I le 1956, na ou fanau mai ai ma se maʻi e taʻua o le spina bifida, e māfua ona ua faaleagaina neula o loʻu tuasivi. Na faigatā ai ona ou savali ma faapogaia ai isi maʻi tugā.

Ae ou te leʻi fanau mai, sa suʻesuʻeina e oʻu mātua le Tusi Paia faatasi ma se ulugalii misionare Molimau a Ieova. A o oʻu laʻitiiti, e toʻaitiiti tagata talaʻi na nonofo i loʻu nuu o Usakos i Namibia. Sa matou talanoaina o se aiga mataupu mo sauniga. Ina ua fitu oʻu tausaga, na faia ai loʻu taotoga e taʻua o le urostomy, lea na taoto ai se vaega o loʻu manava, ina ia faapipii ai se taga e mafai ona faaalu ese ai le feʻauvai. Ina ua 14 oʻu tausaga, na ou maua ai i le maʻi māliu. Talu ai e mamao tele le aʻoga maualuga mai i lo matou nuu, ma sa ou manaʻomia le tausiga a oʻu mātua, sa lē mafai ai ona faauma aʻu aʻoga.

E ui i lea, na ou filifili e faamalosia le ma faiā ma Ieova. Sa leʻi maua i na taimi le tele o a tatou lomiga i le gagana Afrikaans. O lea, na ou aʻoaʻoina ai le gagana Peretania, ina ia mafai ona ou suʻesuʻeina le anoanoaʻi o a tatou tusi. Na avea aʻu ma tagata talaʻi ma papatiso ai i le 19 o oʻu tausaga. A o faagasolo le fā tausaga mulimuli ane, sa ou fetaiaʻi ma le tele o faafitauli i le soifua mālōlōina ma tau faalogona. O le masani i tagata o le nuu, na avea ai le fefe i tagata ma mea e taofia aʻu mai i le faia o se sao maelega i le faiva.

Na matou siitia i Aferika i Saute ina ua silia ma le 20 oʻu tausaga. O le taimi muamua lea na ou auai ai i se faapotopotoga. Maʻeu se faaeaga matagofie! Peitaʻi, sa manaʻomia ona faia se isi aʻu taotoga, e togafitia ai le alāfeʻau (seʻi tulou.)

Na pāʻia loʻu loto i le lauga a se ovasia matagaluega e faatatau i le auaunaga paeonia. Na ou iloa e faigatā ona ou paeonia ona o loʻu soifua mālōlōina, ae na tauaveina e Ieova oʻu faafitauli i le tele o taimi faigatā. O lea, na ou talosaga ai ou te fia paeonia sauatoa. Peitaʻi, e leʻi taliaina e toeaina ona o loʻu soifua mālōlōina.

Na ou filifili pea e faia le mea sili ou te mafaia i le galuega talaʻi. O le fesoasoani a loʻu tinā ma isi, na ou ausia ai itula o se paeonia i le pe ā ma le 6 masina. Na iloa ai i inā loʻu naunau e fia paeonia, e ui i faalētonu o loʻu soifua mālōlōina. Na ou toe talosaga i le paeonia sauatoa, ma iā Setema 1, 1988 na avea ai aʻu ma paeonia sauatoa.

Na ou mātauina le lagolagosua a Ieova a o oʻu paeonia. O le aʻoaʻoina o isi i le upu moni nai lo o le taulaʻi i loʻu lava tulaga, na puipuia ai aʻu ma ou agaʻigaʻi ai i luma faaleagaga. Ua ou matuā olioli i le fesoasoani atu i le toʻatele, lea ua tuuina atu ma papatisoina.

O loo tumau pea ona faalētonu loʻu soifua mālōlōina. Ae ua ʻtauaveina e Ieova laʻu avega i aso taʻitasi.’ (Sala. 68:19) Ua ia tausia aʻu ina ia ou fiafia i le olaga.