AGOSTO killa 1936 watapin Robert, George Nisbet cristianokuna Suazilandia nacionmanta Sobhuza II reypa wasinman chayarqanku. Huk carromantan tocadiscopi uyarichirqanku Joseph F. Rutherford iñiqmasiq discursonta, grabasqa takikunatapas. Chayta uyarispan reyqa anchata kusikurqan, rantiytataqmi munarqan chaykunata. George willakun: “Manan ima niytapas atirqaykuchu, rantiytan munarqan tocadiscota, Diospa Gobiernonmanta willaq discokunata, parlantetapas”, nispa.

Robertqa mana phiñachiq hinallan willarqan chaykunaqa dueñoyoq kasqanta, chayrayku mana vendenapaqchu kasqanta. Reyqa yachaytan munarqan pin chay dueño kasqanta.

Robertmi nirqan: “Llapa kaykunaqa huk reypan”, nispa. Pichus chay rey kasqanmanta Sobhuza rey tapuqtintaqmi kutichirqan: “Diospa Gobiernonpi rey Jesucriston”, nispa.

Sobhuza reytaqmi respetowan kutichirqan: “¡Waw, payqa hatun Reymá, manan paypa kaqninkunamantaqa imatapas munapayaymanchu!”, nispa.

Robertmi qelqarqan: “Anchatan admirachiwarqan chay umalliq [Sobhuza rey] imayna kasqanqa. Allintan rimarqan inglés simita, ichaqa manan chaywanqa hatunchakuqchu, sut’illantan rimaqpas, asuykunapaq hinataqmi karqan. George hawapi takita uyarichimushanankaman wasinpi paywan rimarqayku tawa chunka phisqayoq minutota hina”, nispa.

Nillantaqmi: “Chay p’unchayllapitaqmi Escuela Nacional Suazi nisqaman rillarqaykutaq, chaypi sucedesqanqa ancha munaymi karqan. Directormi makilla uyariwarqanku, nirqaykutaqmi grabasqa discokunata llapa alumnokunaman uyarichiy munasqaykuta, hinan yaqa pachak alumnokunata waqyachispa nirqan tiyaspa uyarinankupaq. Niwarqankun chay escuelapiqa qhari wawakunaman chakra llank’ayta, carpinteriata, huertakuna llank’ayta, wasi perqayta, inglés simita, matemática nisqatapas yachachisqankuta; warmi wawakunamantaq enfermera kayta, wasipi imaymana ruwayta, huk ruwaykunatapas. Willawallarqankutaqmi chay escuelataqa chay llaqtapi reypa abuelan ruwachisqanta”, nispa.

1933 watapiraqmi Sobhuza reyqa iskay precursorkunata ancha kusikuywan uyarisqa wasinman chayaqtinku. Huk kutipipas 100 cuidaqnin soldadokunatan huñusqa Diospa  Gobiernonmanta grabasqa willakuyta uyarinankupaq. Hinaspapas qelqakunata apachinankupaqmi anotachikusqa, chaskikusqataqmi askha qelqakunatapas. Pisi tiempollapin askha qelqanchiskunata wasinpi huñurqan. Segunda Guerra Mundial kasqan tiempopin, Gran Bretaña nacionmanta gobierno kamachikurqan qelqanchiskunata ama hap’inankupaq, chaywanpas payqa hap’illarqanmi.

Sobhuza II reyqa Lobamba llaqtapi kaq palacionpin Testigokunataqa chaskishallarqan, wakin curakunatapas waqyachiqmi Bibliamanta yachachisqankuta uyarinankupaq. Huk kutinmi chay llaqtapi tiyaq Helvie Mashazi iñiq yachachisharqan Mateo 23 capitulomanta, hinan askha religioso runakuna amaña rimananpaq phiñasqa sayarirqanku. Ichaqa chay reymi Mashazi iñiqta nirqan yachachishanallanpaq, llapa uyariqkunatataqmi kamachirqan llapa textokunata anotanankupaq.

Huk kutipipas huk precursor discursota qosqan qhepamanmi tawa curakuna nirqanku: “Manañan curañachu kayku, kunanqa Jehová Diospa testigonmi kayku”, nispa. Chay qhepamantaqmi precursorta tapurqanku: ‘¿Apamurankichu reypa hap’isqan librokunata hina?’, nispa.

Chay reyqa 1982 watapin wañupurqan, payqa 1930 watakunamantapachan rikuchirqan Testigokuna respetasqanta, amachaykurqantaqmi chay llaqtapi qatiykachasqa kanankumanta. Chaymi Testigokunaqa anchata agradecekunku chay reyta, anchatataqmi llakikurqanku wañupusqanmanta.

2013 wata qallariypiqa kinsa waranqa más Testigokunan karqan Suazilandia nacionpi. Chay nacionpin kanku huk millón runakuna, chhaynaqa 384 runakunamantan huk Testigolla karqan. Llapanpiqa 90 iñiq t’aqakunan karqan, 260 precursorkuna ima. 2012 watapi Jesuspa wañupusqanta yuyarinapaq huñunakuymanmi hamurqanku 7.496 runakuna. Askha runakunaraqmi Diosmanta yachananku kashan. 1930 watakunapi chay nacionpi Diosmanta willayqa may allinpunin karqan (Yuyarinanchispaq: Sudáfrica nacionpi).