Mi a nace na aña 1956 cu “lomba habri” (spina bifida), es decir, e tubo di nervio den mi weso di lomba no a cera completamente. Esaki a causa daño na mi nervionan y a pone cu mi no por cana bon y cu mi tin otro problemanan serio di salud.

Prome cu mi a nace, mi mayornan a cuminsa studia Bijbel cu un pareha misionero di Testigonan di Jehova. Tempo mi tabata mucha tabatin solamente un par di publicador ta biba na Usakos (Namibia), mi pueblo natal. Pesey nos tabata studia e informacion di e reunionnan di congregacion como famia. Cu shete aña, mi mester a haci un operacion pa pone saco—of, stoma—pa saca orina (urostomia). Y cu 14 aña, mi a cuminsa haya epilepsia. Mi no por a caba scol secundario, pasobra e scol tabata keda mucho leu y mi mester a haya cuido special cerca mi mayornan.

A pesar di tur esey, mi a dicidi di fortalece mi relacion cu Jehova. Hopi di nos publicacionnan cristian no tabata disponibel ainda na Afrikaans, mi idioma materno. Pesey mi a siña lesa Ingles pa mi por a studia algun di nos bukinan. Mi a bira publicador y cu 19 aña mi a batisa. Pero mi tabatin hopi problema fisico y emocional durante e cuater añanan cu a sigui. Ademas, unda mi tabata biba, tur hende tabata conoce nos bon, y miedo di hende a stroba mi di ta mas activo den sirbishi.

Tempo mi tabatin 20 y pico aña, nos a muda di Namibia bay Sur Africa, y pa prome biaha den mi bida mi por a reuni cu un congregacion. Esta dushi esey tabata! Pero lamentablemente, mi mester a bolbe opera. E biaha aki, nan mester a pone un saco pa saca sushi di tripa (colostomia).

Poco tempo despues mi a tende un superintendente di circuito papia tocante e trabou di pionero. Su palabranan a yega na mi curason. Mi tabata sa cu mi salud no tabata djaki te aya, pero mi a mira con Jehova a sostene mi durante momentonan dificil. Pues, mi a yena e papel di solicitud pa bira pionero regular. Sinembargo, como cu e ancianonan tabata na altura di mi problemanan di salud, nan a dicidi di no aproba mi solicitud.

Pero toch mi kier a haci mi best den e trabou di predica. Cu yudansa di mi mama y otro rumannan, mi a logra yega e oranan di pionero regular durante un periodo di seis luna. Esaki a demostra cu di berdad mi kier a traha pionero y cu mi por a logra esey a pesar di mi problemanan di salud. Mi a bolbe yena un solicitud, y e biaha aki si e rumannan a aprob’e. Mi a bira pionero regular dia prome di september 1988.

Durante mi añanan como pionero, semper mi a mira con Jehova ta sostene mi. E trabou di pionero ta un proteccion pasobra en bes di sinta concentra riba mi limitacionnan, mi ta keda ocupa siñando otro hende e berdad. Tambe el a yuda mi controla mi emocionnan y cultiva un amistad mas cera cu Jehova. Mi ta sinti mi hopi feliz cu mi por a yuda varios hende bira sirbidor dedica y batisa di Jehova.

Mi problemanan di salud t’ey keto bay, pero Jehova ta carga mi carga tur dia pa mi. (Sal. 68:19) El a haci mas cu djis yuda mi soporta mi situacion; danki na Jehova mi ta contento cu mi ta na bida!