Jehovah nih ‘Nikhat hnu Nikhat Ka Thilrit a Ka Chaan’
In awkah a har ngai i a fak ngaimi zawtnak ka ngei nain ka nun chung vialte vancung kan Pa nih dawtnak in a ka bawmh tiah ka ruah. Cun kum 20 leng hmaikal ka ṭuanmi in nuamhnak taktak ka hmu.
1956 ah ka chuak i ka chuahka in ka keng ruh a kak. Ka keng ruh thahri a umnak cu a kah caah ṭha tein ka kal kho lo i a dang a fak ngaimi zawtnak zong ka ngei.
Ka chuah hlanah Jehovah Tehte a simi missionary nuva hna nih ka nu le ka pa kha Baibal an cawnpiak hna. Ka ngakchiat lioah ka chuahnak khua a simi Namibia ram, Usakos ah thawngthanhtu tlawmte lawng an rak um rih. Mah lioah Khrihfabu a um lo caah pumhnak i cawn dingmi kha kan chungkhar ningin kan i ruah hna. Kum 7 ka si ah ka zun a chuah khawh lo caah a kan khuaihlai i ka pum ah a awng an ser. Kum 14 ka si ah tluk zawtnak ka hun ngei. A naih bikmi sianginn hmanh a hlat ngai caah le ka nu le ka pa nih ṭha tein an ka zohkhenh a herh caah sianginn kha a dih tiang ka kai kho lo.
Asinain Jehovah he kan i pehtlaihnak fehter awkah bia ka khiak. Kan holh a simi Africa holh in bupi chuahmi cauk tampi a um rih lo. Cucaah kan cauk pawl hlathlai khawh awkah Mirang ca ka cawng. Thawngthanhtu ka hung si i kum 19 ka si ah tipil ka ing. Mah hnu kum 4 chung cu lungthinlei le pumsalei damlonak tampi ka tong. Kan khua ah mi cu naih tein um a si caah lungtho tein phung ka chim ngam lo.
Kum 20 fai ka si ah Namibia in Thlanglei Africa ah kan i ṭhial. Cuka ah Khrihfabu he a voikhatnak kaa kom kho. Mah cu a nuam tuk. Asinain ka rilpi kha kaa khuaihlai ṭhan.
Caan tlawmpal a rauh hnuah, peng zohkhenhtu nih hmaikal rian ṭuannak kong phung a chimmi kha ka theih. A chimmi nih ka lung a ka suk tuk. Ka zawtnak ruangah hmaikal ṭuan cu a har ko lai ti ka hngalh ko nain Jehovah nih harnak tampi chung in a rak ka bawmhmi kha ka hmuh. Cucaah hmaanhmaan form ka phih. Asinain ka zawtnak ruangah Khrihfa upa nih form ka phihmi kha an hna a tla lo.
Asinain ka si khawh chungin phungchimnak rian kha ṭuan awkah bia ka khiak. Ka nu le unau dang bawmhnak thawng in thlaruk leng phungchimnak ah hmaikal suimilam tluk in kaa tel kho. Mah nih hmaikal rian ṭuan ka duh tuk le ka zawtnak nih a ka donh lo kha a langhter. Form ka phih ṭhan i mahtan cu an cohlan. 1988, September 1 ah hmaanhmaan ka hun ṭuan.
Hmaikal ka ṭuan lioah Jehovah bawmhnak ka hmu zungzal. Keimah sining lawng ruat loin midang biatak ka cawnpiakmi hna nih lungthinlei le thlaraulei ṭhancho awkah a ka bawmh. Mi tam nawn kha Pathian sin i pumpek awk le tipil in awkah ka bawmh khawh hna caah kaa nuam tuk.
Ka zawtnak cu a puang ṭhan lengmang nain Jehovah nih ‘nikhat hnu nikhat ka thilrit a ka chaan.’ (Salm 68:19) Jehovah nih ka nunnak ah inkhawhnak a ka pek lawng si loin ka nunnak kha i nuamhpi awk zongah a ka bawmh.
