Iha tinan 1956, haʼu moris mai ho moras espina bifida. Neʼe mak problema ho uat neʼebé ladún kompletu iha ruin-kotuk neʼebé liga ho kakutak. Ida-neʼe hamosu moras todan seluk no halo haʼu susar atu laʼo.

Antes haʼu moris, haʼu-nia inan-aman komesa estuda Bíblia ho feen-laʼen misionáriu husi Testemuña ba Jeová. Haʼu sai boot iha sidade ida iha rai-Namíbia, naran Usakos, neʼebé iha haklaken-naʼin balu deʼit. Tan neʼe, semana-semana, ami-nia família lee hamutuk ita-nia livru sira neʼebé uza iha reuniaun. Bainhira haʼu tinan hitu, haʼu hetan operasaun ba haʼu-nia mamiik hodi bele soe bee. Bainhira haʼu tinan 14, haʼu hetan moras bibi-maten. Tanba eskola sekundária mak dook husi uma no haʼu presiza inan-aman atu tau matan ba haʼu, haʼu la konsege ramata eskola.

Maski nuneʼe, haʼu hakaʼas an atu hametin haʼu-nia relasaun ho Jeová. Iha tempu neʼebá, ita-nia livru barak seidauk tradús ba ami-nia lia-afrikaans. Tan neʼe, hodi komprende lia-loos husi ita-nia livru barak, haʼu aprende lia-inglés. Bainhira haʼu tinan 19, haʼu sai haklaken-naʼin no hetan batizmu. Maibé depois neʼe, moras oioin kona haʼu no haʼu-nia sentimentu tun-saʼe beibeik durante tinan haat. Liután neʼe, tanba ema hotu koñese malu iha Usakos, da-neʼe halo haʼu moe hodi haklaken ho badinas.

Ikusmai, ami muda ba rai-Áfrika Súl, no ami foin primeiravés komesa ransu ho irmaun-irmán sira iha kongregasaun. Ida-neʼe lori haksolok tebes mai haʼu! Maski nuneʼe, haʼu presiza operasaun dala ida tan atu haʼu bele soe bee boot.

Liutiha tempu balu, haʼu rona diskursu husi katuas área nian ida kona-ba serbisu pioneiru, no ida-neʼe kona duni haʼu-nia laran. Haʼu hatene katak haʼu la iha saúde diʼak, maibé haʼu haree ona oinsá mak Jeová ajuda haʼu atu tahan hasoru susar barak. Tan neʼe, haʼu prenxe formuláriu atu foti pioneiru regulár. Maibé tanba haʼu moras, foufoun katuas sira laran-rua atu simu haʼu-nia aplikasaun.

Maski nuneʼe, haʼu hakaʼas an nafatin atu haklaken. Hodi simu ajuda husi haʼu-nia inan no maluk sira, haʼu konsege hetan oras hanesan pioneiru sira durante fulan neen. Ida-neʼe hatudu katak haʼu-nia moras sei la hanetik haʼu atu halo serbisu haklaken. Tan neʼe, haʼu husu fali atu foti pioneiru, no katuas sira simu. Ikusmai, iha 1 Setembru 1988, haʼu sai pioneiru regulár.

Nuʼudar haʼu halaʼo serbisu pioneiru, Jeová sempre ajuda haʼu. Hodi hanorin lia-loos ba ema foun sira duké hanoin barak kona-ba haʼu-nia susar rasik, ida-neʼe proteje no ajuda haʼu atu hametin haʼu-nia relasaun ho Jeová. Haʼu mós hetan haksolok boot hodi ajuda ema barak atu dedika an ba Jeová no hetan batizmu.

Haʼu-nia saúde sei fraku. Maibé Jeová lori haʼu-nia naha todan loroloron. (Sal 68:19) Sin, nia ajuda haʼu laʼós deʼit atu tahan hasoru susar oioin, maibé atu hetan haksolok iha haʼu-nia moris!