KUA tupu te reira i roto ia Aukute, i te mataiti 1936. Te ngai, ko te Swaziland Royal Kraal me kore te aua ariki. Kua akatangi a Robert raua ko George Nisbet i te au imene rekotiia e oti aru mai te au akoanga a te Taeake J. F. Rutherford mei roto mai i tetai motoka akatangi karere. Rekareka tikai te Ariki Sobhuza II. Akamarama mai a George e: “Akama tikai maua no te mea, kua inangaro aia i te oko i te matini akatangi anga e te au rekoti, e te pu!”

Kua tataraapa a Robert e kare aia e rauka i te oko atu i teia au apinga. No teaa ra? No te mea, kare nana teia au apinga. Kua inangro te Ariki i te kite e naai teia au apinga.

Kua pau atu a Robert e, “Na tetai Ariki ke teia au apinga.” E oti kua ui a Sobhuza e koai teia Ariki. Karanga a Robert e: “Ko Iesu Karaiti, te Ariki o te Patireia o te Atua.”

“E Ariki maata aia,” i tuatua akangateitei ei a Sobhuza. “Kare au e inangaro i te apai i tana au apinga.”

Kua tata a Robert e: ‘Kua umere tikai au i te tu o te Rangatira Maata, te Ariki Sobhuza. Mako tikai tana tuatua Papaa, kare e akatietie, kare e ngakau parau e te mama ua i te tuatua kiaia. E 45 miniti to maua noo anga i roto i tona opati, kua akatangi a George i te imene i vao mai.

Karanga a Robert e, ‘I taua ra rai, kua atoro maua i te au tamariki i ko i te Swazi National School e kua tupu tetai mea umere. Kua tuatua maua ki te puapii maata no runga i te tuatua meitaki, e kua akarongo mai aia. Kua taiku maua i te matini e kua pati kia akatangi i te au rekotianga no te tamariki apii. Kua rekareka tikai aia e kua kapiki atu ia ratou kia akaputuputu mai kia akarongo ki te akatangianga. Vaitata rai i te 100 tamariki tei aere mai i te akarongo. Kua akakiteia mai e e apiiia ana te au tamariki tamaroa i te akono manu, tanutanu, kamuta, patu are, reo Papaa, e te tare numero; te au tamariki tamaine ra, e apiiia ana ratou i te angaanga neti, te au angaanga o te ngutuare, e tetai au angaanga puapinga ke mai.’ Na te mama ruau o te Rangatira Maata i akamata i taua apii ra. *

Mei te mataiti 1933 mai, kua rekareka tikai te Ariki Sobhuza  i te akarongo ki te au painia tei aere atu ki te Aua Ariki Kraal. Tetai atianga, kua akaputuputu mai aia i te 100 au toa uritumu kia akarongo ki te akatangianga o te karere Patireia. Kua inangaro aia kia tukuia atu te au makatini e te au puka kiaia. Kare i roa ana, mei rauka rai iaia te au puka a te Au Kite o Iehova! Tei maata atu, kua akono aia i te reira noatu kua arai te kavamani o Peritane i ta tatou au puka i te tuatau o te tamakianga rua o te ao nei.

Kua ariki te Ariki Sobhuza II i te Au Kite ki roto i te Aua Ariki Kraal i Lobamba, e kua kapiki katoa i te au orometua kia aere mai kia akarongo ki te au akoanga Pipiria. Te uriuri anga tetai taeake ko Hel­vie Mashazi ia Mataio pene 23, kua rere mai tetai pupu orometua e kua maro iaia kia noo ki raro. Inara kua arai te Ariki ia ratou e kua pati i te Taeake Mashazi kia rave i tana akoanga. Tetai katoa, kua akakite te Ariki ki te katoatoa kia tata i te au irava Pipiria me taikuia mai!

I tetai atianga ke mai, i muri ake te akarongo anga tetai au orometua tokoa ki te akoanga a tetai taeake painia, kua akakite ratou e: “Kare matou i te orometua akaou, teianei e Au Kite matou no Iehova.” E oti kua pati ratou i tetai au puka a te painia mei ta te Rangatira Maata rai.

Mei te au mataiti o te 1930 e tae ua atu ki tona matenga i te mataiti 1982, kua akangateitei ua rai te Rangatira Maata i te Au Kite o Iehova e kare aia i akatika ia ratou kia takionkinoia no tei kore ratou i akono i te au peu a te iti tangata Swaziland. No reira, e tumuanga tau to te Au Kite kia akameitaki iaia, e kua eva tikai ratou i tona mate anga.

I te akamataanga o te mataiti 2013, kua tere atu i te 3,000 tangata e akakitekite ra i te Patireia i Swaziland. I roto i teia enua kua tere atu i te tai mirioni tangata, e 384 ki te papuritia okotai. Tere atu i te 260 painia i roto i te 90 putuputuanga, e e 7,496 tei tae ki te Akamaaraanga i te mataiti 2012. Te taka meitaki ra e, te maata ra te tangata ka aere mai ki roto i te tuatua mou. E mea papu e kua akanooia te tango i te au mataiti mua o te 1930, i te tuatau i aere ei te au painia ki Swaziland.​—Au apinga takere i Aperika Tonga.