KAY 1936 watapi agosto killapi, Robert chantá George Nisbet Suazilandia suyupi Sobhuza II nisqa reypa kamachina wasinpi kasharqanku. Paykunaqa parlanteyoj automanta musicata tocachiytawan, hermano Joseph F. Rutherford umallirichisqanta uyaricherqanku. Reytaj chayta uyarispa, ¡may kusisqa kasharqa! George nerqa: “Reyqa tocachinapaj aparatota, grabasqa umallirichiykunata, parlanteta ima rantikapuyta munarqa”, nispa. Paykunataj, mana vendepuyta atisqankurayku ni imata niyta aterqankuchu.

Robertqa reyman mana vendenapajchu kasqanta allillanmanta sutʼincharqa. Imaraykuchus chay imasqa dueñoyoj karqa. Chay reytaj pejpatachus kasqanta yachayta munarqa.

Roberttaj “kaykunaqa waj reypata”, nispa nerqa. Sobhuza reytaj, “¿pitaj chay reyri?”, nispa taporqa. Roberttaj “Jesucristo, pichus Diospa Reinonpa Reynin”, nispa kuticherqa.

Sobhuza reyqa Jesucristota jatunpaj qhawasqanrayku nerqa: “Uhh, payqa may jatun Rey, paymantaqa mana imatapis qhechuyta munaymanchu”, nispa.

Robert nerqa: “Rey Sobhuza imayna runachus kasqanmanta tʼukulla qhepakorqani. Inglesta sumajta parlajtinpis mana may kasqantachu yuyakorqa, chimpaykunapaj jinallataj karqa. Paywanqa khuskan hora partiyojta qhepakorqani, chaykamataj George jawapi musicata tocachisharqa”.

Robert nillarqapuni: “Chaymantataj Escuela Nacional Suazi nisqaman rerqayku, chaypitaj sumaj riwarqayku. Directorqa sumajta uyariwarqayku, tocachinapaj aparatopi yachakojkunaman uyarichiyta munasqaykuta nejtiykutaj, munarqapacha. Payqa yaqha tukuy yachakojkunata wajyacherqa pasto patapi tiyaraspa uyarinankupaj. Chay escuelapeqa qhari wawasman tarpuyta, huerta allinchayta, maderamanta imatapis ruwayta, wasi ruwayta, inglesta, matematicasta ima yachachej kasqanku; warmi wawasmantaj jampiyta, wasi ruwanasta, waj sumaj ruwaykunatawan. Chay escuelataqa rey Sobhuzaj jatun maman sayarichisqa”, nispa.

Rey Sobhuzaqa 1933 watapiña, kamachina wasinman rej precursoresta sumajta uyarisqa. Uj kutipitaj Reinomanta willayta uyarinankupaj 100 soldadosninta ima tantaykusqa.  Chantapis revistasta apapunallankupajpuni qhelqachikusqa, waj publicacionestapis kusiywan japʼikoj kasqa. Niraj unayninmantaj, bibliotecanpi yaqha tukuynin publicacionesña kasqa. Iskay Kaj Guerra Mundialpi Gran Bretañamanta gobierno publicacionesninchejwan churanakuyta qallarejtinpis, chay publicacionesqa pachitan kakushasqa.

Rey Sobhuzaqa kamachina wasinman hermanos rejtinku, sumajta japʼikullarqapuni. Astawanpis hermanos Bibliamanta umallirichisqankuta uyarinankupaj, religionta kamachejkunata wajyachej. Uj kuteqa chay llajtayoj hermano Helvie Mashazita, Mateo 23 capitulomanta sutʼinchashajtin, religionta kamachejkunamanta uj qotu mayta phiñarikuspa sayarerqanku, kallpallataj tiyachiyta munarqanku. Chaywanpis rey Sobhuzaqa hermanoman kutikuspa parlanallantapuni nerqa. Chaypi kajkunatataj Bibliaj versiculosninta qhelqakunankuta kamacherqa.

Waj kutipitaj, religionta kamachejkunamanta tawa runas uj precursorpa umallirichisqanta uyariytawan, kayta nerqanku: “Niña religionta kamachejkunachu kayku, kunanqa Jehovaj testigosnin kayku”, nispa. Chantá, reypata tiyaporqa chay jina librosta mañakorqanku.

Rey Sobhuzaqa 1930 watas chaynejmantapacha 1982 watapi wañupunankama, Jehovaj testigosninta jatunpaj qhawarqa. Nitaj saqerqachu chay suyupi costumbresninkuman mana chhapukusqankurayku qhatiykachasqa kanankutaqa. Hermanostaj chaymanta agradecekorqanku, wañupojtintaj sinchʼita llakikorqanku.

Kay 2013 wata qallarishajtenqa Suazilandia suyupi 3.000 willajkunamanta astawanña karqa. Chay suyupi uj millón runaslla tiyakojtinkupis, 384 runaspaj uj willajlla karqa. Chantá, 90 qotuchakuykunapi 260 precursoresmanta astawanña karqa. Jesuspa wañuyninta yuyarinapaj tantakuymantaj, 2012 watapi 7.496 runas jamorqanku. Chay suyupi 1930 watas chaynejpi willayta qallarikusqanqa, ¡may sumaj karqa! (Sudafricapi waqaychakusqanmanta.)