Homẹ Ahọlu lọ Tọn Hùn Taun!
SỌN ONÚ HOHO SẸDOTẸN MÍTỌN
Homẹ Ahọlu lọ Tọn Hùn Taun!
Nujijọ lọ wá aimẹ to août 1936 to Họ̀nmẹ Swaziland tọn kavi to lẹdo etọn mẹ. Robert po George Nisbet po ṣẹṣẹ hò nuhiho yidokanji lẹ po hodidọ yidokanji Mẹmẹsunnu J. F. Rutherford tọn lẹ po sọn mọto he tindo zomọ gbèzeyiaga tọn de mẹ. Homẹ Ahọlu Sobhuza II tọn hùn taun. George basi zẹẹmẹ dọmọ: “Mí biọ bẹwlu mẹ taun na ewọ jlo na họ̀ maṣinu he nọ hònú lọ, nuyidokanji lọ lẹ po zomọ gbèzeyiaga tọn lọ po!”
Robert dọ po ogbè fifá po dọ ni ma gblehomẹ blo, na onú lọ lẹ ma tin na sisà. Etẹwutu? Na mẹdevo tọn wẹ azọ́nwanu lọ lẹ. Ahọlu lọ jlo na yọ́n mẹlọ.
Robert gblọn dọ, “Ahọlu devo tọn wẹ.” Whenẹnu wẹ Sobhuza kanse dọ Ahọlu tẹwẹ. Robert gblọn dọmọ: “Jesu Klisti, Ahọlu Ahọluduta Jiwheyẹwhe tọn wẹ.”
Sobhuza yigbe po sisi sisosiso po dọmọ: “Oo, Ahọlu daho de wẹ. N’ma jlo na yí nudepope he yin etọn.”
Robert wlan dọ, ‘Gbẹtọ-yinyin Ahọlu Sobhuza tọn yinuwado ji e taun. E sè Glẹnsigbe ganji bo masọ nọ mọ ede mẹ kavi yigo podọ e yọ́n dọnsẹpọ bọ hodidọ etọn to tlọlọ. N’sinai hẹ ẹ to azọ́nwatẹn etọn na nudi nukunwhiwhe 45 to whenue George to núhò to gbonu.’
Robert zindonukọn dọ, ‘To azán enẹ dopolọ gbè, mí yì Wehọmẹ Ahọlu tọn Swazi tọn, fie mí tindo numimọ he fọnjlodotena mí hugan te. Mí dekunnuna ogán wehọmẹ lọ tọn podọ ewọ dotoai po jejejininọ po. To whenue mí dọho gando maṣinu lọ go bo biọ to e si nado hò nuyidokanji lọ lẹ na mẹlẹpo he tin to wehọmẹ lọ, homẹ etọn hùn bọ e degbena nudi wehọmẹvi 100 nado sinai do ogbé lẹ ji bo dotoai. Yè dọna mí dọ wehọmẹ daho lọ nọ plọn sunnu lẹ glelilẹ, nukunpipedo jipa go, azọ́n whlẹpipa po họ̀gbigbá po tọn, gọna Glẹnsigbe po nulinlẹn po; bo nọ plọn yọnnu lẹ dotozọ́n, whégbè-zọ́n po azọ́n yọ́n-na-yizan devo lẹ po.’ Onọ̀ daho Ahọlu Sobhuza tọn wẹ do wehọmẹ lọ ai. a
Sọn 1933 gbọ́n wẹ Ahọlu Sobhuza nọ yí ayajẹ do dotoaina gbehosọnalitọ he nọ wá Họ̀nmẹ etọn lẹ. To gbèdopo, e tlẹ pli awhànfuntọ 100 he nọ basi hihọ́na ẹn lẹ nado dotoaina owẹ̀n Ahọluduta lọ tọn he yin yiyidokanji lọ. E basi akuẹdida na linlinnamẹwe mítọn lẹ bosọ nọ yí owe mítọn lẹ. E ma dẹn bọ Ahọlu lọ tindo owe sinai do Biblu ji susu lẹ! Humọ, e gbẹ́ hẹn yé go mahopọnna dọ owe mítọn lẹ yin alọhẹndotena gbọn gandudu Grande-Bretagne tọn he paṣẹ do otò lọ ji to wẹkẹ-whàn awetọ whenu dali!
Na owhe susu lẹ, Ahọlu Sobhuza II nọ yí Kunnudetọ lẹ eyin yé wá Họ̀nmẹ etọn to Lobamba, bo tlẹ nọ basi oylọna sinsẹ̀ngán lẹ nado wá dotoaina hodidọ sinai do Biblu ji yetọn lẹ. To gbèdopo, Kunnudetọ lẹdo lọ tọn de he nọ yin Helvie Mashazi to zẹẹmẹ basi do Matiu weta 23 ji, bọ pipli sinsẹ̀ngán lẹ tọn de fọnṣite po homẹgble po bo tẹnpọn nado hẹn mẹmẹsunnu lọ gánnugánnu nado sinai. Ṣigba Ahọlu lọ do yé te, bo biọ to Mẹmẹsunnu Mashazi si nado zindonukọn to hodidọ etọn mẹ. Humọ, Ahọlu lọ dọna mẹplidopọ lẹ nado basi kandai wefọ Biblu tọn he yin nùdego to hodidọ lọ mẹ lẹpo tọn!
