1956 kaq watapim nacerqani espina bífida nisqa onqoyniyoq. Wasa orqoypi tulluy mana allinta wichqakusqanraykum nervioykuna dañakururqa, chaymi ñakarini purinaypaq, chayraykutaqmi huk onqoykunawanpas ñakarini.

Tayta-mamaymi Biblia estudiayta qallaykurqaku Jehova Diospa testigon huk casarasqa misionerokunawan, chayqa karqa manaraq nacechkaptiymi. Warmallaraq kachkaptiyqa Diosmanta willakuqkunaqa aschallaraqmi karqaku Usakos (Namibia) sutiyoq nacesqay llaqtapiqa, chaymi huñunakuypi estudianapaq qellqakunata familiaywan estudiaq kaniku. 7 wataypi kachkaptiymi urostomía nisqata ruwawarqaku, chaytaqa ruwawarqaku yaku ispayniy wiksaypa waqtanta lloqsinanpaqmi. Chaymantañataqmi 14 wataypi kachkaptiy wañuymaña onqoywan kasqayta doctorkuna niykuwarqaku. Wasiymanta colegioyman karu-karu kasqanrayku hinaspa onqosqaywan tayta-mamaypa yanapakuyninta necesitasqayraykum estudiayta mana tukurqanichu.

Chayna kaptinpas, Jehova Diosta servinaypaqmi tanteakururqani. Chay watakunapi afrikáans rimayniypi qellqanchikkuna manaraq kasqanraykum ingles leeyta yacharurqani wakin qellqakunata estudianaypaq. Diosmanta willakuyta qallaykuspaymi 19 wataypi bautizakururqani. Qatiqnin 4 watakunapim llumpayta onqorqani hinaspapas llumpay llakisqam tarikurqani. Chaymantapas, yachasqay lawpi lliw vecinoykunawanmi allinta reqsinakuq kaniku, chaymi runakunata manchakuspay Diosmanta willakuq mana anchachu lloqsiq kani.

Iskay chunka masnin wataypi kachkaptiymi Sudáfrica nacionman astakurqaniku, chaypim chayllaraq congregacionman riyta qallaykurqani. ¡Anchatamá kusikurqani! Chaymantam ichaqa colostomía nisqata ruwawarqaku (chayqa hatun ispay lloqsinanpaq wiksapa waqtanta kuchuymi).

Watakuna pasaytam congregacionkunata watukuq ancianota uyarirqani precursorkunamanta discurso rimaqta. Nisqankunam sonqoyman chayarurqa. Llumpaytamá ñoqaqa onqoq kani, chayna kaptinpas Jehova Diosqa yanapaykuwarqam llumpay sasachakuykunapipas. Chaymi precursora kanaypaq solicitud nisqata huntachirqani. Ichaqa, imayna tarikusqayta ancianokuna yachasqankuraykum mana munarqakuchu precursora kanayta.

Chayna kaptinpas, atisqayta Diosmanta willakunaypaqmi tanteakurqani. Mamaypa hinaspa wakin iñiqkunapa yanapakuyninwanmi soqta killa precursora hina predicayta atirqani, chayna ruwasqaymi qawachirqa onqoq kachkaspaypas precursora kay munasqayta. Chaymi kaqmanta solicitudta huntachirqani, chay kutipiqa precursora kanaypaqmi chaskiykuwarqaku. 1988 kaq watapa qallariynin punchaw septiembre killapim precursora regular kayta qallaykurqani.

Precursora kasqay watakunapiqa Jehova Diosqa manam saqewarqachu. Imayna tarikusqaypi piensanamantaqa Bibliamanta runakunaman yachachiymi anchata yanapawarqa hawka tarikunaypaq hinaspa Jehova Dioswan allin amistad kanaypaq. ¡Diosta servinankupaq achka runakunata yanapasqayqa anchatamá kusichiwan!

Hinallamá onqoyniywanqa sasachakuchkani, chayna kaptinpas Jehova Diosmi sapa punchaw qepillayta apaysiwan (Sal. 68:19). Payqa manam sasachakuyniyta atipanallaypaqchu yanapawarqa, qowarqataqmi achka bendicionkunatapas.