Dan nou arsiv

Sa lerwa ti vreman kontan!

SA TI ariv an Out 1936, Swaziland dan zalantour pale rwayal. Robert ek George Nisbet ti fek pe zwe bann lanrezistreman mizikal e apre en diskour Frer Joseph Rutherford dan zot transpor. Lerwa Sobhuza 2 ti kontan pour ekoute. George ti dir, “Sa ki ti anbarasan se ler i ti demann nou pour vann li sa masin rikord, bann lanrezistreman ek granmofonn ki nou ti pe servi pour anons mesaz Rwayonm.”

Robert ti eskiz son lekor e dir li ki sa bann keksoz pa ti pe vann. Akoz? Parski sa bann lekipman ti pour en lot dimoun. Sa Lerwa ti anvi konnen lekel.

Robert ti reponn, “Tou sa la i pour en lot Lerwa.” Apre sa, Sobhuza ti demande lekel sa Lerwa. Robert ti reponn, “Se Zezi Kri, Lerwa Rwayonm Bondye.”

Avek profon respe, Lerwa Sobhuza ti dir, “I en gran Lerwa li. Mon pa oule pran nanryen ki pour li.”

Robert ti ekrir: ‘Mon ti vreman etonnen avek latitid sa Gran Sef [Lerwa Sobhuza]. I ti koz byen Angle san okenn lafyerte ouswa lorgey, i ti fran e fasil pour aprose. Mon ti asiz avek li dan son lofis pour apepre 45 minit letan ki George ti pe zwe bann lanrezistreman deor.’

Robert i kontinyen, ‘Pli tar sa zour, nou ti al vizit The Swazi National School kot nou ti ganny en leksperyans byen enteresan. Nou ti rann temwannyaz avek direkter sa lekol ki ti pare pour ekoute. Kan nou ti koz lo sa masin e demande pour ki lekol antye i ekout sa bann lanrezistreman, i ti byen kontan e envit apepre san etidyan lekol pour asiz lo zerb pour ekoute. Nou ti ganny dir ki sa lekol ti ansenny bann garson lagrikiltir, zardinaz, sarpantye, konstriksyon, Angle ek matematik e bann fiy ners, travay lakaz ek lezot travay itil.’ I ti granmanman sa Gran Sef ki ti’n met sa lekol an plas. *

An 1933, Lerwa Sobhuza ti kontan pour ekout bann pionye ki ti vin vizit pale rwayal. En fwa, i ti envit 100 son bann solda pour vin ekout en lanrezistreman baze lo mesaz  Rwayonm. I ti kontribye e aksepte nou bann piblikasyon. I pa ti pran bokou letan pour sa Lerwa annan tou bann piblikasyon baze lo Labib. Deplis, malgre ki gouvernman kolonyal Angle ti enterdi nou bann piblikasyon pandan dezyenm lager mondyal, sa lerwa ti fer sir ki son bann piblikasyon pa ti ganny andomaze.

Lerwa Sobhuza 2 ti kontinyen envit bann Temwen kot pale rwayal Lobamba, i ti menm envit bann sef relizye pour vin ekout bann diskour baze lo Labib. En fwa, ler en Frer ki ti apel Helvie Mashazi ti pe eksplik Matye sapit 23, en group sef relizye byen ankoler ti leve e esey fors li pour asize. Me Lerwa ti entervenir e demann Frer Mashazi pour kontinyen. An plis ki sa, Lerwa ti demann lodyans pour ekrir tou bann verse Labib dan sa diskour!

Dan en lot moman, apre ki zot ti’n ekout diskour en frer pionye, kat sef relizye ki ti la pe ekoute ti devir zot kol e dir: “Nou nepli bann pret, me aprezan nou Temwen Zeova.” Apre sa, zot ti demann sa pionye si i ti annan ankor sa bann liv ki Gran Sef ti annan.

Depi bann lannen 1930 ziska son lanmor an 1982, sa Gran Sef ti respekte Temwen Zeova e i pa ti les zot ganny persekite lefet ki zot pa ti partisip dan bann seremoni relizye Swazi. Alor, bann Temwen ti byen rekonesan anver li, e zot ti vreman sagren ler i ti mor.

Ver konmansman lannen 2013, i ti annan plis ki 3,000 proklanmater Swaziland. Avek en popilasyon plis ki en milyon, i annan 384 dimoun pour sak proklanmater dan sa pei. Plis ki 260 pionye ti okipe dan 90 kongregasyon, e 7,496 dimoun ti asiste Memoryal an 2012. I kler ki i annan potansyel dan sa pei pour plis ogmantasyon. En fondasyon solid ti’n ganny poze pandan sa bann premye vizit Temwen Zeova Swaziland dan bann lannen 1930.​—Dan nou arsiv Sidafrik.

[Not anba lo paz]

[Portre lo paz 31]

Portre Lerwa Sobhuza 2 ki ti ganny tire an 1936 par Robert Nisbet e ganny donnen avek Watch Tower Society

[Portre lo paz 32]

Bann etidyan segonder ki ti asiste en diskour piblik Swaziland an 1936

[Portre lo paz 32]

George Nisbet o bor son loto