Jehova Nĩwe ‘Ũnguagĩra Mũrigo Wakwa o Mũthenya’
O na gũtuĩka nĩ ngoretwo na mathĩna manene ma mwĩrĩ, Jehova akoretwo akĩndeithia ũtũũro-inĩ wakwa wothe. Na makĩria ma mĩaka 20, ngoretwo na gĩkeno kĩa mwanya ngĩmũtungatĩra ndĩ painia.
Ndaciarirũo 1956 ndĩ na mũrimũ wa ihĩndĩ rĩa mũnyiginyigi. Nĩ ũndũ wa thĩna ũcio, ti ũndũ mũhũthũ gwĩtwara na magũrũ na nĩ ũndeheire mathĩna mangĩ maritũ ma mwĩrĩ.
Itanaciarũo, mũthuri ũmwe na mũtumia wake arĩa maarĩ amishonarĩ nĩ maambĩrĩirie kũruta aciari akwa Bibilia. Ndĩ mũnini, kwarĩ na ahunjia anini tu maanyaganĩte taũni-inĩ ya gwitũ ya Usakos, Namibia. Nĩ ũndũ ũcio, twacemanagia tũrĩ famĩlĩ tũkaarĩrĩria maũndũ marĩa maathomagwo ciũngano-inĩ. Ndĩ wa mĩaka mũgwanja, nĩ ndathĩnjirũo ngĩkĩrũo mũberethi wa kũruta mathugumo. Ningĩ ndĩ na mĩaka 14, ngĩrwara mũrimũ wa kĩbaba. Tondũ sekondarĩ yarĩ haraihu mũno na nĩ ndabataraga gũtungatwo na njĩra ya mwanya nĩ aciari akwa, ndiahotire kũrĩkia cukuru.
O na kũrĩ ũguo, nĩ ndatuire itua rĩa gwĩkĩra hinya ũrata wakwa na Jehova. Hĩndĩ ĩyo mabuku maitũ maingĩ ma Gĩkristiano matiataũrĩtwo na rũthiomi rwitũ rwa Afrikaans. Nĩ ũndũ ũcio, ngĩĩruta Gĩthũngũ nĩguo hotage gũthoma mabuku maingĩ maitũ. Nĩ ndaatuĩkire mũhunjia na ngĩbatithio ndĩ na mĩaka 19. Mĩaka ĩna ĩrĩa yarũmĩrĩire nĩ ndagĩire na mathĩna maingĩ ma mwĩrĩ na gũkua ngoro. Makĩria ma ũguo, tondũ twaikaraga kũndũ andũ maanyitaine mũno, nĩ ndaremagwo kũhunjia na kĩyo nĩ ũndũ wa gwĩtigĩra andũ.
Ndĩ na kĩndũ mĩaka 20 nĩ twathamĩire Afrika ya Mũhuro tũkiuma Namibia, na hĩndĩ ĩyo nĩrĩo ndagĩire na mweke wa kũnyitanĩra na kĩũngano gĩa Gĩkristiano riita rĩa mbere. Kĩarĩ gĩkeno kĩnene mũno! O na kũrĩ ũguo, nĩ ndaabataraga gũthĩnjwo rĩngĩ nĩguo njĩkĩrũo mũberethi wa kũruta kahinda kanene.
Thutha ũcio, nĩ ndaaiguire mũrori ũmwe wa mũthiũrũrũko akĩruta mĩario ĩgiĩ ũtungata wa ũpainia. Ciugo ciake nĩ ciahutirie mũno. O na gũtuĩka nĩ ndaamenyaga atĩ ndiarĩ na ũgima mwega wa mwĩrĩ, nĩ ndeyoneire ũrĩa Jehova aandeithĩtie kũhiũrania na mathĩna maritũ. Nĩ ũndũ ũcio, ngĩiyũria bomu ya painia wa hĩndĩ ciothe. Ĩndĩ, nĩ ũndũ wa mathĩna makwa ma mwĩrĩ, athuri a kĩũngano maatietĩkĩrire nduĩke painia.
O na kũrĩ ũguo, ngĩtua itua rĩa gũthiĩ na mbere kũhunjia na kĩyo. Kũgerera ũteithio wa mami na andũ angĩ nĩ ndaahotire gũkinyia mathaa marĩa maabataranagia harĩ painia o mweri ihinda rĩa mĩeri ĩtandatũ. Ũndũ ũcio nĩ wonanirie atĩ ndaarĩ na wendi mũnene wa ũpainia na atĩ mathĩna makwa ma mwĩrĩ matiarĩ mũhĩnga. Ngĩiyũria bomu rĩngĩ, na kũrĩ Septemba 1, 1988 ngĩtuĩka painia wa hĩndĩ ciothe.
Jehova ndarĩ andiganĩria thĩinĩ wa ũtungata wakwa wa painia. Kũruta andũ ũhoro ũrĩa wa ma handũ ha gwĩciria ũhoro wa mathĩna makwa nĩ kũngitĩrĩte, gũkanjĩkĩra hinya, na gũkandeithia gũkũra kĩĩroho. Nĩ ngĩĩte na gĩkeno kĩnene nĩ ũndũ wa gũteithia andũ maigana ũna meyamũrĩre Jehova na makabatithio.
O na rĩu no hiũranagia na mathĩna ma mwĩrĩ. Ĩndĩ Jehova nĩwe ‘ũnguagĩra mũrigo wakwa o mũthenya.’ (Thab. 68:19) Makĩria ma kũndeithia nyũmĩrĩrie, nĩ andeithagia gũkorũo na gĩkeno ũtũũro-inĩ!
