Yehova ‘Alansendela Ifisendo Cila Bushiku’

Ba Maretha du Raan

Nangu ca kuti nalilwala amalwele ayabipisha kabili limo ndalwalisha mu kupumikisha fye, ica kuti imona kwati te kuti nshipikishe, nali-imwena ukuti Shifwe wa ku muulu alansakamana no kuntungilila. Kabili ukucila pa myaka 20 iyo nabomba bupainiya, naliba ne nsansa nga nshi.

Nafyelwe mu 1956, kabili nafyelwe no bulwele ubwa mu mungololo ubo beta ukuti spina bifida. Ubu bulwele bwalenga imishipa ukonaika ica kuti ndafilwa ukwenda kabili bwalenga ndelwala na malwele yambi ayabipisha.

Ilyo nshilafyalwa abafyashi bandi batendeke ukusambilila Baibolo na ba Nte, bamishonari. Mwi tauni twaleikala ilyo nali umwaice ilya Usakos ku Namibia, mwali fye ba Nte abanono kabili baleikala umutali mutali. Apo takwali icilonganino, twalelonganina pa ng’anda ngo lupwa. Ilyo nali ne myaka 7, balincitile opareshoni pa kuti bapange apa kuti ndepoosela amenshi. Lintu nali ne myaka 14 nalilwele cipumputu. Nalifililwe ukupwisha isukulu pantu ukwabelele isukulu lya sekondari kwali ukutali sana, kabili nalekabila ukuba mupepi na bafyashi bandi pa kuti balensakamana.

Nangu cali ifi, napingwilepo ukukosha bucibusa bwandi na Yehova. Pali ilya nshita, takwali impapulo sha mu lulimi lwesu ulwa ciAfrikaans. E ico nalisambilile iciNgeleshi pa kuti ndebelenga ifitabo ifyalekanalekana. Naishileba kasabankanya kabili ilyo nali ne myaka 19 nalibatishiwe. Imyaka ine iyakonkelepo, nalilwele sana kabili nalisakamikwe nga nshi. Na kabili, apo mwi tauni twaleikala bonse twalishibene, calengele ukuti ndefilwa ukushimikila sana pantu naletiina abantu.

Ilyo nali ne myaka nalimo 20 twakukiile ku South Africa, kabili e wali umuku wa kubalilapo ukulalongana pamo ne cilonganino. Ala caliweme icine cine! Na kabili balincitile opareshoni, lelo uno muku yali ni opareshoni ya kupanga apa kufumina ubusali.

Inshita imo, kangalila wa muputule alandile ilyashi ilyalelanda pali bupainiya. Ifyo alandile fyalimfikile pa mutima. Nalishibe ukuti ubumi bwandi tabwali bwino ubwa kubomba bupainiya, lelo nalimwene ifyo Yehova angafwile mu mafya ayengi. E ico nalilembele formu ya kwipushishapo bupainiya bwa nshita yonse. Lelo pa mulandu wa malwele nalwala, baeluda tabasaine formu yandi.

Na lyo line, napingwilepo ukubombesha mu mulimo wa kushimikila. Bamayo na ba bwananyina balingafwile kabili pa myeshi 6 nalikumanishe ukubomba ama-awala ya bupainiya. Ici calangile fye ukutila kuti nakumanisha ukubomba bupainiya bwa nshita yonse nangu ca kutila nalilwala. Nalilembele formu ya kwipushishapo bupainiya na kabili, uno muku balinsuminishe. E ico pa 1 September, 1988, nalitendeke bupainiya.

Ilyo momba bupainiya, nalimona ifyo Yehova ansakamana. Ukusambilisha abapya icine mu nshita ya kulatontonkanya fye pa mafya nakwata kwalincingilila, kabili kwalilenga bucibusa bwandi na Yehova ukukosa. Naliba ne nsansa nga nshi pantu nalyafwa abengi ukuipeela kuli Lesa no kubatishiwa.

Kwena ukulwala kwena nalilwala. Lelo Yehova ‘alansendela ifisendo cila bushiku.’ (Amalu. 68:19) Tangafwa fye ukushipikisha, lelo alalenga no kuti ndeipakisha ubumi!