Yehova ‘Wakunifighilira Mazuŵa’ Ghose
Nangauli nili na matenda agho nchakusuzga kuzizipizga, kweni nkhuwona kuti Adada ŵithu ŵacitemwa ŵa kucanya ŵanovwira umoyo wane wose. Ndipo kwa vyaka vyakujumpha 20, nakondwa comene pakuteŵetera Yehova pakuŵa mupayiniya wanyengozose.
Nkhababika mu 1956 na nthenda ya spina bifida. Cifukwa cakuti msana wane uli makora cara, nkhwenda mwakusuzgikira, ndipo suzgo iyi yambiskaso matenda ghanyake ghakuru.
Pambere nindababike, ŵapapi ŵane ŵakamba kusambira Baibolo na Ŵakaboni ŵa Yehova awo ŵakaŵa ŵamishonale. Apo nkhaŵa mwanici, mu tawuni yakwithu ya Usakos, ku Namibia, mukaŵa ŵapharazgi ŵacoko waka. Ntheura pakuti ku malo agha kukaŵavya mpingo, tikasambiliranga ku nyumba nkhani za maungano izo zaŵikika pa ndondomeko sabata iyo. Apo nkhaŵa na vyaka 7, ŵakanicita opareshoni ya kunjizga payipi mu nthumbo kuti ndiyo nitundirenge. Apo nkhaŵa na vyaka 14 nkhaŵa na nthenda ya kuwa. Cifukwa cakuti sukulu ya sekondare yikaŵa kutali ndipo nkhakhumbikwiranga wovwiri wa ŵapapi ŵane, nkhatondeka kumalizga sukulu iyi.
Ndipouli, nkhawona kuti nchiwemi kuti nikhozge ubwezi wane na Yehova. Mabuku ghithu ghanandi ghakaŵa kuti ghandang’anamulike mu ciyowoyero cane ca Afrikaans. Ntheura nkhasambira kuŵazga Cingelezi mwakuti niŵazgenge mabuku ghithu ghanandi. Nkhaŵa mupharazgi wa Ufumu na kubapatizika apo nkhaŵa na vyaka 19. Vyaka vinayi vyakulondezgapo, matenda ghakanisuzga comene ndiposo nkhaŵa na suzgo la maghanoghano. Kweniso pakuti mu tawuni yakwithu ŵanthu ŵakacitanga vinthu mwakukolerana comene, nkhatondekanga kupharazga mwamwamphu cifukwa ca kopa ŵanthu.
Apo nkhaŵa na vyaka vya m’ma 20, tikasama ku Namibia na kuluta ku South Africa, ndipo kakwamba pa umoyo wane nkhamba kuwungana na mpingo. Ici cikaŵa cakukondweska comene. Ndipouli, ŵakanipanga opareshoni yinyake ndipo pa nyengo iyi ŵakaniŵika payipi mu nthumbo yakuti nicitirenge cimbuzi.
Nyengo yikati yajumphapo, nkhategherezga nkhani ya mulaŵiliri wa dera, yakukhwaskana na kucita upayiniya. Fundo izo wakayowoya zikanicontha mtima comene. Nkhamanya kuti nkhaŵa mulwarilwari, kweni nkhawona umo Yehova wakanifighililira mu masuzgo ghanandi. Ntheura nkhapempha upayiniya wanyengozose. Kweni cifukwa cakuti nkhalwarangalwaranga, ŵalara ŵakatondeka kuzomerezga pempho lane.
Ndipouli, nkhasankha kuti nicitenge vyose ivyo ningafiska pakupharazga Ufumu. Na wovwiri wa amama na ŵanji, nkhafiskanga maora gha upayiniya mu uteŵeti wa mu munda kwa myezi 6. Ici cikalongora kuti nkhakhumbanga nadi kucita upayiniya ndiposo kuti ningacita upayiniya nangauli nili mulwari. Nkhapemphaso upayiniya, ndipo pa nyengo iyi, nkhazomerezgeka. Pa Seputembala 1, 1988, nkhamba kucita upayiniya wanyengozose.
Pakuŵa mupayiniya, nyengo zose Yehova wakunovwira. Para nkhusambizga ŵaphya unenesko m’malo mwa kuŵika mahara pa masuzgo ghane, nkhuvikilirika, kulereka, kweniso nkhovwirika kuti nimutemwenge comene Yehova. Nili na cimwemwe cikuru comene cifukwa ca kovwira ŵanthu ŵanandi kuti ŵajipatulire kwa Yehova na kubapatizika.
Umoyo wane ucali wakusuzgasuzga. Kweni Yehova ‘wakunifighilira mazuŵa’ ghose. (Sal. 68:19) Iyo wakunovwira kuti nizizipizgenge, kweniso kuti nikondwenge cifukwa ca kuŵa wamoyo.
