostara pundapi churashpa, tucui horas Jehová Diosta sirvijushcata ricuchijujpica ñucanchi shuticunapash Nehemiaspa shutishnallatami Diospa libropi escribishca canga. Apóstol Pabloca nircami: ‘Cangunallatami: “¿Ñachu alipacha crij cani, narachu ali crij cani?”’ yashpa purina canguichi nishpa (2 Cor. 13:5). Paipa llactapi cangapaj esforzarijpica Jehová Diosca alipajmi ñucanchitaca yaringa.