1956 watachömi yurikurqä. Washä mana alli kaptinmi alläpa grävi qeshyawan yurirqä y puritapis allillaqa manam puëdïtsu, y mas qeshyakunamanmi chashqä.

Manaraq yurikuptïmi teytäkunaqa Bibliapita yachakur qallayarqan juk parëja misionërukunawan. Wamrallaraq kanqä witsanqa, yurikunqä Usakos (Namibia) markachöqa wallkaqllam Diospita yachatsikoqkuna kayaq, tsëmi reunionkunataqa familiällawan rurayaq kayä. Qanchis watayoqllaraq këkaptïmi, cuerpüta uchkurayämurqan tsëllapana yakuta ishpakunäpaq, y 14 watayoq këkarnam atäki qeshyawan qeshyar qallëkurqä. Y secundariätaqa manam usharqätsu, porqui wayïpita alläpa karuchöraqmi colegiu karqan y teytakuna cuidayämänantam imëpis wanaq kä.

Tsënö këkarpis, Diospa kaqchöqa alli këtam munarqä. Parlanqä afrikaans idiömachö publicacionkuna alläpa mana kaptinmi, ingles idiömata yachakurqä wakin wakinllatapis publicacionkunapita leyinäpaq. Publicadöram tikrarirqa, y 19 watayoq këkarmi bautisakurirqä. Tsëpita qateqnin chusku watakunachöqa alläpam qeshyakurkurqä y alläpa yarpachakïmanmi chärirqä. Jinamampis, täranqä markachö llapan vecïnökuna reqiyämaptinmi, mantsakurnin Diospita yachatsikoq alläpaqa yarqoqtsu kä.

Ishkë chunka watayoqpita maslla këkaptïmi ëwakuyarqä Sudafricata, y tsëchöraqmi congregacionmanqa ëwarqä. Alläpa shumaqmi karqan, peru ichik tiempullachömi yapë alläpa grävi operacionta rurarayämarqan; tsë kutichöqa tita aqishnïtanam uchkuriyarqan tsëllapana ishpakunäpaq.

Tiempuwannam, congregacionkunata watukaq turita, precursor këpaq parlaqta wiyarqä. Y ninqankunaqa shonqöyaqmi chärirqan. Saludnïqa imëpis mana allillam karqan, peru rikashqam karqä mas sasa (aja) tiempukunachö Jehovä imanö yanapamanqantaqa. Tsëmi precursöra regular kanäpaq solicitudta qellqarirqä, peru alläpa qeshyanqäta rikarmi anciänukuna aprobayämarqantsu.

Tsënö këkaptimpis llapan puëdinqämannömi Diospita yachatsikur qallëkurqä. Mamänï y cristiänu mayïkuna yanapayämaptinmi, joqta killapa precursöranö hörakunata rurar qallëkurqä, tsëmi rikätsikurqan precursöra këta alläpa munanqäta y qesyëkarnimpis puëdinqäta. Yapëmi solicitudta qellqarirqä, y tsë kutichöqa aprobarayämarqanmi. 1988 wata 1 de septiembri killam precursöra këta qallarirqä.

Precursöra kanqä witsankunachöqa, Jehovä imanö yanapamanqanta rikëkarqöllam. Diospita nunakunata yachatsinqämi yanapamashqa qeshyanqäman mana yarparäkunapaq, y imëka mana allikunapitam tsapämashqa, jina Jehoväwan mas amïgu kanäpaqmi yanapamashqa. ¡Imanömi kushikïkö Jehoväta sirwiyänampaq atskaq nunakunata yanapanqäpita!

Jinallaran qeshyëkä, peru Jehovämi cada junaq yanapaman (Sal. 68:19). Awmi, Jehoväqa manam saludnïllachötsu yanapamashqa, sinöqa përëkurmi kushishqa kawä.