Guleʼ lu iza 1956. Cumu qué ñáʼ chaahuiʼ tubu neural stiʼ dxita decheʼ la? guleniáʼ guendahuará ni rábicabe espina bífida. Nabé bininani guiráʼ nerviu stinneʼ, nga runi qué rándapeʼ rizayaʼ ne pur laani maʼ napaʼ xcaadxi guendahuará malu.

Ti guendaxheelaʼ ni naca misioneru stiʼ ca testigu stiʼ Jiobá nga bizulú biʼndané bixhozeʼ ne jñaaʼ Biblia ante galeʼ. Dxi nahuiineʼ la? chupa chonna si xpinni Cristu nga nuu Usakos (Namibia), guidxi ra guleʼ, ngue runi, ridagulisaadu casi ti familia para guidúʼndanu guiráʼ ni ridiʼdiʼ lu cada guendaridagulisaa. Dxi napaʼ 7 iza bíʼnicabe ti urostomía naa, gudxiidecabe cueʼ ndaaneʼ para ganda guinesaʼ, ne dxi maʼ napaʼ 14 iza bizulú bidii ataque naa. Ne maʼ qué ñanda nunduuxeʼ secundaria, purtiʼ zitu riaana scuela que de ralidxeʼ ne caquiiñeʼ gapa bixhozeʼ ne jñaaʼ naa.

Neca zaqué, gudixheʼ iqueʼ chuaaʼ jma gaxha de Jiobá. Cumu caʼruʼ guibiʼxhiʼ stale de ca libru ne revista stinu lu diidxaʼ afrikáans, diidxaʼ guleniáʼ la? biziideʼ inglés ti ganda guundaʼ chupa chonna de laaca ni. Bizuluáʼ bicheecheʼ diidxaʼ ne guyuaanisaʼ dxi napaʼ 19 iza. Lu stapa iza ni gudiʼdiʼ despué, nabé gucaʼ huaraʼyaʼ ne laaca nabé guyuaaʼ triste. Ne cumu runibiáʼsaadu ndaaniʼ xquidxeʼ la? nabé guca nagana para naa chigucheecheʼ diidxaʼ, purtiʼ ridxibeʼ guiníʼ binni naa.

Guyuudu Sudáfrica dxi nacubi bisaaʼ 20 iza, ne raqué nga primé biaje guyuʼdu lade ti neza binni ridagulisaa. ¡Guizáʼ biecheʼ raqué! Peru biʼniʼ operárcabe naa sti biaje; operación riʼ biree lá ni colostomía.

Despué binadiagaʼ bidii ti superintendente de circuito ti libana ne raqué caguube gana binni gaca precursor. Yendá ni guniʼbe que ndaaniʼ ladxiduáʼ. Nannaʼ nabé huaraʼyaʼ, peru laaca maʼ huayuuyaʼ modo huadiináʼ Jiobá naa ora gudideʼ ra jma nagana; ngue runi, bichayaʼ ti solicitud para gacaʼ precursora regular. Peru cumu nanna ca binnigola que pabiáʼ huaraʼyaʼ la? qué ninacaʼ ñuni firmarcaʼ solicitud que.

Neca zaqué, gudixhe iqueʼ gucheecheʼ diidxaʼ biaʼ gándatiʼ. Cumu gucané jñaaʼ naa ne gucané xcaadxi xpinni Cristu naa la? gunda bisaaʼ biaʼ hora caquiiñeʼ guni ti precursor regular, ne bineʼ ni xhoopaʼ beeu; zaqué bisihuinneʼ pabiáʼ racalaʼdxeʼ gacaʼ precursora ne zanda guneʼ ni neca huaraʼyaʼ. Bichayaʼ solicitud que sti biaje, peru biaje riʼ huaxa maʼ biʼniʼ firmárcabe ni. Bizuluáʼ casi precursora regular 1 stiʼ septiembre iza 1988.

Biaʼ tiempu ziniáʼ casi precursora, maʼ biiyaʼ pabiáʼ huayacané Jiobá naa. Cumu jma cá iqueʼ gusiideʼ binni xiná Biblia la? racaneni naa para cadi chuaaʼ triste ne chuaaʼ jma gaxha de Jiobá, zacá randa rusiaandaʼ ca guendahuará stinneʼ. ¡Nabé nayecheʼ nuaaʼ purtiʼ huayacaniáʼ stale binni gaca xpinni Jiobá!

Dede nagasi huaraʼyaʼ, peru Jiobá nga rudiináʼ naa guiráʼ dxi (Sal. 68:19). Qué racané si Jiobá naa guneʼ huantar ca yuubaʼ stinneʼ, sínuque laaca racanebe naa guibaneʼ nayecheʼ.