I 1956, a fanauhia ˈi au, aita to ˈu ivi tua i paari maitai no te hoê maˈi parauhia spina-bifida. No te mea ua ino to ˈu mau uaua uira, mea fifi roa no ˈu ia haere e ua roohia vau i te tahi atu â mau maˈi ino mau.

Hou to ˈu fanauraa, i haapii na to ˈu na metua i te Bibilia e te mau mitionare Ite no Iehova. I to ˈu tamarii-rii-raa, tau taata poro noa te ora ra i to ˈu oire tumu i Usakos, Namibie. I faatupu na ïa matou i te mau putuputuraa ei utuafare. I te hituraa o to ˈu matahiti, ua tâpûhia vau no te tuu i te tahi faahaereraa omaha. I te 14raa o to ˈu matahiti, tupuhia ˈtura vau i te maˈi hopii. I te mea e mea atea roa te fare haapiiraa piri roa ˈˈe e i hinaaro na vau i te aupuru a to ˈu na metua, aita ˈtura vau i faahope i ta ˈu tau haapiiraa.

Ua faaoti râ vau i te haapuai i to ˈu mau taairaa e o Iehova. Mea iti roa te papai Kerisetiano na roto i te reo o mama, te Afrikaans. Haapii atura vau i te reo Beretane no te hiˈopoa i te rahiraa o ta tatou mau buka. Riro atura vau ei taata poro a bapetizo atu ai i te 19raa o to ˈu matahiti. I na maha matahiti i muri aˈe, ua roohia vau i te maˈi e rave rahi e i te fifi i te pae aau. Hau atu â, mea tahoê roa te feia o to ˈu oire tumu. Aita ïa vau i apiti i te taviniraa ma te itoito rahi no te mǎtaˈu taata.

I te 20raa o to ˈu matahiti, faarue atura matou ia Namibie no te haere atu i Afirika Apatoa. A tahi ra vau e apiti ai i te tahi amuiraa. Auê te faahiahia e! Tera râ, ua faaruru â vau i te tahi atu tâpûraa parauhia colectomie ia nehenehe vau e titio.

I muri aˈe, ua faaroo vau i te tumu parau a te tiaau haaati no nia i te taviniraa pionie. Ua putapû roa vau i ta ˈna mau parau. Ua ite au e mea maˈimaˈi roa vau, ua tauturu mai râ Iehova ia faaruru e rave rahi fifi. Faaî atura vau i te aniraa e riro ei pionie tamau. Ua feaa râ te mau matahiapo i te farii i te reira no to ˈu maˈi rahi.

Noa ˈtu râ, ua faaoti au e tutava i te poro i te Basileia. Maoti te tauturu a to ˈu mama e vetahi ê, i na avaˈe e ono, e hora pionie ta ˈu. Ua haapapu te reira i to ˈu hinaaro mau e riro ei pionie noa ˈtu te maˈi. Ani faahou atura vau e tavini ei pionie. I tera râ taime, ua fariihia! I te 1 no Tetepa 1988, ua riro vau ei pionie tamau.

Ei pionie, ua ite noa vau i te tauturu a Iehova. A haapii ai au i te taata i te parau mau, ua paruruhia e ua faaitoitohia vau a ore atu ai e manaˈo noa i to ˈu maˈi. Ua piri roa ˈtu â vau ia Iehova. Ma te tauturu i te taata ia pûpû e ia bapetizo ia ratou, ua itea ia ˈu te oaoa rahi.

Mea maˈimaˈi roa vau. Te tauturu maira râ Iehova i te mau mahana atoa. (Sal. 68:19) Aita noa o ˈna i tauturu mai ia faaoromai i te maˈi, ia oaoa atoa râ i to ˈu oraraa!