Ndi akanam n̄kpọ abiak fi tutu eyet ọdọn̄ fi?— * Emi esitịbe ọnọ kpukpru nnyịn. Ke uwụtn̄kpọ, owo ekeme nditịn̄ idiọk ikọ ndian nnyịn. Ndi utọ n̄kpọ oro ikpabiakke owo?— Edieke ẹsude nsu ẹdori Abasi, emi esibiak enye n̄ko. Yak ineme iban̄a emi ise inyụn̄ ikụt nte ikpanamde esịt enem enye utu ke ndinam se ibiakde enye.

Bible ọdọhọ ke ndusụk mbon emi ẹkedọhọde ke imama Abasi ẹma ẹnam se ibiakde enye. Yak ise ntak emi Jehovah esikopde ubiak ke ini nnyịn mînamke se enye ọdọhọde.

Akpa owo iba emi Jehovah okobotde ẹma ẹnen̄ede ẹnam enye okop ubiak. Enye ọkọdọn̄ mmọ mbiba ke Paradise isọn̄, ke ebiet oro ẹkotde “in̄wan̄ Eden.” Mmọ ẹkekere didie?— Adam ye Eve. Yak ise se mmọ ẹkenamde abiak Jehovah.

Ke Jehovah ama ọkọdọn̄ mmọ ke In̄wan̄ Eden, enye ama ọdọhọ mmọ ẹtịm ẹkama in̄wan̄ oro. Enye ama onyụn̄ ọdọhọ mmọ ẹnyene nditọ ẹnyụn̄ ẹdụn̄ ke in̄wan̄ oro ke nsinsi. Edi n̄kpọ ama etịbe mbemiso Adam ye Eve ẹnyene nditọ. Ndi ọmọfiọk se iketịbede?— Angel kiet ama anam Adam ye Eve ẹsọn̄ ibuot ye Jehovah. Yak ise nte enye akanamde emi.

Angel emi ama anam etie nte urụkikọt etịn̄ ikọ. Urụkikọt oro ọkọdọhọ Eve ke enye editie nte Abasi. Eve ama ama se urụkikọt oro eketịn̄de. Ntre, enye ama anam se urụkikọt emi ọkọdọhọde. Ndi ọmọfiọk se Eve akanamde?—

Eve ama adia mfri eto emi Jehovah ọkọdọhọde mmọ ẹkûdia. Abasi ọkọdọhọ Adam mbemiso  obotde Eve ete: “Dia kpukpru mfri eto in̄wan̄ yụhọ. Edi amaedi mfri eto ifiọk eti ye idiọk, kûdia, koro ke usen eke afo adiade afo ayakpa n̄kpa.”

Eve ama ọfiọk emi. Edi enye ama aka iso ese eto oro onyụn̄ “okụt nte eto oro ọfọnde ke udia onyụn̄ ọdọn̄de owo ndise . . . Ntre enye ekịbi mfri esie adia.” Ekem, “enye ada ndusụk mfri oro ọnọ ebe esie ndien enye adia.” Ntak emi Adam ọkọbọde enye adia?— Enye ama ama Eve akan Jehovah. Enye okoyom Eve enem esịt utu ke Jehovah. Edi ọfọn ndikop uyo Jehovah akan ndikop uyo owo ekededi.

Ndi emeti urụkikọt emi eketịn̄de ikọ ye Eve? Enyene owo emi akanamde etie nte urụkikọt etịn̄ ikọ kpa nte mme owo ẹsinamde etie nte unam etịn̄ ikọ ke TV. Anie akanam urụkikọt oro etịn̄ ikọ?— Satan. Ntak edi oro Bible okotde enye “akani urụkikọt.”

Ndi ọmọfiọk se akpanamde man esịt enem Jehovah?— Se akpanamde edi ndikop uyo esie. Satan ọdọhọ ke imekeme ndinam kpukpru owo ẹkop uyo imọ. Ntak edi oro Jehovah ekpede nnyịn ubọk ete: “Eyen mi, nyene ọniọn̄, nyụn̄ dat mi esịt, man n̄kụt se ndibọrọde owo eke osụn̄ide mi.” Satan osụn̄i Jehovah. Enye ọdọhọ ke imekeme ndinam kpukpru owo ẹsọn̄ ibuot ye Jehovah. Ntre, kop uyo Jehovah man esịt enem enye. Imọfiọk ke imemke utom. Edi n̄kọ ayanam oro?—