Natawo ako han 1956 nga may sakit nga spina bifida. Tungod kay waray magsara hin bug-os an neural tube ha akon butagtok, nadaot an akon mga nerve salit makuri ako makalakat ngan nagkaada ako iba pa nga grabe nga problema ha kahimsog.

Pipira ka panahon antes ako matawo, an usa nga mag-asawa nga misyonero han mga Saksi ni Jehova nagdumara hin pag-aram ha Biblia ha akon mga kag-anak. Han bata pa ako, gutiay la an magwarali ha amon bungto ha Usakos, Namibia. Tungod kay waray kongregasyon, ginhisgotan namon sugad nga pamilya an nakaeskedyol nga mga aradman para ha mga katirok. Han syete anyos ako, gin-urostomy ako, usa nga operasyon basi himoan ako hin artipisyal nga aragian han ihi. Han 14 anyos ako, nagkaada ako epilepsi. Tungod kay an pinakahirani nga hayskul hirayo ha amon ngan kinahanglan atamanon ako hin maopay han akon mga kag-anak, waray ako makatapos ha hayskul.

Bisan pa hito, nagdesisyon ako nga parig-unon an akon relasyon kan Jehova. Hito nga panahon damu han aton mga publikasyon an waray pa ha akon yinaknan nga Afrikaans. Salit nag-aram ako pagbasa hin Ingles basi damu han aton mga libro an akon maaadman. Nagin magwarali ako han Ginhadian ngan nagpabawtismo han 19 anyos ako. Han sunod nga upat ka tuig, nagkaada ako damu nga problema ha kahimsog ngan ha emosyon. Dugang pa, an mga tawo ha amon bungto duok ha usa kag usa, salit an kahadlok ha tawo nagpugong ha akon nga magin aktibo ha ministeryo.

Han sobra 20 anyos ako, binalhin kami tikang ha Namibia ngadto ha South Africa, ngan ha siyahan nga higayon, nagin kaapi ako han usa nga kongregasyon. Makalilipay gud ito! Pero kinahanglan na liwat ako operahan—hini nga higayon colostomy.

Paglabay hin pipira ka panahon, nakabati ako ha usa nga paramangno han sirkito nga naghihisgot mahitungod han pagpayunir. An iya ginsiring nakabantad han akon kasingkasing. Maaram ako nga diri maopay an akon kahimsog, kondi inabat ko an bulig ni Jehova ha akon ha damu nga makuri nga kahimtang. Salit nag-aplay ako pagregular payunir. Pero tungod kay masakiton ako, an mga tigurang nagruhaduha nga aprobaran an akon aplikasyon.

Bisan pa hito, nagdesisyon ako nga buhaton an akon gimaopayi ha ministeryo. Ha bulig ni Nanay ngan han iba, ha sulod hin unom ka bulan naabot ko an oras nga ginkikinahanglan ha payunir. Ginpamatud-an hito an akon determinasyon nga magpayunir ngan iginpakita hito nga maaakos ko an pagpayunir bisan pa han akon mga problema ha kahimsog. Nag-aplay ako utro, ngan hini nga higayon gin-aprobaran an akon aplikasyon. Han Septyembre 1, 1988, nagin regular payunir ako.

Sugad nga payunir, pirme ko naieksperyensyahan an bulig ni Jehova. An pagtutdo han kamatuoran ha mga bag-ohan imbes nga magpokus ha akon sitwasyon nagpanalipod ngan nakadasig ha akon, ngan nabuligan ako hito nga maparig-on an akon relasyon kan Jehova. Daku gud an akon kalipay nga makabulig ha damu nga indibiduwal nga magdedikar ngan magpabawtismo.

Paburobag-o pa gihapon an kahimtang han akon kahimsog. Kondi hi Jehova nagdadara han akon pinas-an kada adlaw. (Sal. 68:19) Tungod han iya bulig, diri la kay naiilob ko an akon kahimtang, kondi malipayon liwat ako nga buhi ako!