NAYRÏR JANAN PʼEQEÑCHÄWIPA: ¿KUNATSA TʼAQHESIÑAJJ SINTI UTJPACHA? ¿KUNAPACHAS TUKUSJJPACHÄNI?
¿Kunatsa jan juchani jaqenakajj jiwarapjje?
Noelle jiskʼa imillitajj dibujtʼañ wal munirïna. Mä jaypʼojj uta qhephäjjaruw mistuwayäna, ukat mayakwa lanktʼasisin umar jalaranttas ajjskatas jiwäna, pä semanakiw 4 maranïñapatakejj faltäna.
Khä 2012 maran diciembre phajjsit 14 urunak saraqatarojja, Connecticut (Estados Unidos) sat markan mä yateqañ utan 20 jiskʼa wawanakaruw jiwarayasïna, 6 ukat 7 maranikisipkänwa, jupanakat mä qawqhanejj Charlotte, Daniel, Olivia, Josephine ukanakawa. Ukan taqpachanejj 26 jiwarapjjäna. Ukat Barack Obama sat marka apnaqerejj wali llaktʼat jaqenakan nayraqatapanwa jiwaratanakan sutinakap aytasajj akham säna: “Aka jan waltʼäwinakajj janiw utjañapäjjeti” sasa.
Irak markanjja, Bano sat sutini 18 maran mä tawaqojj familiapamp chikaw 1996 maran Noruega sat markar sarjjapjjäna. Ukat 2011 maran julio phajjsit 22 uru saraqatarojj 77 wayn tawaqonakar mä jaqejj jiwaraykäna, ukanwa Bano sat tawaqojj jiwarakïna. Ukham lurasin uka jaqejj akham sänwa: “Disculptʼapjjeta [...] jan jukʼamp jaqenakar jiwarayatajata” sasa.
Taqe aka oraqpachanwa ukham sinti llakkañ jan waltʼäwinakat istʼasi. Amuytʼañataki, akatjamat chijir puriñanaka, jan waltʼäwinaka, chʼajjwäwinaka, terroristanakan jan wali luräwinakapa, Oraqen jan waltʼäwinakapa ukat yaqha ukhamanakajj qawqha llakinaksa ukat tʼaqhesiñanaksa utjayi uk ¿amuyasmati? Ukat ¡qawqha jan juchani walja jaqenakas akatjamat jiwarapjje! ¡Ukataq tʼaqhesiñastï! Taqe ukanakajj ina ukhamatak utjistï.
Ukat yaqhep jaqenakajj Diosaruw juchañchapjje “janiw Jupajj jiwasanakat akchʼas llakiskiti” sasaw amuyapjje. Ukat yaqhanakasti “Diosajj tʼaqhesitas uñjasinkiwa, ukampis janiw askichañ munkiti” sasaw sapjjaraki. Ukampis yaqhep jaqenakajj ukham “tʼaqhesiñasatak luratäpachatänwa” sas kunaw sapjjaraki. Uka toqenakat parlkasajj kunayman amuyunakaw utji. ¿Kawkhansa ukanakat sumpach qhanañchistaspa? Kunjamatsa tʼaqhesiñajj qalltasiwayi, ukat kunjamatsa ukanakajj askichasini, uka toqenakat Diosan Arupajj kamsisa, ukwa jutïr yatichäwinakan yatjjataskañäni.
