N̄kadada udọn̄ọ ọkpọ asakedem emi ẹkotde spina bifida mmana ke 1956. N̄kemeke ndisan̄a ọfọn sia udọn̄ọ emi abiat mi esịp, onyụn̄ anam ndọn̄ọ nsio nsio udọn̄ọ en̄wen.

Esisịt ini mbemiso n̄kamanade, isụn̄utom Mme Ntiense Jehovah ẹma ẹtọn̄ọ ndikpep ete ye eka mi Bible. Ke ini n̄kedide eyenọwọn̄, mme asuanetop ifan̄ kpọt ẹkedu ntomo ntomo ke obio nnyịn emi ẹkotde Usakos ke Namibia. Sia esop mîkodụhe, ikesineme se akpanade ẹneme ke mbono esop ke ubon nnyịn. Ke ini n̄kedide isua itiaba, ẹma ẹsiak mi idem ẹsịn n̄kpọ emi edinamde n̄keme ndisitọk ikịm. Ke ini n̄kedide isua 14, mma ntọn̄ọ ndisiduọ ndisi. Sia ufọkn̄wed sekọndri mîkekpereke, sia okonyụn̄ anade ete ye eka mi ẹnen̄ede ẹse mi enyịn, n̄kekemeke ndikụre ufọkn̄wed sekọndri.

Edi mma mbiere ndinen̄ede nsan̄a n̄kpere Abasi. Ediwak n̄wed nnyịn ikodụhe ke usem Afrikaans, emi edide usem emana nnyịn. Ntre mma n̄kpep ndikot Ikọmbakara man n̄kpekeme ndikot ediwak n̄wed nnyịn. Mma n̄kabade ndi asuanetop Obio Ubọn̄ nnyụn̄ nna baptism ke ini n̄kedide isua 19. Ke isua inan̄ oro ẹketienede, mma ndọn̄ọ nsio nsio udọn̄ọ, ekikere esinyụn̄ etịmede mi. Akan oro, sia mme owo ẹkenen̄erede ẹkpere kiet eken ke obio nnyịn, ndịk owo ikayakke nnen̄ede nsịn ifịk ke utom ukwọrọikọ.

Ke ini n̄kedide n̄kpọ nte isua 22, ima ikpọn̄ Namibia ikodụn̄ ke South Africa, ndien akpa ini emi n̄kabuanade ye esop ekedi oro. Ama enem mi tutu! Edi, ẹma ẹfiak ẹsiak mi idem—isan̄ emi ẹkesiak mi man n̄kpekeme ndisinam ndek.

Esisịt ini ke oro ebede, mma n̄kop utịn̄ikọ esenyịn circuit emi akaban̄ade utom usiakusụn̄. Se enye eketịn̄de ama enen̄ede otụk mi. Mma mfiọk ke idem mi isọn̄ke, edi mma nnyụn̄ n̄kụt n̄ko ke Jehovah an̄wam mi nyọ ata ediwak n̄kpọ. Ntre mma nsịn n̄wed ndidi asiakusụn̄ ofụri ini. Edi ke ntak udọn̄ọ mi, mbiowo ikọsọpke inyịme.

Kpa ye oro, mma mbiere ndisịn ofụri ukeme mi n̄kwọrọ etop Obio Ubọn̄. Eka mi ye mbon en̄wen ẹma ẹn̄wam mi n̄kwọrọ ibat hour oro mme asiakusụn̄ ẹkesinọde ke ọfiọn̄ itiokiet. Emi ama owụt ke mmenen̄ede nyom ndinam utom usiakusụn̄ onyụn̄ owụt ke mmekeme ndinam kpa ye udọn̄ọ mi. Mma mfiak nsịn n̄wed, ndien isan̄ emi mbiowo ẹma ẹnyịme nnam. Ke September 1, 1988, mma ntọn̄ọ utom usiakusụn̄ ofụri ini.

Mmokụt nte Jehovah an̄wamde mi ke ofụri ini emi ndide asiakusụn̄ mi. Ndikpep mbufa owo akpanikọ utu ke ndikere mban̄a mfịna mi ekpeme mi, an̄wam mi, onyụn̄ anam nsọn̄ idem ke n̄kan̄ eke spirit. Mmenen̄ede n̄kop idatesịt ndin̄wam ediwak owo ẹyak idem ẹnọ Abasi ẹnyụn̄ ẹna baptism.

Idem osụk afafịna mi. Edi Jehovah ‘obiom mbiomo mi ke usen ke usen.’ (Ps. 68:19) Enye iyakke uwem odorode mi, edi anam uwem enen̄ede enem mi!