To whedevonu, to whenue sinsẹ̀ngán ẹnẹ dotoaina hodidọ gbehosọnalitọ de tọn godo, yé lilẹ́ kọla awù yetọn lẹ tọn do godo bo dọmọ: “Mí masọ yin sinsẹ̀ngán ba, ṣigba Kunnudetọ Jehovah tọn lẹ wẹ mí yin todin.” To enẹgodo, yé kanse mẹmẹsunnu lọ eyin yelọsu sọgan tindo owe he nkọ Ahọlu lọ tindo lẹ.
Sọn owhe 1930 lẹ gblamẹ kakajẹ whenue e kú to 1982, Ahọlu lọ do sisi hia Kunnudetọ Jehovah tọn lẹ bo ma dike yé ni yin homẹkẹndo, na yé ma nọ basi hùnwhẹ Swazi tọn lẹ wutu. Enẹwutu, Kunnudetọ lẹ tindo whẹwhinwhẹ́n dagbe nado yọ́n pinpẹn nuhe e wà na yé lẹ tọn, podọ yé ví i taun.
To bẹjẹeji 2013 tọn, wẹnlatọ Ahọluduta lọ tọn 3 000 linlán wẹ to Swaziland. Tòvi otò lọ tọn lẹ lán vude to livi dopo ji, podọ enẹ dohia dọ wẹnlatọ 1 na dọyẹwheho na gbẹtọ 388. Gbehosọnalitọ he hugan 260 wẹ tin to agun 90 lẹ mẹ, podọ gbẹtọ 7 496 wẹ wá Oflin tẹnmẹ to 2012. Ayihaawe ma tin dọ, jideji susu na wá to nukọn mẹ. E họnwun dọ mẹmẹsunnu lẹ ze dodonu dolido de dai to dlapọn he yé basi yì Swaziland to 1930 lẹ whenu.—Sọn onú hoho sẹdotẹn mítọn to Afrique du Sud.
[Nudọnamẹ odò tọn]
a L’Âge d’Or [Glẹnsigbe] 30 juin 1937, weda 629.
[Yẹdide to weda 31]
Yẹdide Ahọlu Sobhuza II tọn he Robert Nisbet de bo na Watch Tower Society
[Yẹdide to weda 32]
Wehọmẹvi wehọmẹ daho tọn lẹ he dotoaina togunmẹho de to Swaziland to 1936
[Yẹdide to weda 32]
George Nisbet po mọto he tindo zomọ gbèzeyiaga tọn etọn po
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN
Lehe Okún Ahọluduta lọ Tọn Tintan lẹ Yin Dido Do to Portugal
Avùnnukundiọsọmẹ tẹlẹ ji wẹ wẹnlatọ Ahọluduta lọ tọn tintan lẹ dù te to Portugal?
ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN
Togunmẹho lẹ Gọalọ Nado Lá Wẹndagbe lọ Pé Gbọn Irlande
Etẹwẹ hẹn C. T. Russell kudeji dọ ogle lọ “ko bia bo to tepọn gbingbẹ̀n”?
ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN
“Whetẹnu Wẹ Mí Nasọ Bayi Plidopọ Devo?”
Etẹwẹ zọ́n bọ plidopọ kleun he yin yin bibasi to Mexico to 1932 ehe do jẹna ayidego sọmọ?
ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN
“Ahun He Gọ́ Na Zohunhun po Owanyi po Hugan Gbede Pọ́n”
To plidopọ daho 1922 tọn yetọn godo, nawẹ Biblu Plọntọ lẹ yí ayinamẹ lọ nado “lá Ahọlu lọ po ahọluduta etọn po” do yizan mẹ gbọn?
ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN
“Ali de Ma Nọ Gble Gbau, Mọ Ali de Ma Ka Sọ Nọ Dẹn Gbau”
To vivọnu 1920 lẹ tọn podọ to bẹjẹeji 1930 lẹ tọn, gbehosọnalitọ zohunhunnọ lẹ yí gbemima do hẹn wẹndagbe Ahọluduta Jiwheyẹwhe tọn yì glètoho wlala Australie tọn mẹ.
ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN
“Wẹnlatọ Ahọluduta lọ Tọn He to Grande-Bretagne lẹ Emi—Mì Fọ́n!!”
Sọha wẹnlatọ Ahọluduta lọ tọn lẹ tọn ma jideji to aliho ayidego tọn de mẹ to Grande-Bretagne to owhe ao gblamẹ! Etẹwẹ wá hẹn ninọmẹ lọ pọnte?
