KWAGH ne yange er ken uwer u Agusutu inyom i 1936 la, hen Dwer u tor u tar u Swaziland. Anmgbian Robert Nisbet vea anngô na George Nisbet yange ve wa tser u i kura akaaôron a Anmgbian J. F. Rutherford ker yô, shin mato u kuhwan icer zenden a mi ugen, lu duen sha gbungur gbungur. Tor Sobhuza u sha II la ongo yô, doo un tsung. Anmgbian George pase ér: “Kwagh gema er lan se ishima kpishi yô, Tor ne soo ér una yam rediô wase u kuhwan icer la, man icer i se kura la, kua lôôspika u pasen loho u Tartor a mi la cii!”

Nahan anmgbian Robert kaa a na ér a ya ve anyi, akaa la ka a teen ga, ka a orgen. Nahan tor soo u fan or shon.

Robert kaa a na ér, “Ikyav mbira cii ka mbi Tor ugen.” Nahan Sobhuza pine ve Tor shon. Robert gema kaa a na ér, “Ka Yesu Kristu, Tor u Tartor u Aôndo.”

Sobhuza lumun sha icivir kaa ér, “Ahoo, ngura ka zege Tor. M soo u ngohol kwagh môm u a lu u na ga.”

Robert nger wener: ‘Ieren i Tor u Vesen ne yange kpiligh mo iyol sar her. Yange fa u lamen zwa Buter tsembelee, kpa maren iyol shin kenden a iyol sha ga, ôron kwagh jighilii, shi lumun mbagenev u van ikyua a na. Yange m tema a na ken afishi a na nôngo u kuman miniti 45, George di lu kuhwan ityogholough ken won.’

Robert za hemen wener: ‘Shighe kar yô, se mough her sha iyange shon se za hen makeranta u i yilan ér Swizi National School la, se za zua a uvande-eren mba hemban doon cii. Se za pase buter-makeranta la kwagh, a kegh ato a vese zulee. Se kaa a na ser se mba a rediô u kuhwan icer a mi shi se wa ishima ser se wa icer la mbayevmakeranta cii ve ungwa. Kwagh ne doo un tsung, nahan a kaa a mbayevmakeranta nav mba ve nôngo u kuman deri môm la ér ve̱ haa inya ken fiidi ve̱ ungwa icer shon. Yange buter-makeranta kaa a vese ér ve mba tesen mbayevnomso tom sule man tom kapinta man kwaghmaan man zwa Buter man ayenge; mbayevkasev di ve mba tesen ve tom iyouci man ityom i hen ya kua ityomaveegh igen i ia wase ve yô.’ Lu ngô u Tor u Vesen ne u tamen yange bugh makeranta ne ye.

Ken inyom i 1933 la je, upania mbagenev va u pasen kwagh hen Dwer u Tor Sobhuza, nahan doo un tsung u keghen ato a ve. Sha shighe ugen la, a kohol ushoja mbakuran un 100 imôngo ér ve ungwa loho u sha kwagh u Tartor u i kura ken tser yô. Yange lumun ér i tindin un a umagazin shi ngohol ityakerada kpaa. Ica kera gba ga je maa Tor ne lu a ityakerada yase poo! Heela tseegh  ga, shin er gomoti u tar u Ingila u yange ngohol tar u Swaziland lu sha ikyev ve la va wa atabam sha ityakerada yase shighe u i lu nôngon ityav mbi tar cii mbi sha uhar la nahan kpa, a koso i her.

Tor Sobhuza yange za hemen u ngohol Mbashiada hen Dwer Tor na u u lu hen gar u Lobamba la, je yô, a yila mbahemenev mba aduaav ér ve va ungwa akaaôron a ve a ken Bibilo la. Shighe ugen la Orshiada ugen hen ijiir ne, u i yilan un ér Helvie Mashazi yô, lu tan iwanger sha kwagh u i nger ken Mateu 23 la, nahan ishima vihi mbahemenev mba aduaav mbagenev ker, ve mough ér vea kighir un a tema inya. Kpa Tor venda a ve, a kaa ér Anmgbian Mashazi a za hemen a kwaghôron. Heela tseegh ga, Tor kaa a mba ve lu ungwan la cii ér ve nger avur a Bibilo a i lu teren ken kwaghôron la cii.

Shighe ugen la, anmgbian ugen u lu pania yô, lu nan kwaghôron, nahan mbahemenev mba aduaav unyiin mba ve lu ungwan yô, tsua ikwembe ve sha mon kera, maa ve kaa ér: “Se kera mba mbahemenev mba aduaav ga, se hingir Mbashiada mba Yehova hegen.” Maa ve pine pania la ér una lu a ityakerada i Tor kpa lu a mi la yô.

Tor ne za hemen u nan Mbashiada mba Yehova icivir, shi lumun ér i̱ kighir ve u eren aeren a ityô i Swazi eren la ga, hii ken kwavanyom u 1930 la je zan zan shighe u kar kpen ken inyom i 1982 la. Sha nahan yô, Mbashiada lu a ityôkyaa i injaa i wuese un, shi ku na vihi ve tsung.

Ken mhii u inyom i 2013 ne, mbapasenkwagh u Tartor mba ken tar u Swaziland hemba iorov 3,000. Ior mba ken tar la hemba iorov miliôn môm tseegh, nahan aluer i kar iyenge i Mbashiada mba ken tar la sha iyengeior i ken tar la cii yô, a gba u Orshiada 1 nana pasen iorov 384 kwagh. Upania mba hemban 260 mba pasen kwagh kpoghuloo ken atôônanongo 90, shi iorov 7,496 yange ve va M-umbur u ken inyom 2012 la. Kwagh ne tese wang ér ior kpishi vea va fa mimi ken tar la. Sha mimi yô, kwaghpasen u yange i hii u pasen tsuaa, ken kwavanyom u 1930 la bugh ior kpishi gbenda u fan mimi ken tar u Swaziland.—Ngeren u pasen yiase yase i ken tar u South Africa.