Lagani 1956 ai lau vara neganai, spina bifida gorere lau abia. Lauegu doruna turiana ia koua namonamo lasi dainai, egu varovaro idia dika bona lau raka namonamo lasi. Unai sibona lasi, to gorere badadia ma haida lau davaria danu.

Lau do vara lasi neganai, Iehova ena Witnes taudia edia misinari tadikaka ta bona ena adavana ese egu tama sina ida Baibel idia stadilaia matamaia. Lau maragi neganai, egu hanua Usakos, Namibia dekenai pablisa haida sibona idia noho. Unuseniai kongrigeisen be lasi dainai, kongrigeisen heboudia be famili stadi bamona ai karaia. Egu mauri lagani be seven neganai, urostomy opereisen lau abia (egu bogana dekenai matu maragina ta idia karaia, tiubi bona mei ena baege ta idia atoa). Gabeai, egu mauri lagani be 14 neganai, epilepsy gorerena lau abia. Egu sikuli be daudau herea bona egu tama sina ese lau idia naria be namo, unai dainai sikuli lau haorea lasi.

Ena be unai ia vara, to egu lalona lau hadaia egu hetura karana Iehova ida do lau hagoadaia. Unai nega ai iseda pablikeisen momo be egu gado, Afrikaans ai idia do hahanaia lasi. Unai dainai English gado lau dibaia, unai amo iseda buka ma haida lau duahia diba. Pablisa ai lau lao, bona egu mauri lagani be 19 neganai lau bapatiso. To lagani 4 lalonai, lau gorere momo dainai, lau lalometau bada. Danu, ena be emai taoni ai momo be ai manada heheni, to lau be taunimanima lau gari henidia dainai, haroro gaukara lau karaia lasi.

Egu mauri lagani be 20 neganai, Namibia ai rakatania bona South Africa ai lao. Unai be nega ginigunana kongrigeisen ta dekenai lau lao bona lau moale bada! To, opereisen ma ta lau abia. Unai be colostomy opereisen (bogana dekenai matu ta idia karaia, bona tiubi ta idia atoa kukuri ia raka-lasi totona).

Gabeai, sekit naria tauna ese painia gaukara ia herevalaia neganai, iena hereva ese egu kudouna ia hamarerea. Ena be lau gorere, to lau mamia Iehova ese lau davaria hekwakwanai momo lalonai lau ia durua. Unai dainai, regula painia aplikeisen lau siaia. To, egu gorere dainai elda taudia ese egu aplikeisen idia abia dae lasi.

Ena be unai ia vara, to egu lalona lau hadaia haroro gaukara lau karaia goadagoada totona. Bona egu sinana bona ma haida edia heduru dainai, haroro gaukara dekenai hua 6 lalonai painia ena hora lau abia. Unai ese lau dekenai goada ia henia lau painia totona, bona lau mamia egu gorere lau haheaukalaia diba. Painia aplikeisen lau siaia lou neganai idia abia dae, bena September 1, 1988 ai, regula painia gaukara lau matamaia.

Egu painia gaukara lalonai hanaihanai Iehova ese lau ia durua. Kamonai matamata taudia dekenai hereva momokani lau hadibaia karana ese lau ia durua, egu gorere lau laloa momo lasi totona. Danu, unai ese lau ia gimaia bona egu hetura karana Iehova ida ia hagoadaia. Lau moale bada badina egu stadi haida be edia mauri idia gwauhamatalaia bona bapatiso idia abia.

Ena be lau gorere bada herea, to Iehova ese ‘dina ibounai egu maduna metaudia ia huaia.’ (Sal. 68:19) Lau ia durua dainai, egu gorere lau haheaukalaia bona lau moale diba!