AGAWA iya nen Agosto 1936 diad Swaziland Royal Kraal, sular na ari. Kakkasumpal ya impatogtog nen Robert tan George Nisbet iray akarekord ya musika tan insublay da ray akarekord ya paliwawa nen Brother J. F. Rutherford. Aliketan si Arin Sobhuza II. Balet oniay inkuan nen George: “Nababaingan kami ta labay ton saliwen so player, saray plaka, tan samay trumpa ya uusaren parad mensahe Panarian!”

Kinmerew na dispensa si Robert tan imbaga ton agda iratan ilalako. Akin? Lapud walay sananey ya akanggawad saratan. Tinepet na Ari no siopa itan.

Say inyebat nen Robert, “Gawa na sananey ya Ari.” Kanian tinepet nen Arin Sobhuza no siopa itan ya Ari. “Si Jesu-Kristo, say Ari na Panarian na Dios,” so inkuan nen Robert.

“A, say makapanyarin Ari,” so marespeton imbalikas nen Arin Sobhuza. “Agko labay ya alaen so antokaman ya kayarian to.”

Oniay insulat nen Robert: ‘Pambiliban koy ugali nen Arin Sobhuza. Maomaong ya man-English balet aliwan mapangta o mapasirayew tan talagan prangka tan mainomay ya katongtong. Manga 45 minuto kamin nantongtong ed opisina to legan ya manpapatogtog si George na musika ed paway.

Oniay intuloy ya imbaga nen Robert: ‘Diad saman ya agew, linma kami met ed The Swazi National School tan balibalin talaga so eksperiensya mi diman. Pinulongan mi prinsipal, tan dinengel to kami. Nen imbaga mi nipaakar ed sound car tan tinepet mi no nayarin iparengel iray rekording ed interon eskuelaan, sikatoy aliketan tan tinawag toy ngalngali sanlasus ya estudyante. Pinayurong to rad karikaan pian ondengel. Imbaga dad sikami ya diad saman ya high school et ibabangat dad saray lalaki so agrikultura, panagdalus, panagkarpentero, panagpaalagey, English, tan panagkuenta; say ibabangat dad bibii et panag-asikaso, kimey ed abung, tan arum nin mausausar ya kimey. Say Founder na saman ya eskuelaan et say bai nen Arin Sobhuza.’ *

Nen 1933, labalabay la nen Arin Sobhuza II so ondengel ed saray payunir ya oonlad Royal Kraal. Aminsan, tinawag to ray 100 a guardia to pian narengel da so nirekord a mensahe  na Panarian. Sikatoy nan-subscribe na saray magasin tayo tan mangaawat na saray literatura. Ag-abayag, amin lawarin literatura tayo et wala lad library to! Inalwaran to iratan anggano nen insebel na gobiernoy Britanya iray literatura tayo ed amin a bansan sakop na satan legan na komaduan sankamundoan a guerra.

Intultuloy ya inawat nen Arin Sobhuza II iray Tasi ya oonlad Royal Kraal a walad Lobamba tan tinawag to ni ingen iray pari pian ondengel ed nibase ed Biblian paliwawa ra. Aminsan, legan ya ipapaliwawa na sakey a Tasin manngaran na Helvie Mashazi so Mateo kapitulo 23, wala ray sinmabin pari ya mamapasnok tan papatundaen da. Balet sinmalet so Ari, tan inkuan tod si Brother Mashazi ya ituloy to labat. Likud nid satan, imbaga na Ari ed saray wadman ya isulat dan amin so tekston narengel dad paliwawa!

Aminsan, kayarin dinengel na apatiran pari so paliwawa na sakey a brother ya payunir, inyamot day kuwelyo ra tan imbaga ran: “Aliwa kami lan pari, Tasi nen Jehova kami la.” Insan da tinepetan so payunir no wala ni ray libron singa saramay walad Ari.

Manlapud 1930’s anggad impatey to nen 1982, nirespeto nen Arin Sobhuza II iray Tasi nen Jehova tan agto inyabuloy ya pairapen ira lapud agda panggagawad ritual na saray Swazi. Kanian, misalsalamat ed sikato iray Tasi, tan talagan nanermen irad impatey to.

Diad gapo na 2013, wala lay masulok ya 3,000 a manangipalapag na Panarian diad Swaziland. Lapud masulok labat ya sakey milyon so populasyon ditan, say ratio na manangipalapag ed populasyon et 1 ed kada 384 ya totoo. Masulok ya 260 a payunir so aktibon manlilingkor ed 90 a kongregasyon, tan 7,496 so inmatendid Memoryal nen 2012. Talagan baleg ni posibilidad ya onaligwas so kimey ed satan a lugar. On, akapangiletneg na malet a pundasyon iramay nampulong ed Swaziland nen 1930’s.—Inalad daan iran koleksion mi diad South Africa.