Ke belegwe ka 1956 ke na le bolwetši bja go golofala mokokotlo (spina bifida). Ka ge megalatšhika ya ka ya mokokotlo e be e sa tswalege gabotse, ke ile ka ba le bothata bja go sepela gomme seo sa mpakela mathata a magolo a tša maphelo.

Nakwana pele ke belegwa, baromiwa ba Dihlatse tša Jehofa ba ile ba thoma go ithuta Beibele le batswadi ba ka. Ge ke be ke sa le yo monyenyane, go be go na le bagoeledi ba sego kae ba lego lekatana bao ba bego ba dula toropong ya gešo ya Usakos, Namibia. Ka gona, re be re hlahloba lenaneo la diboka re le lapa. Ge ke be ke na le nywaga e šupago, ke ile ka buiwa gore ke phulwe lešoba la maitirelo gore ke kgone go hlapologa. Ge ke na le nywaga e 14, ke ile ka ba le bolwetši bja go wa. Ka ge sekolo se se phagamego se be se le kgole gomme ke nyaka tlhokomelo e kgethegilego ya batswadi ba ka, ga se ka kgona go fetša sekolo.

Lega go le bjalo, ke ile ka matlafatša tswalano ya ka le Jehofa. Dikgatišo tše dintši tša rena tša Bokriste di be di se gona ka Seafrikaans, e lego segagešo. Ka gona ke ile ka ithuta Seisemane e le gore ke kgone go ithuta dipuku tše ntši tša rena. Ke bile mogoeledi wa Mmušo gomme ka kolobetšwa ke na le nywaga e 19. Nywageng e mene e latetšego, ke ile ka babja kudu le go nyama maikwelong. Go feta moo, ka ge toropong ya gešo re dula kgauswi le kgauswi, go boifa batho go ile gwa ntira gore ke se tšee karolo ka mafolofolo modirong wa boboledi.

Nywageng ya ka ya mathomo ya bo-20, re ile ra tloga Namibia ra yo dula Afrika Borwa, gomme e be e le la mathomothomo ke kopanela le phuthego. Ruri seo se be se kgahliša! Lega go le bjalo, lebakeng le ke ile ka swanelwa ke go buiwa lela le legolo.

Nakwana ka morago, ke ile ka kwa molebeledi wa tikologo a bolelela bobulamadibogo. Tsela yeo a ilego a bo bolelela ka yona e ile ya nkgoma pelo. Ke be ke tseba gore ke motho wa go fokola gomme seo se ka nthatafišetša go ba mmulamadibogo, eupša ke be ke bone ka tsela yeo Jehofa a ilego a nthwala maimeng a ka ka moka. Ka gona ke ile ka dira kgopelo ya go ba mmulamadibogo wa ka mehla. Lega go le bjalo, ka baka la go se phele ga ka gabotse, bagolo ba ile ba dikadika go dumelela kgopelo ya ka.

Eupša ke ile ka šoma ka thata modirong wa go bolela ka Mmušo. Ka thušo ya mma le ba bangwe, ke ile ka kgona go fihlelela diiri tšeo di dirwago ke babulamadibogo ba ka mehla ka dikgwedi tše tshela. Seo se ile sa bontšha gore ke tloga ke ikemišeditše go ba mmulamadibogo le gore mathata a ka a tša maphelo a ka laolega. Ke ile ka dira kgopelo gape, gomme lekgeng le e ile ya atlega. Ka September 1, 1988, ke ile ka ba mmulamadibogo wa ka mehla.

Ka ge ke le mmulamadibogo, ka dinako tše ntši ke ile ka bona thekgo ya Jehofa. Go ruta batho ba bangwe therešo go e na le go dula ke naganne ka maemo a ka go ile gwa nthuša kudu, gwa nthuša gore ke se ke ka gateletšega maikwelong le gore ke gole moyeng. Ke ile ka thabišwa kudu ke go thuša batho ba mmalwa go ineela le go kolobetšwa.

Ga ke tsebe seo se tlago go direga gosasa ka maemo a ka a tša maphelo. Eupša Jehofa o ‘nthwalela morwalo letšatši le letšatši.’ (Ps. 68:19) O dira se se fetago go fo re ke kgotlelele bophelo bja ka; o dira gore ke thabele bophelo!