Ne onyuola e higa 1956 ka an gi tuwo miluongo ni spina bifida ma en tuwo mamako lihumbru. Tuwoni osemiyo ok anyal wuotho maber kendo osemiyo abedo gi tuwoche mamoko momedore nikech nitie bur moro e lihumbruna.

Kinde moko kane pok onyuola, jomisonari moko ariyo dichwo gi chiege ma ne gin Joneno mag Jehova nochako puonjore Muma gi jonyuolna. Kane pod atin, ne nitie mana jolendo manok ma noke e gweng’wa miluongo ni Usakos, e piny Namibia. Nikech ne onge kanyakla ma ne wanyalo dhi timoe chokruok, ne watimo chokruogego kaka joot ka warango chenro mag chokruoge monego otim e kanyakla. Kane achopo jahigini abiriyo, notimna yeng’o miluongo ni urostomy, ma en yeng’o mitimone ng’ato mondo oketne gimoro e dende makonye olo pi. Kane achopo jahigini 14, nabedo gi tuwo mar ndulme. Nikech skul mar sekondar ne bor gi dala, ne dwarore abed machiegni gi jonyuolna nikech tuwochenago ne dwaro ni omiya rit maber, omiyo ne ok atieko skul.

Kata kamano, nang’ado ni adwaro loso winjruokna gi Jehova. Ng’eny bugewa mag Jokristo ne ok yudre e dhok mawacho mar Afrikaans. Mano nomiyo achako puonjora somo dho Ngere mondo mi asom bugewa mang’eny ma nigoyo gi dhokno. Nabedo jaland wach Pinyruoth kendo notisa ka an jahigini 19. Higini ang’wen ma noluwe nabedo gi chandruoge mang’eny mag tuwoche mag del koda paro. E wi mano, e gweng’wa, anyuolawa nigi tudruok machiegni ahinya, omiyo luoro mar dhano ne omona bedo jalendo ma jakinda.

Kane achopo jahigini 20 ne wadar Namibia mi wadhi South Africa. Kanyo e kama nahango dhiyoe e chokruoge mag kanyakla. Mano ne en wach malich miwuoro! Kata kamano, ne dwarore ni otera e yeng’o machielo miluongo ni colostomy ma en yeng’o mitimone ng’ato mondo oyud kaka onyalo golo minyaga.

Kinde moro nawinjo ka jarit alwora wuoyo e wi tij painia. Wachno nomulo chunya ahinya. Nang’eyo ni midekre ma an-go ok nyal miyo atim tij painia, kata kamano naseneno e ngimana kaka Jehova osekonya e chandruoge moko. Omiyo nakwayo fom mondo abed painia mapile. To nikech tuwoche ne siko kelona chandruoge mang’eny jodong’-kanyakla ne ok oyie mayot gi kwayona mar bedo painia.

Kata obedo kamano, nang’ado e chunya ni abiro timo duto manyalo e tij lendo. Nikech kony ma nayudo kuom mamana gi jomamoko, nalendo kuom dweche auchiel kagolo seche mag painia mapile. Mano nokonya ng’eyo ni kara anyalo timo tij painia kendo nokonya ng’eyo bende ni nitie gik manyalo timo kata bed ni atuwo. Omiyo nachako apong’o fom mar bedo painia mi jodongo koro noyiego. Nachako tij painia tarik 1, dwe mar ochiko higa mar 1988.

Kuom kinde duto masebedo ka an painia, aseneno kaka Jehova siko riwa lwedo. Keto pacha e puonjo jomoko adiera mag Muma kar keto pacha e chandruoge mayudo, osemiya rit maber, osejiwa, kendo osekonya mondo abed gi winjruok maber gi Jehova. Aseyudo mor mogundho kuom konyo jomoko buora mi ochiwre kendo obatisi.

Pod atuwora. Kata kamano Jehova ‘ting’ona ting’na’ pile ka pile. (Zab. 68:19) Jehova ok konya mana ting’o ting’na kende, to bende omiyo abedo mamor ni pod an gi thuolo mar dak.