Yehowa ‘Ke Bakaka Kilo na Mono Konso Kilumbu’
Ata mono ke belaka maladi mosi ya ngolo yina lenda monana nde muntu lenda kangila yo ve ntima, mono me monaka lusadisu ya zola ya Tata na beto ya zulu na luzingu na mono. Mpi bamvula kuluta 20, mono me waka kiese mingi na kusadila Yehowa bonso mupasudi-nzila.
Mono butukaka na 1956, ti maladi mosi ya bo ke bingaka spina bifida. Sambu mukwa na mono ya mukongo kangamaka ve mbote, yo vandaka mpasi sambu nde mono tambula mpi yo me natilaka mono bamaladi ya nkaka ya ngolo.
Ntangu fioti na ntwala ya kubutuka na mono, bamisionere ya Bambangi ya Yehowa yantikaka kulonguka Biblia ti bibuti na mono. Na bumwana na mono, bansamuni vandaka kaka mosi mosi na Usakos, mbanza yina mono butukaka na Namibie. Sambu dibundu vandaka ve, beto vandaka kulonguka na dibuta mambu yina yo lombaka nde beto longuka na balukutakanu. Ntangu mono kumaka ti bamvula 7, bo salaka mono operasio sambu na kukangula nzila ya kubasisa masuba. Ntangu mono lungisaka bamvula 14, mono kumaka kubela maladi ya kukona. Sambu ata nzo-nkanda mosi ve ya sekondere vandaka pene-pene ya nzo na beto mpi mono vandaka ntangu yonso na mfunu ya lusadisu ya bibuti na mono, mono manisaka ve nzo-nkanda.
Ata mpidina, mono bakaka lukanu ya kukumisa ngolo bangwisana na mono ti Yehowa. Na ntangu yina, mikanda na beto mingi vandaka ntete ve na Afrikaans, ndinga na beto ya kisina. Yo yina, mono longukaka kutanga Kingelesi sambu na kulonguka mwa mikanda na beto mingi. Na nima, mono kumaka nsamuni ya Kimfumu mpi bakaka mbotika na bamvula 19. Na nsungi ya bamvula iya yina landaka, mono belaka mingi mpi niokwamaka na mabanza. Diaka, sambu mono vandaka kuzinga na mbanza yina bantu vandaka ti bangwisana ya ngolo na kati na bo, boma ya bantu vandaka kukanga mono nzila ya kusamuna ti kikesa.
Ntangu mono katukaka kulutisa bamvula 20, beto katukaka na Namibie mpi kwendaka na Afrique du Sud; sambu na mbala ya ntete, mono zwaka dibaku ya kuvukana ti bampangi na balukutakanu ya dibundu. Mono sepelaka mingi! Kansi, bo salaka mono diaka operasio mosi—na mbala yai sambu na kukangula nzila ya kubasisa tufi.
Na nima ya mwa ntangu, nkengi mosi ya nziunga salaka disolo yina tubilaka kisalu ya kimupasudi-nzila. Mambu yina yandi tubaka simbaka ntima na mono. Mono zabaka nde, mono vandaka mbefo mpi yo vandaka mpasi na kusala kisalu ya kimupasudi-nzila, kansi mono monaka mutindu Yehowa sadisaka mono na bampasi mingi. Yo yina, mono fulusaka formilere sambu na kukuma mupasudi-nzila ya ntangu yonso. Kansi, sambu mono vandaka kubela mingi, bankuluntu vandaka ti baketi-keti sambu na kundima yo.
Ata mpidina, mono bakaka lukanu ya kudipesa mingi na kisalu ya kusamuna. Ti lusadisu ya mama mpi ya bampangi ya nkaka, na nsungi ya bangonda sambanu mono nungaka na kupesa bangunga yina bapasudi-nzila ke pesaka. Yo monisaka kibeni lukanu na mono ya kukuma mupasudi-nzila mpi nde mavimpi na mono lendaka ve kukanga mono nzila. Mono fulusaka diaka formilere, mpi na mbala yai bankuluntu ndimaka. Na Septembri 1, 1988, mono kumaka mupasudi-nzila ya ntangu yonso.
Na kisalu ya kimupasudi-nzila, mono me monaka ntangu yonso lusadisu ya Yehowa. Kulonga bankaka kieleka na kisika ya kudiyangisa na mavimpi na mono me taninaka mono, me pesaka mono kikesa mpi me sadisaka mono na kukumisa ngolo bangwisana na mono ti Yehowa. Kusadisa bantu mingi na kudipesa na Yehowa mpi na kubaka mbotika me natilaka mono kiese mingi.
Tii bubu yai, mono ke belaka kaka. Kansi Yehowa ‘ke bakaka kilo na mono konso kilumbu.’ (Nk. 68:20) Yandi ke sadisaka mono kaka ve na kuvanda na luzingu, kansi mpi na kusepela ti yo!
