Yehova ‘wa Siata Oku Ngambatelako Ocilemo Cange’
Ndaño okuti ndi vela, kuenda si tẽla oku linga upange, pole, nda limbuka ekuatiso li tunda ku Yehova, Isietu wokilu. Pa pita ale ci pitahãla 20 kanyamo tunde eci nda fetika oku kuata esanju lioku vumba Yehova omo lioku kala ukundi wotembo yosi.
Nda citiwa kunyamo wo 1956 luvei umue vowoño. Ndi kuete ovitangi vialua omo liuvei waco u ndi tateka oku enda.
Osimbu sia citiwile handi, manji umue lukãi waye okuti va kala olomisionaliu, va longisa Embimbiliya kolonjali viange. Nda kulila vimbo lio Usakos, ko Namibia okuti, mua kala lika Olombangi vimue Via Yehova. Omo okuti vimbo liaco ka mua kalele ekongelo, vefendelo lietu liepata tua enda oku lilongisa ovipama violohongele. Eci nda kuata anyamo epanduvali, nda pelaliwa, kuenje, olondotolo via sandiliya onjila yikuavo yi ndi kuatisa oku sũsa. Eci nda tẽlisa 14 kanyamo, nda kuatiwa luvei wocinonya. Omo okuti osikola ya kala ocipãla, kuenda nda sukilile oku tatiwa lolonjali viange, sia malẽle oku tanga.
Noke, nda nõlapo oku pamisa ukamba wange la Yehova. Kotembo yaco, ka kua kalele alivulu etu a pongoluiwa kelimi lio Afrikaans lina ndi vangula. Omo liaco, nda lilongisa elimi Liongelesi oco ndi tange alivulu etu. Noke, nda linga ukundi, kuenje, nda papatisiwa eci nda tẽlisa 19 kanyamo. Pole, vokuenda kuanyamo akuãla a kuamamo, nda vela calua. Usumba nda kuatela omanu tua lisunguile lavo wa ndi tateka oku kuata ombili kupange woku kunda.
Eci nda tẽlisa 20 kanyamo, tua tunda ko Namibia kuenje, tua ilukila ko Afrika do Sul, kuna nda fetika oku endaenda kolohongele. Nda kuata esanju lialua omo lioku kala la vamanji! Pole, ndeya oku pelaliwa vali onjanja yikuavo.
Olonjanja vimue nda enda oku yeva evetiyo lia manji o nyula akongelo liatiamẽla kupange wakundi votembo yosi. Ombangulo yaye ya ndi vetiya calua. Ndaño okuti nda sola evetiyo liaye, pole, sia tẽlele oku iñila kupange wakundi votembo yosi omo lioku vela. Noke, ndeya oku soneha ukanda woku kala ukundi wotembo yosi. Pole, akulu vekongelo va kuata atatahãi oku tava epingilo liaco omo liuveyi wange.
Ndaño loku vela, pole, nda siata oku likolisilako oku enda kupange woku kunda. Evetiyo nda tambula ku ina yange kuenda ku vamanji, lia ndi kuatisa oku kala ukundi wa sokamo vokuenda kuolosãi epandu. Kuenje, nda limbuka okuti ndi pondola oku amamako kupange wakundi va sokamo ndaño loku vela. Noke nda soneha ukanda ukuavo woku kala ukundi wotembo yosi, kuenje akulu vekongelo va tava epingilo liaco. Omo liaco, nda fetika upange wakundi votembo yosi keteke liatete kosãi Yenyenye Linene yunyamo wo 1988.
Nda siata oku limbuka ekuatiso lia Yehova omo lioku kala ukundi wotembo yosi. Oku longisa Embimbiliya komanu ca siata oku ndi kuatisa oku yuvula oku sokolola uvei wange, kuenda ca ndi kuatisavo oku pamisa ukamba wange la Yehova. Ndi kuete esanju lialua omo lioku kuatisa omanu oku litumbika ku Yehova kuenda oku papatisiwa.
Ndaño okuti toke cilo ndi vela, pole, Yehova, ‘wa siata oku ngambatelako ocilemo cange eteke leteke.’ (Osa. 68:19) Yehova wa siata oku ndi kuatisa oku kala komuenyo toke cilo, kuenda ndi kuete esanju liocili!
