AKAJJA, agosto 1936 maranwa pasäna. Robert ukat George Nisbet jilatanakajj Suazilandia markankir Sobhuza II reyen palaciopankasipkänwa. Ukat autonkir gramofonotwa Joseph F. Rutherford jilatan walja arstʼäwinakapa ukat musikanakwa istʼayapjjäna. Uk istʼasajj reyejj wal kusisïna ukat gramófono, disconaka ukhamarak parlantenakwa alañ munäna, janiw kamsirjamäpkayätti sasaw George jilatajj säna.

Ukajj janiw aljañatakïkiti sasaw Robert jilatajj suma arunakamp säna. ¿Kunatsa? Ukanakajj janiw jupanakänkkänti. Ukat ukanakajj khitinkkitï uk reyejj wal yatiñ munäna.

“Taqe ukanakajj yaqha Reyinkiwa” sasaw Robert jilatajj säna. Ukat khitis uka reyejja sasin jisktʼatajja, jilatajj akham saskakïnwa: “Jesucristowa, jupaw Diosan Apnaqäwipan uttʼayat reyejja”.

“¡Cheqas jupajj jachʼa Reyiwa!” sasaw respetompi arstʼäna, ukat saskakïnwa: “Janiw jupankir kuns munkti” sasa.

Robert jilatajj akham sasaw qellqarakïna: “Kunjam jaqëkantï Marka Pʼeqtʼiri, Sobhuza reyejj ukajj walpun muspharayitu. Inglés arjja sumpunwa parläna, ukampis janiw jachʼa jachʼa tukkänti, ukat wali qhana arunakampiw parlarakïna ukat jupampi parlañajj janirakiw chʼamäkänti. Ukat 45 minutonakwa oficinapan parlapjjta, ukañkamasti Georgejj anqanwa musicanak uchaskäna” sasa.

Ukat jilatajj saskakiwa: “Ukat jaypʼurojj Escuela Nacional Suazi ukaruw sarapjjta, ukanwa wali suma experiencia jikjjatapjjta. Directoramp parlapjjta ukhajja, wali sumwa istʼapjjetu, ukat taqe yateqerinakan istʼapjjañapatakejj gramofononwa disconak uchapjjerista sasin sapjjta ukhajja, wali kusisitaw iyaw säna ukat istʼapjjañapatakejj niya patak wawanakaruw chʼijir qontʼasipjjañapatak khitäna. Ukanjja, yoqall wawanakarojj yapuchaña, jardín uñjaña, carpintería, utanak luraña, inglés aru ukat matemática ukanakwa yatichasi, ukat imill wawanakarojj usutanak uñjapjjañapataki, utan lurañanaka ukat yaqha wakiskir luräwinakwa yatichasi sasaw sapjjetu. Ukat qhepatjja, reyin awichapaw uka escuela uttʼayi sasaw yatiyapjjarakitu”.

Ukat 1933 maranjja, precursoranakajj palaciopar visittʼapkatayna ukhajj Sobhuza reyejj sumwa jupanakar istʼatayna. Ukat mä kutejja, jupar jarkʼaqer 100 soldadonakaparuw Diosan Reinopat suma yatiyäwinak grabacionat istʼapjjañapatak tantachthapitayna. Ukhamarusa, sapa phajjsi revistanak katoqañatakiw  qellqayasitayna ukat walja qellqatanakwa mayirakitayna. Ukat mä qawqha tiemponakwa bibliotecapan Bibliat apstʼat qellqatanakajj niya phoqhatpach utjjäna. Ukat Payïri Jachʼa Chʼajjwäwi tiemponjj Gran Bretaña markat jutir jaqenakan gobiernopajj qellqatanakas jarkʼkchïnsa, jupajj sumwa imäna.

Sobhuza II reyejja, Lobamba cheqan jikjjataski uka palacioparojj Jehová Diosan Qhanañchirinakapar katoqaskakïnwa. Ukat iglesia pʼeqtʼirinakar kunaw Bibliat apstʼat arstʼäwinak istʼapjjañapatak jawsayirïna. Mä kutejja, uka markankir Helvie Mashazi jilataw Mateo 23 qellqatat qhanañchtʼaskäna, ukat iglesia pʼeqtʼirinakajj wal colerasipjjäna ukat jilatarojj qontʼayañwa munapjjäna. Ukampis reyiw Mashazi jilatan parlaskakiñapatak arjjatäna. Ukat juparakiw istʼirinakarojj Bibliat apstʼat jiskʼa tʼaqanak qellqtʼasipjjañapatak mayïna.

Ukat yaqha urojja, mä precursor jilatan arstʼäwip istʼañ tukuyatarojja, akham sasaw iglesia pʼeqtʼirinakat pusinejj sapjjäna: “Janiw iglesia pʼeqtʼirëjjapjjti; jichhat aksarojj Jehová Diosan Qhanañchirinakapäjjapjjtwa” sasa. Ukat kawkïr libronakatï reyin utjki uka libronakajj utjtamti sasaw precursor jilatarojj jisktʼapjjäna.

Khaya 1930 marat 1982 maran jiwjjäna ukhakamajja, reyejj wali respetompiw Jehová Diosan Qhanañchirinakapar uñjäna, ukat Suazilandia markankïr costumbrenakaparjam jan sarnaqapjjatapat janiw arknaqapjjañap munkänti. Ukhamasti, Jehová Diosan Qhanañchirinakapajj wal yuspärapjjañapäna, ukat jiwatapat wal llakisipjjarakïna.

Aka 2013 mara qalltanjja, 3.000 yatiyirinakaw Suazilandia markan utjäna. Ukat niyakejjay uka markajj mä millón markachirinikïchejja, sapa yatiyirejj 384 jaqenakaruw yatiyañapäna. Ukat 90 tamanakapanjja, 260 precursoranakaw utjäna. Ukat 2012 maranjja, Jesusan jiwäwip amtañatakejj 7.496 jaqenakaw tantachasipjjäna. Ukhamajja, qawqhampis jiljjataskakini ukajj qhanawa. Cheqpachansa, 1930 maranakan visitapkäna ukhaw nayrar sartapjjañapatak sum yanaptʼawayapjjpachäna. (Sudáfrica markat qellqanita.)