KAYQA pasakurqa reypa palacionpim 1936 watapi, Suazilandia nacionpi. Robert hinaspa George Nisbet iñiqmasinchikkunam carropi churarqaku takikunata hinaspa J. F. Rutherford iñiqmasinchikpa discursonta. Sobhuza II reymi admirasqallaña karqa. Chaymi George iñiqmasinchik nin: “Manam ima ruwaytapas atirqanikuchu Diospa gobiernonmanta willakunapaq servichikusqayku tocadiscota, discokunata hinaspa parlanteta chay rey rantiyta munaptin”, nispa. ¿Imatam iñiqmasinchikkuna nirqaku?

Robert sutiyoq iñiqmasinchikqa nirqam mana rantikunapaq kasqanta hinaspa pampachaykunanpaqpas. ¿Imanasqam chaynata nirqa? Chaykunaqa manamá paykunapachu karqa. Reyñataqmi tapurqa: “¿Hinaptinqa pipataq?”, nispa.

Robertñataqmi nirqa: “Kaykunaqa huk Reypam”, nispa. Hinaptinmi Sobhuza reyñataq tapurqa mayqan Reypa kasqanmanta. Payñataqmi nirqa: “Jesucristom, Diospa Gobiernonpa Reynin”, nispa.

Sobhuza reyqa respetowanmi nirqa: “Payqa allin Reymi, manam paypa kapuqninkunataqa apakuymanchu”, nispa.

Robertqa qellqaspanmi kaynata nirqa: “Imayna kasqanmi admirachiwarqa. Ingles rimayta allinta yachaspanpas manam hatun tukuqchu karqa, aswanqa humilde runam karqa. Oficinanpim paywanqa rimarqaniku yaqa huk horata, takita hawapi George churamunankama”, nispa.

Nirqataqmi: “Chay punchawllam watukurqaniku Escuela Nacional de Suazilandia nisqanman, chaypim mana haykapipas pasawasqanku pasakurqa. Chay escuelapa directorninmanmi Diosmanta willarqaniku, payñataqmi allinta uyariwarqaku. Parlanteykuta allicharuptiyku warmakuna uyarinankupaq niptiykum, allinpaq hapirqa hinaspa yaqa pachak warmakunata huñururqa, paykunañataqmi pastopi tiyaykuspa uyarirqaku. Willawarqakum chaypi qari warmakunaman tarpuymanta, plantakunamanta, carpinteriamanta, perqaymanta, ingles rimaymanta hinaspa matematicamanta yachachisqankuta, sipaschakunamanñataqmi imayna hampiymanta, wasipi imapas ruwaymanta hinaspa huk ruwaykunamantapas yachachisqankuta”, nispa. Chay escuelataqa rey Sobhuzapa abuelanmi qallarichisqa. *

Sobhuza reyqa ñam 1933 watapiqa palacionman precursorkuna watukuptinku uyarirqaña. Huk kutipim 100 soldadonkunata  huñurqa Diospa Gobiernonmanta grabasqa discokunata uyarinankupaq. Paykunaqa pagananku kaptinpas llapankum mañakurqaku revistakunata, hinaspam iñiqmasinchikkunapa apasqan qellqakunatapas chaskikurqaku. Pisi tiempollapim chay reypaqqa yaqa lliw qellqanchikkuna kapurqa. Chaymantapas qellqanchikkunaqa hinallam kapurqa iskay kaq hatun guerrapi Gran Bretaña nacion harkakuptinpas.

Unay watakunam, Sobhuza II reyqa Testigokunata hinalla chaskirqa yachasqan Lobamba llaqtapi, wakinpiqa sacerdotekunatam Bibliamanta discursokunata uyarichiq. Chayta ruwaptinmi chay llaqtamanta Helvie Mashazi iñiqmasinchik willachkarqa Mateo libropa 23 capitulonmanta, hinaptinmi sacerdotekunaqa piñarikuspanku iñiqmasinchikta nirqaku tiyananpaq. Ichaqa chay reymi iñiqmasinchik Mashazi hinalla rimananpaq kamachirqa. Kamachirqataqmi chaypi uyariqkunata iñiqmasinchikpa rimamusqan textokunata qellqanankupaq.

Huk kutipim tawa sacerdotekuna huk precursor iñiqmasinchikpa discursonta uyarispanku nirqaku: “Manam sacerdoteñachu kaniku, aswanqa Jehova Diospa testigonkunañam”, nispa. Hinaspankum iñiqmasinchikta tapurqakuraq sichu Sobhuza reypa libronkunata hina apasqanmanta.

1930 watamanta 1982 watapi wañukunankamam, chay reyqa Jehova Diospa testigonkunata respetarqa hinaspapas manam munarqachu nacionninkupi imapas costumbrenkuta mana ruwasqankurayku qatikachasqa kanankutaqa. Chayraykum Testigokunaqa ancha agradecesqa karqaku, hinaspapas anchatam llakikurqaku wañukuptin.

2013 watapa qallariyninpim Suazilandia nacionpiqa Diosmanta willakuqkuna 3.000 karqaku. Chay nacionpi runakunaqa huk millonllam kanku. 384 runakunamantam Diosmanta willakuqkunaqa huk kachkan. Kachkantaqmi 260 precursorkuna hinaspa 90 congregacionkuna. 2012 watapiñataqmi Jesuspa wañukusqanta yuyarinankupaq huñunakurqaku 7.496 runakuna, kaykunam qawachin astawan yapakunanmanta. Sutillataqmi qawakun 1930 watakunapi Suazilandia nacionpi Diosmanta willakusqankuqa hamuq watakunapaq allinpuni kasqanmanta. (Kayqa Sudáfrica lawpi waqaychasqa kaqkunamantam.)