Jehova U ni “Lwalela Milwalo ka Zazi ni Zazi”

Bo Maretha Du Raan

Ku si na taba ni makulanu a matuna e ni kopana ni ona, ni iponezi kuli Ndataa luna ya kwa lihalimu wa ni babalela ka zazi ni zazi. Ka lilimo ze fitelela 20, ni ikozi ku sebeleza Jehova ka tabo inze ni eza bupaina.

Ne ni pepilwe inze ni kula mukokoto (spina bifida) ka silimo sa 1956. Butuku bo, bu tahisize kuli ni palelwe ku zamaya hande, mi hape bu ni tahiselize mapongo a mañata.

Nakonyana pili ni si ka pepwa kale, balumiwa ba babeli ba ba nyalani ba ba li Lipaki za Jehova ba kalisa ku ituta Bibele ni bashemi ba ka. Ha ne ni sa li mwanana, ne ku na ni feela bahasanyi ba sikai mwa tolopo ye ne ni pila ku yona ye bizwa Usakos, ili ye fumaneha mwa naha ya Namibia. Bakeñisa kuli ne ku si na puteho mwa tolopo yeo, ne lu ezanga mikopano ya Sikreste ka sikwata sina lubasi. Ha ne ni na ni lilimo ze 7, na yo pazulwa kwa sipatela kuli ni be ni lisuba mo ne ku ka zwelanga mushamo. Ha ni to ba ni lilimo ze 14, na kala ku kula butuku bwa kanono. Ne ni si ka feza sikolo kabakala kuli ne lu ina kwahule ni sikolo mi ne ni tokwa ku babalelwa ki bashemi ba ka ka nako kaufela.

Nihakulicwalo, naa ikatulela ku tiisa bulikani bwa ka ni Jehova. Buñata bwa lihatiso za luna za Sikreste ne li sa fumanehi mwa puo ya hesu ya Siafrikans. Kiha se ni ituta ku bala Sikuwa ilikuli ni kone ku ipalelanga libuka za luna. Se ni ba muhasanyi ya si ka kolobezwa mi naa kolobezwa ha ne ni li wa lilimo ze 19. Mwa lilimo zee ne ze ne tatami ku zwa fo ni kolobelezwa, ne ni na ni mapongo ni minahano ye miñata. Hape, ne ni palelwa ku tukufalelwa mwa bukombwa kabakala ku saba batu mwa silalanda se ne ni pila ku sona, kakuli ne ni zibana hahulu ni bona.

Ha se ni fitelezi hanyinyani lilimo ze 20, se lu tuta mwa Namibia ku ya kwa South Africa, mi ha se lu li kwa South Africa na kala ku swalisana ni puteho lwa pili mwa bupilo bwa ka. Ne ni tabezi hahulu! Kono ne ni tokwa ku pazulwa hape ilikuli ni kone ku yanga kwa mutabani.

Hamulaho wa nakonyana, ne ni utwile muokameli wa mupotoloho ha bulela za taba ya bupaina. Za naa bulezi ne li ni fitile kwa pilu. Ne ni ziba kuli ne ni li wa mapongo, kono ne ni iponezi mwa naa ni babalelezi Jehova mwa miinelo ye taata kaufela ye ne ni kopani ni yona. Kiha se ni kupa bupaina bwa kamita. Kono baana-bahulu ne ba zina-zinile ku ni paka ku ba paina wa kamita kabakala mapongo a ka.

Nihakulicwalo, na ikatulela ku eza mo ne ni konela kaufela mwa musebezi wa ku kutaza Mubuso. Ka tuso ya bo ma ni ba bañwi, ne ni konile ku kwanisa lihola za naa tokwa ku kwanisa paina wa kamita. Mi ne ni ezize cwalo mane ka likweli ze 6. Taba yeo ne i bonisize takazo ye ne ni na ni yona ya ku bata ku ba paina mi hape ne i bonisize kuli ne ni kona ku eza bupaina niha ne ni kula cwalo. Se ni kutela ku kupa bupaina hape, mi ka nako yeo, kupo ya ka ya amuhelwa. Ka la 1 September, 1988, se ni ba paina wa kamita.

Ka ku ba paina, ni iponezi mwa ni tuselize Jehova. Mwa sibaka sa ku isa pilu kwa makulanu a ka, ku isa pilu kwa musebezi wa ku tusa ba ba tabela, ku ni silelelize ni ku ni tusa ku hula kwa moya. Ni fumani tabo ye tuna kabakala ku tusa batu ba bañata ku ineela ni ku kolobezwa.

Ni sa kula. Kono Jehova u ni “lwalela milwalo ka zazi ni zazi.” (Samu 68:19) U ni tusa ku ziba mwa ku pilela, mi mane u ni tusa ku ba ni tabo mwa bupilo!