Jehova ‘oha humbata ko komutengi wange efiku nefiku’
Nonande ondi na oupyakadi woukolele wa kwata moiti nohau kumu nge meenghedi di lili noku lili, ohandi kala ndi wete nghee Tate yetu womeulu ta yambidida nge pahole monghalamwenyo yange. Oule womido di dulife po 20 odo nda kala handi longele Jehova ndi li omukokolindjila, onda mona ehafo linene.
Onda dalwa mo 1956, nonda dalwa ndi na ounghundi wekipa lomwoongo inali shakena nawa. Osho osha etela nge ounghundi, noshe shi ningifa shidjuu kwaame okweenda nosha etela nge yo omaupyakadi makwao oukolele a kwata moiti.
Fimbo inandi dalwa, ovadali vange ova li va hovela okukonakona Ombibeli novatumwa vEendombwedi daJehova. Eshi nda li okaana, modoolopa yaUsakos, moNamibia, omo nda dalelwa, omwa li ashike ovaudifi vanini nokamwa li eongalo. Onghee hano, oukwaneumbo wetu owa li hau konakona oikundafanwa oyo i na okukundafanwa pokwoongala. Eshi nda li ndi na omido heyali, onda li nda tandwa opo ndi tuwe ombululu yokupitila omaxu. Eshi nda wanifa omido 14, onda li nda kwatwa koudu woshinhona. Molwaashi Ofikola yopombada oya li kokule, inandi dula okuya ko ndi ka mane ofikola molwaashi onda li nda pumbwa efiloshisho le likalekelwa lovadali vange.
Ndele nande ongaho, onda li nda tokola okupameka ekwatafano lange naJehova. Pefimbo opo, oishangomwa yetu ihapu yopaKriste kaya li ya tolokwa melaka lange, Oshiafrikaansa. Onghee hano, onda li nde lihonga okulesha Oshiingilisha opo ndi dule okulesha omambo etu mahapu. Onda li nda ninga omuudifi wOuhamba nonda ka ninginifwa ndi na omido 19. Ndele omido nhee da ka shikula ko, onda ka kala ndi na omaupyakadi oukolele noopamaliudo mahapu. Shikwao vali, molwaashi ovanhu vomodoolopa yetu ova li ve shaafane, oumbada wokutila ovanhu owa li wa imba nge ndi kufe ombinga nouladi moukalele.
Eshi opo nda wanifa omido 20 nasha, otwa li twa tembukila koSouth Africa, naako onda ka endafana neongalo oshikando shange shotete. Osho kasha li tuu shihafifa! Ashike onda ka tandwa vali opo olutu lange li dule okukala tali pitifa mo onyata.
Lwanima, omupashukilishikandjo okwa li a yandja oshipopiwa shi na sha nokukokola ondjila. Oitwa yaye oya li ya kuma nge komutima. Onda li ndi shii kutya nghi na oukolele notashi dulika shi ka kale shidjuu kwaame okukokola ondjila, ashike onda mona nghee Jehova a kala ta yambidida nge momaudjuu mahapu. Onghee hano, onda li nda ninga eindilo ndi ninge omukokolindjila wondjikilile. Ndele omolwounghundi wange, ovakulunhuongalo ova li tava ongaonga okudimina eindilo lange.
Ashike onda li nda tokola okulonga ngaashi handi dulu moilonga yokuudifa Ouhamba. Omolwekwafo lameme nosho yo vamwe, onda li nda dula okuwanifa eevili doukokolindjila oule weemwedi hamano. Osho osha li sha ulika kutya onda tokola toko okukokola ondjila nonokutya ohandi dulu ngoo okuninga sha nonande nghi na oukolele. Onda li nda ninga vali eindilo likwao, noshikando eshi ola li la diminwa. Mu 1 Septemba 1988 onda li nda ninga omukokolindjila wondjikilile.
Ndi li omukokolindjila, onda li nda mona nghee Jehova a kala nokuyambidida nge. Okukala handi hongo ovo vape oshili yOmbibeli ponhele yokuyandja elitulemo konghalo yange osha amena nge, osha twa nge omukumo nosha kwafela nge ndi pameke ekwatafano lange naJehova. Onda li nda mona ehafo itali yelekwa nasha eshi nda kala nokukwafela oohandimwe ve liyapulile Jehova nova ninginifwe.
Oukolele wange inau lunduluka. Ashike Jehova ‘oha humbata ko komutengi wange efiku nefiku.’ (Eps. 68:20) Iha kwafele nge ashike ndi lidiinikile onghalo yange, ndele okwa kwafela nge yo ndi kale nomwenyo.
