TORI FU A KAFTI: FU SAN EDE SO FURU SMA E PINA? O TEN A O KABA?
Someni sma lasi den libi fu soso!
Noelle ben de wan pikin meisje di ben lobi sma èn di ben lobi teken. Wan neti, a koiri go na a bakadyari fu en oso pe wan presi ben de fu swen. Sma no sabi fa a du kon, ma a fadon go na ini a watra èn a dede. A sani disi pasa tu wiki fosi a meisje disi ben o tapu fo yari.
Charlotte, Daniel, Olivia, Josephine . . . Disi na wan tu fu den 20 pikin di wan man ben sutu kiri na wan skoro na ini Connecticut, na Amerkankondre, na tapu 14 december 2012. Furu fu den pikin dati ben abi siksi noso seibi yari. Ala nanga ala a man ben kiri 26 sma. Na wan okasi di ben hori fu memre den sma dati, Presidenti Obama kari a nen fu ibriwan fu den pikin èn a taigi den sma di ben de drape e sari: „Wan kaba musu kon na den ogri sani disi.”
Bano di ben abi 18 yari, gowe libi Irak na ini 1996, èn en nanga en famiri froisi go tan na Noorwegen. Den mati fu en ben e kari en Sun Rays, san wani taki ’leti fu a son’. Ma a de wan sari sani taki na tapu 22 yuli 2011, Bano lasi en libi fu di wan ogri-ati man kiri en. A dei dati, a man disi kiri 77 sma. Baka dati a man disi meki bigi: „Mi e begi unu pardon . . . taki mi no ben man kiri moro sma.”
Den sortu sari tori disi de fu yere ibri leisi baka na ala presi fu grontapu. Ongoloku, ogridu, orloku, ogri-ati sani, rampu, nanga tra sari sani e pasa ibri dei. Prakseri omeni sari den sani disi e tyari kon gi sma. Someni sma lasi den libi, so furu ogri e miti sma, èn nofo tron wi no man frustan fu san ede!
Son sma e krutu Gado fu di den feni taki wi Mekiman no e broko en ede nanga libisma. Tra sma feni taki Gado e si fa wi e pina ma a no e firi fu yepi wi. Trawan baka e taki dati Gado ben bosroiti na fesi kaba taki den rampu disi ben o miti sma. Sma e taki ala sortu sani fu a tori disi. Pe wi kan feni den yoisti piki? Na ini den artikel di o kon, wi o luku san Gado Wortu, Bijbel, e taki fu a tori disi. Na so wi o kon sabi fu san ede so furu pina de èn fa wan kaba o kon na a sani dati.
