Jehova ‘oha humbata omaudhigu gandje esiku kehe’
Nonando onda kala ndi na uunkundi mboka onkalo hayi vulu okulunduluka kehe ethimbo, onda kala ndi wete nkene Tate yetu gwomegulu omuholike a kala nokwaambidhidha ndje monkalamwenyo yandje. Nomuule woomvula dhi vulithe po 20, onda mona enyanyu li ikalekelwa mokulongela Jehova ndi li omukokolindjila.
Onda valwa mo 1956 nuuvu wospina bifida. Molwaashoka okamunino komesipa lyombunda yandje ka kali ka pata thiluthilu, onerve ndjoka ya yonuka oye shi ninga oshidhigu ndi kale handi ende nawa noshe etela ndje wo uunkundi wulwe wa kwata miiti.
Aatumwa mboka ye li Oonzapo dhaJehova oya li ya tameke okukonakona Ombiimbeli naavali yandje, manga inaandi valwa. Pethimbo sho tandi putuka, muUsakos mondoolopa moka omo nda valelwa yi li moNamibia, omwa li owala mu na aauvithi aashona yi ili kokule. Onkee ano, otwa li hatu konakona iinima yokugongala pamwe tu li uukwanegumbo. Sho nda li ndi na oomvula heyali, onda li nda tandwa opo ndi vule okukala handi talaleke. Sho ndi na oomvula 14, onda li nda kwatwa kuuvu woshintona. Molwaashoka osikola yopombanda yopopepi oya li yi li kokule nonda li nda pumbwa esiloshimpwiyu li ikalekelwa lyaavali yandje, kanda li nda vulu okumana osikola.
Ihe nonando ongawo, onda li nda tokola ndi ipameke pambepo. Iileshomwa oyindji yopaKriste kaya li natango melaka ndyoka nda yama lyOshimbulu. Onkee ano onda li ndi ilongo okulesha Oshiingilisa opo ndi vule okukonakona omambo getu ogendji. Onda ningi omuuvithi gwUukwaniilwa nonda li nda ninginithwa sho ndi na oomvula 19. Moomvula ne dha ka landula ko, onda li ndi na uupyakadhi owundji wuukolele nokukala nda gwililwa po pamaiyuvo. Shimwe ishewe, molwaashoka aantu mondoolopa moka nda putukila oya li yi ishi nawa, osha li oshidhigu kungame okuya muukalele molwaashoka onda li handi kala nda tila aantu.
Sho ndi na oomvula 20 nasha, otwa li twa tembuka mo moNamibia e tatu yi koSouth Africa nonda li nda vulu okukala ndi na egongalo, shoka sha li oshikando shandje shotango. Shoka osha li oshiwanawa noonkondo! Ihe, onda li ishewe ndi na okutandwa opo ndi vule okukala handi yi kokandjugo.
Konima yethimbo lyontumba, onda li ndu uvu omutonatelishikandjo ta popi kombinga yuukokolindjila. Shoka a li a popi osha li sha gumu ndje komutima. Onda li ndi shi shi kutya uukolele wandje kawa li nawa, ihe onda li nda mono nkene Jehova a ambidhidha ndje ndi pite muudhigu owundji. Onkee onda li ndu udhitha ofooloma yuukokolindjila wondjigilile. Ihe, molwaashoka kanda li ndi na uukolele, aakuluntugongalo oya li ya ongaonga okupitika ndi shi ninge.
Nonando ongawo, onda li nda tokola ndi longe ngaashi tandi vulu miilonga yokuuvitha Uukwaniilwa. Onda li nda vulu okugwanitha po oowili dhuukokolindjila uule woomwedhi hamano molwaashoka meme nosho wo yalwe oya li ya kwathele ndje. Shoka osha li shu ulike kutya onda tokola toko okukokola ondjila nosha li wo shu ulike kutya otandi vulu okuungaunga nuupyakadhi wuukolele wandje. Onda li ndu udhitha ishewe ofooloma, noposhikando shika onda li nda pitikwa ndi ninge omukokolindjila. Mu 1 Septemba 1988, onda li nda ningi omukokolindjila gwondjigilile.
Ndi li omukokolindjila, onda kala nokumona aluhe nkene Jehova ta ambidhidha ndje. Okulonga yalwe oshili pehala lyokukala owala tandi ungaunga nonkalo yandje okwa gamena ndje, okwa kwathela ndje pamadhiladhilo, nosho wo ndi koke pambepo. Onda mona enyanyu enene mokukwathela oohandimwe oyendji yi iyapulile Jehova nokuninginithwa.
Uukolele wandje ohawu vulu okulunduluka ethimbo kehe. Ihe Jehova ‘oha humbata omaudhigu gandje esiku kehe.’ (Eps. 68:19) Jehova iha kwathele ndje owala ndi idhidhimikile onkalo yandje, ihe oha kwathele ndje unene tuu ndi nyanyukilwe onkalamwenyo!
