Jehova ‘Abuzuba Ulandinyamwida Mukuli’

Ba Maretha du Raan

Nokuba kuti zimwi ziindi ndilaakuciswa kapati cakutayeeyela, ndilimvwa kuti Taateesu wakujulu ulandigwasyilizya caluyando mubuumi bwangu boonse. Kwamyaka iinda ku 20, ndajana lukkomano kwiinda mukubelekela Jehova kandili mupainiya.

Ndakazyalwa mu 1956 abulwazi bwa spina bifida. Akaambo kakuti nsinga zyakumoongolola zyakaalilwa kujala cakumaninina, kunyonyooka kwansinga ooku kwakapa kuti ndibe abuyumuyumu bwakweenda alimwi amapenzi aambi aakuciswa-ciswa.

Kanditanazyalwa, Bakamboni ba Jehova ibakali bamisyinali bakali kwiiya Bbaibbele abazyali bangu. Ciindi nondakacili mwana, kwakali buyo basikumwaya basyoonto mudolopo lya Usakos mu Namibia, mondakali kukkala. Akaambo kakuti kwakanyina mbungano, makani aakeelede kubandikwa kumiswaangano twakali kwaabandika mbuli mukwasyi. Nondakajisi myaka iili ciloba yakuzyalwa, ndakaandulwa kupanga kapulo mumubili kutegwa kandisubila mpawo. Nondakajisi myaka iili 14 yakuzyalwa, ndakaba abulwazi bwakusuntuka. Akaambo kakuti cikolo casekondali cakali kulamfwu alimwi ndakali kuyandika kulanganizyigwa abazyali, tiindakamanizya cikolo pe.

Nokuba boobo, ndakasala kuyumya cilongwe cangu a Jehova. Mabbuku eesu manji aa Bunakristo taakaninga talika kujanika mumwaambo wangu iwaci Afrikaans. Aboobo, ndakaiya kubala Cingisi kutegwa ndicikonzye kwiiya mabbuku eesu aali mbwaabede. Ndakaba sikumwaya wa Bwami akubbapatizyigwa nondakali amyaka iili 19 yakuzyalwa. Mumyaka yone iyakatobela, ndakali kuciswa-ciswa alimwi akukopana mumizeezo. Kuyungizya waawo, mudolopo mondakali kukkala, kuyoowa bantu kwakali kundipa kutaba musungu mumulimo wamumuunda.

Nondakajisi myaka iinda asyoonto ku 20 yakuzyalwa, twakalonga kuzwa ku Namibia kuya ku South Africa, alimwi nceciindi cakusaanguna nondakatalika kuyanzana ambungano. Eelo kaka cakandikkomanisya eeco! Nokuba boobo, ndakeelede kwaandulwa alimwi—pele lino kudonkolwa kapulo mumala ikakali kunoobeleka lyoonse.

Aciindi cimwi, ndakamvwide mulangizi wabbazu kabandika makani aajatikizya bupainiya. Imajwi ngaakaamba akandinjila kapati mumoyo. Ndakalizyi kuti ndilaciswa-ciswa, pele ndakabona mbwaakandilanganya Jehova mumapenzi manji ngondakajisi. Aboobo, ndakalemba foomu yakuba mupainiya waciindi coonse. Pele akaambo kakuti ndakali kuciswa-ciswa, baalu bakawayawaya kuzumizya kulomba kwangu.

Nokuba boobo, ndakasala kucita kufwumbwa ncondakali kukonzya kucita mumulimo wakukambauka Bwami. Kwiinda mulugwasyo lwabamaama alimwi abamwi buyo, ndakacikonzya kubeleka mawoola aabelekwa bapainiya mumulimo wamumuunda kwamyezi iili cisambomwe. Eeci cakasinizya makanze aangu aakuba mupainiya alimwi cakatondezya kuti inga ndacikonzya nokuba kuti ndijisi penzi lyakuciswa-ciswa. Ndakalemba iimbi foomu, lino kulomba kwangu kwakazumizyigwa. Mu September 1, 1988, ndakaba mupainiya waciindi coonse.

Mbondili mupainiya, ndilabona lyoonse kuti Jehova ulandigwasyilizya. Kuyiisya bamwi kasimpe muciindi cakubikkila buyo maano kubukkale bwangu kwandigwasya kutakopana mumizeezo, alimwi kwandigwasya kuyumya cilongwe cangu a Jehova. Kugwasya bantu bali mbobabede kulyaaba akubbapatizyigwa kwandiletela lukkomano lunji.

Buumi bwangu mbwakuciswa-ciswa lyoonse. Pele Jehova ‘abuzuba ulandinyamwida mukuli.’ (Int. 68:19) Ulandicitila zyintu zinji kwiinda buyo kundigwasya kuliyumya mubuumi, pele akupa kuti kandikkomana akupona!