Mo finn né en 1956 avek enn maladie ki appel spina bifida, enn malformation grave dan mo colonne vertebral. Sa ti affecté mo bann nerf ek mo ti gagne difficulté pou marché ek sa ti provok lezot probleme la santé bien grave.

Enn tipé avant mo naissance, enn couple missionnaire Témoins de Jéhovah ti commence etudié la Bible avek mo bann parent. Kan mo ti ankor tipti, ti ena zis enn tigit proclamateur dan Usakos, en Namibie, l’endroit kot mo ti resté. Alors, nou ti examine programme pou bann reunion en famille parski pa ti ena okenn congregation dan nou l’endroit. Kan mo ti ena sept an, mo ti faire enn urostomie, setadir enn l’operation kot ti faire enn passage artificiel dan mo lekor pou permette mo l’urine passé. L’age 14 an, mo ti gagne épilepsie. Mo pa ti kapav contigne lekol parski college ti bien loin ek mo ti bizin gagne enn soin special ar mo bann parent.

Malgré sa, mo ti decidé pou fortifié mo bann relation avek Jéhovah. La plupart nou bann publication pa ti ankor disponible en Afrikaans, mo langue maternel. Alors, mo ti aprann Anglais pou mo kapav etudié certain nou bann livre. Mo ti vinn enn proclamatrice ek mo ti prend bapteme l’age 19 an. Apré, pendant quatre l’année ki ti suive, mo ti gagne beaucoup probleme la santé ek bann difficulté lor plan affectif. En plis, dan l’endroit kot mo ti resté bann dimoune ti bien soudé entre zot, alors, la peur bann dimoune ti empeche moi pou participe avek zele dan predication.

Kan mo ti ena 20 an, nou ti quitte Namibie pou al en Afrique du Sud, ek pou premier fois, mo ti kapav frequente enn congregation. Sa ti vrai-mem extraordinaire! Selman, mo ti bizin faire ankor enn lot l’operation​—sa fois-la enn colostomie.

Enn tipé apré, mo ti tann enn surveillant circonscription koz lor service pionnier. Seki li ti dire ti touche mo leker. Mo ti koné ki mo la santé pa ti permette moi pou faire pionnier, mais mo ti’nn trouvé couma Jéhovah finn aide moi a travers beaucoup difficulté. Alors, mo ti rempli enn forme pou faire pionnier permanent. Selman, a cause mo bann probleme la santé, bann ancien ti hesité pou accepté mo demann pou faire pionnier.

Kan-mem, mo ti decidé pou faire tou seki mo kapav dan mo ministere. Avek l’aide mo mama ek lezot, mo ti reussi faire bann l’heure pionnier pendant enn periode six mois. Sa ti montré ki mo ti bien decidé pou faire pionnier ek ki mo ti kapav faire face avek mo bann probleme la santé. Mo ti ré-rempli enn forme pionnier, ek sa fois-la bann ancien ti approuvé. Le 1^er Septembre 1988, mo ti nommé pionnier permanent.

En tant ki pionnier, mo finn touletan senti ki Jéhovah finn soutenir moi. Au lieu ki mo fixé mo l’attention lor mo prop situation, mo enseigne la verité bann nouveau. Sa protege moi ek faire mo bann relation avek Jéhovah vinn pli fort. Mo finn gagne enn grand la joie pou aide beaucoup dimoune pou voué zot lavi ar Jéhovah ek pou prend bapteme.

Mo toujours pena enn bon la santé. Mais Jéhovah ‘chaque jour sarié mo fardeau.’ (Ps. 68:19) Li pa zis aide moi pou supporte mo maladie, Li aide moi aussi pou trouve la joie pou vive!